អត្ថបទសិក្សា ២២
ចម្រៀងលេខ១២៧ ខ្ញុំគួរជាមនុស្សដែលព្រះពេញចិត្ត
របៀបធ្វើឲ្យការស្វែងយល់ចិត្តគ្នានាំទៅដល់ការសម្រេចចិត្តល្អ
«អ្វីក្នុងចិត្ត . . . មានតម្លៃថ្លៃណាស់»។—១ពេ. ៣:៤
ចំណុចផ្ដោត
អ្វីដែលគូសង្សារអាចធ្វើដើម្បីទទួលជោគជ័យក្នុងការស្វែងយល់ចិត្តគ្នា និងរបៀបដែលអ្នកឯទៀតក្នុងក្រុមជំនុំអាចគាំទ្រពួកគេ។
១-២. តើអ្នកខ្លះមានអារម្មណ៍យ៉ាងណាចំពោះការស្វែងយល់ចិត្តគ្នា?
ការស្វែងយល់ចិត្តគ្នាអាចជាគ្រាដ៏រំភើបនិងសប្បាយរីករាយខ្លាំងណាស់។ បើអ្នកកំពុងស្វែងយល់ចិត្តគ្នា អ្នកច្បាស់ជាចង់ឲ្យវាទៅរលូន។ ចំពោះគូសង្សារជាច្រើន នោះគឺជាគ្រាដ៏សប្បាយ។ បងស្រីស៊ីយ៉ានaពីប្រទេសអេត្យូពីនិយាយថា៖ «គ្រាដ៏សប្បាយបំផុតមួយក្នុងជីវិតរបស់ខ្ញុំគឺពេលដែលខ្ញុំនិងប្ដីខ្ញុំស្វែងយល់ចិត្តគ្នា។ យើងនិយាយរឿងសំខាន់ៗជាមួយគ្នា ហើយសើចជាមួយគ្នា។ ខ្ញុំសប្បាយចិត្តពេលដែលខ្ញុំដឹងថាខ្ញុំបានរកឃើញបុគ្គលដែលខ្ញុំស្រឡាញ់ ហើយគាត់ក៏ស្រឡាញ់ខ្ញុំវិញដែរ»។
២ ប៉ុន្តែបងប្រុសអាលេសូពីប្រទេសហូឡង់និយាយថា៖ «ខ្ញុំសប្បាយចិត្តស្គាល់ប្រពន្ធរបស់ខ្ញុំច្បាស់ជាងពេលដែលយើងស្វែងយល់ចិត្តគ្នា ប៉ុន្តែពេលនោះយើងក៏មានការពិបាកខ្លះដែរ»។ នៅក្នុងអត្ថបទនេះ យើងនឹងពិចារណាការពិបាកដែលគូអាចមាននិងគោលការណ៍គម្ពីរខ្លះដែលអាចជួយគូឲ្យទទួលជោគជ័យក្នុងការស្វែងយល់ចិត្តគ្នា។ យើងក៏នឹងពិចារណារបៀបដែលបងប្អូនក្នុងក្រុមជំនុំអាចជួយគាំទ្រគូដែលកំពុងស្វែងយល់ចិត្តគ្នាដែរ។
គោលបំណងនៃការស្វែងយល់ចិត្តគ្នា
៣. តើអ្វីជាគោលបំណងនៃការស្វែងយល់ចិត្តគ្នា? (សុភាសិត ២០:២៥)
៣ ទោះជាការស្វែងយល់ចិត្តគ្នាអាចជាគ្រាដ៏សប្បាយក្ដី នេះគឺជាជំហានដ៏សំខាន់ដែលអាចនាំទៅដល់ការរៀបអាពាហ៍ពិពាហ៍។ នៅថ្ងៃរៀបការរបស់ពួកគេ គូប្ដីប្រពន្ធស្បថនៅមុខព្រះយេហូវ៉ាថាពួកគេនឹងស្រឡាញ់គ្នា ហើយគោរពគ្នាទៅវិញទៅមកដរាបណាដែលពួកគេទាំងពីរនាក់នៅរស់។ មុនយើងស្បថអ្វីណាមួយ យើងគួរពិចារណាយ៉ាងដិតដល់អំពីរឿងនោះ។ (សូមអាន សុភាសិត ២០:២៥) នេះគឺពិតមែនពេលស្បថនៅថ្ងៃរៀបអាពាហ៍ពិពាហ៍។ ការស្វែងយល់ចិត្តគ្នាបើកឱកាសឲ្យគូសង្សារស្គាល់គ្នា ហើយធ្វើការសម្រេចចិត្តល្អ។ ជួនកាល ការសម្រេចចិត្តនោះគឺរៀបការ តែជួនកាលពួកគេសម្រេចចិត្តបញ្ឈប់ការស្វែងយល់ចិត្តគ្នា។ បើគូសម្រេចចិត្តបែកផ្លូវគ្នា នេះមិនមានន័យថាការស្វែងយល់ចិត្តគ្នារបស់ពួកគេបានបរាជ័យទេ។ ផ្ទុយទៅវិញ នោះបានសម្រេចគោលបំណងនៃការស្វែងយល់ចិត្តគ្នា គឺជួយពួកគេឲ្យធ្វើការសម្រេចចិត្តល្អ។
៤. ហេតុអ្វីយើងគួរមានទស្សនៈត្រឹមត្រូវចំពោះការស្វែងយល់ចិត្តគ្នា?
៤ ហេតុអ្វីសំខាន់ឲ្យមានទស្សនៈត្រឹមត្រូវចំពោះការស្វែងយល់ចិត្តគ្នា? ពេលបងប្អូននៅលីវមានទស្សនៈត្រឹមត្រូវ ពួកគេនឹងមិនស្វែងយល់ចិត្តគ្នាជាមួយនឹងនរណាដែលពួកគេគ្មានបំណងរៀបការជាមួយទេ។ ប៉ុន្តែ មិនមែនមានតែបងប្អូនដែលនៅលីវប៉ុណ្ណោះទេដែលត្រូវមានទស្សនៈត្រឹមត្រូវ គឺយើងទាំងអស់គ្នាគួរបណ្ដុះឲ្យមានទស្សនៈត្រឹមត្រូវ។ ជាឧទាហរណ៍ អ្នកខ្លះគិតថាបើបុគ្គលពីរនាក់ស្វែងយល់ចិត្តគ្នា ពួកគេត្រូវតែរៀបការ។ តើចិត្តគំនិតបែបនេះមានឥទ្ធិពលយ៉ាងណាមកលើគ្រិស្តសាសនិកនៅលីវ? បងស្រីនៅលីវម្នាក់ឈ្មោះមេលីសាដែលរស់នៅសហរដ្ឋអាម៉េរិករៀបរាប់ថា៖ «ពេលដែលបងប្រុសឬបងស្រីស្វែងយល់ចិត្តគ្នា បងប្អូនខ្លះរំពឹងថាពួកគេនឹងរៀបការ។ ជាលទ្ធផល គូខ្លះដែលកំពុងស្វែងយល់ចិត្តគ្នាបន្ដទំនាក់ទំនងរបស់ពួកគេ សូម្បីតែពួកគេមិនស៊ីគ្នាក៏ដោយ។ គ្រិស្តសាសនិកនៅលីវខ្លះទៀត ជៀសវាងពីការស្វែងយល់ចិត្តគ្នាតែម្ដង។ សម្ពាធនេះអាចនាំឲ្យមានការព្រួយចិត្តខ្លាំងណាស់»។
ចូរស្គាល់គ្នាឲ្យបានច្បាស់
៥-៦. តើគូសង្សារគួរស្វែងយល់អ្វីខ្លះអំពីគ្នា? (ពេត្រុសទី១ ៣:៤)
៥ បើអ្នកកំពុងស្វែងយល់ចិត្តគ្នា តើអ្វីនឹងជួយអ្នកឲ្យសម្រេចចិត្តថារៀបការឬមិនរៀបការ? សូមស្គាល់គ្នាឲ្យច្បាស់។ អ្នកទំនងជាបានស្គាល់អ្វីមួយចំនួនអំពីបុគ្គលនោះរួចហើយមុនអ្នកចាប់ផ្ដើមស្វែងយល់ចិត្តគ្នា។ ប៉ុន្តែ ឥឡូវអ្នកមានឱកាសដើម្បីស្គាល់«អ្វីក្នុងចិត្ត»របស់បុគ្គលនោះ។ (សូមអាន ពេត្រុសទី១ ៣:៤) នេះរួមបញ្ចូលការស្វែងយល់ថែមទៀតអំពីចំណងមិត្តភាពរបស់បុគ្គលនោះជាមួយព្រះយេហូវ៉ា បុគ្គលិកលក្ខណៈ និងរបៀបគិតគូររបស់គាត់។ ក្រោយមក អ្នកគួរតែអាចឆ្លើយសំណួរដូចតទៅនេះ៖ ‹តើបុគ្គលនេះនឹងទៅជាគូអាពាហ៍ពិពាហ៍ដ៏ល្អសម្រាប់ខ្ញុំឬទេ?›។ (សុភ. ៣១:២៦, ២៧, ៣០; អេភ. ៥:៣៣; ១ធី. ៥:៨) ‹តើយើងអាចបំពេញសេចក្ដីត្រូវការខាងផ្លូវចិត្តដល់គ្នាឬទេ? តើយើងអាចរស់នៅជាមួយចំណុចខ្សោយរបស់គ្នាឬទេ?›។ (រ៉ូម ៣:២៣) កាលដែលពួកអ្នកកាន់តែស្គាល់គ្នា សូមចាំថាអ្វីសំខាន់បំផុតគឺមិនមែនពួកអ្នកស្រដៀងគ្នាយ៉ាងណាទេ ប៉ុន្តែគឺអ្នកទាំងពីរអាចសម្របនឹងភាពខុសគ្នារបស់គ្នារៀងៗខ្លួន។
៦ តើមានអ្វីផ្សេងទៀតដែលអ្នកគួរស្វែងយល់អំពីគូពេលដែលស្វែងយល់ចិត្តគ្នា? មុនអ្នកមានអារម្មណ៍ខ្លាំងចំពោះបុគ្គលនោះ អ្នកប្រហែលជាចង់ពិភាក្សាគ្នាអំពីរឿងសំខាន់ៗមួយចំនួន ដូចជាគោលដៅរបស់គាត់។ ប៉ុន្តែចុះយ៉ាងណាអំពីរឿងផ្ទាល់ខ្លួនដូចជាបញ្ហាសុខភាព បញ្ហាលុយកាក់ ឬអតីតកាលខ្លោចផ្សារបស់គាត់ជាដើម? ពេលដែលទើបតែស្វែងយល់ចិត្តគ្នា មិនចាំបាច់ពិភាក្សាគ្រប់រឿងទេ។ (សូមពិនិត្យបន្ថែម យ៉ូហាន ១៦:១២) បើអ្នកមានអារម្មណ៍ថាលឿនពេកឲ្យឆ្លើយសំណួរខ្លះដែលគាត់សួរអ្នក សូមប្រាប់គាត់។ ប៉ុន្តែ ក្រោយមកគាត់នឹងត្រូវដឹងព័ត៌មាននេះដើម្បីធ្វើការសម្រេចចិត្តល្អ។ ដូច្នេះដល់ពេលមួយ អ្នកនឹងត្រូវនិយាយយ៉ាងស្មោះអំពីរឿងទាំងនេះ។
៧. តើគូដែលស្វែងយល់ចិត្តគ្នាអាចស្គាល់គ្នាយ៉ាងច្បាស់តាមរបៀបណា? (សូមមើលផងដែរនូវប្រអប់ដែលមានចំណងជើងថា «ការស្វែងយល់ចិត្តគ្នាពេលរស់នៅឆ្ងាយពីគ្នា») (សូមមើលរូបភាពផងដែរ)
៧ តើអ្នកអាចស្គាល់ធាតុពិតរបស់គូសង្សារយ៉ាងដូចម្ដេច? វិធីល្អបំផុតមួយ គឺនិយាយគ្នាដោយស្មោះនិងឥតលាក់លៀម សួរសំណួរ ហើយយកចិត្តទុកដាក់ស្ដាប់។ (សុភ. ២០:៥; យ៉ា. ១:១៩) យ៉ាងនេះ អ្នកប្រហែលជាអាចសម្រេចចិត្តធ្វើអ្វីជាមួយគ្នាដែលងាយស្រួលឲ្យនិយាយគ្នា ដូចជាញ៉ាំអីជាមួយគ្នា ដើរជាមួយគ្នានៅទីសាធារណៈ និងផ្សព្វផ្សាយជាមួយគ្នា។ អ្នកក៏អាចស្វែងយល់អំពីគ្នា ពេលអ្នកចំណាយពេលជាមួយមិត្តភក្តិនិងក្រុមគ្រួសារ។ បន្ថែមទៅទៀត ចូររៀបចំឲ្យមានសកម្មភាពផ្សេងៗដែលនឹងជួយអ្នកឲ្យដឹងអំពីរបៀបដែលបុគ្គលនោះប្រព្រឹត្តក្នុងស្ថានភាពផ្សេងៗ និងជាមួយបុគ្គលផ្សេងៗ។ សូមកត់សម្គាល់អំពីអ្វីដែលបងអេស្វីនពីប្រទេសហូឡង់បានព្យាយាមធ្វើ។ គាត់និយាយអំពីការស្វែងយល់ចិត្តគ្នាជាមួយបងអាលីស្យាថា៖ «យើងរកមើលថាមានសកម្មភាពអ្វីខ្លះដែលនឹងជួយយើងឲ្យស្វែងយល់អំពីគ្នាទៅវិញទៅមក។ សកម្មភាពទាំងនោះភាគច្រើនគឺធម្មតា ដូចជាធ្វើម្ហូបជាមួយគ្នាឬធ្វើកិច្ចការផ្ទះជាមួយគ្នា។ ក្នុងអំឡុងសកម្មភាពទាំងនោះ យើងឃើញភាពខ្លាំងនិងភាពខ្សោយរបស់គ្នា»។
បើអ្នកទាំងពីរធ្វើអ្វីផ្សេងៗដែលនាំឲ្យមានការសន្ទនានោះពួកអ្នកទំនងជានឹងស្គាល់គ្នាកាន់តែច្បាស់ (សូមមើលវគ្គ៧-៨)
៨. តើគូសង្សារអាចទទួលប្រយោជន៍យ៉ាងណាពីការសិក្សាជាមួយគ្នា?
៨ អ្នកក៏អាចស្គាល់គ្នាដោយសិក្សាប្រធានបទផ្សេងៗពីគម្ពីរ។ បើអ្នកទាំងពីររៀបការនៅថ្ងៃខាងមុខ ពួកអ្នកនឹងត្រូវលៃពេលជាទៀងទាត់សម្រាប់ការគោរពប្រណិប័តន៍ជាក្រុមគ្រួសារ ដើម្បីឲ្យព្រះធ្វើជាផ្នែកដ៏សំខាន់ចាំបាច់ក្នុងចំណងអាពាហ៍ពិពាហ៍របស់អ្នក។ (អទ. ៤:១២) យ៉ាងនេះ សូមលៃទុកពេលជាទៀងទាត់ដើម្បីសិក្សាជាមួយគ្នាក្នុងអំឡុងពេលដែលអ្នកស្វែងយល់ចិត្តគ្នា។ ពិតមែនថាគូដែលស្វែងយល់ចិត្តគ្នាមិនទាន់ក្លាយជាក្រុមគ្រួសារ ហើយបងប្រុសមិនទាន់ក្លាយទៅជាប្រមុខរបស់បងស្រីនៅឡើយ។ ប៉ុន្តែ ដោយសិក្សាជាមួយគ្នាជាទៀងទាត់ អ្នកអាចស្គាល់ថាម្នាក់ៗមានចំណងមិត្តភាពយ៉ាងណាជាមួយព្រះយេហូវ៉ា។ ប្ដីប្រពន្ធមួយគូដែលរស់នៅសហរដ្ឋអាម៉េរិកឈ្មោះម៉ាក់ស៍និងឡៃសាបានរកឃើញប្រយោជន៍មួយទៀត។ បងម៉ាក់ស៍និយាយថា៖ «ពេលដែលយើងទើបតែស្វែងយល់ចិត្តគ្នា យើងចាប់ផ្ដើមសិក្សាសៀវភៅផ្សេងៗអំពីការស្វែងយល់ចិត្តគ្នា អាពាហ៍ពិពាហ៍ និងជីវិតគ្រួសារ។ សៀវភៅទាំងនោះបើកឱកាសឲ្យយើងនិយាយគ្នាអំពីរឿងសំខាន់ៗជាច្រើនដែលធម្មតាពិបាកលើកយកមកនិយាយគ្នា»។
កត្តាផ្សេងទៀតដែលត្រូវពិចារណា
៩. តើគូសង្សារគួរពិចារណាកត្តាអ្វីខ្លះពេលសម្រេចចិត្តថានឹងប្រាប់អ្នកណាអំពីការស្វែងយល់ចិត្តគ្នា?
៩ តើអ្នកគួរប្រាប់អ្នកណាខ្លះថាអ្នកកំពុងស្វែងយល់ចិត្តគ្នា? នេះគឺជាអ្វីដែលអ្នកគួរសម្រេចចិត្តរួមគ្នា។ ពេលទើបចាប់ផ្ដើមមានទំនាក់ទំនងស្នេហា អ្នកប្រហែលជាគិតពិចារណាកំណត់ចំនួនមនុស្សដែលអ្នកនឹងប្រាប់។ (សុភ. ១៧:២៧) ដោយធ្វើដូច្នេះ អ្នកប្រហែលជាជៀសវាងពីសម្ពាធនិងសំណួរដែលមិនចាំបាច់។ ក៏ប៉ុន្តែ បើអ្នកមិនប្រាប់អ្នកណាសោះ អ្នកប្រហែលជាញែកខ្លួនតែពីរនាក់ដើម្បីមិនឲ្យអ្នកណាដឹង។ នេះអាចនាំឲ្យមានគ្រោះថ្នាក់។ ដូច្នេះ គឺជាការឈ្លាសវៃយ៉ាងហោចណាស់ឲ្យប្រាប់ពួកអ្នកដែលអាចផ្ដល់យោបល់ល្អ និងជួយអ្នកតាមរបៀបផ្សេងៗ។ (សុភ. ១៥:២២) ជាឧទាហរណ៍ អ្នកអាចប្រាប់សមាជិកខ្លះក្នុងក្រុមគ្រួសារ មិត្តភក្តិដែលមានភាពចាស់ទុំ ឬអ្នកចាស់ទុំ។
១០. តើគូសង្សារអាចធ្វើអ្វីដើម្បីរក្សាភាពថ្លៃថ្នូរពេលស្វែងយល់ចិត្តគ្នា? (សុភាសិត ២២:៣)
១០ តើតាមរបៀបណាអ្នកអាចឲ្យការស្វែងយល់ចិត្តគ្នាបន្តមានភាពថ្លៃថ្នូរ? កាលដែលអារម្មណ៍ស្នេហារបស់អ្នកទាំងពីរកើនឡើង អ្នកនឹងកាន់តែចូលចិត្តចំណាយពេលជាមួយគ្នា។ តើអ្វីអាចជួយអ្នកទាំងពីរឲ្យរក្សាភាពស្អាតស្អំខាងសីលធម៌? (១កូ. ៦:១៨) សូមជៀសវាងពីការសន្ទនាបែបប្រាសចាកសីលធម៌ ការនៅតែពីរនាក់ និងពីការផឹកស្រាហួសប្រមាណ។ (អេភ. ៥:៣) អ្វីទាំងនេះអាចនាំឲ្យកាន់តែមានចំណង់ផ្លូវភេទ ហើយធ្វើឲ្យអ្នកមិនសូវតាំងចិត្តធ្វើអ្វីដែលត្រឹមត្រូវ។ គឺជាការល្អឲ្យនិយាយគ្នាជារឿយៗដើម្បីជៀសវាងពីការធ្វើអ្វីផ្ដេសផ្ដាសដែលនឹងនាំឲ្យព្រះយេហូវ៉ាមិនពេញចិត្ត។ (សូមអាន សុភាសិត ២២:៣) សូមកត់សម្គាល់អ្វីដែលបានជួយបងដាវីតនិងបងអាលម៉ាសពីប្រទេសអេត្យូពី ពួកគាត់និយាយថា៖ «យើងបានចំណាយពេលជាមួយគ្នានៅកន្លែងដែលមានមនុស្សច្រើនឬនៅជាមួយមិត្តភក្តិរបស់យើង។ យើងមិនដែលនៅក្នុងផ្ទះតែពីរនាក់ ឬនៅក្នុងឡានតែពីរនាក់ប៉ុណ្ណោះនោះទេ។ ដូច្នេះ យើងបានជៀសវាងពីស្ថានភាពដែលអាចនាំឲ្យធ្លាក់ក្នុងការល្បួង»។
១១. តើគូដែលស្វែងយល់ចិត្តគ្នាគួរពិចារណាអំពីអ្វីខ្លះពេលធ្វើការសម្រេចចិត្តអំពីការបង្ហាញអារម្មណ៍ស្នេហា?
១១ ចុះយ៉ាងណាអំពីការបង្ហាញអារម្មណ៍ស្នេហា? កាលដែលសេចក្ដីស្រឡាញ់កាន់តែខ្លាំងទៅៗចំពោះគ្នា អ្នកប្រហែលជាសម្រេចចិត្តបង្ហាញសេចក្ដីស្រឡាញ់តាមរបៀបសមរម្យ។ ប៉ុន្តែ បើអ្នកមានចំណងផ្លូវភេទខ្លាំង នោះអាចធ្វើឲ្យអ្នកពិបាកធ្វើការសម្រេចចិត្តដោយការថ្លឹងថ្លែងត្រឹមត្រូវ។ (សាឡូ. ១:២; ២:៦) ការបង្ហាញអារម្មណ៍ស្នេហាក៏អាចងាយនាំឲ្យធ្វើអ្វីដែលខុស។ (សុភ. ៦:២៧) ដូច្នេះ ពេលដែលអ្នកចាប់ផ្ដើមស្វែងយល់ចិត្តគ្នា សូមនិយាយគ្នាថានឹងដាក់កម្រិតណាខ្លះចំពោះការប្រព្រឹត្តដែលសមស្របតាមគោលការណ៍គម្ពីរ។b (១ថែ. ៤:៣-៧) ក្នុងនាមជាគូ សូមពិចារណាជាមួយគ្នាថា ‹តើមនុស្សនៅតំបន់ដែលយើងរស់នៅមានទស្សនៈយ៉ាងណាចំពោះរបៀបដែលយើងបង្ហាញសេចក្ដីស្រឡាញ់ចំពោះគ្នា? តើការប្រព្រឹត្តទាំងនេះអាចជំរុញឲ្យយើងណាម្នាក់មានអារម្មណ៍ស្រើបស្រាលឬទេ?›។
១២. តើគូដែលកំពុងស្វែងយល់ចិត្តគ្នាគួរដឹងអំពីអ្វីស្ដីអំពីបញ្ហានិងការខ្វែងគំនិតគ្នាក្នុងអំឡុងពេលដែលស្វែងយល់ចិត្តគ្នា?
១២ តើតាមរបៀបណាអ្នកអាចដោះស្រាយបញ្ហានិងការខ្វែងគំនិតគ្នា? ចុះបើអ្នកខ្វែងគំនិតគ្នាម្ដងម្កាល តើនេះមានន័យថាអ្នកទាំងពីរមិនស៊ីគ្នាឬទេ? មិនតែងតែដូច្នេះទេ។ គូទាំងឡាយជួនកាលមិនយល់ស្របគ្នា។ ចំណងអាពាហ៍ពិពាហ៍រឹងមាំគឺរវាងមនុស្សពីរនាក់ដែលគោរពគ្នា ហើយសុខចិត្តសម្របខ្លួនតាមចំណង់ចំណូលចិត្តរបស់គ្នា។ ដូច្នេះ របៀបដែលពួកអ្នកដោះស្រាយបញ្ហានៅឥឡូវនេះ អាចបង្ហាញថាអាពាហ៍ពិពាហ៍របស់ពួកអ្នកនឹងជោគជ័យឬយ៉ាងណា។ សូមអ្នកទាំងពីរសួរខ្លួនថា ‹តើយើងអាចដោះស្រាយបញ្ហាដោយចិត្តស្លូតបូតនិងដោយគោរពគ្នាឬទេ? តើយើងអាចទទួលយកចំណុចខ្សោយរបស់ខ្លួន ហើយព្យាយាមធ្វើឲ្យបានល្អជាងឬទេ? តើយើងឆាប់ចុះចូល ឆាប់សុំទោស និងឆាប់អភ័យទោសឬទេ?›។ (អេភ. ៤:៣១, ៣២) ទោះជាយ៉ាងនោះក៏ដោយ បើអ្នកតែងតែឈ្លោះគ្នាឬខ្វែងគំនិតគ្នាក្នុងអំឡុងពេលដែលអ្នកទាំងពីរស្វែងយល់ចិត្តគ្នា នោះក្រោយពីរៀបការស្ថានភាពនោះទំនងជាមិនអាចប្រសើរឡើងឡើយ។ បើអ្នកយល់ថាគូរបស់អ្នកមិនស័ក្ដិសមនឹងអ្នក ការបញ្ចប់ការស្វែងយល់ចិត្តគ្នាគឺជាការសម្រេចចិត្តដ៏ល្អបំផុតសម្រាប់អ្នកទាំងពីរ។
១៣. តើមានកត្តាអ្វីខ្លះអាចជួយគូសង្សារឲ្យដឹងថាពួកគេគួរស្វែងយល់ចិត្តគ្នាយូរប៉ុនណា?
១៣ តើអ្នកគួរចំណាយពេលស្វែងយល់ចិត្តគ្នាយូរប៉ុនណា? ការសម្រេចចិត្តយ៉ាងតក់ក្រហល់ច្រើនតែនាំឲ្យមានលទ្ធផលមិនល្អ។ (សុភ. ២១:៥) ដូច្នេះ អ្នកគួរតែស្វែងយល់ចិត្តគ្នាយូរល្មមដើម្បីឲ្យអ្នកស្គាល់គូសង្សារយ៉ាងច្បាស់។ ប៉ុន្តែ អ្នកមិនគួរអូសបន្លាយពេលស្វែងយល់ចិត្តគ្នាដោយមិនចាំបាច់ទេ។ គម្ពីរចែងថា៖ «សេចក្ដីសង្ឃឹមដែលក្រនឹងកើតឡើង នាំឲ្យក្រៀមក្រំចិត្ត»។ (សុភ. ១៣:១២) ម្យ៉ាងទៀត កាលដែលអ្នកកាន់តែចំណាយពេលស្វែងយល់ចិត្តគ្នា គឺប្រហែលជាកាន់តែពិបាកឲ្យទប់ទល់ការល្បួងខាងផ្លូវភេទ។ (១កូ. ៧:៩) ជាជាងផ្ដោតអារម្មណ៍ទៅលើរយៈពេលដែលអ្នកស្វែងយល់ចិត្តគ្នា អ្នកអាចសួរខ្លួនថា ‹តើមានអ្វីទៀតដែលខ្ញុំត្រូវស្វែងយល់អំពីគូសង្សារដើម្បីធ្វើការសម្រេចចិត្ត?›។
តើអ្នកឯទៀតអាចជួយគាំទ្រគូដែលកំពុងស្វែងយល់ចិត្តគ្នាតាមរបៀបណា?
១៤. តើអ្នកឯទៀតអាចជួយគាំទ្រគូដែលកំពុងស្វែងយល់ចិត្តគ្នាតាមរបៀបណាខ្លះ? (សូមមើលរូបភាពផងដែរ)
១៤ បើយើងស្គាល់គូដែលកំពុងស្វែងយល់ចិត្តគ្នា តើតាមរបៀបណាយើងអាចជួយពួកគេ? យើងអាចអញ្ជើញពួកគេឲ្យបរិភោគអាហារ គោរពប្រណិប័តន៍ជាក្រុមគ្រួសារ ឬលេងកម្សាន្តជាមួយយើង។ (រ៉ូម ១២:១៣) តាមរបៀបទាំងនេះ ពួកគេប្រហែលជាអាចមានឱកាសស្គាល់គ្នាកាន់តែច្បាស់។ ប្រហែលអ្នកអាចជួយពួកគេដោយចេញទៅក្រៅជាមួយពួកគេ ធ្វើដំណើរជាមួយពួកគេឬអញ្ជើញពួកគេឲ្យមកផ្ទះរបស់អ្នកដើម្បីជួយពួកគេមិនឲ្យនៅតែពីរនាក់។ (កាឡ. ៦:១០) បងអាលីស្យាដែលបានត្រូវរៀបរាប់នៅខាងលើនឹកចាំអំពីអ្វីដែលបានជួយគាត់និងបងអេស្វីន។ គាត់និយាយថា៖ «យើងពិតជាសប្បាយរីករាយពេលដែលបងប្អូនខ្លះនិយាយថា បើយើងត្រូវការកន្លែងចំណាយពេលជាមួយគ្នា សូមមកផ្ទះរបស់ពួកគេដើម្បីយើងមិននៅតែពីរនាក់»។ បើអ្នកបានត្រូវសុំឲ្យនៅជាមួយ សូមចាត់ទុកថានោះជាឯកសិទ្ធិ។ សូមប្រយ័ត្នកុំទុកគូឲ្យនៅតែពីរនាក់នៅកន្លែងដែលគ្មានអ្នកណានៅជិត តែសូមស្វែងយល់អំពីពេលណាដែលពួកគេត្រូវការនិយាយរឿងផ្ទាល់ខ្លួន ហើយពេលនោះសូមកុំនៅក្បែរពួកគេពេក។—ភី. ២:៤
បើយើងស្គាល់គូដែលកំពុងស្វែងយល់ចិត្តគ្នា យើងអាចរកវិធីផ្សេងៗដើម្បីជួយគាំទ្រពួកគេ (សូមមើលវគ្គ១៤-១៥)
១៥. តើមិត្តភក្ដិអាចធ្វើអ្វីទៀតដើម្បីជួយគូសង្សារ? (សុភាសិត ១២:១៨)
១៥ យើងក៏អាចគាំទ្រគូដែលកំពុងស្វែងយល់ចិត្តគ្នាតាមរយៈអ្វីដែលយើងនិយាយឬមិននិយាយ។ ជួនកាលយើងប្រហែលជាត្រូវចេះទប់ចិត្ត។ (សូមអាន សុភាសិត ១២:១៨) ជាឧទាហរណ៍ យើងប្រហែលជាចង់ប្រាប់អ្នកឯទៀតថាមានបងប្អូនមួយគូកំពុងចាប់ផ្ដើមស្វែងយល់ចិត្តគ្នា។ ប៉ុន្តែ គូនោះប្រហែលជាចង់ប្រាប់ដំណឹងនេះដោយខ្លួនឯង។ យើងមិនគួរនិយាយដើមគូដែលស្វែងយល់ចិត្តគ្នា ឬរិះគន់ពួកគេអំពីរឿងផ្ទាល់ខ្លួនរបស់ពួកគេទេ។ (សុភ. ២០:១៩; រ៉ូម ១៤:១០; ១ថែ. ៤:១១) យើងក៏មិនគួរនិយាយអ្វីឬក៏សួរសំណួរដែលធ្វើឲ្យគូដែលកំពុងស្វែងយល់ចិត្តគ្នាមានអារម្មណ៍ថាបង្ខំពួកគេឲ្យរៀបការ។ បងស្រីម្នាក់ឈ្មោះអេលីសនិងប្ដីរបស់គាត់នឹកចាំថា៖ «យើងមានអារម្មណ៍ខ្មាសពេលអ្នកឯទៀតសួរយើងអំពីគម្រោងរៀបអាពាហ៍ពិពាហ៍ ពេលដែលយើងមិនទាន់បានពិភាក្សាគ្នាអំពីនោះនៅឡើយ»។
១៦. តើយើងគួរមានប្រតិកម្មយ៉ាងណាបើគូដែលកំពុងស្វែងយល់ចិត្តគ្នាបែកគ្នា?
១៦ ចុះបើគូសម្រេចចិត្តបញ្ឈប់ការស្វែងយល់ចិត្តគ្នា? យើងគួរជៀសវាងពីការជ្រៀតជ្រែកក្នុងរឿងនោះឬកាន់ជើងខាងណាមួយ។ (១ពេ. ៤:១៥) បងស្រីម្នាក់ឈ្មោះលេអានិយាយថា៖ «ខ្ញុំបានឮអ្នកឯទៀតនិយាយស្មានៗអំពីមូលហេតុដែលខ្ញុំនិងបងប្រុសម្នាក់បែកគ្នា។ ខ្ញុំពិតជាឈឺចិត្តខ្លាំងណាស់!»។ ដូចបានត្រូវរៀបរាប់នៅខាងលើ ការបែកគ្នាមិនតែងតែមានន័យថាការស្វែងយល់ចិត្តគ្នាគឺបរាជ័យទេ។ តាមធម្មតា នេះមានន័យថាការស្វែងយល់ចិត្តគ្នាបានសម្រេចគោលបំណងរបស់វា គឺជួយគូឲ្យធ្វើការសម្រេចចិត្តល្អ។ ទោះជាយ៉ាងនោះក៏ដោយ ការសម្រេចចិត្តនោះប្រហែលជាបាននាំឲ្យពួកគេខូចចិត្ត និងមានអារម្មណ៍ឯកោ។ ដូច្នេះ យើងអាចរកវិធីដើម្បីជួយគាំទ្រពួកគេ។—សុភ. ១៧:១៧
១៧. តើគូដែលកំពុងស្វែងយល់ចិត្តគ្នាគួរបន្តធ្វើអ្វី?
១៧ ដូចយើងបានឃើញ ការស្វែងយល់ចិត្តគ្នាអាចមានការពិបាក តែក៏អាចជាអ្វីដែលធ្វើឲ្យអរសប្បាយដែរ។ បងជេស៊ីកានឹកចាំថា៖ «និយាយឲ្យត្រង់ ការស្វែងយល់ចិត្តគ្នាតម្រូវឲ្យខំប្រឹង តែខ្ញុំសប្បាយចិត្តដែលយើងបានប្រើពេលវេលានិងកម្លាំងដើម្បីស្គាល់គ្នាឲ្យបានច្បាស់»។ បើអ្នកជាគូដែលកំពុងស្វែងយល់ចិត្តគ្នា សូមបន្តព្យាយាមស្គាល់គ្នាឲ្យបានច្បាស់។ បើអ្នកធ្វើដូច្នេះ នោះការស្វែងយល់ចិត្តគ្នារបស់អ្នកនឹងជួយអ្នកទាំងពីរឲ្យធ្វើការសម្រេចចិត្តដ៏ឈ្លាសវៃ។
ចម្រៀងលេខ៤៩ ធ្វើឲ្យព្រះយេហូវ៉ាមានចិត្តត្រេកអរ
a ឈ្មោះខ្លះបានត្រូវផ្លាស់ប្ដូរ
b ការស្ទាបអង្អែលអវយវៈភេទរបស់បុគ្គលឯទៀតគឺជាអំពើប្រាសចាកសីលធម៌ខាងផ្លូវភេទ ហើយតម្រូវឲ្យអ្នកចាស់ទុំក្រុមជំនុំបង្កើតគណៈកម្មាធិការវិនិច្ឆ័យ។ ក្នុងករណីខ្លះ ការស្ទាបអង្អែលដោះនិងការសន្ទនាបែបប្រាសចាកសីលធម៌តាមរយៈការផ្ញើសារឬដោយនិយាយតាមទូរស័ព្ទ ក៏អាចនាំទៅដល់ការបង្កើតគណៈកម្មាធិការវិនិច្ឆ័យផងដែរ។