៤៩
ថ្ងៃឈប់ទ្រឹង
សូមក្រឡេកមើលយ៉ូស្វេចុះ គាត់កំពុងតែនិយាយថា៖ ‹ថ្ងៃអើយ ចូរឈប់ទ្រឹង›! ហើយថ្ងៃក៏ឈប់ទ្រឹងមែន។ ថ្ងៃឈប់ទ្រឹងនៅកណ្ដាលផ្ទៃមេឃអស់ពេញមួយថ្ងៃ។ ព្រះយេហូវ៉ាធ្វើឲ្យការនេះកើតឡើង! ប៉ុន្តែសូមឲ្យយើងពិនិត្យមើល នូវហេតុដែលយ៉ូស្វេចង់ឲ្យថ្ងៃនៅមានពន្លឺ។
នៅពេលដែលស្តេចអាក្រក់ទាំងប្រាំអង្គនៅស្រុកកាណាន ចាប់ផ្ដើមប្រយុទ្ធនឹងពួកគីបៀន ពួកគីបៀនក៏ចាត់បុរសម្នាក់ឲ្យសុំលោកយ៉ូស្វេមកជួយ។ គាត់ជំរាបថា៖ ‹សូមមកកន្លែងយើងជាប្រញាប់! ដើម្បីជួយសង្គ្រោះយើងផង! ដ្បិតស្តេចទាំងអស់នៅស្រុកភ្នំបានមកប្រយុទ្ធនឹងយើងជាបាវរបស់លោកហើយ›។
មួយរំពេចនោះ យ៉ូស្វេនិងពួកទាហានរបស់លោកក៏ធ្វើដំណើរចេញទៅភ្លាម។ ពួកគេបានដើរពេញមួយយប់។ នៅពេលដែលគេមកដល់ក្រុងគីបៀន ពួកទាហាននៃស្តេចទាំងប្រាំអង្គក៏ភ័យខ្លាច ហើយចាប់ផ្ដើមរត់អស់។ បន្ទាប់មក ព្រះយេហូវ៉ាបានធ្វើឲ្យព្រិលដុំធំៗធ្លាក់ពីលើមេឃមកសម្លាប់ពួកទាហានទាំងនោះ បានច្រើនជាងចំនួនដែលពួកទាហានរបស់យ៉ូស្វេបានសម្លាប់ទៅទៀត។
យ៉ូស្វេអាចឃើញថា មិនជាយូរប៉ុន្មាន ថ្ងៃនឹងលិចទៅ។ នោះនឹងទៅជាងងឹត ហើយពួកទាហានជាច្រើននៃស្តេចទាំងប្រាំអង្គនោះនឹងរត់រួចអស់។ ដូច្នេះហើយបានជាយ៉ូស្វេអធិស្ឋានទៅព្រះយេហូវ៉ា ហើយបន្ទាប់មកនិយាយថា៖ ‹ថ្ងៃអើយ ចូរឈប់ទ្រឹង›! ហើយនៅពេលដែលថ្ងៃកំពុងតែមានពន្លឺ ទាហានអ៊ីស្រាអែលអាចបង្ហើយការប្រយុទ្ធនោះដោយជោគជ័យ។
មានស្តេចដ៏អាក្រក់ជាច្រើនទៀតនៅស្រុកកាណាន ដែលស្អប់ប្រជារាស្ត្ររបស់ព្រះ។ ក្នុងរវាងប្រាំមួយឆ្នាំ យ៉ូស្វេនិងកងទ័ពរបស់លោកបានវាយឈ្នះលើពួកស្តេច៣១អង្គនៅក្នុងស្រុកនោះ។ កាលដែលបានឈ្នះអស់ហើយ យ៉ូស្វេក៏លៃលកចែកស្រុកកាណានឲ្យទៅពួកសម្ព័ន្ធណាដែលត្រូវការដំបន់ទៀត។
ជាច្រើនឆ្នាំកន្លងមក ហើយដល់ទីបំផុតយ៉ូស្វេក៏ស្លាប់ទៅ កាលដែលមានអាយុ១១០ឆ្នាំ។ ដរាបណាដែលលោកនិងមិត្តរបស់លោកនៅរស់នៅឡើយ ប្រជាជនគោរពតាមព្រះយេហូវ៉ាជានិច្ច។ ប៉ុន្តែ នៅពេលដែលបុរសល្អទាំងនេះបានស្លាប់ទៅ ប្រជាជនបានចាប់ផ្ដើមប្រព្រឹត្តអំពើអាក្រក់ ហើយពួកគេក៏មានបញ្ហាជាច្រើន។ នេះគឺជាគ្រាដែលពួកគេពិតជាត្រូវការជំនួយពីព្រះ។
យ៉ូស្វេ ១០:៦-១៥; ១២:៧-២៤; ១៤:១-៥; ពួកចៅហ្វាយ ២:៨-១៣