ការផ្សព្វផ្សាយសម្គាល់យើងដោយឡែក
១ មនុស្សជាច្រើនសួរថា៖ «តើអ្វីដែលធ្វើឲ្យពួកស្មរបន្ទាល់ព្រះយេហូវ៉ាខុសគ្នាពីសាសនាដទៃទៀត?» តើអ្នកនឹងឆ្លើយយ៉ាងណា? អ្នកអាចពន្យល់ចំណុចខ្លះៗនៃជំនឿរបស់អ្នកដែលមានមូលដ្ឋានទៅលើព្រះគម្ពីរ។ ក៏ប៉ុន្តែ តើអ្នកដែលគិតអំពីការបញ្ជាក់ នូវរបៀបដែលកិច្ចបំរើជាសាធារណៈរបស់យើង សម្គាល់យើងដោយឡែកពីសាសនាដទៃឬទេ?—ម៉ាថាយ ២៤:១៤; ២៨:១៩, ២០
២ សព្វថ្ងៃនេះ មានអ្នកកាន់សាសនាតែមួយចំនួនប៉ុណ្ណោះ ដែលមានចិត្តជំរុញឲ្យគេប្រាប់អ្នកដទៃអំពីជំនឿរបស់ខ្លួន។ គេប្រហែលជាគិតថា គឺគ្រប់គ្រាន់ដែលគោរពច្បាប់របស់សេសារ មានរបៀបរស់នៅដ៏សមគួរខាងសីលធម៌ ឬក៏មានការប្រព្រឹត្តដ៏សប្បុរសទៅលើអ្នកដទៃ។ ក៏ប៉ុន្តែ ពួកគេគ្មានអារម្មណ៍ថា ខ្លួនមានកាតព្វកិច្ចជួយអ្នកដទៃរៀនអ្វីដែលព្រះគម្ពីរប្រាប់អំពីការទទួលសេចក្ដីសង្គ្រោះនោះទេ។ តើពួកយើងគឺផ្សេងយ៉ាងណាទៅ?
៣ កិច្ចបំរើដ៏ឧស្សាហ៍របស់យើង គឺផ្ទុយស្រឡះពីសកម្មភាពនៃសាសនាដទៃទៀត។ អស់ជាង១០០ឆ្នាំហើយ ស្មរបន្ទាល់បច្ចុប្បន្នបានផ្សព្វផ្សាយយ៉ាងខ្នះខ្នែងនូវដំណឹងល្អរហូតដល់ចុងផែនដី ដោយធ្វើតម្រាប់តាមពួកគ្រីស្ទានសម័យដើម។ គោលដៅរបស់យើងក្នុងការធ្វើអ៊ីចឹង គឺដើម្បីជួយមនុស្សដ៏ច្រើនបំផុតដែលអាចជួយបាន ដោយធ្វើឲ្យជីវិតរបស់ខ្លួនសមស្របនឹងព្រះហឫទ័យរបស់ព្រះ។—ធីម៉ូថេទី១ ២:៤; ពេត្រុសទី២ ៣:៩
៤ តើកិត្ដិសព្ទរបស់អ្នកគឺជាអ្វី? តើអ្នកបានត្រូវសម្គាល់ជាអ្នកឧស្សាហ៍ក្នុងការផ្សព្វផ្សាយព្រះបន្ទូលរបស់ព្រះឬទេ? (កិច្ចការ ១៧:២, ៣; ១៨:២៥) ដោយព្រោះសកម្មភាពផ្សព្វផ្សាយរបស់អ្នក តើអ្នកជិតខាងរបស់អ្នកឃើញយ៉ាងស្រួល នូវភាពខុសគ្នារវាងសាសនារបស់គេនិងសាសនារបស់អ្នកឬទេ? តើអ្នកបានត្រូវសម្គាល់ជាអ្នកដែលមានចំណង់ខ្លាំង ចង់ប្រាប់អ្នកដទៃអំពីសេចក្ដីសង្ឃឹមរបស់ខ្លួនឬទេ? តើអ្នកមានទម្លាប់ចូលរួមកិច្ចផ្សព្វផ្សាយយ៉ាងទៀងទាត់នោះទេ? សូមចាំថា យើងធ្វើឲ្យខ្លួនត្រូវសម្គាល់ដោយឡែក មិនគ្រាន់តែដោយឈ្មោះរបស់យើង ក៏ប៉ុន្តែដោយប្រព្រឹត្តអ្វីដែលឈ្មោះនោះពណ៌នា គឺថាធ្វើបន្ទាល់អំពីព្រះយេហូវ៉ា។—អេសាយ ៤៣:១០
៥ សេចក្ដីស្រឡាញ់ចំពោះព្រះនិងអ្នកជិតខាង ក៏ជំរុញឲ្យយើងចូលរួមក្នុងកិច្ចផ្សព្វផ្សាយ។ (ម៉ាថាយ ២២:៣៧-៣៩) នេះហើយជាមូលហេតុដែលយើង ដូចជាព្រះយេស៊ូនិងពួកសាវ័កដែរ ចង់ឆ្លៀតប្រយោជន៍ពីគ្រប់ទាំងឱកាស ដើម្បីប្រាប់សារព្រះរាជាណាចក្រទៅអ្នកដទៃ។ ចូរឲ្យយើងបន្តផ្សព្វផ្សាយដំណឹងល្អយ៉ាងខ្នះខ្នែង ចំពោះអស់អ្នកដែលសុខចិត្តស្ដាប់។ ដោយធ្វើអ៊ីចឹង នោះនឹងជួយមនុស្សដែលមានចិត្តស្មោះត្រង់ «ឃើញសាជាថ្មីថា . . . អ្នកគោរពបំរើព្រះជាម្ចាស់ និងអ្នកមិនគោរពបំរើខុសគ្នាយ៉ាងណា»។—ម៉ាឡាគី ៣:១៨, ព្រះគម្ពីរភាសាខ្មែរសម្រាយ