១០៦
ការដោះលែងពីគុក
សូមមើលទេវតាដែលកំពុងតែបើកទ្វារគុកនៅទីនេះ។ ពួកបុរសដែលទេវតាកំពុងតែដោះលែងនោះ ជាសាវករបស់ព្រះយេស៊ូវ។ សូមឲ្យយើងស្វែងរកនូវមូលហេតុដែលពួកសិស្សត្រូវបានគេចាប់ដាក់គុក។
តាំងពីពេលដែលព្រះវិញ្ញាណបរិសុទ្ធត្រូវបានចាក់មកលើពួកសិស្សរបស់ព្រះយេស៊ូវ រហូតមកដល់គ្រានេះ នោះទើបតែបានរយៈពេលដ៏ខ្លីប៉ុណ្ណោះ។ ហើយនេះជាការណ៍ដែលបានកើតឡើង៖ នៅថ្ងៃរសៀលមួយ ពេត្រុសនិងយ៉ូហានកំពុងតែដើរចូលទៅក្នុងព្រះវិហារនៅក្រុងយេរូសាឡិម។ នៅទីនោះ មានបុរសម្នាក់ដែលបានពិការតាំងពីកំណើតមក អង្គុយនៅក្បែរទ្វារ។ ជារៀងរាល់ថ្ងៃ ប្រជាជនសែងគាត់យកមកដាក់នៅទីនេះ ដើម្បីឲ្យគាត់អាចសុំទានពីពួកអ្នកដើរចូលក្នុងព្រះវិហារ។ កាលដែលគាត់ឃើញពេត្រុសនិងយ៉ូហាន គាត់បានអង្វរសុំទានពីពួកគេ។ តើពួកសាវកនឹងធ្វើយ៉ាងណា?
គេក៏ឈប់ហើយមើលបុរសដ៏ទុគ៌តនេះ។ ពេត្រុសនិយាយថា៖ ‹ខ្ញុំគ្មានប្រាក់ទេ ប៉ុន្តែអ្វីដែលខ្ញុំមាន នោះខ្ញុំនឹងឲ្យដល់អ្នក។ ក្នុងព្រះនាមយេស៊ូវ ចូរក្រោកឡើង ហើយដើរទៅចុះ›! ពេត្រុសក៏ចាប់ដៃស្ដាំបុរសនោះលើកឡើង ហើយភ្លាមនោះ គាត់ក៏ក្រោកឈរឡើងហើយចាប់ផ្ដើមដើរទៅ។ នៅពេលដែលប្រជាជនឃើញការនេះ គេមានចិត្តកោតស្ញែង ហើយសប្បាយរីករាយណាស់ចំពោះអព្ភូតហេតុដ៏អស្ចារ្យនេះ។
ពេត្រុសនិយាយថា៖ ‹ដោយសារតែព្រះចេស្ដារបស់ព្រះ ដែលទ្រង់បានប្រោសព្រះយេស៊ូវពីសេចក្ដីស្លាប់ ដែលយើងបានសម្ដែងអព្ភូតហេតុនេះ›។ កាលដែលគាត់និងយ៉ូហានកំពុងតែនិយាយនោះ ពួកមេដឹកនាំសាសនាខ្លះបានមកដល់។ ពួកគេមានចិត្តខឹងណាស់ ពីព្រោះពេត្រុសនិងយ៉ូហានកំពុងតែពន្យល់ប្រាប់ប្រជាជនអំពីដំណើររស់ឡើងវិញរបស់ព្រះយេស៊ូវ។ ដូច្នេះ គេក៏ចាប់ពេត្រុសនិងយ៉ូហានដាក់គុកទៅ។
ស្អែកឡើង ពួកមេដឹកនាំសាសនាមានកិច្ចប្រជុំធំមួយ។ ពេត្រុសនិងយ៉ូហាន ព្រមទាំងបុរសដែលគេធ្វើឲ្យជានោះ ក៏ត្រូវគេនាំចូលមកដែរ។ ពួកមេដឹកនាំសាសនាសួរថា៖ ‹ដោយសារឥទ្ធិឫទ្ធិអ្វីដែលអ្នកធ្វើអព្ភូតហេតុនេះ›?
ពេត្រុសឆ្លើយប្រាប់គេថា គឺដោយសារឥទ្ធិឫទ្ធិរបស់ព្រះ ដែលបានប្រោសព្រះយេស៊ូវឲ្យមានព្រះជន្មរស់ពីសេចក្ដីស្លាប់។ ពួកសង្ឃនោះទាល់គំនិត ពីព្រោះពួកគេមិនអាចបដិសេធនូវការកើតឡើងដ៏ពិតនៃអព្ភូតហេតុដ៏អស្ចារ្យនេះទេ។ ដូច្នេះ គេក៏ព្រមានពួកសាវកមិនឲ្យនិយាយអំពីព្រះយេស៊ូវតទៅទៀត ហើយបន្ទាប់មក គេដោះលែងពួកសាវកទៅ។
ជាច្រើនថ្ងៃកន្លងមក ពួកសាវកនៅតែបន្តការផ្សាយអំពីព្រះយេស៊ូវ និងធ្វើឲ្យពួកអ្នកឈឺជាឡើងវិញដែរ។ ដំណឹងអំពីអព្ភូតហេតុទាំងនេះបានត្រូវឮសុសសាយ។ ដូច្នេះ សូម្បីតែប្រជាជនដែលរស់នៅក្នុងភូមិជិតខាងក្រុងយេរូសាឡិម ក៏នាំពួកឈឺមកឲ្យពួកសាវកប្រោសឲ្យជាដែរ។ នេះធ្វើឲ្យពួកមេដឹកនាំសាសនាច្រណែន ដូច្នេះគេក៏ចាប់ពួកសាវកដាក់គុក។ ប៉ុន្តែពួកគេមិនបានជាប់គុកយូរទេ។
នៅវេលាយប់ ទេវតានៃព្រះបើកទ្វារគុកឲ្យពួកគេ ដូចជាអ្នកអាចឃើញនៅទីនេះ។ ទេវតាមានប្រសាសន៍ថា៖ ‹ចូរទៅឈរនៅឯព្រះវិហារ ហើយខំបន្តផ្សាយទៅប្រជាជនចុះ›។ លុះដល់ព្រលឹមស្អែកឡើង កាលដែលមេដឹកនាំសាសនាចាត់ឲ្យពួកបុរសទៅយកពួកសាវកពីគុកមក គេមិនឃើញពួកសាវកសោះ។ ក្រោយមក ពួកបុរសរកឃើញពួកសាវកកំពុងតែបង្រៀននៅឯព្រះវិហារ ហើយក៏នាំពួកគេទៅតុលាការជាន់ខ្ពស់នៃសាសន៍យូដា។
ពួកមេដឹកនាំសាសនានិយាយថា៖ ‹យើងបានបញ្ជាអ្នករាល់គ្នាយ៉ាងម៉ឺងម៉ាត់ ថាមិនឲ្យបង្រៀនអំពីព្រះយេស៊ូវទៀតឡើយ។ ប៉ុន្តែ អ្នករាល់គ្នាបានបង្រៀនសេចក្ដីនោះនៅពេញក្រុងយេរូសាឡិមទាំងមូល›។ បន្ទាប់មក ពួកសាវកឆ្លើយថា៖ ‹យើងត្រូវគោរពតាមព្រះជាអ្នកគ្រប់គ្រង ជាជាងមនុស្ស›។ ដូច្នេះ គេនៅតែខំព្យាយាមបង្រៀនអំពី«ដំណឹងល្អ»នេះតទៅទៀត។ តើនេះមិនមែនជាគំរូដ៏ល្អមួយដែលយើងគួរតែយកត្រាប់តាមទេឬ?
កិច្ចការ ជំពូកទី៣ ទៅ ជំពូកទី៥