៣. ហេតុអ្វីបានជាមនុស្សល្អរងទុក្ខ?
ហេតុអ្វីសំណួរនេះគឺសំខាន់?
ការដែលឃើញមនុស្សល្អរងទុក្ខ ប្រហែលជាធ្វើឲ្យយើងមានអារម្មណ៍ថានេះមិនយុត្តិធម៌ទេ។ នេះក៏នាំឲ្យអ្នកខ្លះគិតថា មិនចាំបាច់ធ្វើជាមនុស្សល្អទេ ព្រោះមនុស្សល្អនៅតែរងទុក្ខដូចគ្នាដដែល។
សូមគិតពិចារណា
មនុស្សខ្លះជឿថា មនុស្សយើងត្រូវតែរស់នៅដោយមានការកើតចាស់ឈឺស្លាប់។ ពួកគេនិយាយថា អ្នកដែលធ្វើល្អនឹងបានកើតជាមនុស្សដែលមានជីវិតប្រសើរជាង។ អស់អ្នកដែលធ្វើអំពើអាក្រក់នឹងកើតមកដោយមានជីវិតពិបាកវេទនា។ យោងទៅតាមអ្នកដែលមានជំនឿបែបនោះថា សូម្បីតែមនុស្សល្អក៏អាចរងទុក្ខដែរ បើគាត់បានប្រព្រឹត្តអំពើអាក្រក់កាលពី«ជាតិមុន»។ មនុស្សឯទៀតជឿថា មនុស្សល្អរងទុក្ខដោយសារព្រេងវាសនាឬព្រហ្មលិខិតកំណត់។ ក៏ប៉ុន្តែ . . .
តើចាំបាច់ត្រូវរងទុក្ខដែរឬ បើមនុស្សដែលចាប់ជាតិនោះមិនទាំងដឹងថា ជាតិមុនគាត់បានធ្វើអ្វីផង?
ហេតុអ្វីយើងខំថែរក្សាសុខភាព ហើយខំប្រុងប្រយ័ត្នមិនឲ្យជួបគ្រោះថ្នាក់ បើព្រេងវាសនាឬព្រហ្មលិខិតកំណត់សុខមាលភាពរបស់យើងរួចទៅហើយ?
សូមរៀនថែមទៀត
សូមទស្សនាវីដេអូហេតុអ្វីព្រះអនុញ្ញាតឲ្យមានទុក្ខវេទនា? នៅគេហទំព័រjw.org/km។
អ្វីដែលគម្ពីរចែង
ទុក្ខវេទនាមិនមែនជាការដាក់ទោសពីព្រះនោះទេ។
ផ្ទុយទៅវិញ ដូចរឿងជាច្រើនដែលតែងតែកើតឡើងដោយចៃដន្យឬមិនបានគ្រោងទុកជាមុននោះ រឿងមិនល្អអាចកើតមានចំពោះមនុស្សម្នាក់ បើគាត់នៅចំពេលនិងកន្លែងដែលមានរឿងអាក្រក់នោះកើតឡើង។
«ការរត់ប្រណាំងមិនសំរេចនឹងមនុស្សដែលរត់លឿន ការចំបាំងក៏មិនសំរេចនឹងមនុស្សដែលមានកំឡាំងដែរ ឯនំប៉័ង មិនសំរេចនឹងមនុស្សមានប្រាជ្ញា ឬទ្រព្យសម្បត្តិនឹងមនុស្សមានយោបល់ ឬគុណនឹងមនុស្សស្ទាត់ជំនាញនោះដែរ គ្រប់ទាំងអស់ស្រេចនៅពេលវេលានឹងឱកាសវិញ»។—សាស្ដា ៩:១១
ភាពខុសឆ្គងរបស់យើងបណ្ដាលឲ្យមានទុក្ខវេទនា។
មនុស្សតែងតែប្រើពាក្យ«ខុសឆ្គង»ដើម្បីរៀបរាប់ពីអំពើអាក្រក់ដែលបុគ្គលខ្លះបានប្រព្រឹត្ត។ តែក្នុងគម្ពីរក៏បានប្រើពាក្យនេះដើម្បីបញ្ជាក់ពីភាពខុសឆ្គងរបស់មនុស្សទាំងអស់ គឺទាំងមនុស្សល្អនិងមនុស្សអាក្រក់បានឆ្លងមក។
«ទូលបង្គំបានកើតមកក្នុងសេចក្ដីទុច្ចរិត ហើយម្ដាយទូលបង្គំបានមានទំងន់ បង្កើតទូលបង្គំនៅក្នុងអំពើបាប[ឬភាពខុសឆ្គង]ដែរ»។—ទំនុកតម្កើង ៥១:៥
ភាពខុសឆ្គងដែលយើងបានឆ្លងនោះ មានឥទ្ធិពលដ៏ខ្លោចផ្សាលើមនុស្សជាតិ។
ភាពខុសឆ្គងនេះមិនត្រឹមតែបានបង្ខូចចំណងមិត្តភាពយើងជាមួយនឹងអ្នកបង្កើតដ៏អស្ចារ្យរបស់យើងប៉ុណ្ណោះទេ តែភាពខុសឆ្គងក៏ធ្វើឲ្យយើងមិនអាចរស់នៅដោយសុខសាន្តជាមួយនឹងអ្វីៗទាំងអស់ដែលព្រះបានបង្កើតមកដែរ។ ដូច្នេះ នេះបាននាំឲ្យមានទុក្ខវេទនាជាខ្លាំង ដល់ខ្លួនយើងនិងមនុស្សជាតិទាំងឡាយផងដែរ។
«កាលខ្ញុំប៉ងប្រាថ្នាធ្វើអ្វីដែលត្រឹមត្រូវ នោះអ្វីដែលអាក្រក់នៅជាប់ជាមួយនឹងខ្ញុំ»។—រ៉ូម ៧:២១
«អ្វីៗទាំងឡាយដែលព្រះបានបង្កើតក៏ថ្ងូរនិងឈឺចាប់ជាមួយគ្នាឥតឈប់ រហូតដល់ឥឡូវនេះ»។—រ៉ូម ៨:២២