ប៉ូលិសជូនយ៉ូសែបទៅផ្សព្វផ្សាយ
បើអ្នកជាសាក្សីព្រះយេហូវ៉ាម្នាក់ សូមស្រមៃថាពួកប៉ូលិសបានជូនអ្នកទៅផ្សព្វផ្សាយដំណឹងល្អពីផ្ទះមួយទៅផ្ទះមួយ។ តើអ្នកមានអារម្មណ៍យ៉ាងណា? នេះគឺជាបទពិសោធន៍របស់យ៉ូសែបពីប្រទេសមីក្រូណេស៊ី នៅឆ្នាំ២០១៧។ គាត់និងសាក្សីបីនាក់ទៀតបានរួមចំណែកក្នុងសកម្មភាពផ្សព្វផ្សាយពិសេសនៅកោះដាច់ស្រយាលមួយ។
នៅពេលថ្ងៃ សាក្សីទាំងបួននាក់នេះបានទៅដល់កោះដែលមានប្រជាជនប្រហែល៦០០នាក់ជាង ហើយមេភូមិនៅកោះនោះបានចេញមកស្វាគមន៍ពួកគាត់។ យ៉ូសែបបានពន្យល់អ្វីដែលបានកើតឡើងបន្ទាប់មក គាត់និយាយថា៖«មេភូមិបានប្រាប់ថា ប៉ូលិសនៅទីនេះអាចបើកឡានជូនពួកយើងទៅផ្ទះនីមួយៗទាំងអស់បាន។ យើងពិតជាភ្ញាក់ផ្អើលដែលពួកគេស្នើសុំធ្វើដូច្នេះ ប៉ុន្តែយើងបានបដិសេធដោយការគោរព ដោយសារយើងចង់ទៅលេងមនុស្សពីផ្ទះមួយទៅផ្ទះមួយដូចធម្មតា»។
ក្រោយមក សាក្សីទាំងនេះបានដើរទៅជួបអ្នកដែលរស់នៅលើកោះនោះ ហើយព្យាយាមនិយាយជាមួយមនុស្សឲ្យបានច្រើនបំផុតតាមដែលអាចធ្វើបាន។ ពួកគាត់និយាយថា៖«អ្នកដែលរស់នៅទីនេះពិតជារាក់ទាក់ណាស់ ហើយចាប់អារម្មណ៍នឹងដំណឹងដែលយើងផ្សាយ។ ដូច្នេះ យើងចំណាយពេលយូរជាងធម្មតានៅផ្ទះនីមួយៗ»។
នៅពេលរសៀល ប៉ូលិសបានជិះកាត់យ៉ូសែបពីរដង ហើយដល់លើកទី៣ ពួកគេក៏ឈប់ឡាន ហើយសួរយ៉ូសែបថា តើយ៉ូសែបចង់ឲ្យពួកគេជូនយ៉ូសែបនិងក្រុមរបស់គាត់ទៅផ្ទះដែលមិនទាន់បានទៅលេងឬទេ? យ៉ូសែបនិយាយថា៖«ខ្ញុំប្រាប់ពួកប៉ូលិសថាអត់ទេ ប៉ុន្តែពួកគេប្រកែកថា‹បងនៅសល់ពេលតែបន្តិចទេ ដូច្នេះយើងនឹងជូនបងទៅផ្ទះដែលមិនទាន់បានទៅ›។ ខ្ញុំពិបាកបដិសេធនឹងពួកគេម្ដងទៀត ដោយសារនៅមានផ្ទះច្រើនគួរសមដែរ ដែលយើងមិនទាន់បានទៅ។ កាលដែលយើងទៅដល់ផ្ទះនីមួយៗ ពួកគេបានប្រាប់ខ្ញុំអំពីឈ្មោះរបស់ម្ចាស់ផ្ទះ ហើយថាបើគោះទ្វារតែគ្មានអ្នកណាបើកទ្វារឲ្យ នោះពួកគេនឹងចុចស៊ីផ្លេដើម្បីឲ្យម្ចាស់ផ្ទះឮ»។
គាត់បន្ថែមទៀតថា៖«ដោយមានជំនួយពីប៉ូលិសនៅទីនោះ យើងអាចទៅលេងផ្ទះទាំងអស់បាន។ យើងបានជូនសៀវភៅជាច្រើនដល់ម្ចាស់ផ្ទះ ហើយណាត់ជួបអស់អ្នកដែលចាប់អារម្មណ៍នៅពេលក្រោយ»។
ប៉ូលិសបានប្រាប់យ៉ូសែបថាពួកគេ«ពិតជាចូលចិត្តប្រាប់ដំណឹងល្អណាស់»។ នៅពេលថ្ងៃលិច សាក្សីមួយក្រុមនេះបានចាកចេញពីកោះនោះ ហើយពួកប៉ូលិសបានឈរនៅឆ្នេរបក់ដៃលាពួកគាត់ដោយស្នាមញញឹម ទាំងកាន់សៀវភៅផ្សេងៗដែលសាក្សីបានចែកដល់ពួកគេ។