អ្វីដែលយើងអាចរៀនពីសកលលោក
សកលលោកនៅតែធ្វើឲ្យពួកតារាវិទូកោតស្ងើច។ ជាងពេលមុនៗ សព្វថ្ងៃនេះពួកគេមានឧបករណ៍ទំនើបៗដើម្បីពិនិត្យមើលសកលលោក។ តើពួកគេបានរកឃើញអ្វី?
សកលលោកមានការរៀបចំ។ យោងទៅតាមអត្ថបទមួយក្នុងទស្សនាវដ្ដីអំពីតារាវិទ្យាបានពន្យល់ថា៖ «កាឡាក់ស៊ីនានាមិនមានទីតាំងឥតសណ្ដាប់ធ្នាប់នោះទេ តែពួកវាបានត្រូវរៀបចំឡើងយ៉ាងមានរបៀបរៀបរយហើយតាមលំដាប់»។ (Astronomy) តើនេះអាចកើតឡើងយ៉ាងដូចម្ដេច? អ្នកវិទ្យាសាស្ត្រជឿថាដំណើរការនេះអាចកើតឡើងបានដោយសារថាមពលម្យ៉ាង ហើយពួកគេក៏បានយល់ថា ថាមពលនោះធ្វើឲ្យ«កាឡាក់ស៊ីផ្សេងៗ បណ្ដុំកាឡាក់ស៊ី និងបណ្ដុំកាឡាក់ស៊ីដែលធំជាង . . . មានទម្រង់និងមានរបៀបរៀបរយ»។
ហេតុអ្វីសកលលោកបានត្រូវរៀបចំយ៉ាងអស្ចារ្យបែបនេះ? តើការរៀបចំនេះបានកើតឡើងដោយសារបាតុភូតចៃដន្យឬ? សូមកត់សម្គាល់យោបល់របស់អាឡាន សានដេកដែលបានត្រូវគេស្គាល់ថា «ជាតារាវិទូដ៏ល្បី និងមានឥទ្ធិពលម្នាក់នៅសតវត្សរ៍ទី២០» ហើយគាត់ជឿថាមានព្រះ។
គាត់និយាយថា៖ «មិនអាចមានអ្វីដែលមានរបៀបរៀបរយកើតចេញពីអ្វីដែលឥតសណ្ដាប់ធ្នាប់នោះទេ ត្រូវតែមានអ្នកណាម្នាក់ដែលជាអ្នករៀបចំ»។
សកលលោកបានត្រូវរៀបចំយ៉ាងល្អដើម្បីទ្រទ្រង់ជីវិត។ សូមពិចារណាអំពីថាមពលដែលព្រះអាទិត្យបញ្ចេញ។ បើថាមពលដែលព្រះអាទិត្យបញ្ចេញខ្សោយជាងឬខ្លាំងជាង នោះនឹងមិនមានព្រះអាទិត្យទៀតទេ។
មានច្បាប់និងកម្លាំងធម្មជាតិជាច្រើននៅក្នុងសកលលោកដែលជួយទ្រទ្រង់ជីវិត។ អ្នកនិពន្ធខាងវិទ្យាសាស្ត្រម្នាក់ឈ្មោះអានីល អាណាន់តាស្វាមីបានពន្យល់ថា បើមានច្បាប់ឬថាមពលណាមួយខុសពីឥឡូវ នោះ«ផ្កាយ ភពផ្សេងៗ និងកាឡាក់ស៊ីនឹងមិនអាចកើតមានបានឡើយ ហើយក៏គ្មានជីវិតណាមួយអាចរស់បានដែរ»។
សកលលោកមានផែនដីដែលស្ថិតនៅទីតាំងដ៏ល្អបំផុតសម្រាប់មនុស្សជាតិ។ ផែនដីយើងមានបរិយាកាសត្រឹមត្រូវ មានទឹកគ្រប់គ្រាន់ ហើយមានព្រះចន្ទដែលមានទំហំល្មមដើម្បីទប់លំនឹងផែនដី។ ទស្សនាវដ្ដីមួយបានរៀបរាប់ថា៖ «ភូមិសាស្ត្រ បរិស្ថាន ជីវវិទ្យាបានធ្វើឲ្យភពផែនដីនេះប៉ុណ្ណោះក្លាយជាកន្លែងដែលអាចទ្រទ្រង់ជីវិតមនុស្សបាន» (National Geographic)។a
យោងទៅតាមអ្នកនិពន្ធម្នាក់បានរៀបរាប់ថា ប្រព័ន្ធព្រះអាទិត្យរបស់យើង«គឺឆ្ងាយពីផ្កាយដទៃទៀត»ក្នុងកាឡាក់ស៊ីរបស់យើង។ ប៉ុន្តែ ការនៅឆ្ងាយពីផ្កាយដទៃទៀត នេះបានជួយឲ្យជីវិតនៅលើផែនដីអាចនៅរស់បាន។ បើយើងរស់នៅជិតផ្កាយទាំងនោះ មិនថានៅកណ្ដាលឬនៅជាយនៃកាឡាក់ស៊ីរបស់យើង នោះសារធាតុនៃវិទ្យុសកម្មនឹងបំផ្លាញជីវិតទាំងអស់នៅលើផែនដី។ ផ្ទុយទៅវិញយើងកំពុងរស់នៅទីតាំងមួយដែលអ្នកវិទ្យាសាស្ត្របានហៅថា៖ «តំបន់ដែលជីវិតអាចរស់នៅបាននៃកាឡាក់ស៊ី»។
ដោយផ្អែកលើការយល់ដឹងអំពីសកលលោក រូបវិទូម្នាក់ឈ្មោះផល ដេវីបានសន្និដ្ឋានថា៖ «ខ្ញុំមិនអាចជឿថាយើងមានជីវិតនៅលើសកលលោកនេះ ដោយសារតែការចៃដន្យ ដោយឯកឯង ឬដោយសារមានបាតុភូតដ៏ធំមួយបាននោះទេ . . . ពិតជាមានមូលហេតុដែលយើងមានជីវិតនៅទីនេះ»។ ផល ដេវីមិនបង្រៀនថា ព្រះគឺជាអ្នកបង្កើតសកលលោកនិងជីវិតមនុស្សនោះទេ។ ប៉ុន្តែ តើអ្នកគិតយ៉ាងណា? សកលលោកនិងផែនដីហាក់ដូចជាបានត្រូវរៀបចំឡើងដើម្បីទ្រទ្រង់ជីវិតមនុស្ស។ តើអ្វីទាំងនេះអាចកើតឡើងបាន ដោយសារតែមានអ្នកគ្រោងបង្កើតឬទេ?
a ទស្សនាវដ្ដីនេះ (National Geographic) មិនចង់បង្ហើបថាព្រះជាអ្នកបង្កើតផែនដីនិងមនុស្សនោះទេ។ ផ្ទុយទៅវិញ ពួកគេគ្រាន់តែចង់បញ្ជាក់ថាផែនដីគឺជាកន្លែងល្អបំផុតសម្រាប់ជីវិតមនុស្ស។