តើគម្ពីរបង្រៀនយ៉ាងណា?
តើថ្ងៃវិនិច្ឆ័យសេចក្ដីជាអ្វី?
ហេតុអ្វីថ្ងៃវិនិច្ឆ័យសេចក្ដីគឺជាគ្រាដ៏រីករាយ?
នៅសម័យគម្ពីរ ព្រះបានតែងតាំងចៅហ្វាយឬចៅក្រមដើម្បីជួយរាស្ត្ររបស់លោកឲ្យរួចពីអំពើអយុត្ដិធម៌។ (ពួកចៅហ្វាយ ២:១៨) គម្ពីររៀបរាប់ថាថ្ងៃវិនិច្ឆ័យសេចក្ដីនាអនាគតគឺជាគ្រាដ៏រីករាយ ពេលព្រះយេហូវ៉ាដែលជាចៅក្រមដ៏ខ្ពស់បំផុត នឹងជួយសង្គ្រោះមនុស្សជាតិពីអំពើអយុត្ដិធម៌ទាំងអស់។—សូមអាន ទំនុកតម្កើង ៩៦:១២, ១៣; អេសាយ ២៦:៩
ព្រះបានតែងតាំងលោកយេស៊ូធ្វើជាចៅក្រមនៃមនុស្សរស់និងមនុស្សស្លាប់។ (សកម្មភាព ១០:៤២; ១៧:៣១) មនុស្សជាច្រើនបានស្លាប់មុនពេលពួកគេមានឱកាសស្គាល់ព្រះ។ ក្នុងអំឡុងថ្ងៃវិនិច្ឆ័យសេចក្ដី លោកយេស៊ូនឹងប្រោសមនុស្សដូចនោះឲ្យរស់ឡើងវិញ ដើម្បីពួកគេអាចស្គាល់និងស្រឡាញ់ព្រះពិត។—សូមអាន សកម្មភាព ២៤:១៥
ហេតុអ្វីថ្ងៃវិនិច្ឆ័យសេចក្ដីនឹងមានរយៈពេល១.០០០ឆ្នាំ?
មនុស្សស្លាប់នឹងត្រូវប្រោសឲ្យរស់ឡើងវិញក្នុងអំឡុងគ្រាគ្រប់គ្រង១.០០០ឆ្នាំ។ (ការបើកបង្ហាញ ២០:៤, ១២) ពួកគេនឹងត្រូវការពេលដើម្បីរៀនអំពីតម្រូវការរបស់ព្រះនិងស្ដាប់បង្គាប់លោក។ ផ្ទុយពីយោបល់របស់មនុស្សជាទូទៅនៅសព្វថ្ងៃនេះ គម្ពីរបង្ហាញថាមនុស្សស្លាប់ដែលបានត្រូវប្រោសឲ្យរស់ឡើងវិញ នឹងទទួលការវិនិច្ឆ័យសេចក្ដីចំពោះអ្វីដែលពួកគេធ្វើក្រោយមក។—សូមអាន រ៉ូម ៦:៧
គម្ពីរក៏រៀបរាប់ដែរអំពីថ្ងៃវិនិច្ឆ័យមនុស្សទុច្ចរិតដែលនឹងកើតឡើងភ្លាមមុនគ្រាគ្រប់គ្រង១.០០០ឆ្នាំ។ ដូចដែលបានត្រូវបកស្រាយនៅដើមទស្សនាវដ្ដីនេះ ពេលនោះបានត្រូវហៅថាទីបញ្ចប់។ នៅពេលនោះ ព្រះនឹងបំផ្លាញមនុស្សទុច្ចរិតទាំងអស់។ (ពេត្រុសទី២ ៣:៧) ដូច្នេះ យើងគួរព្យាយាមបង្ហាញសេចក្ដីស្រឡាញ់ចំពោះព្រះ។—សូមអាន ពេត្រុសទី២ ៣:៩, ១៣