តើគម្ពីរចែងយ៉ាងណាអំពីចិត្តសេរី? តើព្រះកំណត់វាសនាអ្នកឬ?
ចម្លើយពីគម្ពីរ
ព្រះឲ្យកិត្តិយសយើងដោយឲ្យយើងមានចិត្តសេរី។ វាគឺជាសមត្ថភាពដែលយើងអាចធ្វើការសម្រេចចិត្តដោយខ្លួនឯង មិនមែនព្រះឬវាសនាកំណត់ទុកជាមុនអំពីអ្វីដែលយើងធ្វើទេ។ សូមពិចារណាអំពីអ្វីដែលគម្ពីរបង្រៀន។
ព្រះបានបង្កើតមនុស្សឲ្យមានភាពដូចលោក។ (ដើមកំណើត ១:២៦) ខុសពីសត្វដែលធ្វើអ្វីដោយសភាវគតិ យើងមានភាពដូចព្រះដែលជាអ្នកបង្កើត ក្នុងន័យថាយើងមានសមត្ថភាពបង្ហាញគុណសម្បត្តិដូចលោក ដូចជាសេចក្ដីស្រឡាញ់និងយុត្តិធម៌ជាដើម។ ម្យ៉ាងទៀត យើងក៏មានចិត្តសេរីដូចព្រះដែរ។
យើងមានសមត្ថភាពកាន់កាប់មួយកម្រិតធំទៅលើអ្វីដែលកើតឡើងក្នុងជីវិតរបស់យើង។ គម្ពីរលើកទឹកចិត្តយើងឲ្យ«ជ្រើសយកជីវិត . . . [ដោយ]ស្ដាប់តាម[ព្រះ]» ពោលគឺសម្រេចចិត្តស្ដាប់បង្គាប់លោក។ (ការបំភ្លឺច្បាប់ ៣០:១៩, ២០) ដូច្នេះគឺសមហេតុផលហេតុដែលយើងត្រូវមានចិត្តសេរីដើម្បីធ្វើដូច្នេះ។ ព្រះមិនបង្ខំយើងឲ្យធ្វើតាមលោកទេ តែលោកបានជំរុញចិត្តយើងយ៉ាងកក់ក្ដៅថា៖«បើអ្នករាល់គ្នាយកចិត្តទុកដាក់ធ្វើតាមបញ្ញត្តិខ្ញុំ នោះសេចក្ដីសុខសាន្តរបស់អ្នករាល់គ្នានឹងបានដូចជាទន្លេ»។—អេសាយ ៤៨:១៨
ជីវិតរបស់យើងជោគជ័យឬបរាជ័យមិនមែនកំណត់ដោយព្រេងវាសនាទេ។ បើយើងចង់ជោគជ័យក្នុងការងារ យើងត្រូវឧស្សាហ៍ធ្វើការ។ គម្ពីរចែងថា៖«អ្វីក៏ដោយដែលដៃរបស់អ្នកអាចធ្វើបាន ចូរធ្វើឲ្យអស់ពីកម្លាំងចុះ»។ (អ្នកទូន្មាន ៩:១០) គម្ពីរក៏ចែងដែរថា៖«គម្រោងរបស់មនុស្សឧស្សាហ៍នឹងបានជោគជ័យជាមិនខាន»។—សុភាសិត ២១:៥
ចិត្តសេរីគឺជាអំណោយវិសេសពីព្រះ ហេតុនេះយើងអាចសម្រេចចិត្តស្រឡាញ់ព្រះ«អស់ពីដួងចិត្ត» មិនមែនដោយបង្ខំចិត្តទេ តែដោយផុសចេញពីចិត្តយើងតែម្ដង។—ម៉ាថាយ ២២:៣៧
តើព្រះកាន់កាប់លើអ្វីៗទាំងអស់ឬ?
គម្ពីរបង្រៀនថាព្រះមានឫទ្ធានុភាពដ៏ខ្លាំងក្លាបំផុត។ នេះបញ្ជាក់ថាឫទ្ធានុភាពរបស់លោកគ្មានកម្រិតទេ ហើយក៏គ្មានអ្នកណាមានឫទ្ធានុភាពខ្លាំងជាងលោកដែរ។ (យ៉ូប ៣៧:២៣; អេសាយ ៤០:២៦) ប៉ុន្តែ លោកមិនប្រើឫទ្ធានុភាពរបស់លោកដើម្បីកាន់កាប់អ្វីៗទាំងអស់ឡើយ។ ជាឧទាហរណ៍ គម្ពីរចែងថាព្រះបាន«ទប់ចិត្ត»ឬអត់ធ្មត់នឹងបាប៊ីឡូននៅសម័យបុរាណដែលជាសត្រូវរបស់រាស្ត្រលោក។ (អេសាយ ៤២:១៤) ស្រដៀងគ្នាដែរ នៅសព្វថ្ងៃនេះលោកសម្រេចចិត្តអត់ធ្មត់ចំពោះពួកអ្នកដែលប្រើចិត្តសេរីតាមរបៀបមិនត្រឹមត្រូវ ដែលនាំឲ្យអ្នកឯទៀតរងទុក្ខ។ ប៉ុន្តែ លោកនឹងមិនអត់ធ្មត់រហូតឡើយ។—ចម្រៀងសរសើរព្រះ ៣៧:១០, ១១