អត្ថបទសិក្សា ៤៣
‹លោកនឹងធ្វើឲ្យអ្នកខ្លាំងក្លា› តើតាមរបៀបណា?
«[ព្រះយេហូវ៉ា]នឹងធ្វើឲ្យអ្នករាល់គ្នាមាំមួនហើយខ្លាំងក្លា លោកនឹងជួយអ្នកមិនឲ្យរង្គោះរង្គើឡើយ»។—១ពេ. ៥:១០
ចម្រៀងលេខ៣៨ លោកនឹងធ្វើឲ្យអ្នកខ្លាំងក្លា
សេចក្ដីសង្ខេបa
១. តើពួកអ្នកគោរពប្រណិប័តន៍ព្រះនៅសម័យបុរាណបានទទួលកម្លាំងយ៉ាងដូចម្ដេច?
បណ្ដាំព្រះច្រើនតែរៀបរាប់អំពីបុរសដ៏ស្មោះត្រង់ថាជាបុរសខ្លាំងក្លា។ ប៉ុន្តែ ពួកគេមិនតែងតែមានអារម្មណ៍ថាខ្លួនខ្លាំងក្លាទេ។ ជាឧទាហរណ៍ នៅពេលខ្លះស្ដេចដាវីឌមានអារម្មណ៍ថាគាត់«រឹងមាំដូចភ្នំ» តែនៅពេលផ្សេងទៀត គាត់«ចាប់ផ្ដើមភ័យខ្លាច»។ (ចសព. ៣០:៧) ស្រដៀងគ្នាដែរ ទោះជាសាំសុនមានកម្លាំងខ្លាំងក្លាមហិមាពេលដែលគាត់ទទួលឫទ្ធានុភាពរបស់ព្រះក្ដី គាត់បានទទួលស្គាល់ថាបើគ្មានឫទ្ធានុភាពដែលមកពីលោកទេ ‹កម្លាំងគាត់នឹងចុះខ្សោយ ហើយគាត់នឹងដូចមនុស្សទូទៅដែរ›។ (អសក. ១៤:៥, ៦; ១៦:១៧) បុរសដ៏ស្មោះត្រង់ទាំងនេះអាចមានកម្លាំងខ្លាំងក្លាបាន ដោយសារតែព្រះយេហូវ៉ាបានឲ្យឫទ្ធានុភាពដល់ពួកគាត់។
២. ហេតុអ្វីប៉ូលនិយាយថាពេលគាត់ខ្សោយ គាត់មានកម្លាំងខ្លាំងក្លា? (កូរិនថូសទី២ ១២:៩, ១០)
២ សាវ័កប៉ូលបានទទួលស្គាល់ថាគាត់ក៏ត្រូវការឫទ្ធានុភាពពីព្រះយេហូវ៉ាដែរ។ (សូមអាន កូរិនថូសទី២ ១២:៩, ១០) ដូចយើងជាច្រើននាក់ ប៉ូលតស៊ូនឹងបញ្ហាសុខភាព។ (កាឡ. ៤:១៣, ១៤) ពេលខ្លះគាត់ក៏ពិបាកធ្វើអ្វីដែលត្រឹមត្រូវដែរ។ (រ៉ូម ៧:១៨, ១៩) ម្យ៉ាងទៀត ជួនកាលគាត់ខ្វល់ខ្វាយ ហើយខ្លាចអំពីអ្វីដែលប្រហែលជានឹងកើតឡើងចំពោះគាត់។ (២កូ. ១:៨, ៩) ប៉ុន្តែពេលប៉ូលខ្សោយ គាត់ទៅជាខ្លាំងក្លា។ តើតាមរបៀបណា? ព្រះយេហូវ៉ាបានឲ្យប៉ូលនូវកម្លាំងដែលគាត់ត្រូវការ។ លោកបានធ្វើឲ្យប៉ូលខ្លាំងក្លា។
៣. ក្នុងអត្ថបទនេះ តើយើងនឹងទទួលចម្លើយចំពោះសំណួរអ្វីខ្លះ?
៣ ព្រះយេហូវ៉ាសន្យាថាលោកក៏នឹងធ្វើឲ្យយើងខ្លាំងក្លាដែរ។ (១ពេ. ៥:១០) ប៉ុន្តែ យើងមិនអាចរំពឹងថានឹងទទួលឫទ្ធានុភាពនោះដោយមិនខំព្យាយាមខ្លួនឯងឡើយ។ ជាឧទាហរណ៍ ម៉ាស៊ីនឡានអាចធ្វើឲ្យឡានដំណើរការទៅមុខ ប៉ុន្តែអ្នកបើកបរត្រូវជាន់ឈ្នាន់ល្បឿនឬហ៊្គែរដើម្បីទៅមុខ។ ស្រដៀងគ្នាដែរ ព្រះយេហូវ៉ាប្រុងប្រៀបផ្ដល់ឫទ្ធានុភាពដែលយើងត្រូវការ ប៉ុន្តែយើងត្រូវចាត់វិធានការដើម្បីទទួលប្រយោជន៍ពីឫទ្ធានុភាពនោះ។ តើព្រះយេហូវ៉ាបានផ្ដល់អ្វីដើម្បីធ្វើឲ្យយើងខ្លាំងក្លា ហើយតើយើងត្រូវធ្វើអ្វីដើម្បីទទួលឫទ្ធានុភាពនោះ? យើងនឹងដឹងចម្លើយចំពោះសំណួរទាំងនេះដោយពិចារណាអំពីរបៀបដែលព្រះយេហូវ៉ាបានពង្រឹងកម្លាំងបុគ្គលបីនាក់ក្នុងគម្ពីរ គឺអ្នកប្រកាសទំនាយយ៉ូណាស ម៉ារៀដែលជាម្ដាយរបស់លោកយេស៊ូ និងសាវ័កប៉ូល។ យើងក៏នឹងឃើញរបៀបដែលព្រះយេហូវ៉ាបន្ដពង្រឹងកម្លាំងអ្នកបម្រើរបស់លោកនៅសព្វថ្ងៃតាមរបៀបស្រដៀងនឹងនេះ។
ចូរទទួលកម្លាំងពីការអធិដ្ឋាននិងការសិក្សា
៤. តើយើងអាចទទួលឫទ្ធានុភាពពីព្រះយេហូវ៉ាតាមរបៀបណា?
៤ របៀបមួយដែលយើងអាចទទួលឫទ្ធានុភាពពីព្រះយេហូវ៉ាគឺដោយអធិដ្ឋានទៅលោក។ ព្រះយេហូវ៉ានឹងតបឆ្លើយសេចក្ដីអធិដ្ឋានរបស់យើងដោយឲ្យយើង«ឫទ្ធានុភាពដែលលើសពីធម្មតា»។ (២កូ. ៤:៧) កម្លាំងរបស់យើងក៏អាចពង្រឹងឡើងពេលយើងអាននិងរំពឹងគិតអំពីបណ្ដាំលោក។ (ចសព. ៨៦:១១) ដំណឹងរបស់ព្រះយេហូវ៉ាសម្រាប់យើងក្នុងគម្ពីរ«មានឫទ្ធានុភាព»។ (ហេ. ៤:១២) ពេលអ្នកអធិដ្ឋានទៅព្រះយេហូវ៉ានិងអានបណ្ដាំលោក អ្នកនឹងទទួលកម្លាំងដែលអ្នកត្រូវការដើម្បីស៊ូទ្រាំ រក្សាអំណរ ឬបំពេញភារកិច្ចដ៏ពិបាក។ សូមកត់សម្គាល់អំពីរបៀបដែលព្រះយេហូវ៉ាបានពង្រឹងកម្លាំងអ្នកប្រកាសទំនាយយ៉ូណាស។
៥. ហេតុអ្វីអ្នកប្រកាសទំនាយយ៉ូណាសត្រូវការកម្លាំង?
៥ អ្នកប្រកាសទំនាយយ៉ូណាសត្រូវការកម្លាំង។ គាត់បានរត់គេចពីភារកិច្ចដ៏ពិបាកដែលព្រះយេហូវ៉ាបានឲ្យគាត់។ ជាលទ្ធផល គាត់ស្ទើរតែបាត់បង់ជីវិតក្នុងខ្យល់ព្យុះយ៉ាងខ្លាំង ហើយក៏បានធ្វើឲ្យអ្នករួមដំណើរតាមសំពៅជាមួយគាត់ប៊ិះនឹងស្លាប់ដែរ។ ពេលគាត់បានត្រូវបោះទៅក្នុងសមុទ្រ គាត់បានឃើញថាខ្លួនស្ថិតក្នុងកន្លែងដ៏ងងឹតមួយដែលគាត់មិនធ្លាប់នៅ គឺនៅក្នុងពោះត្រីដ៏ធំ។ តើអ្នកគិតថាយ៉ូណាសមានអារម្មណ៍យ៉ាងណា? តើគាត់គិតថាគាត់នឹងស្លាប់នៅទីនោះឬ? តើគាត់ប្រហែលជាបានឆ្ងល់ថាតើព្រះយេហូវ៉ាបោះបង់ចោលគាត់ឬទេ? យ៉ូណាសច្បាស់ជាខ្វល់ចិត្តជាខ្លាំង។
ដូចអ្នកប្រកាសទំនាយយ៉ូណាស តើយើងអាចទទួលកម្លាំងយ៉ាងដូចម្ដេច ពេលជួបទុក្ខលំបាក? (សូមមើលវគ្គ៦-៩)
៦. យោងទៅតាមយ៉ូណាស ២:១, ២, ៧ តើអ្វីបានពង្រឹងកម្លាំងយ៉ូណាសកាលដែលគាត់នៅក្នុងពោះត្រី?
៦ តើយ៉ូណាសបានធ្វើអ្វីដើម្បីទទួលកម្លាំងពេលគាត់នៅក្នុងពោះត្រីតែម្នាក់ឯង? គាត់បានអធិដ្ឋានទៅព្រះយេហូវ៉ា។ (សូមអាន យ៉ូណាស ២:១, ២, ៧) ទោះជាយ៉ូណាសមិនបានស្ដាប់បង្គាប់ព្រះយេហូវ៉ាក្ដី គាត់ជឿជាក់ថាព្រះយេហូវ៉ានឹងស្ដាប់សេចក្ដីអធិដ្ឋានដ៏រាបទាបរបស់គាត់ដែលបានបង្ហាញថាគាត់ប្រែចិត្ត។ យ៉ូណាសក៏បានរំពឹងគិតអំពីបទគម្ពីរដែរ។ ហេតុអ្វីយើងអាចនិយាយដូច្នេះ? ពីព្រោះសេចក្ដីអធិដ្ឋានរបស់គាត់ដែលបានត្រូវកត់ទុកក្នុងយ៉ូណាស ជំពូក២ ប្រើពាក្យនិងឃ្លាដូចគ្នាជាច្រើនដែលមានក្នុងចម្រៀងសរសើរព្រះ។ (ជាឧទាហរណ៍ សូមប្រៀបធៀបយ៉ូណាស ២:២, ៥ ទៅនឹងចម្រៀងសរសើរព្រះ ៦៩:១; ៨៦:៧) គឺច្បាស់ណាស់ថាយ៉ូណាសស្គាល់បទគម្ពីរទាំងនោះយ៉ាងច្បាស់។ ម្យ៉ាងទៀត ដោយរំពឹងគិតអំពីបទគម្ពីរទាំងនោះក្នុងអំឡុងពេលដែលគាត់ជួបស្ថានភាពពិបាក គាត់មានទំនុកចិត្តថាព្រះយេហូវ៉ានឹងជួយគាត់។ ព្រះយេហូវ៉ាបានសង្គ្រោះយ៉ូណាស ហើយក្រោយមកគាត់ត្រៀមខ្លួនដើម្បីធ្វើកិច្ចការដែលព្រះយេហូវ៉ាបានប្រាប់គាត់ឲ្យធ្វើ។—យ៉ូណ. ២:១០–៣:៤
៧-៨. តើបងប្រុសម្នាក់នៅប្រទេសតៃវ៉ាន់បានទទួលកម្លាំងយ៉ាងដូចម្ដេចក្នុងអំឡុងគ្រាដែលគាត់មានទុក្ខលំបាក?
៧ គំរូរបស់យ៉ូណាសអាចជួយយើងពេលយើងជួបទុក្ខលំបាកផ្សេងៗ។ ជាឧទាហរណ៍ បងប្រុសស៊ីមីងbនៅប្រទេសតៃវ៉ាន់មានបញ្ហាសុខភាពធ្ងន់ធ្ងរ។ បន្ថែមទៅទៀត គាត់ត្រូវស៊ូទ្រាំនឹងការប្រឆាំងដ៏សាហាវពីក្រុមគ្រួសារ ពីព្រោះគាត់មានជំនឿលើព្រះយេហូវ៉ា។ ប៉ុន្តែគាត់ទទួលកម្លាំងពីព្រះយេហូវ៉ាតាមរយៈការអធិដ្ឋាននិងការសិក្សា។ គាត់សារភាពថា៖ «ជួនកាល ពេលបញ្ហាកើតឡើង ខ្ញុំខ្វល់ចិត្តជាខ្លាំងបានជាខ្ញុំមិនអាចមានចិត្តស្ងប់ដើម្បីសិក្សាផ្ទាល់ខ្លួនទេ»។ ទោះជាយ៉ាងនេះក្ដី គាត់មិនឈប់ព្យាយាមឡើយ។ គាត់និយាយថា៖ «ដំបូង ខ្ញុំអធិដ្ឋានទៅព្រះយេហូវ៉ា។ បន្ទាប់មក ខ្ញុំពាក់កាសស្ដាប់ចម្រៀងរាជាណាចក្ររបស់យើង។ ជួនកាលខ្ញុំថែមទាំងច្រៀងចម្រៀងទាំងនោះខ្សឹបៗរហូតដល់ខ្ញុំស្ងប់អារម្មណ៍។ រួចមកខ្ញុំចាប់ផ្ដើមសិក្សា»។
៨ ការសិក្សាផ្ទាល់ខ្លួនបានពង្រឹងកម្លាំងបងស៊ីមីងតាមរបៀបដែលនឹកស្មានមិនដល់។ ជាឧទាហរណ៍ កាលដែលគាត់សម្រាកព្យាបាលបន្ទាប់ពីទទួលការវះកាត់ដ៏ធំមួយ គិលានុបដ្ឋាកបានប្រាប់គាត់ថា ដោយសារកោសិកាគ្រាប់ឈាមក្រហមរបស់គាត់ថយចុះ គាត់ត្រូវការចាក់បញ្ចូលឈាម។ តើអ្វីបានជួយបងស៊ីមីង? នៅយប់មុនបងស៊ីមីងបានត្រូវវះកាត់ គាត់បានអានអំពីបងស្រីម្នាក់ដែលបានទទួលការវះកាត់ដូចគ្នា។ កោសិកាគ្រាប់ឈាមក្រហមរបស់បងស្រីនោះបានធ្លាក់ចុះខ្លាំងជាងឈាមរបស់គាត់ទៅទៀត ប៉ុន្តែបងស្រីនោះមិនព្រមទទួលការចាក់បញ្ចូលឈាម ហើយបានជាសះស្បើយ។ បទពិសោធន៍នេះបានពង្រឹងកម្លាំងបងស៊ីមីងឲ្យរក្សាចិត្តស្មោះត្រង់។
៩. បើអ្នកខ្វល់ចិត្តដោយសារទុក្ខលំបាក តើអ្នកអាចធ្វើអ្វី? (សូមមើលរូបភាពផងដែរ)
៩ ក្នុងអំឡុងពេលជួបទុក្ខលំបាក តើអ្នកធ្លាប់ខ្វល់ខ្វាយខ្លាំងពេករហូតដល់ពិបាកអធិដ្ឋានឬទេ? ឬតើអ្នកអស់កម្លាំងពេករហូតដល់ពិបាកសិក្សា? សូមចាំថាព្រះយេហូវ៉ាយល់ច្បាស់អំពីស្ថានភាពរបស់អ្នក។ ដូច្នេះ សូម្បីតែពេលអ្នកអធិដ្ឋានខ្លីៗ ក៏អ្នកអាចប្រាកដថាលោកនឹងផ្ដល់អ្វីដែលអ្នកត្រូវការ។ (អេភ. ៣:២០) បើអ្នកពិបាកអាននិងសិក្សាដោយសារអ្នកឈឺ អស់កម្លាំង ឬខ្វល់ចិត្តជាខ្លាំង អ្នកអាចស្ដាប់អំណានគម្ពីរឬសៀវភៅណាមួយរបស់យើងជាឯកសារសំឡេង។ អ្នកក៏អាចស្ដាប់ចម្រៀងរបស់យើង ឬមើលវីដេអូណាមួយនៅគេហទំព័រjw.org។ ព្រះយេហូវ៉ាចង់ធ្វើឲ្យអ្នកខ្លាំងក្លា ហើយលោកនឹងធ្វើដូច្នេះពេលអ្នកអធិដ្ឋានទៅលោក ព្រមទាំងរកមើលចម្លើយចំពោះសេចក្ដីអធិដ្ឋានរបស់អ្នកក្នុងគម្ពីរនិងក្នុងអ្វីផ្សេងទៀតដែលលោកផ្ដល់ឲ្យដើម្បីពង្រឹងជំនឿ។។
ចូរទទួលកម្លាំងពីអ្នកគោរពប្រណិប័តន៍គ្នីគ្នា
១០. តើបងប្អូនរបស់យើងពង្រឹងកម្លាំងយើងតាមរបៀបណា?
១០ ព្រះយេហូវ៉ាអាចប្រើបងប្អូនរួមជំនឿរបស់យើងឲ្យពង្រឹងកម្លាំងយើង។ ពួកគេអាចទៅជា«ប្រភពនៃការសម្រាលទុក្ខដ៏ធំ»ពេលយើងជួបទុក្ខលំបាក ឬពិបាកបំពេញភារកិច្ចមិនស្រួលណាមួយ។ (កូឡ. ៤:១០, ១១) ជាពិសេសយើងត្រូវការមិត្តភក្ដិនៅក្នុងអំឡុង«ពេលមានទុក្ខលំបាក»។ (សុភ. ១៧:១៧) ពេលយើងខ្សោយ បងប្អូនរួមជំនឿរបស់យើងអាចផ្ដល់អ្វីដែលយើងត្រូវការ សម្រាលទុក្ខយើង និងលើកទឹកចិត្តយើងឲ្យបន្ដបម្រើព្រះយេហូវ៉ាដោយស្មោះត្រង់។ សូមគិតអំពីរបៀបដែលម៉ារៀដែលជាម្ដាយរបស់លោកយេស៊ូបានទទួលកម្លាំងពីអ្នកឯទៀត។
១១. ហេតុអ្វីម៉ារៀត្រូវការកម្លាំងចិត្ត?
១១ ម៉ារៀត្រូវការកម្លាំង។ សូមស្រមៃគិតថាគាត់ខ្វល់ចិត្តខ្លាំងយ៉ាងណាក្រោយពីទទួលភារកិច្ចដ៏សំខាន់ពីទេវតាកាព្រីយ៉ែល។ គាត់នឹងមានផ្ទៃពោះ តែគាត់មិនទាន់រៀបការទេ។ គាត់ក៏គ្មានបទពិសោធន៍ចិញ្ចឹមអប់រំកូនដែរ ប៉ុន្តែគាត់ត្រូវមើលថែកូនតូចដែលនឹងទៅជាមេស្ស៊ី។ ម្យ៉ាងទៀត ដោយសារគាត់មិនដែលរួមដំណេកជាមួយនឹងបុរសណាម្នាក់ តើម៉ារៀនឹងពន្យល់អំពីរឿងនេះទៅយ៉ូសែបដែលជាគូដណ្ដឹងរបស់គាត់យ៉ាងដូចម្ដេច?—លូក. ១:២៦-៣៣
១២. យោងទៅតាមលូកា ១:៣៩-៤៥ តើម៉ារៀបានទទួលកម្លាំងដែលគាត់ត្រូវការយ៉ាងដូចម្ដេច?
១២ តើតាមរបៀបណាម៉ារៀបានទទួលកម្លាំងដែលគាត់ត្រូវការដើម្បីបំពេញភារកិច្ចចម្លែកដ៏ពិបាកនេះ? គាត់បានរកជំនួយពីអ្នកឯទៀត។ ជាឧទាហរណ៍ គាត់បានសុំកាព្រីយ៉ែលឲ្យផ្ដល់ព័ត៌មានថែមទៀតអំពីភារកិច្ចនោះ។ (លូក. ១:៣៤) មិនយូរក្រោយមក គាត់បានធ្វើដំណើរឆ្ពោះទៅ«ឯតំបន់ភ្នំ»ក្នុងស្រុកយូដា ដើម្បីទៅសួរសុខទុក្ខអេលីសាបិតដែលជាសាច់ញាតិរបស់គាត់។ ការទៅសួរសុខទុក្ខនោះគឺមានប្រយោជន៍មែន។ អេលីសាបិតបានសរសើរម៉ារៀ ហើយព្រះយេហូវ៉ាបានដឹកនាំអេលីសាបិតឲ្យប្រាប់ទំនាយដ៏គួរឲ្យលើកទឹកចិត្តអំពីទារកដែលនៅក្នុងផ្ទៃរបស់ម៉ារៀ។ (សូមអាន លូកា ១:៣៩-៤៥) ម៉ារៀនិយាយថាព្រះយេហូវ៉ា«បានធ្វើកិច្ចការយ៉ាងអស្ចារ្យដោយដៃរបស់លោក»។ (លូក. ១:៤៦-៥១) ព្រះយេហូវ៉ាបានពង្រឹងកម្លាំងម៉ារៀតាមរយៈកាព្រីយ៉ែល និងអេលីសាបិត។
១៣. តើអ្វីបានកើតឡើងពេលបងស្រីម្នាក់បានសុំជំនួយពីបងប្អូន?
១៣ ដូចម៉ារៀ អ្នកក៏អាចទទួលកម្លាំងពីអ្នកគោរពប្រណិប័តន៍គ្នីគ្នាដែរ។ បងស្រីដេស៊ូរីនៅប្រទេសបូលីវីត្រូវការកម្លាំងបែបនេះ។ ពេលឪពុកបងដេស៊ូរីបានត្រូវរកឃើញថាមានជំងឺដែលនាំឲ្យស្លាប់ ហើយត្រូវស្នាក់នៅមន្ទីរពេទ្យ បងដេស៊ូរីសុខចិត្តនៅមើលថែគាត់។ (១ធី. ៥:៤) នេះមិនតែងតែស្រួលទេ។ គាត់សារភាពថា៖ «ច្រើនដងខ្ញុំមានអារម្មណ៍ថាខ្ញុំមិនអាចទៅមុខទៀតទេ»។ តើគាត់បានសុំជំនួយឬទេ? ដំបូងគាត់មិនបានសុំទេ។ គាត់ពន្យល់ថា៖ «ខ្ញុំមិនចង់រំខានបងប្អូន។ ខ្ញុំបានវែកញែកថា ‹គឺព្រះយេហូវ៉ាដែលនឹងផ្ដល់ជំនួយដែលខ្ញុំត្រូវការ›។ ប៉ុន្តែក្រោយមក ខ្ញុំបានទទួលស្គាល់ថាពេលខ្ញុំញែកខ្លួនចេញពីអ្នកឯទៀត ខ្ញុំព្យាយាមដោះស្រាយបញ្ហារបស់ខ្ញុំតែម្នាក់ឯង»។ (សុភ. ១៨:១) បងដេស៊ូរីបានសម្រេចចិត្តសរសេររៀបរាប់អំពីស្ថានភាពរបស់គាត់ទៅមិត្តភក្ដិខ្លះ។ គាត់និយាយថា៖ «ខ្ញុំបានទទួលកម្លាំងពីបងប្អូនជាទីស្រឡាញ់ខ្លាំងដល់ម្ល៉េះរហូតដល់មិនអាចពណ៌នាបាន។ ពួកគេបានយកម្ហូបអាហារមកមន្ទីរពេទ្យ ហើយបង្ហាញខ្ញុំបទគម្ពីរដែលជួយសម្រាលទុក្ខ។ ការដឹងថាយើងមិននៅម្នាក់ឯងគឺជាអារម្មណ៍ដ៏កក់ក្ដៅមែន។ យើងនៅក្នុងក្រុមគ្រួសារដ៏ធំរបស់ព្រះយេហូវ៉ា ជាក្រុមគ្រួសារមួយដែលសុខចិត្តជួយយើង យំជាមួយយើង និងកាន់ដៃតស៊ូជាមួយយើង»។
១៤. ហេតុអ្វីយើងគួរទទួលជំនួយពីពួកអ្នកចាស់ទុំ?
១៤ របៀបមួយដែលព្រះយេហូវ៉ាផ្ដល់ឫទ្ធានុភាពដល់យើងគឺតាមរយៈពួកអ្នកចាស់ទុំ។ ពួកគេជាអំណោយដែលលោកប្រើដើម្បីពង្រឹងកម្លាំងនិងធ្វើឲ្យយើងមានកម្លាំងឡើងវិញ។ (អេ. ៣២:១, ២) ដូច្នេះ ពេលអ្នកខ្វល់ចិត្ត សូមប្រាប់កង្វល់របស់អ្នកទៅពួកអ្នកចាស់ទុំ។ ពេលពួកគេខំជួយអ្នក សូមទទួលដោយចិត្តដឹងគុណ។ តាមរយៈពួកគេ ព្រះយេហូវ៉ាអាចធ្វើឲ្យអ្នកខ្លាំងក្លា។
ចូរទទួលកម្លាំងពីសេចក្ដីសង្ឃឹមរបស់អ្នកចំពោះថ្ងៃអនាគត
១៥. តើគ្រិស្តសាសនិកទាំងអស់មានសេចក្ដីសង្ឃឹមអ្វី?
១៥ សេចក្ដីសន្យាក្នុងគម្ពីរអាចផ្ដល់ឲ្យយើងនូវសេចក្ដីសង្ឃឹមនិងកម្លាំងដើម្បីបន្ដបម្រើព្រះយេហូវ៉ា។ (រ៉ូម ៤:៣, ១៨-២០) ក្នុងនាមជាគ្រិស្តសាសនិក យើងមានសេចក្ដីសង្ឃឹមដ៏មានតម្លៃវិសេសវិសាលអំពីការរស់នៅជារៀងរហូតក្នុងសួនឧទ្យានលើផែនដី ឬក្នុងរាជាណាចក្រនៅស្ថានសួគ៌។ សេចក្ដីសង្ឃឹមរបស់យើងពង្រឹងកម្លាំងយើងឲ្យស៊ូទ្រាំនឹងទុក្ខលំបាក ផ្សព្វផ្សាយដំណឹងល្អ និងបំពេញភារកិច្ចផ្សេងៗក្នុងក្រុមជំនុំ។ (១ថែ. ១:៣) សេចក្ដីសង្ឃឹមនេះក៏បានពង្រឹងកម្លាំងសាវ័កប៉ូលដែរ។
១៦. ហេតុអ្វីសាវ័កប៉ូលត្រូវការកម្លាំង?
១៦ ប៉ូលត្រូវការកម្លាំង។ ក្នុងសំបុត្ររបស់គាត់ទៅកាន់គ្រិស្តសាសនិកនៅក្រុងកូរិនថូស គាត់បានប្រដូចខ្លួនគាត់ទៅនឹងភាជនៈដីដែលងាយបែក។ គាត់«ទាល់គំនិត» «ត្រូវគេគាបសង្កត់» «បៀតបៀន» និង«ផ្ដួលដល់ដី»។ ជួនកាលជីវិតគាត់ស្ថិតក្នុងគ្រោះថ្នាក់ទៀតផង។ (២កូ. ៤:៨-១០) ប៉ូលបានសរសេរពាក្យទាំងនោះក្នុងអំឡុងដំណើរជាសាសនទូតលើកទី៣របស់គាត់។ ក្រោយពីគាត់បានសរសេរពាក្យទាំងនោះ គាត់ជួបស្ថានភាពពិបាកផ្សេងៗ។ គាត់បានរងអំពើឃោរឃៅពីសាធារណៈជន ត្រូវគេចាប់ខ្លួន លិចសំពៅ និងជាប់គុក។
១៧. យោងទៅតាមកូរិនថូសទី២ ៤:១៦-១៨ តើអ្វីបានពង្រឹងកម្លាំងប៉ូលឲ្យស៊ូទ្រាំនឹងទុក្ខលំបាក?
១៧ ប៉ូលបានទទួលកម្លាំងដើម្បីស៊ូទ្រាំដោយផ្ដោតអារម្មណ៍ទៅលើសេចក្ដីសង្ឃឹមរបស់គាត់។ (សូមអាន កូរិនថូសទី២ ៤:១៦-១៨) គាត់បានប្រាប់គ្រិស្តសាសនិកនៅក្រុងកូរិនថូសថា ទោះជារូបកាយរបស់គាត់«កំពុងខូចទៅ»ក៏ដោយ គាត់មិនឲ្យនោះធ្វើឲ្យគាត់ធ្លាក់ទឹកចិត្តទេ។ ប៉ូលបានផ្ដោតអារម្មណ៍ទៅលើអនាគតរបស់គាត់។ សេចក្ដីសង្ឃឹមរបស់គាត់អំពីជីវិតជារៀងរហូតនៅស្ថានសួគ៌គឺ«កាន់តែឧត្ដុង្គឧត្ដម»ចំពោះគាត់។ សេចក្ដីសង្ឃឹមរបស់ប៉ូលមានតម្លៃជាខ្លាំង រហូតដល់គាត់សុខចិត្តស៊ូទ្រាំនឹងទុក្ខលំបាកណាក៏ដោយដើម្បីទទួលរង្វាន់នោះ។ ប៉ូលបានរំពឹងគិតអំពីសេចក្ដីសង្ឃឹមនោះ ហើយជាលទ្ធផល គាត់«ទទួលកម្លាំងជាថ្មីរាល់ថ្ងៃជានិច្ច»។
១៨. តើសេចក្ដីសង្ឃឹមសម្រាប់ថ្ងៃអនាគតបានពង្រឹងកម្លាំងរបស់ធីហូមៀនិងក្រុមគ្រួសារគាត់យ៉ាងដូចម្ដេច?
១៨ បងប្រុសធីហូមៀនៅប្រទេសប៊ុលហ្គារីទទួលកម្លាំងពីសេចក្ដីសង្ឃឹមរបស់គាត់។ ប៉ុន្មានឆ្នាំមុន ប្អូនប្រុសរបស់គាត់ឈ្មោះស្ត្រាវកូបានស្លាប់ក្នុងគ្រោះថ្នាក់ចរាចរណ៍។ អស់មួយរយៈពេលក្រោយមក បងធីហូមៀកើតទុក្ខជាពន់ពេក។ ដើម្បីស៊ូទ្រាំ គាត់និងប្រពន្ធកូនគាត់បានស្រមៃគិតអំពីការប្រោសឲ្យរស់ឡើងវិញថាគឺយ៉ាងណា។ គាត់ពន្យល់ថា៖ «ជាឧទាហរណ៍ យើងនិយាយគ្នាអំពីកន្លែងណាដែលយើងនឹងជួបស្ត្រាវកូ យើងនឹងធ្វើម្ហូបអ្វីឲ្យគាត់ យើងនឹងអញ្ជើញអ្នកណាខ្លះឲ្យចូលរួមការជួបជុំគ្នាជាលើកដំបូងពេលគាត់ត្រឡប់មកវិញ ហើយយើងនឹងប្រាប់គាត់អ្វីខ្លះអំពីគ្រាចុងក្រោយបង្អស់»។ បងធីហូមៀនិយាយថាការផ្ដោតអារម្មណ៍លើសេចក្ដីសង្ឃឹមពង្រឹងកម្លាំងក្រុមគ្រួសារគាត់ឲ្យបន្ដស៊ូទ្រាំ និងបន្ដរង់ចាំពេលដែលព្រះយេហូវ៉ានឹងប្រោសប្អូនប្រុសរបស់គាត់ឲ្យរស់ឡើងវិញ។
តើអ្នកគិតថាអ្នកនឹងមានជីវិតបែបណានៅក្នុងពិភពលោកថ្មី? (សូមមើលវគ្គ១៩)c
១៩. តើអ្នកអាចធ្វើអ្វីដើម្បីពង្រឹងសេចក្ដីសង្ឃឹមរបស់អ្នក? (សូមមើលរូបភាពផងដែរ)
១៩ តើអ្នកអាចពង្រឹងសេចក្ដីសង្ឃឹមរបស់អ្នកតាមរបៀបណា? ជាឧទាហរណ៍ បើអ្នកមានសេចក្ដីសង្ឃឹមរស់ជារៀងរហូតនៅលើផែនដី សូមអាននិងរំពឹងគិតអំពីអ្វីដែលគម្ពីររៀបរាប់អំពីសួនឧទ្យាន។ (អេ. ២៥:៨; ៣២:១៦-១៨) សូមស្រមៃគិតថាជីវិតក្នុងពិភពលោកថ្មីគឺយ៉ាងណា។ សូមស្រមៃឃើញខ្លួនអ្នកនៅទីនោះ។ តើអ្នកឃើញបុគ្គលណាខ្លះ? តើអ្នកឮសំឡេងអ្វីខ្លះ? តើអ្នកមានអារម្មណ៍យ៉ាងណា? ដើម្បីជួយអ្នកឲ្យស្រមៃឃើញថាជីវិតក្នុងសួនឧទ្យានប្រហែលជាយ៉ាងណា សូមមើលរូបភាពក្នុងសៀវភៅផ្សេងៗរបស់យើងដែលបង្ហាញអំពីសួនឧទ្យាន ឬមើលវីដេអូចម្រៀងដូចជានៅផែនដីថ្មីខាងមុខ ឬជិតណាស់ហើយជាដើម។ បើយើងលៃទុកពេលជាទៀងទាត់ដើម្បីស្រមៃគិតអំពីសេចក្ដីសង្ឃឹមអំពីពិភពលោកថ្មី បញ្ហារបស់យើងនឹង«មានតែមួយរយៈពេលខ្លី ហើយស្រាល»។ (២កូ. ៤:១៧) សេចក្ដីសង្ឃឹមដែលព្រះយេហូវ៉ាផ្ដល់ឲ្យអ្នកអាចជួយអ្នកឲ្យស៊ូទ្រាំនឹងទុក្ខលំបាក។
២០. ពេលយើងខ្សោយ តើយើងអាចទទួលកម្លាំងតាមរបៀបណា?
២០ សូម្បីតែពេលយើងខ្សោយ ក៏«យើងនឹងទទួលកម្លាំងឡើងវិញពីព្រះ»។ (ចសព. ១០៨:១៣) ព្រះយេហូវ៉ាបានផ្ដល់រួចហើយនូវអ្វីដែលអ្នកត្រូវការដើម្បីទទួលកម្លាំងពីលោក។ ដូច្នេះ ពេលអ្នកត្រូវការជំនួយដើម្បីបំពេញភារកិច្ច ស៊ូទ្រាំនឹងទុក្ខលំបាក ឬរក្សាអំណររបស់អ្នក សូមអធិដ្ឋានអស់ពីចិត្តទៅព្រះយេហូវ៉ា និងស្វែងរកការណែនាំពីលោកតាមរយៈការសិក្សាផ្ទាល់ខ្លួន។ សូមទទួលយកការលើកទឹកចិត្តពីបងប្អូនគ្រិស្តសាសនិករបស់អ្នក។ សូមលៃទុកពេលជាទៀងទាត់ដើម្បីគិតអំពីសេចក្ដីសង្ឃឹមរបស់អ្នកសម្រាប់ថ្ងៃអនាគត។ យ៉ាងនេះ អ្នកនឹង‹ទទួលកម្លាំងខ្លាំងក្លាពីឫទ្ធានុភាពរុងរឿងរបស់ព្រះ ដើម្បីអ្នកអាចស៊ូទ្រាំនឹងការទាំងអស់ ដោយចិត្តអត់ធ្មត់និងមានអំណរ›។—កូឡ. ១:១១
ចម្រៀងលេខ៣៣ ចូរផ្ទេរបន្ទុកទៅលើព្រះយេហូវ៉ា
a អត្ថបទនេះនឹងជួយពួកអ្នកដែលមានអារម្មណ៍ថាពិបាកស៊ូទ្រាំនឹងទុក្ខលំបាក ឬថាភារកិច្ចណាមួយគឺហួសពីសមត្ថភាពរបស់ពួកគេ។ យើងនឹងរៀនអំពីរបៀបដែលព្រះយេហូវ៉ាអាចពង្រឹងកម្លាំងយើង និងអ្វីដែលយើងអាចធ្វើដើម្បីទទួលជំនួយពីលោក។
b ឈ្មោះខ្លះបានត្រូវផ្លាស់ប្ដូរ។
c ការពណ៌នាអំពីរូបភាព៖ បងស្រីម្នាក់ដែលថ្លង់ស្រមៃគិតអំពីសេចក្ដីសន្យាពីគម្ពីរ ហើយមើលវីដេអូ ដើម្បីជួយគាត់ឲ្យស្រមៃឃើញថាជីវិតរបស់គាត់នឹងទៅជាយ៉ាងណាក្នុងពិភពលោកថ្មី។