មេរៀនទី៣
រ៉ាហាបបានជឿព្រះយេហូវ៉ា
សូមគិតថាយើងកំពុងនៅទីក្រុងយេរីខូ។ ទីក្រុងនេះនៅក្នុងស្រុកកាណាន ហើយមនុស្សនៅទីនេះមិនជឿព្រះយេហូវ៉ាទេ។ ស្ត្រីម្នាក់ឈ្មោះរ៉ាហាបក៏រស់នៅទីនេះដែរ។
ពេលរ៉ាហាបនៅក្មេង នាងបានឮអំពីរបៀបដែលម៉ូសេញែកសមុទ្រក្រហម និងនាំបណ្ដាជនអ៊ីស្រាអែលចេញពីស្រុកអេស៊ីប។ នាងក៏បានឮអំពីរបៀបដែលព្រះយេហូវ៉ាបានជួយពួកគេច្បាំងឈ្នះសត្រូវរបស់ពួកគេដែរ។ ឥឡូវនាងឮថា បណ្ដាជនអ៊ីស្រាអែលកំពុងបោះជំរំនៅជិតទីក្រុងយេរីខូ!
រ៉ាហាបបានការពារអ្នកស៊ើបការណ៍សម្ងាត់ ដោយសារនាងជឿព្រះយេហូវ៉ា
នៅយប់មួយ ជនជាតិអ៊ីស្រាអែលពីរនាក់បានបន្លំចូលជាសម្ងាត់ដើម្បីមើលទីក្រុងនេះ។ ពួកគាត់បានត្រូវហៅថា អ្នកស៊ើបការណ៍សម្ងាត់។ ពួកគាត់បានមកឯផ្ទះរបស់រ៉ាហាប។ នាងបានអញ្ជើញពួកគេឲ្យចូលក្នុងផ្ទះដើម្បីសម្រាក។ នៅយប់នោះ ស្តេចក្រុងយេរីខូបានដឹងថា មានអ្នកស៊ើបការណ៍សម្ងាត់នៅក្នុងទីក្រុង ហើយពួកគេបានទៅផ្ទះរបស់រ៉ាហាប។ ដូច្នេះ ស្តេចបានចាត់បុរសមួយចំនួនឲ្យទៅចាប់ពួកគេ។ រ៉ាហាបបានលាក់អ្នកស៊ើបការណ៍សម្ងាត់ពីរនាក់នោះនៅដំបូលរាបស្មើលើផ្ទះរបស់នាង ហើយនាងបានប្រាប់បុរសដែលស្តេចចាត់ឲ្យមកថា៖ ‹អ្នកស៊ើបការណ៍សម្ងាត់នោះនៅទីនេះមែន តែពួកគេបានចេញពីទីក្រុងហើយ។ បើអ្នកដេញតាមឥឡូវ អ្នកអាចតាមពួកគេទាន់!›។ ហេតុអ្វីរ៉ាហាបការពារអ្នកស៊ើបការណ៍សម្ងាត់នេះ? តើកូនដឹងទេ?— ពីព្រោះនាងជឿព្រះយេហូវ៉ា ហើយនាងដឹងថា លោកនឹងឲ្យទឹកដីស្រុកកាណានដល់បណ្ដាជនអ៊ីស្រាអែល។
មុនអ្នកស៊ើបការណ៍ចេញពីផ្ទះរបស់រ៉ាហាប ពួកគាត់បានសន្យាថា ពេលទីក្រុងយេរីខូបានត្រូវបំផ្លាញ នាងនិងក្រុមគ្រួសាររបស់នាងនឹងរួចជីវិត។ តើពួកគាត់បានប្រាប់នាងឲ្យធ្វើអ្វី? តើកូនដឹងទេ?— ពួកគាត់និយាយថា៖ ‹សូមយកខ្សែក្រហមនេះ ហើយត្រូវចងនៅខាងក្រៅបង្អួចរបស់អ្នក។ បើអ្នកធ្វើដូច្នេះ មនុស្សទាំងអស់ដែលនៅក្នុងផ្ទះរបស់អ្នកនឹងរួចជីវិត›។ រ៉ាហាបបានធ្វើតាមដូចអ្វីដែលអ្នកស៊ើបការណ៍នោះប្រាប់។ តើកូនដឹងថា មានអ្វីកើតឡើងក្រោយមកទេ?—
ព្រះយេហូវ៉ាបានសង្គ្រោះរ៉ាហាបនិងក្រុមគ្រួសាររបស់នាង
ប៉ុន្មានថ្ងៃក្រោយមក បណ្ដាជនអ៊ីស្រាអែលបានដើរជុំវិញទីក្រុងដោយស្ងៀមស្ងាត់។ អស់៦ថ្ងៃពួកគេបានដើរជុំវិញទីក្រុង មួយថ្ងៃមួយជុំ។ ប៉ុន្តែ នៅថ្ងៃទី៧ ពួកគេបានដើរជុំវិញទីក្រុងអស់៧ជុំ។ ក្រោមមក ពួកគេទាំងអស់គ្នាបានស្រែកឡើងយ៉ាងខ្លាំង ហើយព្រះយេហូវ៉ាធ្វើឲ្យកំពែងជុំវិញទីក្រុងរលំ។ ប៉ុន្តែ ផ្ទះនៅជាប់កំពែងទីក្រុងដែលមានខ្សែក្រហមចងនៅខាងក្រៅបង្អួចនោះ មិនបានរលំឡើយ! តើកូនឃើញក្នុងរូបភាពនេះទេ?— រ៉ាហាបនិងក្រុមគ្រួសាររបស់នាងបានរួចជីវិត!
តើកូនអាចរៀនមេរៀនអ្វីពីរ៉ាហាប?— រ៉ាហាបបានជឿព្រះយេហូវ៉ា ដោយសារនាងបានរៀនអ្វីៗដ៏អស្ចារ្យជាច្រើនអំពីលោក។ កូនក៏កំពុងរៀនអ្វីៗដ៏អស្ចារ្យជាច្រើនអំពីព្រះយេហូវ៉ាដែរ។ តើកូនជឿព្រះយេហូវ៉ាដូចរ៉ាហាបទេ?— កូនប្រាកដជាជឿមែន!