អ្វីដែលមនុស្សខ្លះជឿ
សាសនាហិណ្ឌូ
មានទស្សនៈថា ទុក្ខវេទនាគឺបណ្ដាលមកពីការប្រព្រឹត្តរបស់ខ្លួន មិនថាគាត់រស់នៅក្នុងជាតិនេះឬជាតិមុននោះទេ។ អ្នកកាន់តាមសាសនាហិណ្ឌូជឿថា ពួកគេនឹងលែងមានទុក្ខវេទនាពេលពួកគេទៅដល់ឋានម៉ុកសា(moksha) ដែលជាការរួចផុតពីការកើតចាស់ឈឺស្លាប់។
សាសនាអ៊ីស្លាម
មានទស្សនៈថា ទុក្ខវេទនាជាការដាក់ទោសសម្រាប់អំពើបាបនិងជាការសាកល្បងជំនឿ។ បណ្ឌិតម្នាក់(Sayyid Syeed) ដែលជាប្រធានសមាគមអ៊ីស្លាមនៅទ្វីបអាម៉េរិកខាងជើង បាននិយាយថា រឿងខ្លោចផ្សាគឺជាការរំលឹក«ដើម្បីរក្សាចិត្តដឹងគុណចំពោះព្រះសម្រាប់ពរទាំងអស់ដែលយើងមាន និងទទួលស្គាល់ថា យើងត្រូវជួយដល់អស់អ្នកដែលត្រូវការជំនួយ»។
សាសនាយូដា
ជឿថាការរងទុក្ខវេទនាជាផលដែលកើតមកពីការប្រព្រឹត្តរបស់ខ្លួន។ អ្នកកាន់សាសនាយូដាខ្លះនិយាយថា នឹងមានការរស់ឡើងវិញ ក្រោយមកនឹងមានការរកយុត្តិធម៌ជូនអ្នកដែលបានរងទុក្ខ។ និកាយមួយរបស់សាសនាយូដាបង្រៀនអំពីការចាប់ជាតិ ហើយជឿថានេះជាឱកាសឲ្យមនុស្សម្នាក់លាងជម្រះអំពើខុសឆ្គងរបស់ខ្លួនពីជាតិមុន។
ពុទ្ធសាសនា
ជឿថាបុគ្គលម្នាក់អាចចាប់ជាតិច្រើនដង។ ពួកគេជឿថាបុគ្គលនោះមានទុក្ខវេទនារហូតដល់គាត់លែងធ្វើខុស មានអារម្មណ៍ និងទំនោរចិត្តមិនល្អគ្រប់បែបយ៉ាង។ បើបុគ្គលម្នាក់មានប្រាជ្ញា ប្រព្រឹត្តល្អ ហើយមានគំនិតស្អាតស្អំ នោះគាត់អាចទៅដល់ឋាននិព្វាន ជាកន្លែងមួយដែលគ្មានការឈឺចាប់ឬទុក្ខវេទនាទាំងអស់។
លទ្ធិខុងជឺ
ជឿថាទុក្ខវេទនាភាគច្រើនគឺមកពី«កំហុសឆ្គងនិងភាពបរាជ័យរបស់មនុស្ស» នេះគឺយោងទៅតាមសៀវភៅមួយដែលប្រៀបធៀបជំនឿសាសនា (A Dictionary of Comparative Religion)។ លទ្ធិខុងជឺជឿថា បើមនុស្សរស់នៅដោយគុណធម៌នោះមិនសូវមានទុក្ខវេទនាទេ ហើយជឿថាមាន«បុគ្គលវិញ្ញាណដែលមានអំណាចខ្លាំងជាងមនុស្ស។ ដូច្នេះ មនុស្សត្រូវតែទទួលយកវាសនាដែលបុគ្គលវិញ្ញាណទាំងនោះសម្រេចឲ្យកើតឡើងក្នុងជីវិត»។
សាសនារបស់ពួកកុលសម្ព័ន្ធខ្លះៗ
ជឿថាទុក្ខវេទនាគឺមកពីមន្តអាគម។ យោងតាមអ្នកដែលជឿមួយចំនួនបាននិយាយថា រឿងល្អឬអាក្រក់គឺស្រេចទៅលើគ្រូមន្តអាគម ហើយពួកគេអាចកាត់បន្ថយគ្រោះកាចដោយប្រារព្ធពិធីបួងសួងផ្សេងៗ។ ពេលមនុស្សឈឺ ការធ្វើពិធីនិងថ្នាំរបស់គ្រូមន្តអាគម អាចធ្វើឲ្យមនុស្សដែលឈឺជាពីជំងឺបាន។
គ្រិស្តសាសនា
ជឿថាទុក្ខវេទនាគឺបណ្ដាលមកពីមនុស្សពីរនាក់ដំបូងបានធ្វើខុស ដូចគម្ពីរបានរៀបរាប់នៅសៀវភៅលោកុប្បត្តិ។ យ៉ាងណាក៏ដោយ និកាយជាច្រើនបន្ថែមទស្សនៈរបស់ខ្លួនចូលទៅក្នុងសេចក្ដីបង្រៀននេះ។ ជាឧទាហរណ៍ អ្នកកាន់សាសនាកាតូលិកខ្លះបាននិយាយថា ទុក្ខវេទនាដែលគេកំពុងតែជួបគឺអាច‹ជូនជាគ្រឿងបូជាទៅព្រះ›ដើម្បីសុំលោកផ្ដល់ពរដល់ព្រះវិហារ ឬដើម្បីឲ្យលោកសង្គ្រោះបុគ្គលណាម្នាក់ទៀត។
សូមរៀនថែមទៀត
សូមទស្សនាវីដេអូតើព្រះពេញចិត្តនឹងការគោរពប្រណិប័តន៍ទាំងអស់ឬទេ? នៅគេហទំព័ររបស់យើងjw.org/km។