ចូរសរសើរព្រះយេហូវ៉ារៀងរាល់ថ្ងៃ
១. តើអ្នកបម្រើព្រះបានជំរុញចិត្តឲ្យធ្វើអ្វី? ហេតុអ្វី?
១ ស្តេចដាវីឌបានប្រាប់ពីការតាំងចិត្តរបស់គាត់ដើម្បីសរសើរព្រះយេហូវ៉ា«រាល់ៗថ្ងៃ» ព្រមទាំងសរសើរលោកជារៀងរាបដរាបទៅ។ (ទំនុក. ១៤៥:២, ៧, ២១) យើងក៏មានមូលហេតុល្អឲ្យសរសើរព្រះយេហូវ៉ារៀងរាល់ថ្ងៃដែរ។—ទំនុក. ៣៧:១០; ១៤៥:១៤, ១៨; ២ពេ. ៣:១៣
២. តើក្រុមគ្រួសារអាចសរសើរព្រះយេហូវ៉ារៀងរាល់ថ្ងៃយ៉ាងណា?
២ ពេលនៅផ្ទះ : ដើម្បីពិគ្រោះអំពីព្រះនិងគម្ពីរ យើងមានសៀវភៅផ្សេងៗដែលជួយលើកទឹកចិត្តយើងពេលមើលបទគម្ពីរប្រចាំថ្ងៃ ពេលគោរពប្រណិប័តន៍ជាក្រុមគ្រួសារ និងពេលរៀបចំសម្រាប់ប្រជុំក្រុមជំនុំ។ ក្រុមគ្រួសារជាច្រើនមានទម្លាប់បរិភោគអាហារជាមួយគ្នា យ៉ាងហោចណាស់ម្ដងរៀងរាល់ថ្ងៃ។ ការបរិភោគអាហារជាមួយគ្នា នាំឲ្យមានការពិភាក្សាតាមសម្រួល ហើយបើកឱកាសឲ្យសរសើរព្រះយេហូវ៉ា។ ការពិគ្រោះជាទូទៅដែលឪពុកម្ដាយលើកមកនិយាយជាមួយកូនៗ ជាជំនួយដ៏សំខាន់ក្នុងការអប់រំកូន«ទៅតាមការប្រៀនប្រដៅរបស់ព្រះយេហូវ៉ា ហើយបណ្ដុះឲ្យកូនមានគំនិតដូចលោក»។—អេភ. ៦:៤; ចោ. ៦:៥-៧
៣. ពេលនៅជាមួយបងប្អូនរួមជំនឿ តើយើងមានឱកាសសរសើរព្រះយេហូវ៉ាយ៉ាងណា?
៣ ពេលនៅជាមួយបងប្អូនរួមជំនឿ : ពេលផ្សព្វផ្សាយ ឬពេលនៅក្រុមជំនុំ យើងមានឱកាសល្អដើម្បីសរសើរព្រះយេហូវ៉ាជាមួយនឹងបងប្អូនរួមជំនឿរបស់យើង។ (សុភ. ១៥:៣០; ភី. ៤:៨; ហេ. ១៣:១៥) ដោយសារយើងគ្រប់គ្នាស្រឡាញ់ព្រះយេហូវ៉ា ពេលយើងនិយាយជាមួយគ្នា គឺមិនពិបាកឲ្យយើងនិយាយដ៏ស្មោះអំពីអំណរគុណចំពោះភាពល្អៗរបស់ព្រះយេហូវ៉ាទេ។—ទំនុក. ១០៦:១
៤. តើយើងអាចសរសើរព្រះយេហូវ៉ានៅកន្លែងណាទៀត?
៤ ពេលនិយាយជាមួយអ្នកមិនជឿ : ថ្វីបើយើងឥតមានកាលៈទេសៈដើម្បីផ្សព្វផ្សាយជារៀងរាល់ថ្ងៃក៏ដោយ ការនិយាយតិចតួចអំពីព្រះយេហូវ៉ាហើយគោលបំណងរបស់លោកចំពោះអ្នកធ្វើការជាមួយ សិស្សរួមថ្នាក់ និងមនុស្សឯទៀត អាចធ្វើឲ្យមនុស្សចិត្តស្មោះត្រង់មានសេចក្ដីសង្ឃឹម។ (ទំនុក. ២៧:១៤; ១ពេ. ៣:១៥) ពេលធ្វើដំណើរតាមយន្តហោះបងស្រីម្នាក់បានផ្សាយដំណឹងល្អដល់អ្នករួមដំណើរជាមួយគាត់។ បុគ្គលនោះបានទទួលការសម្រាលទុក្ខនិងការលើកទឹកចិត្តណាស់ពីអ្វីដែលនាងបានឮ។ គាត់ក៏ឲ្យអាសយដ្ឋាននិងលេខទូរស័ព្ទដល់បងស្រីយើង ដើម្បីអាចទាក់ទងគ្នាទៀត។ កាលដែលពិភពលោកមានបញ្ហាកាន់តែច្រើនឡើងៗនិងមានស្ថានភាពកាន់តែអាក្រក់ទៅៗ អ្នកបម្រើព្រះយេហូវ៉ាបន្ត«នាំដំណឹងល្អពីការប្រសើរមក»ឲ្យមនុស្សដែលចង់ស្ដាប់។ ការនេះផ្ដល់ឲ្យអ្នកឯទៀតនូវសេចក្ដីសង្ឃឹម និងបណ្ដាលឲ្យពួកគេសរសើរព្រះយេហូវ៉ាដែរ។—អេ. ៥២:៧; រ៉ូម ១៥:១១
៥. ហេតុអ្វីក៏យើងមានបំណងចិត្តចង់សរសើរព្រះយេហូវ៉ា? ហើយតើនេះនឹងសម្រេចអ្វី?
៥ ព្រះយេហូវ៉ាច្បាស់ជាសប្បាយណាស់ដោយឮពួកអ្នកបម្រើរបស់លោកសរសើរលោករៀងរាល់ថ្ងៃ! ដូចជាអ្វីៗដែលព្រះយេហូវ៉ាបានបង្កើតក៏សរសើរលោក នោះយើងក៏អាចសរសើរព្រះយេហូវ៉ាជារៀងរាល់ថ្ងៃនៅឯផ្ទះ ក្រុមជំនុំ និងពេលនិយាយជាមួយអ្នកដែលមិនទាន់សរសើរព្រះផងដែរ។—ទំនុក. ១៩:១-៤