ប្រអប់សំណួរ
◼ តើយើងអាចជួយអ្នកត្រួសត្រាយតាមរបៀបណាខ្លះ?
នៅឆ្នាំកិច្ចបម្រើ២០០៩ បងប្អូនប្រហែល៨០០.០០០នាក់នៅទូទាំងពិភពលោក បានបម្រើជាអ្នកត្រួសត្រាយពេញពេលឬអ្នកត្រួសត្រាយពិសេស។ ពួកគាត់លះបង់ពេលវេលា កម្លាំង និងធនធានដើម្បីផ្សាយដំណឹងល្អអំពីរាជាណាចក្រ។ អ្វីៗទាំងនេះប្រៀបដូចជាផលដំបូងរបស់ពួកគាត់។ (សុភ. ៣:៩) ការព្យាយាមរបស់ពួកគាត់ប្រាកដជាធ្វើឲ្យព្រះយេហូវ៉ាពេញចិត្តណាស់! តើយើងអាចបង្ហាញថាយើងមានចិត្តគំនិតដូចព្រះយេហូវ៉ាចំពោះពួកគាត់យ៉ាងដូចម្ដេច? តើយើងអាចជួយពួកគាត់ឲ្យមានអំណរច្រើនជាងហើយស៊ូទ្រាំក្នុងកិច្ចបម្រើតាមរបៀបណា?
ពាក្យសម្ដីរបស់យើងច្បាស់ជាអាចលើកទឹកចិត្តពួកគាត់ឲ្យបន្តបម្រើជាអ្នកត្រួសត្រាយ។ (សុភ. ២៥:១១) យើងប្រហែលជាអាចផ្លាស់ប្ដូរថ្ងៃឬម៉ោងដែលយើងផ្សព្វផ្សាយដើម្បីអាចទៅផ្សព្វផ្សាយជាមួយនឹងពួកគាត់បាន។ ពេលទៅផ្សព្វផ្សាយជាមួយគ្នា យើងអាចស្នើឲ្យគាត់ជិះជាមួយយើងវិញ ជាជាងយើងសុំជិះជាមួយគាត់។ ម្យ៉ាងទៀត ក្នុងករណីយើងជិះជាមួយគាត់ ប្រហែលជាយើងអាចជូនលុយបន្ដិចបន្តួចដើម្បីជួយចេញថ្លៃសាំងដែរ។ (១កូ. ១៣:៥; ភី. ២:៤) យើងក៏អាចគាំទ្រអ្នកត្រួសត្រាយដោយបង្ហាញភាពរាក់ទាក់ដល់ពួកគាត់ដែរ។ យើងអាចធ្វើដូច្នេះដោយអញ្ជើញពួកគាត់ម្ដងម្កាលឲ្យមកបរិភោគអាហារជាមួយនឹងយើង។—១ពេ. ៤:៨, ៩
ក្នុងបទគម្ពីរ ព្រះយេហូវ៉ាសន្យាថាលោកនឹងទំនុកបម្រុងអស់អ្នកដែលស្វែងរករាជាណាចក្ររបស់លោកជាមុន។ (ទំនុក. ៣៧:២៥; ម៉ាថ. ៦:៣៣) វិធីមួយដែលលោកធ្វើដូច្នេះ គឺតាមរយៈបងប្អូនគ្រិស្តសាសនិករបស់យើងដែលមានសេចក្ដីស្រឡាញ់។ (១យ៉ូន. ៣:១៦-១៨) នេះមិនមានន័យថាអ្នកត្រួសត្រាយសង្ឃឹមឲ្យអ្នកឯទៀតចិញ្ចឹមពួកគាត់នោះទេ ហើយពួកគាត់ក៏ប្រហែលជាមិនរត់ទៅឲ្យអ្នកឯទៀតជួយពេលដែលមានសេចក្ដីត្រូវការដែរ។ ក៏ប៉ុន្តែ បើយើងចេះសង្កេតមើល ហើយយល់អំពីកាលៈទេសៈរបស់ពួកគាត់ យើងអាចជួយ«បំពេញការខ្វះខាត»របស់អ្នកត្រួសត្រាយដ៏ស្មោះត្រង់ទាំងនោះតាមរបៀបផ្សេងៗបាន។—២កូ. ៨:១៤, ១៥
នៅសតវត្សរ៍ទី១ ក្នុងក្រុមជំនុំនៅក្រុងសង់គ្រា មានបងស្រីម្នាក់ដែលខ្នះខ្នែងផ្សាយដំណឹងល្អ។ ពេលដែលនាងធ្វើដំណើរទៅក្រុងរ៉ូម ប៉ូលបានលើកទឹកចិត្តបងប្អូននៅទីនោះឲ្យ«ទទួលស្វាគមន៍នាងក្នុងលោកម្ចាស់ តាមរបៀបដែលសមនឹងពួកអ្នកបរិសុទ្ធ ហើយ . . . ជួយនាងក្នុងរឿងអ្វីក៏ដោយដែលនាងត្រូវការអ្នករាល់គ្នាជួយ»។ (រ៉ូម ១៦:១, ២) យើងមានឱកាសបង្ហាញសេចក្ដីស្រឡាញ់និងការគាំទ្រដល់បងប្អូនក្នុងក្រុមជំនុំរបស់យើងដែលកំពុងប្រកាសដំណឹងល្អឥតឈប់ ដោយបម្រើជាអ្នកត្រួសត្រាយពេញពេលនិងអ្នកត្រួសត្រាយពិសេស។—សកម្ម. ៥:៤២