៣៦
កូនគោមាស
តើប្រជាជនកំពុងតែធ្វើអ្វីហ្នឹង? ពួកគេកំពុងតែអធិស្ឋានទៅកូនគោ! ហេតុអ្វីក៏ពួកគេធ្វើដូច្នេះ?
នៅពេលដែលម៉ូសេបានស្នាក់នៅលើភ្នំយ៉ាងយូរនោះ ប្រជាជនបាននិយាយថា៖ ‹យើងមិនដឹងថាមានអ្វីបានកើតឡើងដល់លោកម៉ូសេទេ។ ដូច្នេះ ចូរឲ្យយើងធ្វើព្រះ ដែលនឹងនាំយើងឲ្យចេញពីស្រុកនេះទៅ›។
អើរ៉ុនជាបងប្រុសរបស់ម៉ូសេនិយាយថា៖ ‹បើអញ្ចឹង ចូរដោះក្រវិលមាសខ្លួន ហើយយកមកឲ្យខ្ញុំ›។ នៅពេលដែលប្រជាជនបានដោះក្រវិលមាសមកឲ្យ អើរ៉ុនក៏រំលាយចាក់ក្នុងពុម្ពសិតធ្វើជារូបកូនគោមាស។ ហើយប្រជាជនក៏និយាយថា៖ ‹នេះជាព្រះរបស់យើង ដែលបាននាំយើងចេញពីស្រុកអេស៊ីព្ទមក›! បន្ទាប់មកប្រជាជនអ៊ីស្រាអែលបានធ្វើជប់លៀងយ៉ាងធំ ហើយថ្វាយបង្គំរូបកូនគោមាសនោះ។
នៅពេលដែលព្រះយេហូវ៉ាទតឃើញការប្រព្រឹត្តនេះ ទ្រង់មានព្រះហឫទ័យខ្ញាល់ណាស់។ ដូច្នេះ ទ្រង់ក៏មានបន្ទូលទៅម៉ូសេថា៖ ‹ចូរចុះទៅជាប្រញាប់ ប្រជាជនបានប្រព្រឹត្តអាក្រក់ណាស់។ ពួកគេបានភ្លេចពីច្បាប់របស់អញ ហើយកំពុងតែថ្វាយបង្គំដល់កូនគោមាស›។
ម៉ូសេក៏ចុះពីលើភ្នំយ៉ាងប្រញាប់។ ហើយនៅពេលដែលគាត់បានមកដល់ នេះហើយជាការដែលគាត់បានឃើញ។ ប្រជាជនកំពុងតែច្រៀងរាំជុំវិញកូនគោមាសនោះ! ម៉ូសេមានចិត្តខឹងយ៉ាងខ្លាំងដល់ម្ល៉េះ បានជាគាត់បោះទម្លាក់បន្ទះថ្មច្បាប់ទាំងពីរនោះ ហើយថ្មនោះក៏បែកខ្ចាត់ខ្ចាយទៅជាដុំតូចៗយ៉ាងច្រើន។ បន្ទាប់មក គាត់ក៏យកកូនគោមាសនោះ ហើយក៏រំលាយវាចោល។ ហើយក្រោយមក គាត់ក៏កិនវាទៅជាម្សៅ។
ប្រជាជនបានប្រព្រឹត្តអំពើដ៏អាក្រក់ណាស់។ ដូច្នេះ ម៉ូសេក៏ប្រាប់ពួកបុរសខ្លះឲ្យយកដាវរបស់ខ្លួន។ ម៉ូសេមានប្រសាសន៍ថា៖ ‹ពួកមនុស្សអាក្រក់ដែលបានថ្វាយបង្គំកូនគោមាសនោះ ត្រូវតែស្លាប់›។ ដូច្នេះហើយ ពួកបុរសបានសម្លាប់មនុស្ស៣.០០០នាក់! រឿងនេះបង្ហាញថា យើងត្រូវតែប្រយ័ត្ន កុំឲ្យថ្វាយបង្គំព្រះមិនពិតណាឡើយ តែត្រូវថ្វាយបង្គំព្រះយេហូវ៉ាប៉ុណ្ណោះ។