ប្រអប់សំណួរ
◼ តើសមរម្យទេក្នុងការជូនលុយដល់បងប្អូន ដែលយកយានជំនិះរបស់ខ្លួនដើម្បីជូនដំណើរយើង?
បងប្អូនខ្លះមានកាលៈទេសៈដែលតម្រូវឲ្យបងប្អូនផ្សេងទៀតជួយ ដើម្បីចូលរួមកិច្ចប្រជុំឲ្យបានទៀងទាត់និងទៅផ្សព្វផ្សាយផង។ បងប្អូនប្រុសស្រីជាច្រើននាក់សុខចិត្តលះបង់ប្រយោជន៍ខ្លួន ហើយពេញចិត្តយកឡានឬម៉ូតូ ចំណាយពេលវេលា និងធនធានផ្សេងៗដើម្បីជូនដំណើរយើង។ ហើយទោះជាគេត្រូវរៀបចំខ្លួនឲ្យបានមុន និងមកផ្ទះវិញយឺតក៏ដោយ ក៏ពួកគាត់នៅតែសុខចិត្តយកយានជំនិះរបស់ខ្លួនដើម្បីជូនដំណើរយើងដោយចិត្តស្មោះស្ម័គ្រ។
គោលការណ៍ដែលមានក្នុងសៀវភៅកាឡាទី ៦:៥ ទាក់ទងនឹងរឿងនេះក៏ដូចរឿងឯទៀតក្នុងកិច្ចបម្រើផ្សាយដែរ។ គោលការណ៍នោះចែងថា៖ «ដ្បិតគ្រប់គ្នាត្រូវទទួលបន្ទុកជារបស់ផងខ្លួន»។ ដូច្នេះ បើបុគ្គលណាម្នាក់យកឡានឬម៉ូតូជូនដំណើរយើងជាទៀងទាត់ យើងគួរបង្ហាញចិត្តដឹងគុណ មិនគ្រាន់តែតាមពាក្យសម្ដីប៉ុណ្ណោះ តែបើអាចធ្វើបាន យើងគប្បីជូនវិភាគទានជាលុយកាក់តិចតួចដើម្បីជួយខាងប្រេងសាំងជាដើម។—ម៉ាថ. ៧:១២; ១កូ. ១០:២៤
ទោះជាបងប្អូនដែលជូនដំណើរយើង មិនសុំឲ្យបង់លុយក៏ពិតមែន ហើយមើលទៅគាត់ហាក់ដូចជាមិនត្រូវការលុយក៏ដោយ តែបើយើងជូនដោយស្មោះ នោះគាត់ពិតជាមានអំណរមែន។ អ្នកជូនដំណើរយើងប្រហែលជាមិនព្រមទទួលអ្វីទេ តែព្រមឬមិនព្រម ទុកឲ្យគាត់ជាអ្នកសម្រេចចិត្តចុះ។ ប៉ុន្តែ គឺសមរម្យមែនឲ្យអ្នកជូនវិភាគទានជាលុយ។ បើពេលនោះអ្នកមិនអាចឲ្យវិភាគទានទេ សូមចងចាំទុក។ អ្នកអាចជូនច្រើនជាងបន្ដិច ពេលគាត់ជូនដំណើរអ្នកនៅលើកក្រោយ។—លូ. ៦:៣៨
គឺពិតជាប្រកបដោយសេចក្ដីស្រឡាញ់មែន ចំពោះអស់អ្នកដែលមានយានជំនិះក្នុងការជូនដំណើរបងប្អូនផ្សេងៗ។ ដ្បិតបើមិនដូច្នេះទេ ពួកគាត់ពុំអាចទៅចូលរួមកិច្ចប្រជុំ ឬទៅផ្សព្វផ្សាយបានឡើយ។ (សុ. ៣:២៧) ប៉ុន្តែ ក៏ប្រកបទៅដោយសេចក្ដីស្រឡាញ់ដែរ ចំពោះអស់អ្នកដែលទទួលប្រយោជន៍ពីសេចក្ដីសប្បុរសបែបនេះ ឲ្យបង្ហាញការដឹងគុណដោយជូនវិភាគទានជាលុយកាក់យោងទៅតាមកាលៈទេសៈរបស់ខ្លួន។—កូល. ៣:១៥