អង្គការហើយកិច្ចបំរើរបស់ពួកគេដែលមានពេញពិភពលោកទាំងមូល
គឺមានតំណទាក់ទងជាច្រើនដែលបានត្រូវប្រើក្នុងការដឹកនាំធ្វើកិច្ចបន្ទាល់ នៅជាង២០០ស្រុកដែលកំពុងធ្វើប្រតិបត្ដិការនេះសព្វថ្ងៃនេះ។ ការដឹកនាំលើកិច្ចបន្ទាល់ទាំងមូលនេះ ចេញពីគណៈអភិបាលនៅមន្ទីរចាត់ការពិភពលោកនៅទីក្រុងប៊្រុគ្លីន រដ្ឋនូយ៉ក។ ជារៀងរាល់ឆ្នាំ គណៈអភិបាលចាត់អ្នកតំណាងឲ្យទៅជាង១៥តំបន់អន្តរជាតិដែលមានពេញពិភពលោកទាំងមូល ដើម្បីទាក់ទងជាមួយនឹងអ្នកតំណាងរបស់ការិយាល័យសាខានានានៅតាមតំបន់អន្តរជាតិនិមួយៗ។ នៅក្នុងការិយាល័យសាខានិមួយៗ មានគណៈកម្មាធិកាសាខាដែលមានសមាជិកពី៣ទៅ៧នាក់ ដើម្បីត្រួតត្រាលើកិច្ចបន្ទាល់នៅក្នុងស្រុកដែលនៅក្រោមយុត្ដាធិការរបស់គេ។ ការិយាល័យជាច្រើនមានរោងចក្របោះពុម្ព ការិយាល័យខ្លះនេះប្រើម៉ាស៊ីនបោះពុម្ពដែលវិលដោយល្បឿនយ៉ាងលឿនណាស់។ ការិយាល័យសាខានានាបំរើប្រទេសមួយឬក៏អាចរួមទាំងប្រទេសនៅជិតខាងគេដែរ។ តំបន់ត្រួតត្រានៃការិយាល័យសាខានិមួយៗ បានត្រូវចែកជាតំបន់នានា ហើយតំបន់និមួយៗបានត្រូវចែកជាមណ្ឌលនានា។ មណ្ឌលនិមួយៗមានប្រមាណ២០ក្រុមជំនុំ។ អ្នកត្រួតត្រាតាមតំបន់ម្នាក់ទៅទស្សនាមណ្ឌលនានាក្នុងតំបន់នោះតាមវេន។ រាល់តែឆ្នាំមានសភាពីរសម្រាប់មណ្ឌលនិមួយៗ។ មានអ្នកត្រួតត្រាតាមមណ្ឌលដែរ ហើយលោកទៅទស្សនាក្រុមជំនុំនិមួយៗក្នុងមណ្ឌលរបស់លោកជាធម្មតាពីរដងក្នុងមួយឆ្នាំ ដើម្បីជួយពួកស្មរបន្ទាល់ក្នុងការចាត់ចែងហើយធ្វើកិច្ចផ្សាយដំណឹង នៅក្នុងតំបន់ផ្សាយដែលត្រូវបានចាត់ចែងចំពោះក្រុមជំនុំនោះ។
ក្រុមជំនុំនៃកន្លែងមួយហើយនិងសាលព្រះរាជាណាចក្ររបស់គេ គឺជាមន្ទីរចាត់ការសម្រាប់ផ្សាយដំណឹងល្អនៅក្នុងសហគមន៍របស់លោកអ្នក។ តំបន់ផ្សាយនៃក្រុមជំនុំនិមួយៗ បានត្រូវចែកជាផែនទីនៃកន្លែងផ្សាយតូចៗ។ ផែនទីនេះបានត្រូវចាត់ឲ្យទៅស្មរបន្ទាល់ម្នាក់ៗ ដែលខំព្យាយាមទៅជួបហើយនិយាយជាមួយមនុស្សនៅគ្រប់ផ្ទះទាំងអស់នៅទីនោះ។ ក្រុមជំនុំនិមួយៗ មានចំនួនពីតិចតូចរហូតដល់ជាង២០០ស្មរបន្ទាល់ព្រះយេហូវ៉ា ហើយមានអ្នកចាស់ទុំដែលបានត្រូវចាត់ចែងឲ្យរ៉ាប់ភារៈផ្សេងៗជាច្រើន។ អ្នកផ្សាយដំណឹងល្អម្នាក់ៗ គឺជាអ្នកសំខាន់ជាចាំបាច់ក្នុងអង្គការរបស់ពួកស្មរបន្ទាល់ព្រះយេហូវ៉ា។ ស្មរបន្ទាល់គ្រប់ៗគ្នា ទោះជាពួកគេបំរើនៅក្នុងមន្ទីរចាត់ការពិភពលោក នៅតាមការិយាល័យសាខា ឬក៏នៅក្នុងក្រុមជំនុំនិមួយៗក្ដី ពួកគេធ្វើកិច្ចការប្រកាសនេះដោយប្រាប់អ្នកដទៃអំពីព្រះរាជាណាចក្រដោយផ្ទាល់ខ្លួន។
នៅទីបំផុត សេចក្ដីរាយការណ៍អំពីសកម្មភាពនេះមកដល់មន្ទីរចាត់ការពិភពលោក ហើយរៀងរាល់ឆ្នាំសេចក្ដីរាយការណ៍ទាំងនេះបានត្រូវប្រមូលផ្ដុំ ហើយបោះពុម្ពផ្សាយជាសៀវភៅប្រចាំឆ្នាំ។ បន្ថែមទៅទៀត ជារៀងរាល់ឆ្នាំក្នុងលេខទស្សនាវដ្ដីប៉មយាមថ្ងៃទី១ ខែមករា មានបោះពុម្ពផ្សាយបញ្ជីពីសេចក្ដីរាយការណ៍ទាំងនេះ។ ប្រកាសនវត្ថុទាំងពីរនេះឲ្យសេចក្ដីរាយការណ៍ដ៏ល្អិតល្អន់ជាច្រើន អំពីសេចក្ដីដែលបានសម្រេចក្នុងមួយឆ្នាំៗនោះ ក្នុងការធ្វើបន្ទាល់អំពីព្រះយេហូវ៉ា ហើយអំពីរាជាណាចក្ររបស់ទ្រង់ដែលនៅក្រោមការគ្រងរាជ្យនៃគ្រីស្ទយេស៊ូវ។ សៀវភៅប្រចាំឆ្នាំ១៩៩២ រាយការណ៍ថានៅក្នុងឆ្នាំ១៩៩១មានចំនួន១០.៦៥០.១៥៨ស្មរបន្ទាល់និងមនុស្សចាប់ចិត្តនោះ ដែលបានមករួមប្រជុំគ្នានៅក្នុងពិធីបុណ្យរំឭកនៃមរណភាពរបស់ព្រះយេស៊ូវដែលមានមួយឆ្នាំមួយដងនោះ។ ក្នុងកំលុងឆ្នាំនៃកិច្ចបំរើ១៩៩១ ពួកស្មរបន្ទាល់ព្រះយេហូវ៉ាបានចំណាយជាង៩៥០.០០០.០០០ម៉ោង ដើម្បីផ្សាយប្រកាសដំណឹងល្អ ហើយមានចំនួន៣០០.៩៤៥អ្នកថ្មីដែលបានធ្វើពិធីបុណ្យជ្រមុជទឹកផង។ ប្រកាសនវត្ថុដែលគេប្រគល់ដល់ជនដែលស្ដាប់គេនោះ មានចំនួនជាច្រើនរយលានក្បាល។