៩៧
ព្រះយេស៊ូវយាងមកជាស្តេច
មួយរយៈខ្លីក្រោយពីបានធ្វើឲ្យមនុស្សសុំទានខ្វាក់ពីរនាក់បានជាឡើងវិញហើយ ព្រះយេស៊ូវក៏បានមកដល់ភូមិតូចមួយជិតក្រុងយេរូសាឡិម។ ទ្រង់មានបន្ទូលប្រាប់សិស្សពីរនាក់ថា៖ ‹ចូរទៅឯភូមិ ហើយអ្នកនឹងឃើញសត្វលាជំទង់មួយ។ ចូរស្រាយវាហើយនាំវាមកឲ្យខ្ញុំ›។
នៅពេលដែលគេយកសត្វលាមកឲ្យទ្រង់ហើយ ព្រះយេស៊ូវក៏គង់លើវាទៅ។ បន្ទាប់មកទ្រង់ក៏យាងទៅឯក្រុងយេរូសាឡិមដែលនៅជិតនោះ។ នៅពេលដែលទ្រង់យាងទៅជិតក្រុងនោះ មនុស្សមួយហ្វូងយ៉ាងធំបានចេញមកជួបទ្រង់។ ពួកគេភាគច្រើនបានដោះអាវវែងរបស់គេហើយក៏ក្រាលនៅលើផ្លូវ។ អ្នកខ្លះទៀតបានកាប់យកធាងដូងមកក្រាលនៅលើផ្លូវដែរ ហើយពួកគេក៏ស្រែកឡើងថា៖ ‹សូមឲ្យព្រះជូនពរដល់ស្តេចដែលយាងមកក្នុងព្រះនាមនៃព្រះយេហូវ៉ា›!
កាលពីជំនាន់ដើម នៅក្នុងស្រុកអ៊ីស្រាអែល ស្តេចថ្មីៗត្រូវគង់លើសត្វលាជំទង់ ហើយត្រូវយាងចូលក្រុងយេរូសាឡិមដើម្បីបង្ហាញអង្គទ្រង់ឲ្យមនុស្សឃើញ។ នេះហើយជាអ្វីដែលព្រះយេស៊ូវកំពុងតែធ្វើ។ ហើយពួកមនុស្សទាំងនេះកំពុងតែបង្ហាញថា គេចង់បានព្រះយេស៊ូវជាស្តេចរបស់គេ។ ប៉ុន្តែ មានមនុស្សខ្លះគេមិនចង់បានទ្រង់ទេ។ យើងអាចឃើញអំពីរឿងនេះ ដោយពិនិត្យមើលការដែលកើតឡើងដល់ទ្រង់ ពេលដែលព្រះយេស៊ូវយាងទៅឯព្រះវិហារ។
នៅឯព្រះវិហារ ព្រះយេស៊ូវបានធ្វើឲ្យមនុស្សខ្វាក់និងពិការបានជាឡើងវិញ។ នៅពេលដែលកូនក្មេងមើលឃើញការនេះ គេក៏ស្រែកសរសើរដល់ព្រះយេស៊ូវ។ ប៉ុន្តែ សម្រែកនេះធ្វើឲ្យពួកសង្ឃមានចិត្តខឹង ហើយគេក៏ប្រាប់ព្រះយេស៊ូវថា៖ ‹តើអ្នកឮពាក្យដែលកូនក្មេងទាំងនេះថាឬទេ›?
ព្រះយេស៊ូវឆ្លើយថា៖ ‹ខ្ញុំឮហើយ តើអ្នកមិនដែលអានក្នុងព្រះគម្ពីរដែលចែងថា៖«ចេញពីមាត់កូនក្មេង ព្រះនឹងធ្វើឲ្យមានសេចក្ដីសរសើរទេឬ»›? ដូច្នេះ កូនក្មេងក៏ស្រែកសរសើរដល់ស្តេចរបស់ព្រះតទៅទៀត។
យើងចង់ឲ្យបានដូចកូនក្មេងទាំងអស់នោះដែរ មែនទេ? មនុស្សខ្លះប្រហែលជាចង់បញ្ឈប់យើង ក្នុងការនិយាយអំពីព្រះរាជាណាចក្ររបស់ព្រះ។ ប៉ុន្តែ យើងនៅតែខំប្រាប់ដល់អ្នកដទៃអំពីការដ៏អស្ចារ្យ ដែលព្រះយេស៊ូវនឹងធ្វើឲ្យមនុស្សលោកជានិច្ច។
នៅពេលដែលព្រះយេស៊ូវទ្រង់នៅលើផែនដីនៅឡើយ នោះមិនមែនជាពេលសំរាប់សោយរាជ្យជាស្តេចទេ។ តើនៅពេលណាទើបគ្រានេះនឹងមកដល់? ពួកសិស្សរបស់ព្រះយេស៊ូវចង់ដឹងនូវរឿងនេះ។ យើងនឹងអានអំពីរឿងនេះជាបន្ទាប់។
ម៉ាថាយ ២១:១-១៧; យ៉ូហាន ១២:១២-១៦