តើអ្នកណាដែលប្រហែលនឹងព្រមទទួលសិក្សាព្រះគម្ពីរ?
១ ព្យាការីអេម៉ុសបានប្រកាសថា នឹងមានអំណត់នៅស្រុកអ៊ីស្រាអែលដែល«មិនមែនជាអំណត់ដែលអត់អាហារ ឬដែលស្រេកទឹកទេ គឺជាអំណត់ខាងឯការឮព្រះបន្ទូលនៃព្រះយេហូវ៉ាវិញ»។ (អេម៉ុស ៨:១១) ដើម្បីប្រយោជន៍ចំពោះអស់អ្នកណាដែលកំពុងតែឃ្លាននិងស្រេកខាងវិញ្ញាណ នោះអង្គការរបស់ព្រះយេហូវ៉ាកំពុងតែចែកចាយប្រកាសនវត្ថុព្រះគម្ពីរមួយចំនួនធំទូទាំងផែនដី។
២ មកដល់ពេលឥឡូវនេះ យើងបានបោះពុម្ពសៀវភៅចំណេះ អស់៧០លានក្បាល និងសៀវភៅស្តើងតម្រូវ អស់៩១លានក្បាល។ ក្នុងការបង្រៀនសេចក្ដីពិត យើងអបអរនឹងភាពស្រួលយល់និងប្រសិទ្ធិភាពនៃប្រកាសនវត្ថុទាំងនេះ។ ក៏ប៉ុន្តែ មនុស្សជាច្រើនអនេកដែលបានទទួលប្រកាសនវត្ថុរបស់យើង នោះមិនទាន់សិក្សាព្រះគម្ពីរជាមួយយើងទេ។ តើយើងអាចធ្វើយ៉ាងណាចំពោះរឿងនេះ?
៣ គ្រប់ទាំងការផ្ដល់ឲ្យអាចទៅជាការសិក្សាមួយ! សូមពិចារណាមើលបទពិសោធន៍នៃអ្នកផ្សាយម្នាក់ ដែលបានអញ្ជើញឲ្យស្ត្រីម្នាក់សិក្សា នៅលើកទីមួយដែលគាត់បាននិយាយជាមួយនាងនៅផ្ទះរបស់នាង។ នាងបានយល់ព្រមភ្លាម។ ក្រោយមក នាងបានប្រាប់គាត់ថា៖ «លោកជាអ្នកទីមួយដែលបានអញ្ជើញខ្ញុំសិក្សាព្រះគម្ពីរ»។ ក្នុងតំបន់ផ្សាយរបស់អ្នក តើមនុស្សប៉ុន្មាននាក់ដែលមានប្រកាសនវត្ថុយើងហើយ គេប្រហែលជានឹងឆ្លើយអ៊ីចឹងដែរ? គ្រប់ទាំងការផ្ដល់ឲ្យនោះ គឺផ្ដល់ឲ្យឱកាស ដើម្បីធ្វើការត្រឡប់ទៅជួបគេវិញនិងសិក្សាព្រះគម្ពីរតាមផ្ទះ។
៤ ដោយព្រោះ ជាញឹកញយយើងជួបមនុស្សដែលមានប្រកាសនវត្ថុរបស់យើងហើយនោះ តើយ៉ាងដូចម្ដេចដែលយើងអាចធ្វើឲ្យគេចាប់អារម្មណ៍លើការរៀនអ្វីដែលមានក្នុងប្រកាសនវត្ថុរបស់យើង? ស្មរបន្ទាល់ម្នាក់បានសួរម្ចាស់ផ្ទះមួយយ៉ាងចំៗ ថាតើនាងមានសំនួរអំពីព្រះគម្ពីរទេ? ប៉ុន្តែនាងបានឆ្លើយថា «អត់ទេ»។ បងស្រីនោះបានបន្តព្យាយាមទាំងប្រាប់ថា៖ «ប្រាកដជាអ្នកមានមែន»។ ស្ត្រីនោះមានសំនួរមែន ហើយការសិក្សាមួយបានចាប់ផ្ដើម។ សូមសួរម្ចាស់ផ្ទះ ថាតើគាត់ចង់រៀនទស្សនៈព្រះគម្ពីរ អំពីសំនួរមួយឬក៏រឿងមួយដែលធ្វើឲ្យគាត់ខ្វល់ខ្វាយឬទេ? ចូររៀបចំសួរនូវសំនួរមួយដែលចាប់អារម្មណ៍ បើសិនជាម្ចាស់ផ្ទះមិនអាចគិតអំពីសំនួរមួយទេ។ ការពិគ្រោះបែបនេះប្រហែលជានឹងបង្កើតផ្លូវមួយឲ្យមានការសិក្សាយ៉ាងទៀងទាត់នូវសេចក្ដីពិតបឋមពីព្រះគម្ពីរ។
៥ កិច្ចការសិក្សាព្រះគម្ពីរ គឺជាផ្នែកសំខាន់បំផុតនៃកិច្ចបំរើរបស់យើង។ ដោយព្រោះយើងមិនដឹងថា អ្នកណាប្រហែលជានឹងយល់ព្រមសិក្សា នោះកុំស្ទាក់ស្ទើរអញ្ជើញអស់អ្នកណាដែលអ្នកជួបឲ្យសិក្សាជាមួយ។ សូមទូលព្រះយេហូវ៉ាតាមរយៈការអធិស្ឋានអំពីរឿងនេះ ហើយធ្វើការសមស្របតាមការអធិស្ឋានរបស់អ្នក។ ប្រហែលជាបន្ដិចទៀតអ្នកនឹងឃើញថា មនុស្សម្នាក់ដែលត្រូវអ្នកអញ្ជើញសិក្សាជាមួយនោះ ច្បាស់នឹងយល់ព្រម!—យ៉ូហានទី១ ៥:១៤, ១៥