១៣
អ័ប្រាហាំ—មិត្តសំឡាញ់របស់ព្រះ
កន្លែងមួយដែលមនុស្សបានទៅរស់នៅ ក្រោយពីទឹកជំនន់នោះគឺជាកន្លែងដែលហៅថា អ៊ើរ។ កន្លែងនេះបានទៅជាក្រុងដ៏សំខាន់មួយ ដែលមានផ្ទះសម្បែងស្អាតៗនៅទីនោះ។ ប៉ុន្តែ ពួកមនុស្សនៅទីនោះបានថ្វាយបង្គំព្រះមិនពិតជាច្រើន។ ពួកគេក៏បានធ្វើយ៉ាងនេះដែរ កាលដែលគេនៅក្រុងបាបិល។ ប្រជាជននៅក្រុងអ៊ើរនិងបាបិលមិនដូចលោកណូអេនិងសិមជាកូនប្រុសរបស់គាត់ទេ ដែលជាអ្នកខំបំរើព្រះយេហូវ៉ាជានិច្ចនោះ។
នៅទីបំផុត ៣៥០ឆ្នាំក្រោយពីទឹកជំនន់មក លោកណូអេដែលជាមនុស្សស្មោះត្រង់ក៏បានស្លាប់ទៅ។ គ្រាន់តែពីរឆ្នាំក្រោយមក បុរសដែលអ្នកឃើញនៅក្នុងរូបភាពនេះបានកើតមក។ គាត់ជាបុរសដ៏ពិសេសណាស់ចំពោះព្រះ។ ឈ្មោះរបស់គាត់ជា អ័ប្រាហាំ។ គាត់បានរស់នៅជាមួយនឹងគ្រួសាររបស់គាត់នៅក្រុងអ៊ើរ។
នៅថ្ងៃមួយព្រះយេហូវ៉ាបានមានបន្ទូលប្រាប់លោកអ័ប្រាហាំថា៖ ‹ចូរចេញពីក្រុងអ៊ើរនិងញាតិសន្ដានឯង ហើយទៅឯស្រុកដែលអញនឹងបង្ហាញឯង›។ តើលោកអ័ប្រាហាំគោរពតាមព្រះ ហើយលះបង់ចោលគ្រប់គ្រឿងស្រណុកនៅក្រុងអ៊ើរនេះទេ? ត្រូវហើយ លោកបានធ្វើអញ្ចឹងមែន។ ហើយដោយសារតែអ័ប្រាហាំបានគោរពតាមព្រះជារៀងរាល់ដងនោះ លោកត្រូវបានល្បីឈ្មោះជា មិត្តសំឡាញ់របស់ព្រះ។
គ្រួសាររបស់លោកអ័ប្រាហាំខ្លះបានទៅជាមួយលោកដែរ នៅពេលដែលលោកបានចាកចេញពីក្រុងអ៊ើរ។ ឪពុករបស់លោកឈ្មោះថេរ៉ា និងឡុតដែលត្រូវជាក្មួយ ព្រមទាំងនាងសារ៉ាជាប្រពន្ធរបស់លោក ក៏បានទៅជាមួយដែរ។ នៅពេលក្រោយមក គេបានមកដល់កន្លែងមួយដែលហៅថា ខារ៉ាន ជាកន្លែងដែលថេរ៉ាបានស្លាប់ទៅ។ ពួកគេបានឃ្លាតកាន់តែឆ្ងាយឡើងពីក្រុងអ៊ើរ។
មួយរយៈក្រោយមក អ័ប្រាហាំនិងគ្រួសារបានចាកចេញពីក្រុងខារ៉ាន ហើយក៏បានមកដល់ស្រុកដែលហៅថា កាណាន។ នៅទីនោះព្រះយេហូវ៉ាបានមានបន្ទូលថា៖ ‹នេះជាស្រុកដែលអញនឹងផ្ដល់ឲ្យទៅកូនចៅរបស់ឯង›។ លោកអ័ប្រាហាំបានតាំងលំនៅក្នុងស្រុកកាណានដោយរស់នៅក្នុងត្រសាល។
ព្រះទ្រង់ក៏ចាប់ផ្ដើមជួយអ័ប្រាហាំ រហូតទាល់តែគាត់មានហ្វូងចៀមនិងសត្វឯទៀតជាច្រើន ហើយនិងអ្នកបំរើរាប់រយនាក់។ ប៉ុន្តែ ចំពោះលោកនិងនាងសារ៉ាឥតមានកូនបង្កើតទេ។
នៅពេលដែលលោកអ័ប្រាហាំបានអាយុ៩៩ឆ្នាំ ព្រះយេហូវ៉ាបានមានបន្ទូលថា៖ ‹អញសន្យាថាឯងនឹងធ្វើជាឪពុកនៃសាសន៍របស់មនុស្សជាច្រើន›។ ប៉ុន្តែតើការនេះអាចកើតឡើងយ៉ាងណាបាន បើអ័ប្រាហាំនិងនាងសារ៉ាឥឡូវនេះមានអាយុចាស់ពេកនឹងមានកូនទៅហើយ?
លោកុប្បត្តិ ១១:២៧-៣២; ១២:១-៧; ១៧:១-៨, ១៥-១៧; ១៨:៩-១៩