២
សួនច្បារដ៏ល្អបំព្រងមួយ
សូមក្រឡេកមើលផែនដីនៅកន្លែងនេះ! របស់ទាំងអស់នេះស្អាតណាស់ហ្ន៎! សូមមើលស្មៅនិងដើមឈើ បុប្ផានិងសត្វទាំងឡាយ។ តើអ្នកអាចមើលឃើញសត្វដំរីនិងសត្វសិង្ហទេ?
តើសួនច្បារដ៏ល្អបំព្រងនេះកើតមានឡើងតាមរបៀបណា? អញ្ចឹង សូមឲ្យយើងពិចារណានូវរបៀបដែលព្រះបានរៀបចំផែនដីឲ្យបានល្អសំរាប់យើង។
ជាបឋម ព្រះបានបង្កើតស្មៅខៀវខ្ចីៗឲ្យគ្របលើដី។ ហើយទ្រង់បានបង្កើតរុក្ខជាតិតូចៗគ្រប់ប្រភេទទាំងអស់ និងព្រៃឈើទាំងឡាយដែរ។ របស់ដែលដុះទាំងអស់នេះជួយធ្វើឲ្យផែនដីជាទីស្អាតមួយ។ ប៉ុន្តែ របស់ទាំងអស់នោះផ្ដល់ប្រយោជន៍ច្រើនជាងនេះទៅទៀត។ របស់ជាច្រើននោះ ផ្ដល់ចំណីអាហារដល់យើង ដែលមានរសជាតិយ៉ាងឆ្ងាញ់ដែរ។
ក្រោយមក ព្រះបានបង្កើតត្រីឲ្យហែលនៅក្នុងទឹក ហើយបក្សាបក្សីឲ្យហើរលើអាកាស។ ទ្រង់បានបង្កើតឆ្កែនិងឆ្មា ហើយនិងសេះជាច្រើន សត្វធំៗនិងសត្វតូចៗទាំងឡាយ។ តើមានសត្វណាខ្លះដែលរស់នៅជិតផ្ទះរបស់អ្នក? តើយើងមិនគួរអរសប្បាយទេឬ ដែលព្រះបានបង្កើតរបស់ទាំងអស់នេះសំរាប់យើងនោះ?
នៅទីបំផុត ព្រះបានធ្វើមួយភាគនៃផែនដីជាកន្លែងដ៏ពិសេសមួយ។ ទ្រង់បានហៅកន្លែងនេះជាសួនច្បារអេដែន។ សួនច្បារនេះជាកន្លែងមួយដ៏សុក្រឹតមែន។ របស់នៅក្នុងនោះ សុទ្ធតែល្អបំព្រងទាំងអស់។ ហើយព្រះមានព្រះហឫទ័យចង់ឲ្យផែនដីទាំងមូល បានដូចសួនច្បារដ៏ស្អាតដែលទ្រង់បានបង្កើតនេះ។
ប៉ុន្តែ សូមមើលរូបភាពនៅក្នុងសួនច្បារនេះម្ដងទៀត។ តើអ្នកដឹងថាព្រះទតឃើញអ្វី ដែលមិនមានក្នុងរូបភាពនេះទេ? សូមឲ្យយើងស្វែងរកចម្លើយ។