ជំពូកទីដប់ប្រាំពីរ
ចូរសម្ដែងការគោរពប្រតិបត្ដិចំពោះព្រះក្នុងក្រុមគ្រួសារ
១. តើការអនុវត្តតាមសេចក្ដីណែនាំពីបន្ទូលរបស់ព្រះ មានអានុភាពយ៉ាងណាលើរឿងអាពាហ៍ពិពាហ៍?
ព្រះយេហូវ៉ាជាអ្នកស្ថាបនាចំណងអាពាហ៍ពិពាហ៍ដំបូង និងព្រះបន្ទូលរបស់ទ្រង់ផ្ដល់នូវសេចក្ដីណែនាំដ៏ប្រសើរបំផុតសំរាប់ក្រុមគ្រួសារ។ មនុស្សជាច្រើនបានធ្វើឲ្យអាពាហ៍ពិពាហ៍បានជោគជ័យ ដោយសារពួកគេអនុវត្តតាមសេចក្ដីណែនាំរបស់ទ្រង់។ គួរឲ្យសរសើរណាស់! ដែលមនុស្សខ្លះធ្លាប់រស់នៅជាមួយគ្នាដោយមិនបានរៀបការ បានត្រូវជំរុញឲ្យពួកគេរៀបអាពាហ៍ពិពាហ៍ត្រឹមត្រូវតាមច្បាប់វិញ។ អ្នកខ្លះទៀតបានឈប់រួមភេទក្រៅអាពាហ៍ពិពាហ៍។ ពួកបុរសដ៏កាចសាហាវដែលធ្លាប់វាយធ្វើបាបប្រពន្ធនិងកូនរបស់ខ្លួន ក៏បានរៀនបង្ហាញនូវសេចក្ដីសប្បុរសនិងសេចក្ដីថ្នាក់ថ្នមវិញដែរ។
២. តើជីវិតរស់នៅក្នុងក្រុមគ្រួសារគ្រីស្ទានរួមបញ្ចូលភារកិច្ចអ្វីខ្លះ?
២ ជីវិតរស់នៅក្នុងក្រុមគ្រួសារគ្រីស្ទាន រួមបញ្ចូលអ្វីជាច្រើន ដូចជាការមានទស្សនៈចំពោះភាពអចិន្ត្រៃយ៍នៃចំណងអាពាហ៍ពិពាហ៍ និងអ្វីដែលយើងធ្វើដើម្បីបំពេញភារកិច្ចក្នុងក្រុមគ្រួសារ ព្រមទាំងរបៀបដែលយើងប្រព្រឹត្តទៅលើសមាជិកក្នុងក្រុមគ្រួសារផងដែរ។ (អេភេសូរ ៥:៣៣–៦:៤) ទោះជាយើងដឹងថា ព្រះគម្ពីរចែងយ៉ាងណាអំពីជីវិតរស់នៅក្នុងក្រុមគ្រួសារក៏ដោយ តែការប្រព្រឹត្តតាមឱវាទព្រះគម្ពីរគឺជាអ្វីដ៏ពិបាកណាស់។ គ្មានយើងណាម្នាក់ចង់ធ្វើដូចជាអស់អ្នកដែលព្រះយេស៊ូផ្ដន្ទាទោសនោះទេ ព្រោះពួកគេមិនបានធ្វើតាមបញ្ញត្តរបស់ព្រះឡើយ។ ពួកគេបានវែកញែកយ៉ាងខុសថា ការមានភក្ដីភាពចំពោះព្រះប៉ុណ្ណោះគឺគ្រប់គ្រាន់ហើយ។ (ម៉ាថាយ ១៥:៤-៩) យើងមិនចង់មានឫកពាជាអ្នកគោរពប្រតិបត្ដិចំពោះព្រះ ប៉ុន្តែខកខានមិនគោរពប្រតិបត្ដិចំពោះព្រះក្នុងក្រុមគ្រួសាររបស់យើងទេ។ ផ្ទុយទៅវិញ យើងចង់សម្ដែងនូវសច្ចភាពនៃការគោរពប្រតិបត្ដិចំពោះព្រះ ដែលជា«កំរៃ១យ៉ាងធំមែន»។—ធីម៉ូថេទី១ ៥:៤; ៦:៦; ធីម៉ូថេទី២ ៣:៥
តើចំណងអាពាហ៍ពិពាហ៍ត្រូវមានយូរប៉ុនណា?
៣. (ក) តើមានអ្វីដែលកំពុងតែកើតឡើងដល់អាពាហ៍ពិពាហ៍ជាច្រើន? តែយើងគួរតាំងចិត្តធ្វើអ្វី? (ខ) ចូរប្រើព្រះគម្ពីរដើម្បីឆ្លើយនូវសំនួរដែលមាននៅខាងក្រោមវគ្គនេះ។
៣ ចំណងអាពាហ៍ពិពាហ៍កាន់តែច្រើនឡើង បានបែកបាក់គ្នាយ៉ាងឆាប់រហ័ស។ គូស្វាមីភរិយាខ្លះបានរៀបការច្រើនឆ្នាំមកហើយ តែនៅតែសម្រេចចិត្តលែងលះគ្នាទៅរៀបការយកគូថ្មីមួយទៀតទាល់តែបាន។ ម្យ៉ាងទៀត គឺលែងជាការចម្លែកហើយ ពេលឮគូស្វាមីភរិយាដែលនៅក្មេងបានរស់នៅដាច់ឡែកពីគ្នា ក្រោយពីរៀបការបានតែមួយរយៈពេលដ៏ខ្លីនោះ។ ទោះជាអ្នកដទៃធ្វើយ៉ាងណាក៏ដោយ យើងគួរចង់ផ្គាប់ព្រះហឫទ័យរបស់ព្រះយេហូវ៉ា។ ដូច្នេះ សូមឲ្យយើងពិនិត្យមើលនូវសំនួរនិងបទគម្ពីរទាំងប៉ុន្មានដូចតទៅ ដើម្បីឲ្យដឹងថាតើព្រះបន្ទូលរបស់ព្រះចែងយ៉ាងណា អំពីភាពអចិន្ត្រៃយ៍នៃអាពាហ៍ពិពាហ៍។
ពេលបុរសនិងស្ត្រីរៀបការ តើតម្រូវឲ្យពួកគេរស់នៅជាមួយគ្នាយូរប៉ុនណាទៅ? (ម៉ាកុស ១០:៦-៩; រ៉ូម ៧:២, ៣)
តើអ្វីជាមូលហេតុតែមួយគត់ដែលព្រះទទួលស្គាល់ចំពោះការលែងលះគ្នា ដែលបើកលទ្ធភាពឲ្យរៀបការម្ដងទៀតបាន? (ម៉ាថាយ ៥:៣១, ៣២; ១៩:៣-៩)
តើព្រះយេហូវ៉ាមានព្រះទ័យយ៉ាងណា ចំពោះការលែងលះគ្នាដែលគ្មានមូលដ្ឋានពីព្រះបន្ទូលរបស់ទ្រង់? (ម៉ាឡាគី ២:១៣-១៦)
តើព្រះគម្ពីរគាំទ្រការរស់នៅដាច់ឡែកពីគ្នា ជាមធ្យោបាយដោះស្រាយបញ្ហាក្នុងអាពាហ៍ពិពាហ៍ឬទេ? (កូរិនថូសទី១ ៧:១០-១៣)
តើនៅក្នុងកាលៈទេសៈណាដែលការរស់នៅដាច់ឡែកពីគ្នាគឺត្រឹមត្រូវ? (ទំនុកដំកើង ១១:៥; លូកា ៤:៨; ធីម៉ូថេទី១ ៥:៨)
៤. ហេតុអ្វីបានជាចំណងអាពាហ៍ពិពាហ៍ខ្លះនៅស្ថិតស្ថេរជាប់រហូត?
៤ អាពាហ៍ពិពាហ៍ខ្លះបានជោគជ័យ គឺថាពួកគេបានរស់នៅជាមួយគ្នារហូត។ ហេតុអ្វី? កត្ដាមួយដ៏សំខាន់ គឺជាការចាំមួយរយៈពេលសិនដោយមិនរៀបការរហូតដល់បុគ្គលទាំងពីរនាក់មានគំនិតចាស់ទុំរៀងៗខ្លួន។ កត្ដាមួយទៀតដ៏សំខាន់ គឺបុគ្គលទាំងពីរនាក់ត្រូវមានចំណាប់អារម្មណ៍ដូចគ្នា និងអាចពិគ្រោះជាមួយគ្នានូវរឿងផ្សេងៗដោយឥតលាក់លៀមបាន។ ប៉ុន្តែ អ្វីដែលសំខាន់បំផុត គឺការស្វែងរកគូម្នាក់ដែលស្រឡាញ់ព្រះយេហូវ៉ា និងគោរពព្រះបន្ទូលរបស់ទ្រង់ក្នុងពេលដោះស្រាយបញ្ហា។ (ទំនុកដំកើង ១១៩:៩៧, ១០៤; ធីម៉ូថេទី២ ៣:១៦, ១៧) បុគ្គលបែបនេះមិនគួរមានគំនិតថា បើអាពាហ៍ពិពាហ៍របស់ខ្លួនឥតបានជោគជ័យទេ នោះគាត់អាចរស់នៅដាច់ឡែកពីគ្នា ឬក៏នឹងលែងលះគ្នាបាននោះ។ គាត់នឹងមិនយកគុណវិបត្ដិនៃគូរបស់ខ្លួន មកអាងជាលេសឲ្យគាត់ជៀសវាងភារកិច្ចរបស់ខ្លួនឡើយ។ ផ្ទុយទៅវិញ គាត់នឹងមិនដកថយពីបញ្ហាទេ តែខំរកដំណោះស្រាយវិញ។
៥. (ក) តើភក្ដីភាពចំពោះព្រះយេហូវ៉ាជាប់ទាក់ទងយ៉ាងណានឹងអាពាហ៍ពិពាហ៍? (ខ) ទោះជាមានការប្រឆាំងយ៉ាងណាក៏ដោយ តើការកាន់តាមខ្នាតតម្រារបស់ព្រះយេហូវ៉ាអាចមានប្រយោជន៍យ៉ាងណា?
៥ សាតាំងអះអាងថា ពេលយើងរងទុក្ខ នោះយើងនឹងបោះបង់ចោលមាគ៌ារបស់ព្រះយេហូវ៉ាជាពុំខាន។ (យ៉ូប ២:៤, ៥; សុភាសិត ២៧:១១) ប៉ុន្តែស្មរបន្ទាល់ព្រះយេហូវ៉ាភាគច្រើន ដែលបានរងទុក្ខដោយសារមានគូដែលប្រឆាំង មិនបានបំភ្លេចពាក្យសច្ចាអាពាហ៍ពិពាហ៍របស់គេទេ។ ពួកគេបន្តស្មោះត្រង់ចំពោះព្រះយេហូវ៉ានិងបញ្ញត្ដិរបស់ទ្រង់ជានិច្ច។ (ម៉ាថាយ ៥:៣៧) ស្មរបន្ទាល់ខ្លះដែលបានស៊ូទ្រាំក៏បានមានអំណរដែរ ដោយសារគូរបស់ខ្លួនបានរួមចំណែកជាមួយខ្លួនក្នុងការថ្វាយបង្គំព្រះយេហូវ៉ា សូម្បីតែធ្លាប់ប្រឆាំងជាច្រើនឆ្នាំមកហើយក៏ដោយ។ (ពេត្រុសទី១ ៣:១, ២) រីឯគ្រីស្ទានដែលមានគូ ដែលនៅតែប្រឆាំង ឬបានបោះបង់ចោលខ្លួនដោយសារតែពួកគេបំរើព្រះយេហូវ៉ា អ្នកទាំងនេះដឹងថា ពួកគេនឹងទទួលពរ ដែលមកពីការគោរពប្រតិបត្ដិចំពោះព្រះក្នុងក្រុមគ្រួសារខ្លួន។—ទំនុកដំកើង ៥៥:២២; ១៤៥:១៦
បុគ្គលម្នាក់ៗត្រូវបំពេញភារកិច្ចរបស់ខ្លួន
៦. ដើម្បីជួយអាពាហ៍ពិពាហ៍ឲ្យបានជោគជ័យ តើត្រូវគោរពរបៀបរៀបចំអ្វី?
៦ ប្រាកដហើយ ការជួយអាពាហ៍ពិពាហ៍ឲ្យបានជោគជ័យគឺតម្រូវច្រើនទៀត មិនមែនគ្រាន់តែរស់នៅជាមួយគ្នាប៉ុណ្ណោះនោះទេ។ បុគ្គលម្នាក់ៗត្រូវគោរពរបៀបរៀបចំរបស់ព្រះយេហូវ៉ាស្តីអំពីប្រមុខភាព។ នេះនាំឲ្យមានសណ្ដាប់ធ្នាប់និងមានអារម្មណ៍សុខស្រួលក្នុងក្រុមគ្រួសារ។ នៅកូរិនថូសទី១ ១១:៣ យើងអានថា៖ «តែខ្ញុំចង់ឲ្យអ្នករាល់គ្នាដឹងថា ព្រះគ្រីស្ទជាសិរសានៃបុរសទាំងអស់ ឯបុរសវិញ នោះជាក្បាលនៃស្ត្រី ហើយសិរសានៃព្រះគ្រីស្ទ គឺជាព្រះ»។
៧. តើអ្នកដែលជាប្រមុខក្នុងក្រុមគ្រួសារត្រូវប្រព្រឹត្តយ៉ាងណា?
៧ តើអ្នកបានកត់សម្គាល់ថាខនេះបានរៀបរាប់អ្វីមុនគេទេ? មែនហើយ បុរសទាំងអស់មានមេដឹកនាំជាព្រះគ្រីស្ទ ហើយគាត់ត្រូវចុះចូលតាមទ្រង់ជានិច្ច។ នេះបានសេចក្ដីថា ស្វាមីគួរជាមេគ្រួសារដែលបង្ហាញនូវគុណសម្បត្ដិរបស់ព្រះយេស៊ូ។ ព្រះគ្រីស្ទចុះចូលជាមួយនឹងព្រះយេហូវ៉ា ស្រឡាញ់ក្រុមជំនុំយ៉ាងស្មោះស្ម័គ្រ និងមើលថែរក្សាក្រុមជំនុំ។ (ធីម៉ូថេទី១ ៣:១៥) ទ្រង់ថែមទាំង«បានប្រគល់ព្រះអង្គទ្រង់ជំនួសផង»។ ព្រះយេស៊ូមិនក្រអឺតក្រទម ឬជាបុគ្គលដែលមិនគិតដល់ប្រយោជន៍អ្នកឯទៀតនោះទេ តែទ្រង់«ស្លូតហើយមានចិត្តសុភាព»។ អស់អ្នកដែលនៅក្រោមប្រមុខភាពរបស់ទ្រង់«បានកម្លាំងចិត្តចំពោះជីវិតរបស់ពួកគេ»។ ពេលស្វាមីប្រព្រឹត្តចំពោះក្រុមគ្រួសារតាមរបៀបនេះ គាត់បង្ហាញថា គាត់ចុះចូលចំពោះព្រះគ្រីស្ទ។ ភរិយាជាគ្រីស្ទាននឹងបានផលប្រយោជន៍និងកម្លាំងចិត្ត ពេលសហការជាមួយនឹងស្វាមីរបស់នាង និងចុះចូលចំពោះប្រមុខភាពរបស់ប្ដី។—អេភេសូរ ៥:២៥-៣៣; ម៉ាថាយ ១១:២៨, ២៩, ព.ថ.; សុភាសិត ៣១:១០, ២៨
៨. (ក) ហេតុអ្វីក៏វិធីដោះស្រាយបញ្ហាតាមមាគ៌ាគ្រីស្ទានមើលទៅហាក់ដូចជា មិនបានលទ្ធផលល្អក្នុងក្រុមគ្រួសារខ្លះ? (ខ) តើយើងត្រូវធ្វើយ៉ាងណា បើប្រឈមមុខនឹងស្ថានការណ៍បែបនេះ?
៨ ប៉ុន្តែ នឹងមានបញ្ហា។ ការតូចចិត្តខ្លះៗចំពោះការណែនាំពីអ្នកដទៃ ប្រហែលជានៅជាប់ក្នុងចិត្តយ៉ាងជ្រៅ មុននឹងបុគ្គលណាម្នាក់ក្នុងគ្រួសារចាប់ផ្ដើមអនុវត្តតាមគោលការណ៍ព្រះគម្ពីរនោះ។ សេចក្ដីស្នើសុំដ៏ស្លូតបូតឬការប្រព្រឹត្តដោយស្រឡាញ់ ហាក់ដូចជាឥតបានលទ្ធផលល្អទេ។ យើងដឹងថា ព្រះគម្ពីរចែងថា ត្រូវបំបាត់ចោល«កំហឹង ឡូឡា ជេរប្រមាថ នឹងគ្រប់ទាំងសេចក្ដីអាក្រក់»។ (អេភេសូរ ៤:៣១) ចុះបើសមាជិកខ្លះក្នុងគ្រួសារមិនព្រមស្ដាប់តាមទេ ទាល់តែមានការគំហកកំហែងទើបធ្វើនោះ? តើត្រូវធ្វើយ៉ាងណា? ព្រះយេស៊ូឥតធ្វើតាមគំរូនៃអស់អ្នកដែលគំរាមកំហែងនិងជេរប្រមាថនោះទេ តែទ្រង់ទុកចិត្តលើព្រះវរបិតាវិញ។ (ពេត្រុសទី១ ២:២២, ២៣) ពេលមានស្ថានការណ៍ដ៏ពិបាកក្នុងក្រុមគ្រួសារ សូមបង្ហាញថាខ្លួនគោរពប្រតិបត្ដិព្រះ ដោយអធិស្ឋានទូលព្រះយេហូវ៉ាឲ្យទ្រង់ជួយ ជាជាងធ្វើតាមផ្លូវរបស់លោកីយ៍នេះ។—សុភាសិត ៣:៥-៧
៩. ជាជាងចាប់កំហុស តើស្វាមីគ្រីស្ទានបានរៀនចេះធ្វើអ្វី?
៩ ការកែប្រែមិនតែងកើតមានភ្លាមៗទេ តែឱវាទក្នុងព្រះគម្ពីរពិតជាមានប្រយោជន៍ បើត្រូវអនុវត្តតាមដោយចិត្តអត់ធ្មត់ និងដោយចិត្តព្យាយាម។ ស្វាមីជាច្រើនយល់ឃើញថា ចំណងអាពាហ៍ពិពាហ៍បានរឹងមាំឡើង ពេលពួកគេយល់នូវការប្រព្រឹត្តរបស់ព្រះគ្រីស្ទចំពោះក្រុមជំនុំ។ ក្រុមជំនុំមិនមានមនុស្សគ្រប់ល័ក្ខណ៍ទេ។ ប៉ុន្តែ ព្រះយេស៊ូស្រឡាញ់ក្រុមជំនុំ ទ្រង់ទុកគំរូយ៉ាងល្អឲ្យ ហើយប្រើបទគម្ពីរដើម្បីជួយក្រុមជំនុំឲ្យរីកចំរើន។ ទ្រង់បានបូជាព្រះជន្មទ្រង់ដើម្បីក្រុមជំនុំ។ (ពេត្រុសទី១ ២:២១) គំរូរបស់ទ្រង់បានលើកទឹកចិត្តស្វាមីគ្រីស្ទានជាច្រើន ឲ្យធ្វើជាមេគ្រួសារដ៏ល្អ និងផ្ដល់ជំនួយដែលប្រកបទៅដោយសេចក្ដីស្រឡាញ់ដើម្បីជួយឲ្យចំណងអាពាហ៍ពិពាហ៍របស់ពួកគេបានរឹងមាំថែមទៀត។ ការធ្វើបែបនេះនឹងបានលទ្ធផលល្អប្រសើរជាងការចាប់កំហុសឬការឈប់និយាយរកគ្នា។
១០. (ក) តើតាមរបៀបណាដែលស្វាមីឬភរិយាដែលអះអាងថាខ្លួនជាគ្រីស្ទាន ធ្វើឲ្យពិបាកដល់សមាជិកក្នុងគ្រួសារ? (ខ) តើអាចធ្វើអ្វីដើម្បីឲ្យមានស្ថានការណ៍ដ៏ល្អឡើងវិញ?
១០ ចុះយ៉ាងណាវិញ បើប្ដីមិនដឹងនូវសេចក្ដីត្រូវការខាងផ្លូវចិត្តរបស់ក្រុមគ្រួសារខ្លួន ឬមិនផ្ដើមគំនិតរៀបចំសំរាប់ការពិគ្រោះព្រះគម្ពីរជាក្រុមគ្រួសារ និងសំរាប់សកម្មភាពផ្សេងទៀតនោះ? ឬចុះយ៉ាងណាវិញ បើភរិយាមិនសហការជាមួយគាត់ និងមិនបង្ហាញការចុះចូលតាមបង្គាប់របស់ព្រះ? អ្នកខ្លះបានលទ្ធផលល្អ ដោយមានការពិគ្រោះជាគ្រួសារស្តីអំពីបញ្ហានេះ។ (លោកុប្បត្តិ ២១:១០-១២; សុភាសិត ១៥:២២) ប៉ុន្តែ ទោះជាឥតបានសម្រេចតាមសេចក្ដីសង្ឃឹមក៏ដោយ យើងម្នាក់ៗអាចនាំឲ្យមានបរិយាកាសដ៏ល្អវិញ ដោយសម្ដែងនូវផលផ្លែនៃព្រះវិញ្ញាណរបស់ព្រះក្នុងជីវិតយើង ដោយបង្ហាញនូវការចេះគិតដល់សមាជិកក្នុងគ្រួសារ។ (កាឡាទី ៥:២២, ២៣) បញ្ហានឹងបាត់ទៅបន្ដិចម្ដងៗ បើយើងមិនចាំទាល់តែសមាជិកផ្សេងទៀតក្នុងគ្រួសារកែប្រែមុនយើងនោះទេ តែដោយយើងបំពេញភារកិច្ចរបស់យើងជាមុន នោះនឹងបង្ហាញថាយើងមានភក្ដីភាពចំពោះព្រះ។—កូល៉ុស ៣:១៨-២១
ប្រភពនៃឱវាទត្រឹមត្រូវ
១១, ១២. តើព្រះយេហូវ៉ាបានប្រទានជំនួយអ្វី ដើម្បីធ្វើឲ្យជីវិតក្នុងគ្រួសារបានជោគជ័យ?
១១ មនុស្សជាច្រើនស្វែងរកឱវាទពីមជ្ឈដ្ឋានផ្សេងៗចំពោះរឿងក្នុងក្រុមគ្រួសាររបស់ពួកគេ។ ប៉ុន្តែ យើងដឹងថា ព្រះបន្ទូលរបស់ព្រះមានឱវាទដ៏ល្អបំផុត ហើយយើងក៏មានអំណរគុណដែលទ្រង់ជួយយើងឲ្យអនុវត្តតាមឱវាទនោះ តាមរយៈអង្គការរបស់ទ្រង់នៅលើផែនដី។ តើអ្នកកំពុងតែទទួលប្រយោជន៍យ៉ាងពេញលេញពីជំនួយនោះទេ?—ទំនុកដំកើង ១១៩:១២៩,១៣០; មីកា ៤:២
១២ ក្រៅពីការទៅឯកិច្ចប្រជុំក្នុងក្រុមជំនុំ តើអ្នកលៃយកពេលមួយដ៏ទៀងទាត់សំរាប់ការសិក្សាព្រះគម្ពីរជាគ្រួសារឬទេ? ក្រុមគ្រួសារណាដែលធ្វើដូច្នេះ នឹងអាចនាំឲ្យមានសាមគ្គីភាពក្នុងការថ្វាយបង្គំព្រះ។ ជីវិតរស់នៅក្នុងក្រុមគ្រួសាររបស់ពួកគេនឹងបានពរយ៉ាងវិសេស ពេលពួកគេអនុវត្តតាមបន្ទូលព្រះក្នុងកាលៈទេសៈរបស់ខ្លួន។—ចោទិយកថា ១១:១៨-២១
១៣. (ក) បើយើងមានសំនួរលើរឿងក្នុងគ្រួសារ តើយើងអាចរកជំនួយពីណា? (ខ) តើអ្វីដែលយើងត្រូវបង្ហាញក្នុងសេចក្ដីសម្រេចចិត្តទាំងអស់ ដែលយើងធ្វើនោះ?
១៣ អ្នកប្រហែលជាមានសំនួរអំពីរឿងក្នុងក្រុមគ្រួសារ។ ជាឧទាហរណ៍ ចុះយ៉ាងណាចំពោះការលេបថ្នាំពន្យារកំណើត? តើការពន្លូតកូនគឺត្រឹមត្រូវឬទេ? បើកូនម្នាក់ឥតចាប់អារម្មណ៍លើរឿងខាងវិញ្ញាណ តើគួរតម្រូវឲ្យកូននោះចូលរួមក្នុងការថ្វាយបង្គំជាគ្រួសារដល់កំរិតណា? សំនួរជាច្រើនដូចនេះបានត្រូវពិគ្រោះក្នុងប្រកាសនវត្ថុ ដែលបោះពុម្ពដោយស្មរបន្ទាល់ព្រះយេហូវ៉ា។ ចូររៀនប្រើឧបករណ៍សំរាប់ការសិក្សាព្រះគម្ពីរ ដូចជាលិបិក្រមជាដើម ដើម្បីរកចម្លើយ។ ប្រសិនបើអ្នកឥតមានប្រកាសនវត្ថុដែលមានក្នុងលិបិក្រមនោះទេ សូមឆែកមើលបណ្ណាល័យនៅសាលប្រជុំ។ ឬអ្នកអាចរកប្រកាសនវត្ថុនេះក្នុងកុំព្យូទ័ររបស់អ្នក។ អ្នកក៏អាចពិគ្រោះសំនួរនេះជាមួយនឹងបុរសនិងស្ត្រីគ្រីស្ទាន ដែលមានគំនិតចាស់ទុំដែរ។ ប៉ុន្តែ អ្នកមិនគួរសង្ឃឹមថាបានចម្លើយដែលប្រាប់អ្នកយ៉ាងច្បាស់នូវអ្វីដែលអ្នកគួរធ្វើ ឬអ្វីដែលអ្នកមិនគួរធ្វើនោះឡើយ។ ជារឿយៗអ្នកត្រូវតែសម្រេចចិត្តដោយខ្លួនឯង ឬជាគូស្វាមីភរិយា។ រួចមកធ្វើការសម្រេចចិត្ត ដែលបង្ហាញថា អ្នកគោរពប្រតិបត្ដិចំពោះព្រះ មិនមែនតែនៅមុខគេឯងប៉ុណ្ណោះទេ តែនៅក្នុងផ្ទះរបស់អ្នកដែរ។—រ៉ូម ១៤:១៩; អេភេសូរ ៥:១០
ការពិគ្រោះសាឡើងវិញ
• តើយ៉ាងដូចម្ដេចដែលភក្ដីភាពចំពោះព្រះយេហូវ៉ា ក៏ទាក់ទងនឹងសេចក្ដីស្មោះត្រង់ចំពោះគូរបស់ខ្លួនដែរ?
• ពេលមានការពិបាកដោយសារបញ្ហាក្នុងគ្រួសារ តើអ្វីដែលនឹងជួយយើងឲ្យធ្វើតាមព្រះហឫទ័យរបស់ព្រះ?
• ទោះជាសមាជិកខ្លះក្នុងគ្រួសារមិនធ្វើតាមក៏ដោយ តើយើងអាចធ្វើអ្វីដើម្បីឲ្យស្ថានការណ៍ក្នុងគ្រួសារបានប្រសើរឡើង?
[រូបភាពនៅទំព័រ១៥៥]
ជាមេគ្រួសារស្វាមីគួរបង្ហាញគុណសម្បត្ដិរបស់ព្រះយេស៊ូ
[រូបភាពនៅទំព័រ១៥៧]
ការសិក្សាព្រះគម្ពីរជាទៀងទាត់ជាមួយនឹងគ្រួសារនឹងជួយឲ្យមានសាមគ្គីភាព