ចូរប្រើប្រាស់ឧបករណ៍ផ្សាយរបស់យើងដែលមានមូលដ្ឋានលើព្រះគម្ពីរដោយប្រាជ្ញា
១ បុរសម្នាក់បានសរសេរសំបុត្រមួយទៅមន្ទីរចាត់ការនៃស្មរបន្ទាល់ព្រះយេហូវ៉ាដូចតទៅ៖ «ខ្ញុំបានអានប្រកាសនវត្ថុរបស់អង្គការអ្នកតាំងពីឆ្នាំ១៩៦៥។ នៅពេលដែលខ្ញុំអានសៀវភៅរបស់អង្គការអ្នក ខ្ញុំអានព្រះគម្ពីរដែរ ហើយព័ត៌មានទាំងអស់ក្នុងសៀវភៅរបស់អ្នកស្របតាមព្រះគម្ពីរ។ ខ្ញុំតែងតែចង់យល់ដឹងនូវសេចក្ដីពិតអំពីព្រះនិងព្រះយេស៊ូ ហើយខ្ញុំអាចនិយាយដោយចិត្តស្មោះថា ខ្ញុំកំពុងតែរកឃើញសេចក្ដីពិតតាមរយៈសៀវភៅរបស់អង្គការអ្នកនិងព្រះគម្ពីរ»។ ក្នុងសំបុត្រនោះដែរ គាត់បានសូមសិក្សាព្រះគម្ពីរ។
២ ដូចបុរសកតញ្ញូនោះ មនុស្សរាប់លាននាក់មានចិត្តអបអរចំពោះសៀវភៅដែលជួយយើងយល់ព្រះគម្ពីរដែល‹អ្នកបំរើស្មោះត្រង់ដែលមានវិនិច្ឆ័យល្អ›ផ្ដល់ឲ្យ។ (ម៉ាថ. ២៤:៤៥) ជារៀងរាល់ឆ្នាំ ឧបករណ៍ផ្សាយជាច្រើនបានត្រូវរៀបចំឡើងដើម្បីជួយមនុស្សដែលមានចិត្តស្មោះត្រង់«ឲ្យបានស្គាល់សេចក្ដីពិត»។ (១ធី. ២:៤) តើយើងអាចប្រើប្រាស់ឧបករណ៍ផ្សាយរបស់យើងដែលមានមូលដ្ឋានលើព្រះគម្ពីរដោយប្រាជ្ញាយ៉ាងដូចម្ដេច?
៣ ចៀសវាងការបង្ខាត: ក្រោយពេលមួយរយៈ យើងក៏អាចប្រមូលទុកឧបករណ៍ផ្សាយលើសជាងចំនួនដែលយើងនឹងចែក។ តើយើងអាចធ្វើអ្វីដើម្បីចៀសវាងពីការបង្ខាតប្រកាសនវត្ថុដែលមានដំឡៃ? យើងត្រូវដឹងខ្នាតនៅពេលដែលយើងយកឧបករណ៍ផ្សាយ។ ជាជាងយកឧបករណ៍ផ្សាយដែលយើងកំពុងតែផ្ដល់នោះច្រើនក្បាល គឺល្អបើយើងយកតែមួយឬពីរក្បាលប៉ុណ្ណោះ និងក្រោយពីយើងបានចែកសៀវភៅនោះហើយ យើងអាចយកថែមទៀត។ ដោយធ្វើដូច្នេះ យើងនឹងចៀសវាងពីការប្រមូលទុកឧបករណ៍ផ្សាយច្រើនពេកនៅឯផ្ទះយើង។ ដូចគ្នាដែរ បើយើងនៅមានទស្សនាវដ្ដីច្រើនដែលយើងមិនទាន់ចែកនោះ គឺសមហេតុផលឲ្យយើងបញ្ចុះចំនួនទស្សនាវដ្ដីដែលបានកុម្មង់។
៤ នៅពេលក្រុមជំនុំមានប្រកាសនវត្ថុច្រើនពេក: ប្រសិនបើក្រុមជំនុំមានប្រកាសនវត្ថុខ្លះច្រើនពេក អ្នកទទួលខុសត្រូវផ្នែកប្រកាសនវត្ថុក៏អាចសួរក្រុមជំនុំនៅក្នុងតំបន់ ក្រែងលោក្រុមជំនុំផ្សេងត្រូវការប្រកាសនវត្ថុនោះ។ អ្នកផ្សាយអាចជូនប្រកាសនវត្ថុដែលបានបោះពុម្ពយូរហើយ ដល់សមាជិកគ្រួសារដែលមិនមានជំនឿសាសនាដូចគ្នា សិស្សព្រះគម្ពីរនិងមនុស្សឯទៀត។ អស់អ្នកដែលចូលរួមក្រុមជំនុំនៅពេលថ្មីៗនេះ ប្រហែលមានចិត្តចង់បានប្រកាសនវត្ថុដែលបានបោះពុម្ពយូរហើយ ទុកក្នុងបណ្ណាល័យផ្ទាល់ខ្លួន។
៥ ឧបករណ៍ផ្សាយរបស់យើងបានរៀបចំឡើងដើម្បីឲ្យយើងអាចជួយមនុស្សដែលមានចិត្តស្មោះរៀនបន្ថែមអំពីបំណងព្រះហឫទ័យដ៏អស្ចារ្យនៃព្រះយេហូវ៉ា។ ដូចជាព្រះយេស៊ូមិនបានបង្ខាតម្ហូបដែលនៅសល់ក្រោយពីទ្រង់បានប្រទានអាហារដល់ហ្វូងមនុស្ស យើងគួរមានគោលដៅប្រើប្រាស់ប្រកាសនវត្ថុដ៏មានដំឡៃដែលមានមូលដ្ឋានលើព្រះគម្ពីរដោយប្រាជ្ញា។ (យ៉ូន. ៦:១១-១៣) សារក្នុងប្រកាសនវត្ថុយើងដែលអាចសង្គ្រោះជីវិតបាន មិនអាចមានអានុភាពលើមនុស្សដែលស្រឡាញ់សេចក្ដីសុចរិត បើយើងទុកប្រកាសនវត្ថុនោះនៅផ្ទះយើងឬក្នុងកាតាប។ ហេតុនេះហើយបានជា យើងត្រូវដឹងខ្នាតនៅពេលដែលយើងយកឧបករណ៍ផ្សាយ ហើយប្រើប្រាស់ដោយប្រាជ្ញា ជាប្រយោជន៍ដល់អ្នកដទៃ។—កា. ៥:២៣
[សំណួរសម្រាប់អត្ថបទសិក្សា]
១, ២. តើមនុស្សជាច្រើនមានទស្សនៈយ៉ាងណាចំពោះប្រកាសនវត្ថុរបស់យើង? តើមានសំណួរណាដែលយើងត្រូវសួរ?
៣. តើយើងអាចធ្វើអ្វីដើម្បីចៀសវាងបង្ខាតឧបករណ៍ផ្សាយ?
៤. តើក្រុមជំនុំអាចធ្វើអ្វីបើមានប្រកាសនវត្ថុច្រើនពេក?
៥. តើយើងអាចបង្ហាញថាយើងមានចិត្តអបអរចំពោះឧបករណ៍ផ្សាយយ៉ាងដូចម្ដេច?