និយាយអំពីព្រះយេហូវ៉ារៀងរាល់ថ្ងៃ
១ មនុស្សសប្បាយរីករាយនឹងនិយាយអំពីអ្វីៗដែលគេស្រឡាញ់ជាទីបំផុត ដ្បិតមាត់គេពោលបញ្ចេញសេចក្ដីបរិបូរ ដែលនៅក្នុងចិត្តជានិច្ច។ (លូកា ៦:៤៥ខ) តើអ្វីដ៏ជាទីស្រឡាញ់ក្នុងដួងចិត្តរបស់យើង? អ្នកតែងបទទំនុកដំកើងបានសរសេរថា៖ «អណ្ដាតទូលបង្គំនឹងថ្លែងប្រាប់ ពីសេចក្ដីសុចរិតរបស់ទ្រង់ ហើយពីសេចក្ដីសរសើរនៃទ្រង់ជាដរាបរាល់ថ្ងៃ»។ (ទំនុកដំកើង ៣៥:២៨) គាត់មានការអបអរដ៏ជ្រៅចំពោះព្រះយេហូវ៉ា ហើយបានចាត់ទុកជាឯកសិទ្ធិដ៏មានតម្លៃ ដើម្បីនិយាយអំពីព្រះហើយសរសើរទ្រង់គ្រប់ពេលវេលា។ ដោយស្គាល់ព្រះយេហូវ៉ាយ៉ាងស្និទ្ធស្នាល អ្នកតែងបទទំនុកដំកើងមានរបស់ជាច្រើនក្នុងការសម្ដែងសេចក្ដីរីករាយ។ (ទំនុកដំកើង ៣៥:៩) តើតាមរបៀបណាដែលយើងអាចធ្វើតាមគំរូដ៏ល្អរបស់គាត់?
២ និយាយអំពីព្រះយេហូវ៉ាក្នុងផ្ទះរបស់អ្នក: នៅក្នុងគ្រួសារយើងគួរនិយាយអំពីព្រះយេហូវ៉ារៀងរាល់ថ្ងៃ។ ឪពុកម្ដាយដែលមានសេចក្ដីស្រឡាញ់ខ្លាំងដល់ព្រះយេហូវ៉ា នោះធម្មតានឹងនិយាយអំពីទ្រង់ក្នុងគ្រប់សកម្មភាពរបស់គេ។ (ចោទិយកថា ៦:៥-៧) កាលដែលគេនិយាយអំពីទ្រង់ ក្មេងនឹងឃើញថាឪពុកម្ដាយរបស់គេអនុវត្តស្របតាមជំនឿហើយស្រឡាញ់ក្រិត្យវិន័យរបស់ព្រះ។ ក្មេងនឹងគិតថាការសិក្សាព្រះគម្ពីរតាមគ្រួសារ គឺជាការសម្ដែងពិតនៃសេចក្ដីគោរពប្រតិបត្ដិដល់ព្រះរបស់ឪពុកម្ដាយគេ។—ពេត្រុសទី២ ៣:១១
៣ និយាយអំពីព្រះយេហូវ៉ាជាមួយបងប្អូនខាងវិញ្ញាណរបស់អ្នក: ក្នុងកំឡុងកម្មវិធីព្រះធិបតេយ្យរាល់សប្ដាហ៍របស់យើង យើងតែងមានឱកាសជាច្រើនដើម្បីបំប៉នអាហារខាងវិញ្ញាណក្នុងចិត្តគំនិតរបស់យើង។ យើងមិនដែលខ្វះការនិយាយអំពីរបស់ល្អៗទេ។ (លូកា ៦:៤៥ក) តើមានចំណុចណាដែលអ្នកបានប្រមូលពីការសិក្សាផ្ទាល់ខ្លួនរបស់អ្នក ឬក៏ពីការអានព្រះគម្ពីររាល់សប្ដាហ៍ ដែលធ្វើឲ្យអ្នកចូលចិត្តទេ? សូមនិយាយប្រាប់ជាមួយបងប្អូនខាងវិញ្ញាណរបស់អ្នក នេះនឹងជួយគេឲ្យចំរើនសេចក្ដីស្រឡាញ់ដល់ព្រះយេហូវ៉ា។—ទំនុកដំកើង ៣៥:១៨; ហេព្រើរ ១០:២៤
៤ និយាយអំពីព្រះយេហូវ៉ាជាមួយអ្នកដទៃ: ក្នុងការទាក់ទងរៀងរាល់ថ្ងៃជាមួយមនុស្ស—នៅកន្លែងធ្វើការ សាលារៀន និងជាមួយសមាជិកក្នុងគ្រួសារដែលមិនជឿ—យើងគួរសម្ដែងឲ្យឃើញថាអ្វីដ៏សំខាន់ក្នុងជីវិតរបស់យើង គឺការធ្វើបន្ទាល់អំពីព្រះយេហូវ៉ា។ ការនិយាយស្តីរបស់យើងគួរសរសើរព្រះ ជាជាងឲ្យប្រឡាក់នឹងអាកប្បកិរិយាមិនល្អនិងការនិយាយគំរោះនៃលោកីយ៍នេះ។ រៀងរាល់ថ្ងៃ ក្នុងគ្រប់កាលៈទេសៈ សូមនិយាយជាមួយអ្នកដទៃអំពីដំណឹងល្អ ដែលទ្រង់បានប្រគល់ឲ្យយើងផ្សាយ។—កិច្ចការ ៥:៤២; កូល៉ុស ៤:៦
៥ ជាអ្នកថ្វាយបង្គំពិតនៃព្រះយេហូវ៉ា សូមឲ្យយើងឆ្លៀតយកគ្រប់ឱកាស ដើម្បីនិយាយអំពីព្រះដ៏មិនអាចផ្ទឹមបានរបស់យើង ព្រះយេហូវ៉ា។—ទំនុកដំកើង ១០៦:៤៧