យើងមានអំណរពីការមានសាមគ្គីភាពជាមួយព្រះយេហូវ៉ានិងរាជបុត្រារបស់ទ្រង់
ពិធីបុណ្យសំខាន់បំផុតនាឆ្នាំនេះត្រូវធ្វើឡើងនៅថ្ងៃទី២៨ ខែមីនា
១ បើយើងចូលរួមពិធីបុណ្យអាហារពេលល្ងាចរបស់ព្រះអម្ចាស់ ក្រោយថ្ងៃលិចនាថ្ងៃទី២៨ ខែមីនា ឆ្នាំ២០០១ នោះយើងបង្ហាញនូវអំណរដែលមកពីសាមគ្គីភាពជាមួយព្រះយេហូវ៉ានិងព្រះយេស៊ូគ្រីស្ទ។ នៅពិធីដ៏ពិសេសនេះ ពួកអ្នកសំណល់នៃជនគ្រីស្ទានចាក់ប្រេងតាំងនឹងរួមចំណែកក្នុង«សេចក្ដីប្រកប»នឹងគ្នាដ៏ពិសេស ជាមួយពួកអ្នកដែលនឹងទទួលមរដកក្នុងព្រះរាជាណាចក្រជាមួយព្រះវរបិតានិងព្រះរាជបុត្រារបស់ទ្រង់ដែរ។ (១យ៉ូន. ១:៣; អេភ. ១:១១, ១២) ពួក«ចៀមឯទៀត»រាប់សិបលាននាក់នឹងរំពឹងគិតអំពីឯកសិទ្ធិដ៏អស្ចារ្យដែលគេមាន ក្នុងការសាមគ្គីគ្នាជាមួយព្រះយេហូវ៉ានិងរាជបុត្រាទ្រង់ ទាំងមានចិត្តគំនិតតែមួយជាមួយទ្រង់ក្នុងការសម្រេចកិច្ចការរបស់ព្រះ!—យ៉ូន. ១០:១៦
២ កំពុងតែធ្វើការជាមួយគ្នាដោយមានទំនាក់ទំនងយ៉ាងជិតស្និទ្ធ: ព្រះយេហូវ៉ានិងព្រះយេស៊ូមានអំណរជានិច្ចពីការមានសាមគ្គីភាពជាមួយនឹងគ្នា។ ព្រះអង្គទាំងពីរធ្លាប់មានភាពស្និទ្ធស្នាលនឹងគ្នាយ៉ាងយូរអនេកអនន្តមុននឹងកំណើតមនុស្សលោកទៅទៀត។ (មីកា ៥:១) ជាលទ្ធផលនោះ ចំណងនៃសេចក្ដីស្រឡាញ់ដ៏ជ្រាលជ្រៅបានបណ្ដុះឡើងរវាងទ្រង់ទាំងពីរអង្គ។ មុននឹងរាជបុត្រាច្បងនេះចាប់កំណើតជាមនុស្ស ទ្រង់ជាតួអង្គនៃប្រាជ្ញាហើយក៏មានបន្ទូលថា៖ «អញជាទីគាប់ព្រះហឫទ័យ[ព្រះយេហូវ៉ា]រាល់ៗថ្ងៃ ព្រមទាំងមានសេចក្ដីរីករាយនៅចំពោះទ្រង់ជានិច្ច»។ (សុ. ៨:៣០) ការចំណាយពេលច្រើនឥតគណនាដើម្បីទាក់ទងយ៉ាងជិតស្និទ្ធជាមួយព្រះអង្គដែលជាប្រភពនៃសេចក្ដីស្រឡាញ់ នោះមានអានុភាពច្រើនណាស់ហ្ន៎! លើរាជបុត្រានៃព្រះ។—១យ៉ូន. ៤:៨
៣ ដោយនឹកគិតពីការប្រោសលោះដែលមនុស្សត្រូវការនោះ ព្រះយេហូវ៉ាបានជ្រើសរើសរាជបុត្រាតែមួយគត់ដែលទ្រង់បង្កើតផ្ទាល់អង្គ ឲ្យធ្វើជាយញ្ញបូជាលោះ។ ព្រះរាជបុត្រាទ្រង់ស្រឡាញ់មនុស្សលោកណាស់ ហើយយញ្ញបូជារបស់ទ្រង់ជាមូលដ្ឋានតែមួយគត់ឲ្យយើងមានសេចក្ដីសង្ឃឹម។ (សុ. ៨:៣១) ដូចជាព្រះយេហូវ៉ានិងព្រះរាជបុត្រាទ្រង់មានសាមគ្គីភាពក្នុងការសម្រេចគោលបំណងតែមួយ នោះពួកយើងក៏រួមសាមគ្គីគ្នាជាមួយទ្រង់ទាំងពីរអង្គ ហើយជាមួយគ្នានិងគ្នាផងដែរ ទាំងមានចំណងនៃសេចក្ដីស្រឡាញ់ដ៏រឹងមាំ និងធ្វើតាមព្រះហឫទ័យរបស់ព្រះដោយអំណរ។
៤ ការបង្ហាញកតញ្ញូធម៌អស់ពីក្រអៅបេះដូង: បើយើងចូលរួមពិធីបុណ្យរំឭកនិងប្រុងស្ដាប់ដោយចិត្តគោរព នោះយើងអាចបង្ហាញនូវកតញ្ញូធម៌ពិតប្រាកដចំពោះសេចក្ដីស្រឡាញ់របស់ព្រះយេហូវ៉ា ព្រមទាំងចំពោះយញ្ញបូជាដែលបុត្រាទ្រង់បានធ្វើប្រយោជន៍ឲ្យយើង។ កម្មវិធីនេះនឹងលើកបញ្ជាក់អំពីគំរូរបស់ព្រះយេស៊ូដែលប្រកបទៅដោយសេចក្ដីស្រឡាញ់ និងភាពស្មោះត្រង់របស់ទ្រង់រហូតដល់សោយទិវង្គតដើម្បីផ្ដល់ឲ្យតម្លៃលោះ។ កម្មវិធីនេះនឹងសឲ្យឃើញអំពីការគ្រប់គ្រងរបស់ទ្រង់ជាស្តេចនៃព្រះរាជាណាចក្រដែលព្រះបានស្ថាបនាហើយ ព្រមទាំងប្រសិទ្ធិពរដែលព្រះរាជាណាចក្រនោះនឹងផ្ដល់ឲ្យមនុស្សជាតិ។ យើងនឹងទទួលសេចក្ដីរំឭកថែមទៀតដែរ ថាយើងត្រូវបង្ហាញចិត្តស្មោះត្រង់ជានិច្ច ទាំងខ្នះខ្នែងធ្វើការស្របទៅតាមព្រះហឫទ័យរបស់ព្រះយេហូវ៉ា ជា‹អ្នកធ្វើការជាមួយគ្នាក្នុងសេចក្ដីពិត›។—៣យ៉ូន. ៨; យ៉ា. ២:១៧
៥ ការជួយអ្នកដទៃឲ្យចូលរួមជាមួយយើងដែរ: ក្រុមអ្នកចាស់ទុំត្រូវខិតខំជាពិសេស ដើម្បីលើកទឹកចិត្តស្មរបន្ទាល់ឥតសកម្មទាំងឡាយក្នុងតំបន់ផ្សាយរបស់យើង ឲ្យចូលរួមពិធីបុណ្យរំឭកការសោយទិវង្គតនៃព្រះគ្រីស្ទ។ (ម៉ាថ. ១៨:១២, ១៣) សូមកត់បញ្ជីឈ្មោះនៃអស់អ្នកដែលគួរទទួលសេចក្ដីអញ្ជើញដោយផ្ទាល់ដែលខានពុំបាន។
៦ តើអ្នកស្គាល់មនុស្សណាទៀតដែលប្រហែលជានឹងមកចូលរួមពិធីបុណ្យរំឭកនេះឬ? សូមចាត់វិធានការភ្លាមៗក្នុងការជួយបង្កើនឲ្យគេមានចិត្តចេះដឹងគុណចំពោះពិធីបុណ្យនេះ។ សូមអញ្ជើញពួកគេមកដោយស្វាគមន៍យ៉ាងកក់ក្ដៅ។ សូមឲ្យយើងព្យាយាមអញ្ជើញសិស្សទាំងឡាយដែលរៀនព្រះគម្ពីរជាមួយយើង ព្រមទាំងអ្នកចាប់អារម្មណ៍ឯទៀត ហើយបងប្អូនញាតិមិត្ត និងសហការីផ្សេងៗទៀតផង ឲ្យមកចូលរួមពិធីបុណ្យសំខាន់បំផុតនាឆ្នាំនេះ។ អស់អ្នកណាដែលយល់ព្រមថា ‹ការស្គាល់ព្រះគ្រីស្ទយេស៊ូវ ជាសេចក្ដីដែលប្រសើរជាង› នោះអាចទទួលបាននូវប្រយោជន៍ដែលមកពីតម្លៃលោះនោះ។ (ភី. ៣:៨) មនុស្សណាដែលអនុវត្តជំនឿទៅលើយញ្ញបូជារបស់ព្រះគ្រីស្ទ អាចមានសេចក្ដីសង្ឃឹមមុតមាំឲ្យបានជីវិតជារៀងរហូត។—យ៉ូន. ៣:១៦
៧ កុំមើលងាយនូវឥទ្ធិពលដែលពិធីបុណ្យរំឭកអាចមានលើមនុស្សដែលមានចិត្តស្មោះស។ ពីរឆ្នាំមុននេះនៅប្រទេសប៉ាពួរណូវែលហ្គីណេជាកោះមួយនោះ មនុស្ស១១នាក់ដែលមានចំណាប់អារម្មណ៍បានជិះទូកតូចមួយអស់១៧ម៉ោងកាត់រលកសមុទ្រដែលបោកបក់ដើម្បីទៅចូលរួមប្រជុំ។ ហេតុអ្វី? គេស្រដីថា៖ «យើងចង់រួមចំណែកជាមួយបងប្អូនគ្នីគ្នាដែលថ្វាយបង្គំព្រះយេហូវ៉ា ដើម្បីធ្វើពិធីបុណ្យរំឭកនេះ។ ហេតុនេះហើយបានជាយើងសុខចិត្តធ្វើដំណើរដូច្នេះ»។ អ្នកចាប់អារម្មណ៍ទាំងនោះច្បាស់ជាមានចិត្តខ្នះខ្នែងមែន! ក៏អបអរនឹងអំណរដែលមកពីសាមគ្គីភាពជាមួយព្រះយេហូវ៉ា និងរាជបុត្រារបស់ទ្រង់ ព្រមទាំងជាមួយភាតរភាពគ្រីស្ទានរបស់យើងផងដែរ។
៨ សូមអញ្ជើញអ្នកចាប់អារម្មណ៍ទាំងឡាយឲ្យរៀនព្រះគម្ពីរ។ លើកទឹកចិត្តពួកគេឲ្យចូលរួមកម្មវិធីប្រជុំជាទៀងទាត់ ព្រមទាំងប្រាប់ដល់អ្នកដទៃនូវសេចក្ដីពិតទាំងប៉ុន្មានដែលគេកំពុងតែរៀន។ ចូរជួយគេឲ្យ«ដើរក្នុងពន្លឺ» និង«ប្រព្រឹត្តតាមសេចក្ដីពិត»ទាំងនេះ ដោយអនុវត្តតាមគោលការណ៍ព្រះគម្ពីរក្នុងជីវិតគេ។ (១យ៉ូន. ១:៦, ៧) ចូរជួយគេបណ្ដុះឲ្យមានទំនាក់ទំនងជិតស្និទ្ធជាមួយនឹងព្រះយេហូវ៉ា ហើយបណ្ដុះបណ្ដាលឲ្យមានចិត្តដឹងគុណចំពោះឯកសិទ្ធិនេះដែលយើងមានក្នុងការធ្វើតាមព្រះហឫទ័យរបស់ទ្រង់ដោយសាមគ្គីភាព។
៩ យើងពិតជាមានឯកសិទ្ធិដ៏អស្ចារ្យណាស់ហ្ន៎! ដោយមានអំណរមកពីសាមគ្គីភាពដោយព្រោះ«មានចិត្តមានគំនិតតែ១ ដើម្បីនឹងតតាំងជាមួយគ្នា ដោយនូវសេចក្ដីជំនឿ ខាងឯដំណឹងល្អ»។ (ភី. ១:២៧, ២៨) ចូរឲ្យយើងរង់ចាំដោយរំភើបនូវការរាប់រកគ្នាដ៏សប្បាយដែលយើងនឹងមានជាមួយគ្នានៅឯពិធីបុណ្យរំឭកប្រចាំថ្ងៃទី២៨ ខែមីនា ទាំងដឹងគុណចំពោះព្រះយេហូវ៉ានិងព្រះរាជបុត្រាទ្រង់ជានិច្ច!—លូ. ២២:១៩