១១០
ធីម៉ូថេ—អ្នកជំនួយថ្មីរបស់ប៉ុល
យុវជនដែលអ្នកឃើញឈរជាមួយនឹងសាវកប៉ុលនៅទីនេះ ឈ្មោះធីម៉ូថេ។ ធីម៉ូថេរស់នៅក្នុងក្រុងលីស្ដ្រាជាមួយគ្រួសាររបស់គាត់។ ម្ដាយរបស់គាត់ឈ្មោះអ៊ើនីស ហើយជីដូនរបស់គាត់ឈ្មោះឡូអ៊ីស។
នេះជាលើកទីបីហើយ ដែលប៉ុលបានធ្វើដំណើរមកក្រុងលីស្ដ្រា។ ប្រហែលជាមួយឆ្នាំមុននេះ ប៉ុលនិងបាណាបាសបានមកទីនេះជាលើកដំបូងក្នុងការធ្វើដំណើរផ្សាយ។ ហើយឥឡូវនេះ ប៉ុលបានត្រឡប់មកវិញជាមួយមិត្តរបស់គាត់ឈ្មោះស៊ីឡាស។
តើអ្នកដឹងប៉ុលកំពុងតែនិយាយអ្វីនឹងធីម៉ូថេទេ? គាត់កំពុងតែសួរថា៖ ‹តើអ្នកចង់ទៅជាមួយខ្ញុំនិងស៊ីឡាសទេ? យើងត្រូវការអ្នកឲ្យជួយយើង ក្នុងការផ្សាយដល់មនុស្សនៅកន្លែងឆ្ងាយផ្សេងៗ›។
ធីម៉ូថេឆ្លើយថា៖ ‹បាទ ខ្ញុំចង់ទៅ›។ ដូច្នេះ បន្ដិចក្រោយមក ធីម៉ូថេចាកចេញពីគ្រួសាររបស់គាត់ ហើយក៏ទៅជាមួយប៉ុលនិងស៊ីឡាស។ ប៉ុន្តែ មុននឹងយើងរៀនអំពីការធ្វើដំណើររបស់គេ សូមឲ្យយើងពិនិត្យពីការណ៍ដែលបានកើតឡើងដល់ប៉ុលសិន។ អស់រយៈពេលប្រមាណ១៧ឆ្នាំហើយ ដែលព្រះយេស៊ូវបានលេចឡើងទៅគាត់នៅតាមផ្លូវទៅក្រុងដាម៉ាស។
នៅចាំទេ ប៉ុលបានមកក្រុងដាម៉ាសដើម្បីមកធ្វើទុក្ខបៀតបៀនដល់សិស្សរបស់ព្រះយេស៊ូវ។ ប៉ុន្តែ ឥឡូវនេះ ខ្លួនគាត់ជាសិស្សម្នាក់ដែរ! ក្រោយមក ពួកសត្រូវខ្លះធ្វើគម្រោងការណ៍ដើម្បីសម្លាប់ប៉ុល ពីព្រោះគេមិនចូលចិត្តគាត់បង្រៀនអំពីព្រះយេស៊ូវ។ ប៉ុន្តែ ពួកសិស្សបានជួយប៉ុលឲ្យគេចខ្លួនចេញ។ គេដាក់គាត់នៅក្នុងកញ្ជើហើយក៏សំរូតគាត់ចុះទៅខាងក្រៅកំផែងក្រុង។
ក្រោយមក ប៉ុលចេញទៅផ្សាយនៅក្រុងអាន់ទីយ៉ូក។ នៅទីនេះហើយ ដែលពួកអ្នកកាន់តាមព្រះយេស៊ូវ ត្រូវគេហៅជាលើកដំបូងជាជនគ្រីស្ទាន។ បន្ទាប់មក ប៉ុលនិងបាណាបាសត្រូវបានបញ្ជូនពីក្រុងអាន់ទីយ៉ូកឲ្យធ្វើដំណើរផ្សាយទៅស្រុកឆ្ងាយផ្សេងៗទៀត។ ក្រុងមួយក្នុងចំណោមក្រុងជាច្រើនដែលគេទៅនោះ គឺក្រុងលីស្ដ្រាដែលជាស្រុកកំណើតរបស់ធីម៉ូថេ។
ឥឡូវនេះ ប្រហែលជាមួយឆ្នាំក្រោយមក ប៉ុលក៏វិលមកដល់ក្រុងលីស្ដ្រាវិញ ក្នុងការធ្វើដំណើរលើកទីពីរ។ នៅពេលធីម៉ូថេចាកចេញជាមួយប៉ុលនិងស៊ីឡាស តើអ្នកដឹងថាពួកគេទៅកន្លែងណាខ្លះទេ? សូមមើលផែនទីនេះ ដើម្បីរៀនអំពីកន្លែងខ្លះៗ។
ជាបឋម ពួកគេទៅក្រុងអ៊ីកូនាមដែលនៅជិតនោះ បន្ទាប់មកក៏ទៅក្រុងទីពីរឈ្មោះអាន់ទីយ៉ូក។ ក្រោយពីនោះមក គេធ្វើដំណើរទៅក្រុងទ្រអាស រួចបង្ហួសទៅក្រុងភីលីព ក្រុងថែស្សាឡូនីច និងក្រុងបេរា។ តើអ្នកឃើញក្រុងអាថែននៅលើផែនទីទេ? ប៉ុលក៏បានផ្សាយនៅទីនោះដែរ។ ក្រោយមក គេចំណាយពេលអស់រយៈមួយឆ្នាំកន្លះ ដើម្បីផ្សាយនៅក្រុងកូរិនថូស។ នៅទីបំផុត គេទៅឈប់មួយរយៈខ្លីនៅឯក្រុងអេភេសូរ។ រួចគេជិះទូកត្រឡប់ទៅក្រុងសេសារាវិញ ហើយក៏ធ្វើដំណើរឡើងទៅក្រុងអាន់ទីយ៉ូក ដែលជាកន្លែងប៉ុលអាស្រ័យនៅ។
ដូច្នេះ ធីម៉ូថេបានធ្វើដំណើរអស់រាប់រយគីឡូម៉ែត្រ ក្នុងការជួយប៉ុលផ្សាយអំពី«ដំណឹងល្អ»និងបង្កើតក្រុមជំនុំជាច្រើន។ នៅពេលដែលអ្នកធំឡើង តើអ្នកនឹងទៅជាអ្នកបំរើដ៏ស្មោះត្រង់របស់ព្រះម្នាក់ដូចធីម៉ូថេទេ?
កិច្ចការ ៩:១៩-៣០; ១១:១៩-២៦; ជំពូកទី១៣ ទៅ ជំពូក១៧; ១៨:១-២២
[Map]
(For fully formatted text, see publication)
ក្រុងរ៉ូម
កោះមេលីត
ក្រុងថែស្សាឡូនីច
ក្រុងបេរា
ក្រុងកូរិនថូស
ក្រុងភីលីព
ក្រុងអាថែន
កោះក្រេត
ក្រុងទ្រអាស
ក្រុងអេភេសូរ
ក្រុងមីលេត
ក្រុងកូល៉ុស
ក្រុងអាន់ទីយ៉ូក
ក្រុងអ៊ីកូនាម
ក្រុងលីស្ដ្រា
ក្រុងអាន់ទីយ៉ូក
កោះគីប្រុស
ក្រុងដាម៉ាស
ក្រុងសេសារា
ក្រុងយ៉ុបប៉េ
ក្រុងយេរូសាឡិម
សមុទ្រធំ (សមុទ្រម៉េឌីតែរ៉ាណេ)