១១១
ក្មេងប្រុសដែលដេកលក់
តើមានការអ្វីកើតឡើងនៅទីនេះ? តើក្មេងប្រុសដែលកំពុងតែផ្ដេកនៅនឹងដីត្រូវរបួសខ្លាំងឬ? មើលហ្ន៎! បុរសម្នាក់ដែលចេញពីផ្ទះនោះ ជាប៉ុល! តើអ្នកមើលឃើញធីម៉ូថេនៅទីនេះដែរទេ? តើក្មេងប្រុសនេះបានធ្លាក់ពីបង្អួចឬ?
ត្រូវហើយ ក្មេងប្រុសនេះបានធ្លាក់ពីបង្អួចមែន។ ប៉ុលកំពុងតែថ្លែងសុន្ទរកថាជូនសិស្សនៅក្រុងទ្រអាស។ គាត់បានដឹងថាគាត់នឹងមិនជួបពួកគេម្ដងទៀតជាយូរ ពីព្រោះគាត់នឹងចាកចេញទៅតាមទូកនៅថ្ងៃស្អែក។ ដូច្នេះ គាត់ក៏ខំព្យាយាមអធិប្បាយរហូតដល់យប់អធ្រាត្រ។
ក្មេងប្រុសនេះឈ្មោះអ៊ើទីកុសបានអង្គុយនៅមាត់បង្អួច ហើយក៏ដេកលក់ទៅ។ ក្មេងប្រុសនេះបានធ្លាក់មកដីពីបង្អួចនៅជាន់ទីបី! ដូច្នេះហើយបានជាអ្នកឃើញមនុស្សទាំងនេះមានទឹកមុខព្រួយបារម្ភណាស់។ នៅពេលដែលពួកបុរសលើកក្មេងប្រុសឡើង កូននោះបានស្លាប់បាត់ទៅហើយ!
នៅពេលដែលប៉ុលឃើញថាក្មេងប្រុសនោះស្លាប់ហើយ គាត់ក៏ផ្ដេកខ្លួនគាត់ពីលើឱបក្មេងនោះទៅ។ បន្ទាប់មក គាត់មានប្រសាសន៍ថា៖ ‹កុំព្រួយអី វាមិនកើតអីទេ›! ហើយក៏ដូចពាក្យនោះមែន! នេះជាអព្ភូតហេតុមួយ! ប៉ុលបានធ្វើឲ្យក្មេងនេះមានជីវិតរស់ឡើងវិញ! មនុស្សទាំងនោះមានចិត្តអរសប្បាយយ៉ាងក្រៃលែង។
ពួកគេនាំគ្នាឡើងទៅបន្ទប់ជាន់លើវិញ ហើយក៏បរិភោគអាហារ។ ប៉ុលក៏បន្តការអធិប្បាយរហូតដល់ភ្លឺ។ ប៉ុន្តែ អ្នកអាចដឹងជាពិតប្រាកដថា អ៊ើទីកុសមុខជាមិនដេកលក់ទៀតឡើយ! បន្ទាប់មក ប៉ុល ធីម៉ូថេនិងពួករួមដំណើរជាមួយគេ ក៏នាំគ្នាឡើងជិះទូកទៅ។ តើអ្នកដឹងពួកគេទៅទីណាទេ?
ប៉ុលទើបតែបានបញ្ចប់ការធ្វើដំណើរផ្សាយលើកទីបីរបស់គាត់ ហើយក៏ធ្វើដំណើរត្រឡប់ទៅស្រុករបស់គាត់វិញ។ ការធ្វើដំណើរផ្សាយលើកនេះ ប៉ុលបានស្នាក់នៅបីឆ្នាំក្នុងក្រុងអេភេសូរ។ ដូច្នេះ ការធ្វើដំណើរលើកនេះ មានរយៈពេលយូរជាងការធ្វើដំណើរនៅលើកទីពីររបស់គាត់ទៅទៀត។
ក្រោយពីបានចាកចេញពីក្រុងទ្រអាស ពួកគេក៏មកឈប់ទូកនៅក្រុងមីលេតមួយរយៈពេលខ្លី។ ដោយព្រោះតែក្រុងអេភេសូរមានចម្ងាយតែពីរបីគីឡូម៉ែត្រប៉ុណ្ណោះ ប៉ុលក៏ចាត់ឲ្យគេទៅហៅពួកចាស់ទុំនៃក្រុមជំនុំនោះឲ្យមកក្រុងមីលេត ដើម្បីគាត់អាចនិយាយនឹងពួកគេជាលើកចុងក្រោយបំផុត។ ក្រោយមក នៅពេលដល់គ្រាចាកចេញ ពួកគេមានចិត្តស្រងូតស្រងាត់ណាស់ដោយឃើញប៉ុលឃ្លាតទៅនោះ!
នៅទីបំផុត ទូកក៏មកដល់ក្រុងសេសារា។ កាលដែលប៉ុលកំពុងតែស្នាក់នៅទីនេះ នៅឯផ្ទះរបស់សិស្សម្នាក់ឈ្មោះភីលីព ព្យាការីម្នាក់ឈ្មោះអ័ក្កាបុសបានមកហាមប្រាប់ប៉ុល។ គាត់និយាយថាប៉ុលនឹងទៅជាអ្នកជាប់គុក នៅពេលដែលគាត់មកក្រុងយេរូសាឡិមវិញ។ ហើយនេះបានកើតឡើងពិតមែន។ ក្រោយពីបានជាប់គុកពីរឆ្នាំនៅក្រុងសេសារាហើយនោះ គេក៏បញ្ជូនប៉ុលឲ្យទៅក្រុងរ៉ូម ដើម្បីឡើងតុលាការវិនិច្ឆ័យទោសនៅពីមុខអ្នកគ្រប់គ្រងសាសន៍រ៉ូមម្នាក់ឈ្មោះ សេសារ។ សូមឲ្យយើងពិនិត្យមើលការណ៍ដែលកើតឡើង ពេលធ្វើដំណើរទៅក្រុងរ៉ូម។
កិច្ចការ ជំពូកទី១៩ ទៅ ជំពូកទី២៦