នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?

១. តើនៅពេលណាយើងនឹងចាប់ផ្ដើមសិក្សាសៀវភៅស្តើងនៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា? ហើយតើយើងនឹងទទួលប្រយោជន៍យ៉ាងណាពីសៀវភៅស្តើងនេះ?

^១ ចាប់ពីសប្ដាហ៍ថ្ងៃទី២៨ ខែតុលា យើងនឹងសិក្សាសៀវភៅស្តើងនៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា? ក្នុងការសិក្សាគម្ពីរជាក្រុមជំនុំ។ សៀវភៅស្តើងថ្មីនេះបានចេញនៅមហាសន្និបាតប្រចាំតំបន់ដែលមានប្រធានថា៖ ‹ចូររក្សាចិត្តរបស់អ្នក!›។ សៀវភៅនេះបានត្រូវរៀបចំឡើងដើម្បីជួយសិស្សគម្ពីរឲ្យស្គាល់អង្គការរបស់ព្រះ។ នេះមិនគ្រាន់តែជួយយើងឲ្យមានអំណរគុណកាន់តែច្រើនដែលយើងមានចំណែកក្នុងអង្គការរបស់ព្រះយេហូវ៉ាប៉ុណ្ណោះទេ តែនេះក៏នឹងជួយយើងឲ្យយល់ច្បាស់ថា វាជាឧបករណ៍ដ៏មានតម្លៃក្នុងកិច្ចបម្រើផ្សាយ។—ទំនុក. ៤៨:១៣

២. តើតាមវិធីណាដែលសៀវភៅស្តើងនេះនឹងត្រូវសិក្សាជាក្រុមជំនុំ?

^២ វិធីសិក្សាសៀវភៅនេះ: អ្នកដឹកនាំត្រូវចែកពេលឲ្យបានស្មើគ្នា ដើម្បីអាចពិគ្រោះមេរៀននីមួយៗឲ្យបានសព្វគ្រប់។ សៀវភៅស្តើងនេះមាន២៨មេរៀន។ មេរៀននីមួយៗមានចំណងជើងជាសំណួរ។ ពេលចាប់ផ្ដើមរៀនមេរៀននីមួយៗអ្នកដឹកនាំនឹងអានចំណងជើងនោះ។ រួចមក គាត់នឹងអញ្ជើញអ្នកអានឲ្យអានវគ្គផ្ដើមនៃមេរៀន។ ក្រោយនោះ គាត់នឹងសួរអ្នកស្ដាប់នូវសំណួរមួយដែលគាត់បានរៀបចំហើយស្តីអំពីវគ្គផ្ដើម។ បន្ទាប់មក សូមអាននិងពិគ្រោះព័ត៌មាននៅក្រោមចំណងជើងតូចជាអក្សរដិតម្ដងមួយៗដោយឡែកពីគ្នា។ ក្រោយពីអានព័ត៌មាននៅក្រោមចំណងជើងតូចហើយ អ្នកដឹកនាំនឹងសូមឲ្យបងប្អូនប្រាប់ចម្លើយចំពោះសំណួរដែលជាចំណងជើងមេរៀន។ ក្នុងសៀវភៅស្តើងនេះមានរូបភាពជាច្រើនដែលយើងអាចឆ្លើយបាន។ បើមានពេលគួរអានបទគម្ពីរសំខាន់ៗ។ មុនចូលទៅមេរៀនមួយទៀត អ្នកដឹកនាំគួរសួរសំណួររៀនសាឡើងវិញដែលមាននៅខាងក្រោមទំព័រនោះ។ បើក្នុងមេរៀនមានប្រអប់«ដើម្បីរៀនថែមទៀត» នោះគាត់ត្រូវសុំឲ្យអាន។ រួចមកគាត់សុំអ្នកស្ដាប់ឲ្យឆ្លើយអំពីរបៀបដែលសិស្សគម្ពីរនឹងទទួលប្រយោជន៍ពីយោបល់ក្នុងប្រអប់នោះ។ នៅចុងបញ្ចប់នៃការសិក្សា បើសល់ពេលអ្នកដឹកនាំអាចប្រើចំណងជើងមេរៀននីមួយៗដើម្បីរៀនសាឡើងវិញដែរ។ សូមចាំថា យើងមិនចាំបាច់ប្រើវិធីនេះក្នុងការបង្រៀនសិស្សគម្ពីរតាមផ្ទះទេ។

៣. តើយើងអាចទទួលប្រយោជន៍យ៉ាងពេញលេញពីការសិក្សាសៀវភៅស្តើងនេះយ៉ាងដូចម្ដេច?

^៣ ដើម្បីយើងអាចទទួលប្រយោជន៍យ៉ាងពេញលេញ សូមរៀបចំឲ្យបានល្អមុនចូលរួមកិច្ចប្រជុំ។ សូមខំលើកដៃឆ្លើយ។ ក្នុងអំឡុងការពិគ្រោះ សូមគិតអំពីមូលហេតុដែលសិស្សគម្ពីរអាចទទួលប្រយោជន៍ពីសៀវភៅស្តើងនេះ។ សូមឲ្យការសិក្សាសៀវភៅស្តើងនេះពង្រឹងសមត្ថភាពយើងដើម្បីជួយអ្នកឯទៀតឲ្យចូលរួមជាមួយយើងក្នុងការធ្វើតាមបំណងប្រាថ្នារបស់ព្រះ ដើម្បីពួកគេអាចមានសេចក្ដីសង្ឃឹមទទួលជីវិតដែលគ្មានទីបញ្ចប់ដែរ។—១យ៉ូន. ២:១៧