បើអត់ឃើញអ្នកបង្កើតធ្វើម្ដេចជឿបាន?
«គ្រិស្តសាសនានិងសាសនាឯទៀតបង្រៀនថា មានព្រះនិងជីវិតអមតៈ។ រីឯមនុស្សដែលសង្ស័យថា គ្មានព្រះទេ គេគិតថាគ្មានអ្វីប្រាកដប្រជា ឬមួយក៏ បើមានពិតមែន យើងមិនអាចដឹងប្រាកដនាពេលបច្ចុប្បន្ននេះឡើយ»។ —នេះជាការយល់ឃើញរបស់ទស្សនៈវិទូ (ឈ្មោះ BERTRAND RUSSELL) នៅឆ្នាំ១៩៥៣។
លោកឆាល ដាវីន (Charles Darwin) ជាអ្នកបង្កើតទ្រឹស្តីដែលថា ជីវិតទាំងឡាយសុទ្ធតែវិវត្តន៍មកដោយឯកឯង។ លោកថូម៉ាស ហាក់ស្លី (Thomas Huxley) ដែលកើតនៅឆ្នាំ១៨២៥ ជាអ្នកបណ្ឌិតស្រាវជ្រាវផ្នែកពពួកសត្វដែលរស់នៅសម័យលោកដាវីន ព្រមទាំងជឿតាមទ្រឹស្តីរបស់គាត់ដែរ។ លោកហាក់ស្លីដៅបញ្ជាក់ពីមនុស្សដែលសង្ស័យថា គ្មានព្រះ ហើយនៅឆ្នាំ១៨៦៣បានសរសេរថា គាត់ក៏មិនធ្លាប់ឃើញភ័ស្តុតាងដើម្បីបញ្ជាក់ពីជំនឿរបស់«គ្រិស្តសាសនាដែលថា»មានព្រះមួយអង្គ«ស្រឡាញ់និងយកចិត្តទុកដាក់ចំពោះយើង»ឡើយ។
សព្វថ្ងៃនេះ មនុស្សជាច្រើនឯកភាពនឹងទស្សនៈរបស់អ្នកប្រាជ្ញទាំងនោះ ហើយក៏មានគំនិតថា គេជឿទៅលើអ្វីដែលគេអាចមើលឃើញតែប៉ុណ្ណោះ។ គេថាមានតែមនុស្សត្រចៀកស្រាលទេ ដែលជឿទៅលើអ្វីដែលគ្មានភ័ស្តុតាងដូចនេះ។
បើយើងជឿតាមគម្ពីរបរិសុទ្ធ តើនេះមានន័យថាយើងជឿផ្កាប់មុខទៅលើព្រះមួយអង្គដែលជាអ្នកបង្កើតអ្វីៗទាំងអស់ឬ? មិនមែនទេ! ផ្ទុយទៅវិញ គម្ពីររៀបរាប់ថា មានតែមនុស្សល្ងីល្ងើដែលជឿទៅលើអ្វីដែលគ្មានទីសំអាង។ គម្ពីរចែងថា៖ «មនុស្សឆោតល្ងង់គេជឿគ្រប់ពាក្យទាំងអស់ តែមនុស្សមានគំនិតវាងវៃរមែងមើលផ្លូវខ្លួនដោយប្រយ័ត្ន»។—សុភាសិត ១៤:១៥
ចុះយ៉ាងណាវិញចំពោះជំនឿថា មានព្រះមួយអង្គដែលជាអ្នកបង្កើតរបស់សព្វសារពើ? តើពិតជាមានភ័ស្តុតាងបញ្ជាក់ថា មានព្រះមួយអង្គដែលស្រឡាញ់និងយកចិត្តទុកដាក់ចំពោះយើងមែនឬ?
អ្វីដែលបង្ហាញពីគុណសម្បត្ដិល្អៗរបស់ព្រះ
លោកប៉ុលជាមនុស្សម្នាក់ដែលបានរួមដៃក្នុងការសរសេរគម្ពីរ ហើយពេលកំពុងនិយាយជាមួយបញ្ញវន្តមួយចំនួននៅទីក្រុងអាថែន នាប្រទេសក្រិចពីបុរាណ គាត់បញ្ជាក់ពីជំនឿដែលថា មានព្រះមួយអង្គជា«ព្រះដែលបង្កើតលោកីយនឹងរបស់សព្វសារពើ»មែន! ប៉ុលប្រាប់អ្នកស្ដាប់ដែលមានមន្ទិលសង្ស័យទាំងនោះថា ព្រះអង្គយកចិត្តទុកដាក់និងមនុស្សជាតិមែន ហើយតាមការពិតក៏«មិនគង់ឆ្ងាយពីយើងនិមួយៗ»ដែរ។—កិច្ចការ ១៧:២៤-២៧
ហេតុអ្វីបានជាប៉ុលមានជំនឿស៊ប់ថា មានព្រះមួយអង្គដែលពិតជាយកចិត្តទុកដាក់ចំពោះមនុស្សដែលលោកបានបង្កើតមក? ពេលសរសេរសំបុត្រជូនចំពោះគ្រិស្តសាសនិកគ្នីគ្នានៅទីក្រុងរ៉ូម ប៉ុលបានពន្យល់ពីមូលហេតុមួយដែលគាត់ជឿ។ ប៉ុលសរសេរថា៖ ‹អ្វីៗរបស់ព្រះដែលរកមើលមិនឃើញ តាំងពីកំណើតពិភពលោកមក ទោះទាំងព្រះចេស្ដានឹងនិស្ស័យជាព្រះ នោះឃើញច្បាស់វិញ ដោយពិចារណាយល់របស់ទាំងប៉ុន្មានដែលព្រះបានបង្កើតមក›។—រ៉ូម ១:២០
អត្ថបទបន្តបន្ទាប់នឹងពិភាក្សាអំពីគុណសម្បត្ដិបីយ៉ាងរបស់ព្រះដែលយើងអាចឃើញច្បាស់ដោយពិចារណាយល់ពីអ្វីៗទាំងប៉ុន្មានដែលលោកបានបង្កើតមក។ ពេលពិនិត្យមើលឧទាហរណ៍នីមួយៗ សូមសួរខ្លួនឯងថា ‹តើចំណេះអំពីគុណសម្បត្ដិទាំងបីនោះគួរជំរុញចិត្តខ្ញុំឲ្យធ្វើដូចម្ដេច?›។
[ឃ្លាអក្សរធំនៅទំព័រ៣]
អ្នកដែលជឿទៅលើគម្ពីរថាមានព្រះ មិនជឿផ្កាប់មុខទេ
[អ្នកផ្ដល់សិទ្ធិឲ្យប្រើរូបភាពនៅទំព័រ២]
COVER: Snowflakes: SnowCrystals.com; beetle: Entom Pictures/Paul Eekhoff