សេចក្ដីបង្រៀនដែលផ្ដល់សេចក្ដីសង្ឃឹម
ព្រះបានសន្យាថា នៅថ្ងៃខាងមុខឆាប់ៗនេះ លោកនឹងធ្វើការផ្លាស់ប្ដូរដ៏អស្ចារ្យ។ លោកនឹងបំបាត់ចោលទុក្ខវេទនា ហើយធ្វើឲ្យក្រុមគ្រួសារទាំងអស់នៅផែនដីមានជីវិតសប្បាយរីករាយ។ (ចម្រៀងសរសើរព្រះ ៣៧:១១) ហេតុអ្វីយើងអាចជឿសេចក្ដីសន្យានេះ? ដោយសារ«ព្រះមិនដូចជាមនុស្សដែលចេះកុហកនោះទេ»។ (ជំរឿនបណ្ដាជន ២៣:១៩) សូមពិចារណាអំពីអ្វីខ្លះៗដែលអ្នកបង្កើតរបស់យើងនឹងធ្វើ។
ព្រះនឹងបំផ្លាញចោលមនុស្សទុច្ចរិត
«ពេលជនទុច្ចរិតដុះដូចជាស្មៅ ពេលមនុស្សដែលប្រព្រឹត្តអំពើខុសឆ្គងចម្រុងចម្រើន នោះគឺដើម្បីឲ្យពួកគេត្រូវវិនាសសូន្យទៅតែប៉ុណ្ណោះ»។—ចម្រៀងសរសើរព្រះ ៩២:៧
ដូចយើងបានរៀននៅអត្ថបទមុន អំពើអាក្រក់មានកាន់តែច្រើនឡើងៗ។ នេះមិនគួរធ្វើឲ្យយើងភ្ញាក់ផ្អើលទេ ដោយសារគម្ពីរបានទាយទុកនៅធីម៉ូថេទី២ ៣:១-៥ ថាក្នុងអំឡុង«គ្រាចុងក្រោយបង្អស់»មនុស្សនឹងអាក្រក់ណាស់។ តើគ្រាចុងក្រោយបង្អស់នៃអ្វី? គឺគ្រាចុងក្រោយនៃរបៀបរបបពិភពលោកដែលពោរពេញទៅដោយមនុស្សដែលមិនចង់ស្ដាប់បង្គាប់ព្រះ។ បន្តិចទៀត ព្រះនឹងបំផ្លាញចោលអស់អ្នកដែលមិនព្រមឈប់ធ្វើអ្វីដែលអាក្រក់។ បន្ទាប់មក មានតែមនុស្សល្អដែលរស់នៅផែនដី គឺអស់អ្នកដែលស្ដាប់បង្គាប់ព្រះ។ «មនុស្សសុចរិតនឹងបានផែនដីជាមត៌ក ហើយពួកគេនឹងរស់នៅផែនដីជារៀងរហូត»។—ចម្រៀងសរសើរព្រះ ៣៧:២៩
ព្រះនឹងបំផ្លាញចោលសាថាន
«ព្រះដែលផ្ដល់សេចក្ដីសុខសាន្តនឹង . . . កិនកម្ទេចសាថាន»។—រ៉ូម ១៦:២០
ពេលសាថាន ពួកវិញ្ញាណកំណាច និងមនុស្សទុច្ចរិតទាំងឡាយបានសាបសូន្យទៅ ផែនដីទាំងមូលនឹងមានសន្តិភាព។ អ្នកបង្កើតយើងសន្យាថា៖«នឹងគ្មានអ្នកណាមកបំភ័យ[អ្នក]ឡើយ»។—មីកា ៤:៤
ព្រះនឹងបំបាត់ចោលជំងឺនិងសេចក្ដីស្លាប់
«ត្រសាលរបស់ព្រះនៅជាមួយនឹងមនុស្សជាតិ . . . លោកនឹងជូតអស់ទាំងទឹកភ្នែកចេញពីភ្នែករបស់ពួកគេ ហើយសេចក្ដីស្លាប់នឹងលែងមានទៀត ទុក្ខព្រួយ ការស្រែកយំ និងការឈឺចាប់ ក៏នឹងលែងមានទៀតដែរ»។—ការបើកបង្ហាញ ២១:៣, ៤
ទុក្ខវេទនានិងជំងឺនឹងលែងមានទៀតដោយសារព្រះនឹងបំបាត់ចោលរាល់បញ្ហាទាំងអស់ដែលបណ្ដាលមកពីសាថាន អាដាម អាវ៉ា និងភាពមិនល្អឥតខ្ចោះរបស់យើង។ ជាលទ្ធផល សូម្បីតែ«សេចក្ដីស្លាប់នឹងលែងមានទៀត»។ មនុស្សដែលស្រឡាញ់និងស្ដាប់បង្គាប់អ្នកបង្កើតនឹងរស់ជារៀងរហូត។ ប៉ុន្តែ តើពួកគេនឹងរស់នៅឯណា?
អ្នកបង្កើតរបស់យើងនឹងធ្វើឲ្យផែនដីក្លាយទៅជាសួនឧទ្យាន
«តំបន់ស្ងាត់ជ្រងំនិងតំបន់ហួតហែងនឹងអរសប្បាយ វាលរហោស្ថាននឹងត្រេកអរ ហើយមានផ្ការីកស្គុសស្គាយ»។—អេសាយ ៣៥:១
ពេលព្រះបំផ្លាញចោលមនុស្សទុច្ចរិត ផែនដីនឹងក្លាយទៅជាសួនឧទ្យាន! នៅទីនោះនឹងមានកន្លែងស្អាតជាច្រើន ហើយនឹងមានអាហារជាបរិបូរ។ (ចម្រៀងសរសើរព្រះ ៧២:១៦) មហាសមុទ្រ បឹង និងទន្លេ នឹងស្អាត ហើយនៅក្នុងនោះនឹងមានភាវរស់ជាច្រើន។ សូម្បីតែពាក្យ«កខ្វក់»ក៏នឹងលែងប្រើទៀតដែរ ដោយសារគ្រប់ទីកន្លែងគឺស្អាត។ មនុស្សនឹងសង់ហើយរស់នៅក្នុងផ្ទះរបស់ខ្លួន ហើយគ្មាននរណាម្នាក់ដែលគ្មានផ្ទះ អត់ឃ្លាន ឬក្រទៀតឡើយ។—អេសាយ ៦៥:២១, ២២
ព្រះនឹងប្រោសមនុស្សស្លាប់ឲ្យរស់ឡើងវិញ
«មនុស្ស . . . នឹងត្រូវប្រោសឲ្យរស់ឡើងវិញ»។—សកម្មភាព ២៤:១៥
តើអ្នកចង់ជួបមនុស្សជាទីស្រឡាញ់របស់អ្នកម្ដងទៀតឬទេ? ព្រះដែលមានឫទ្ធានុភាពខ្លាំងក្លាបំផុតនឹងប្រោសឲ្យពួកគេរស់ឡើងវិញក្នុងសួនឧទ្យាននៅផែនដី។ អ្នកនឹងស្គាល់ពួកគេ ហើយពួកគេនឹងស្គាល់អ្នកដែរ។ សូមស្រមៃគិតអំពីអំណរដែលអ្នកនិងពួកគេមាន! ហេតុអ្វីយើងអាចជឿជាក់ថាសេចក្ដីសង្ឃឹមនេះនឹងកើតឡើងពិតមែន? នេះគឺដោយសារគម្ពីរមានកំណត់ហេតុដែលរៀបរាប់អំពីមនុស្សពេញវ័យនិងក្មេងៗ ដែលបានត្រូវប្រោសឲ្យរស់ឡើងវិញដើម្បីជួបជុំជាមួយក្រុមគ្រួសាររបស់ពួកគេ។ បន្ថែមទៅទៀត លោកយេស៊ូច្រើនតែប្រោសមនុស្សស្លាប់ឲ្យរស់ឡើងវិញនៅចំពោះមុខសាក្សីជាច្រើននាក់។—លូកា ៨:៤៩-៥៦; យ៉ូហាន ១១:១១-១៤, ៣៨-៤៤