ពួកព្រាយបិសាចជាអ្នកសម្លាប់!
តាំងពីដើមមក អារក្សសាតាំងនិងពួកព្រាយបិសាចតែងតែជាអ្នកកំណាចហើយជាអ្នកបណ្ដាលឲ្យមានគ្រោះថ្នាក់ផង។ នៅជំនាន់ដើមសាតាំងបានសម្លាប់បសុសត្វនិងបាវបំរើរបស់លោកយ៉ូបជាអ្នកស្មោះត្រង់ម្នាក់។ រួចមកវាសម្លាប់កូនរបស់លោកយ៉ូបទាំង១០នាក់ ដោយធ្វើឲ្យមាន «ខ្យល់គំហុកជាខ្លាំង» មកបំផ្លាញផ្ទះដែលគេនៅក្នុងនោះ។ ក្រោយមកទៀត សាតាំងក៏ធ្វើឲ្យយ៉ូបកើត «ដំបៅដ៏អាក្រក់ចាប់តាំងពីបាតជើងរហូតដល់ក្រយៅក្បាល»។—យ៉ូប ១:៧-១៩; យ៉ូប ២:៧
នៅជំនាន់ព្រះយេស៊ូវ ពួកព្រាយបិសាចធ្វើឲ្យមនុស្សខ្លះទៅជាគហើយខ្វាក់។ (ម៉ាថាយ ៩:៣២, ៣៣; ១២:២២) ពួកវាធ្វើទុក្ខយ៉ាងខ្លាំងដល់បុរសម្នាក់ ហើយធ្វើឲ្យគាត់យកថ្មមកអារសាច់ខ្លួនឯង។ (ម៉ាកុស ៥:៥) ពួកវាក៏ធ្វើឲ្យក្មេងប្រុសម្នាក់យំស្រែក ទាំងផ្ដួលខ្លួន ហើយ «ធ្វើឲ្យប្រកាច់ប្រកិនជាខ្លាំង»។—លូកា ៩:៤២
នៅជំនាន់ដើម ពួកព្រាយបិសាចធ្វើឲ្យអ្នកខ្លះឈឺហើយឲ្យអ្នកឯទៀតត្រូវប្រកាច់ជាខ្លាំង
សព្វថ្ងៃនេះ អារក្សសាតាំងនិងពួកព្រាយបិសាចរឹតតែសម្លាប់ជាងមុនទៅទៀត។ តាមពិតសកម្មភាពដ៏អាក្រក់របស់ពួកវាបានកើនច្រើនឡើង តាំងពីពេលពួកវាបានត្រូវបោះទំលាក់ចេញពីស្ថានសួគ៌មក។ សេចក្ដីរាយការណ៍ពីជុំវិញពិភពលោកបញ្ជាក់អំពីសេចក្ដីកំណាចរបស់ពួកវា។ ពួកវាធ្វើឲ្យអ្នកខ្លះឈឺថ្កាត់ រំខានបៀតបៀនអ្នកឯទៀតនៅពេលយប់ ទាំងធ្វើឲ្យគេដេកមិនបាន ឬធ្វើឲ្យគេយល់សប្ដដ៏អាក្រក់ក្រៃលែង។ ពួកវារំលោភអ្នកឯទៀត។ ហើយធ្វើឲ្យអ្នកឯទៀតទៅជាឆ្កួត ទៅសម្លាប់គេ ឬសម្លាប់ខ្លួនឯង។
សព្វថ្ងៃនេះ ពួកព្រាយបិសាចធ្វើឲ្យអ្នកខ្លះទៅជាឃោរឃៅហើយរំខានបៀតបៀនអ្នកឯទៀតនៅពេលយប់ឲ្យគេយល់សប្ដអាក្រក់ក្រៃលែង
នាងលីនធីណា ដែលរស់នៅក្នុងប្រទេសសួរីណាម ប្រាប់ថាព្រាយបិសាច ឬវិញ្ញាណអាក្រក់ បានសម្លាប់គ្នា១៦នាក់ក្នុងគ្រួសារនាង ហើយធ្វើទុក្ខយ៉ាងខ្លាំងដល់រូបកាយនិងចិត្តរបស់នាងអស់រយៈ១៨ឆ្នាំ។ ពីការពិសោធខ្លួនឯង នាងថ្លែងថាពួកព្រាយបិសាច «ចូលចិត្តធ្វើទារុណកម្មដល់អ្នករងគ្រោះដែលចង់រួចខ្លួន ដរាបដល់គេស្លាប់»។
ប៉ុន្តែ ព្រះយេហូវ៉ាមានសមត្ថភាពនឹងរក្សាការពារអ្នកបំរើទ្រង់ពីការធ្វើទុក្ខបៀតបៀនរបស់សាតាំង។—សុភាសិត ១៨:១០