តើអ្នកជាស្មរបន្ទាល់ពេញពេលទេ?
១ តើអ្នកនឹងឆ្លើយថា បាទ ដល់សំនួរនេះទេ? ទោះជាពួកបំរើរបស់ព្រះយេហូវ៉ាទាំងអស់ មិនអាចចុះឈ្មោះក្នុងកិច្ចបំរើពេញពេលក៏ដោយ តើមិនជាសមហេតុផលទេឬ ក្នុងការរាប់ខ្លួនយើង ជាស្មរបន្ទាល់ពេញពេលនោះ? គឺយ៉ាងប្រាកដហើយ យើងគួរគិតដូច្នេះ។
២ ការធ្វើជាគ្រីស្ទានឥតពេញពេល នោះគឺមិនដែលឮទេ។ ព្រះយេស៊ូបានមានបន្ទូលអំពីព្រះវរបិតាទ្រង់ថា៖ «ខ្ញុំចេះតែធ្វើការ ដែលគាប់ដល់ព្រះហឫទ័យទ្រង់ជាដរាប»។ (យ៉ូហាន ៨:២៩) ប៉ុល ដែលមានអារម្មណ៍ដូចនេះដែរ បានដាស់តឿនយើងឲ្យ«ធ្វើទាំងអស់សំរាប់ចំរើនសិរីល្អដល់ព្រះ»។ (កូរិនថូសទី១ ១០:៣១) ដូច្នេះ យើងគ្រប់គ្នាគួររាប់ខ្លួនយើង ជាស្មរបន្ទាល់ពេញពេលរបស់ព្រះយេហូវ៉ា។ ការមានគំនិតបែបនេះ នឹងមានឥទ្ធិពលលើយើងដ៏ល្អ ក្នុងគ្រប់សកម្មភាពដែលយើងធ្វើ។
៣ សូមពិនិត្យមើលទីសំអាង: អាការក្រៅ ពាក្យសំដី និងចរិយារបស់យើង អាចបង្ហាញប្រាប់អ្នកដទៃ ថាយើងប្រាកដជាស្មរបន្ទាល់ព្រះយេហូវ៉ា។ យើងយកចិត្តទុកដាក់អំពីសេចក្ដីត្រូវការ ចំពោះសំលៀកបំពាក់ ពាក្យសំដីសមរម្យ ហើយចរិយាត្រឹមត្រូវ ក្នុងកាលដែលយើងធ្វើកិច្ចផ្សាយបំរើ ឬទៅឯកិច្ចប្រជុំគ្រីស្ទាន។ ប៉ុន្តែ មិនថាយើងទៅសាលារៀន ធ្វើការក្រៅសាសនា ឬកំពុងលេងកំសាន្ត អ្វីៗទាំងអស់អំពីយើង គួរឲ្យទីសំអាងថា យើងរស់នៅដោយខ្នាតគំរូដ៏សុចរិតរបស់ព្រះយេហូវ៉ា។
៤ ព្រះយេស៊ូបានមានបន្ទូលថា៖ «ទីក្រុងណាដែលនៅលើភ្នំ នោះលាក់មិនកំបាំងទេ . . . ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នា ដែលគង់នៅស្ថានសួគ៌»។ (ម៉ាថាយ ៥:១៤-១៦) នេះគួរជាការណ៍ពិត ក្នុងគ្រប់អ្វីៗដែលយើងធ្វើ ក្នុងគ្រប់ពេលវេលាទាំងអស់។ ប្រសិនបើយើងឃើញ ថាយើងស្ទាក់ស្ទើរក្នុងការផ្សាយ ពីព្រោះនៅកន្លែងណាមួយ ឬអ្វីដែលយើងកំពុងតែធ្វើ នោះយើងត្រូវសួរខ្លួនថា ‹តើខ្ញុំបំរើព្រះយេហូវ៉ាពេញពេលឬក៏ឥតពេញពេល›? សូមកុំឲ្យយើងបោះបង់ចោលឱកាស ក្នុងការនិយាយដល់អ្នកដទៃ អំពីដំណឹងល្អនៃព្រះរាជាណាចក្រ។
៥ សូមចងចាំថា យើងឲ្យកិត្ដិយសនិងផ្គាប់ព្រះហឫទ័យនៃព្រះយេហូវ៉ា ពេលដែលយើងអាចឆ្លើយនឹងសំនួរ «តើអ្នកជាស្មរបន្ទាល់ពេញពេលឬ»? ដែលអាចឆ្លើយដ៏ច្បាស់ថា «បាទ»!