តើអ្នកនឹងត្រួសត្រាយជំនួយទេ?
១. ហេតុអ្វីខែមីនា មេសា និងឧសភាជាខែដ៏ល្អដើម្បីបង្កើនកិច្ចបម្រើផ្សាយរបស់យើង?
១ ខែមីនា មេសា និងឧសភាជាខែដ៏ល្អដើម្បីបង្កើនកិច្ចបម្រើផ្សាយរបស់យើង។ នេះជាពេលដែលយើងរំពឹងគិតយ៉ាងជ្រាលជ្រៅអំពីសេចក្ដីស្រឡាញ់ដ៏ធំធេងរបស់ព្រះយេហូវ៉ាក្នុងការផ្ដល់ជីវិតបុត្ររបស់លោកជាថ្លៃលោះ។ (យ៉ូន. ៣:១៦) នេះធ្វើឲ្យយើងមានចិត្តដឹងគុណយ៉ាងខ្លាំងចំពោះអ្វីដែលព្រះយេហូវ៉ាបានធ្វើសម្រាប់យើង ហើយជំរុញចិត្តយើងកាន់តែខ្លាំងឲ្យប្រាប់អ្នកឯទៀតអំពីព្រះយេហូវ៉ានិងអ្វីដែលលោកកំពុងធ្វើសម្រាប់មនុស្សជាតិ។ (អេ. ១២:៤, ៥; លូក. ៦:៤៥) នេះក៏ជាឱកាសមួយដែរ ដែលយើងចូលរួមយ៉ាងរីករាយក្នុងសកម្មភាពពិសេសដើម្បីអញ្ជើញអ្នកដែលយើងស្គាល់និងមនុស្សនៅតំបន់ផ្សាយឲ្យចូលរួមពិធីរំលឹកជាមួយយើង។ បន្ទាប់មក យើងព្យាយាមបណ្ដុះចំណាប់អារម្មណ៍អស់អ្នកដែលបានចូលរួម។ តើអ្នកនឹងបង្កើនសកម្មភាពក្នុងកិច្ចបម្រើផ្សាយដោយត្រួសត្រាយជំនួយក្នុងអំឡុងខែមីនា មេសា និងឧសភាទេ?
២. ហេតុអ្វីខែមីនាជាខែដ៏ពិសេសដើម្បីត្រួសត្រាយជំនួយ?
២ ធ្វើឲ្យខែមីនាជាខែដ៏ពិសេស: ខែមីនាជាខែដ៏ពិសេសដើម្បីត្រួសត្រាយជំនួយ។ អស់អ្នកដែលនឹងធ្វើជាអ្នកត្រួសត្រាយជំនួយអាចបំពេញ៣០ឬ៥០ម៉ោងតាមការសម្រេចចិត្តរបស់ខ្លួន។ បើមានទស្សនកិច្ចរបស់អ្នកត្រួតពិនិត្យប្រចាំមណ្ឌលចំខែមីនា នោះអ្នកត្រួសត្រាយជំនួយអាចចូលរួមកិច្ចប្រជុំទាំងអស់ជាមួយអ្នកត្រួសត្រាយពេញពេល និងអ្នកត្រួសត្រាយពិសេស។ សកម្មភាពពិសេសដើម្បីអញ្ជើញមនុស្សមកពិធីរំលឹកមានរយៈពេលវែងជាងឆ្នាំមុន ហើយនឹងចាប់ផ្ដើមនៅថ្ងៃទី១ ខែមីនា។ ពិធីរំលឹកនេះនឹងត្រូវធ្វើឡើងនៅថ្ងៃអង្គារ ទី២៦ ខែមីនា ឆ្នាំ២០១៣។ បន្ថែមទៀត ខែមីនាមានថ្ងៃសៅរ៍និងថ្ងៃអាទិត្យប្រាំដង។ សូមពិចារណាឲ្យបានដិតដល់ថា តើអ្នកអាចចូលរួមធ្វើឲ្យខែនោះជាខែពិសេសបំផុតប្រចាំឆ្នាំបានទេ?
៣. តើយើងអាចរៀបចំគម្រោងដើម្បីបង្កើនកិច្ចបម្រើផ្សាយយ៉ាងដូចម្ដេច?
៣ ធ្វើគម្រោងឥឡូវ: ឥឡូវជាពេលដែលអ្នកពិនិត្យមើលកាលវិភាគរបស់អ្នកឡើងវិញ ហើយមើលអ្វីដែលត្រូវកែប្រែជាចាំបាច់ដើម្បីអាចត្រួសត្រាយបាន។ ការសហការជាក្រុមគ្រួសារគឺសំខាន់ណាស់។ ដូច្នេះ ក្នុងអំឡុងការគោរពប្រណិប័តន៍ជាក្រុមគ្រួសារ សូមចំណាយពេលពិគ្រោះគ្នាអំពីគោលដៅជាក្រុមគ្រួសារហើយធ្វើកាលវិភាគ។ (សុភ. ១៥:២២) បើអ្នកមិនអាចត្រួសត្រាយជំនួយបានទេ សូមកុំធ្លាក់ទឹកចិត្តឡើយ។ តើអ្នកអាចកែប្រែកាលវិភាគដើម្បីផ្សព្វផ្សាយយូរជាងនៅថ្ងៃដែលអ្នកត្រូវទៅផ្សព្វផ្សាយទេ? ក្នុងសប្ដាហ៍ តើអ្នកអាចទៅផ្សព្វផ្សាយមួយថ្ងៃថែមទៀតបានទេ?
៤. តើយើងនឹងទទួលប្រយោជន៍អ្វីពីការបង្កើនសកម្មភាពក្នុងអំឡុងខែមីនា មេសា និងឧសភា?
៤ កាលដែលយើងបង្កើនសកម្មភាពក្នុងអំឡុងខែមីនា មេសា និងឧសភា យើងនឹងមានអំណរហើយស្កប់ចិត្តថែមទៀតពីការបម្រើព្រះយេហូវ៉ានិងការឲ្យអ្នកឯទៀត។ (យ៉ូន. ៤:៣៤; សកម្ម. ២០:៣៥) សំខាន់ជាងនោះទៅទៀត ការលះបង់ប្រយោជន៍ខ្លួននឹងនាំឲ្យព្រះយេហូវ៉ាមានចិត្តរីករាយ។—សុភ. ២៧:១១