មេរៀនទី២
ចូរស្មោះត្រង់ចំពោះគ្នា
«កុំឲ្យអ្នកណាពង្រាត់គូដែលព្រះបានផ្សំផ្គុំឡើយ»។—ម៉ាកុស ១០:៩
ព្រះយេហូវ៉ាតម្រូវឲ្យយើងមានភក្ដីភាពនិងចិត្តស្មោះត្រង់។ (ទំនុកតម្កើង ៣១:២៣) ក្នុងអាពាហ៍ពិពាហ៍ គុណសម្បត្ដិនេះគឺសំខាន់ណាស់ ព្រោះបើប្ដីប្រពន្ធគ្មានភាពស្មោះត្រង់ទេ នោះពួកគេមិនអាចទុកចិត្តគ្នាបានឡើយ។ ម្យ៉ាងទៀត ការទុកចិត្តគ្នានេះគឺចាំបាច់ដើម្បីឲ្យគូអាពាហ៍ពិពាហ៍ស្រឡាញ់គ្នាកាន់តែខ្លាំងឡើង។
នៅសព្វថ្ងៃនេះ មានអ្វីៗជាច្រើនក្នុងពិភពលោកដែលអាចបំផ្លាញភាពស្មោះត្រង់របស់គូអាពាហ៍ពិពាហ៍។ ដូច្នេះ ដើម្បីការពារអាពាហ៍ពិពាហ៍របស់អ្នក អ្នកត្រូវតាំងចិត្តធ្វើអ្វីទាំងពីរយ៉ាងដូចខាងក្រោមនេះ។
១ ចាត់ទុកអាពាហ៍ពិពាហ៍របស់អ្នកសំខាន់បំផុត
គម្ពីររៀបរាប់ថា: ចូរ«ពិចារណាឲ្យដឹងប្រាកដថាការអ្វីដែលសំខាន់ជាង»។ (ភីលីព ១:១០) អាពាហ៍ពិពាហ៍របស់អ្នកគឺជាអ្វីមួយដែលសំខាន់បំផុតក្នុងជីវិតរបស់អ្នក។ ដូច្នេះ អ្នកគួរយកចិត្តទុកដាក់ចំពោះអាពាហ៍ពិពាហ៍របស់អ្នកមុនអ្វីផ្សេងទៀត។
ព្រះយេហូវ៉ាចង់ឲ្យអ្នកផ្ដោតអារម្មណ៍ទៅលើគូរបស់អ្នក ហើយ«រស់នៅដោយអំណរ»ជាមួយគ្នា។ (សាស្ដា ៩:៩) លោកបានបញ្ជាក់យ៉ាងច្បាស់ថា អ្នកមិនគួរភ្លេចគូរបស់អ្នកទេ។ ផ្ទុយទៅវិញ អ្នកទាំងពីរគួររកវិធីផ្សេងៗដើម្បីធ្វើយ៉ាងណាឲ្យអ្នកទាំងពីរមានចិត្តសប្បាយ។ (កូរិនថូសទី១ ១០:២៤) សូមធ្វើឲ្យគូដឹងថាអ្នកត្រូវការគាត់ ហើយឲ្យតម្លៃចំពោះគាត់។
សូមសាកធ្វើតាមយោបល់នេះ:
សូមចំណាយពេលជាទៀងទាត់ជាមួយនឹងគូ ហើយប្រមូលអារម្មណ៍ទៅលើគាត់ទាំងស្រុងនៅពេលនោះ
សូមចាំថាអ្នកត្រូវគិតអំពីគូរបស់អ្នកជានិច្ច មុននឹងធ្វើការសម្រេចចិត្តណាមួយ កុំគិតតែអំពីខ្លួនអ្នកឡើយ
២ ការពារចិត្តរបស់អ្នក
គម្ពីររៀបរាប់ថា: «អ្នកណាដែលសម្លឹងមើលស្រីរហូតដល់កើតមានចិត្តស្រើបស្រាល អ្នកនោះបានផិតក្បត់ជាមួយនឹងនាងនៅក្នុងចិត្តរួចហើយ»។ (ម៉ាថាយ ៥:២៨) ដូច្នេះ បើអ្នកណាម្នាក់មមៃគិតអំពីការប្រព្រឹត្តអំពើប្រាសចាកសីលធម៌ នោះគាត់កំពុងតែមិនស្មោះត្រង់នឹងគូរបស់គាត់ហើយ។
ព្រះយេហូវ៉ាបានប្រាប់ថា អ្នកត្រូវ«រក្សាចិត្ត»ឬការពារចិត្តរបស់អ្នក។ (សុភាសិត ៤:២៣; យេរេមា ១៧:៩) ដើម្បីធ្វើដូច្នេះ អ្នកត្រូវប្រុងប្រយ័ត្ននឹងអ្វីដែលអ្នកមើល។ (ម៉ាថាយ ៥:២៩, ៣០) សូមធ្វើតាមគំរូរបស់យ៉ូបដែលជាបុរសម្នាក់រស់នៅសម័យបុរាណ។ គាត់បានធ្វើកិច្ចសន្យានឹងភ្នែករបស់គាត់ថា គាត់នឹងមិនសម្លឹងមើលស្ត្រីឯទៀតដោយមានសេចក្ដីប៉ងប្រាថ្នាមិនត្រឹមត្រូវទេ។ (យ៉ូប ៣១:១) សូមតាំងចិត្តមិនមើលរូបអាសអាភាសជាដាច់ខាត។ ណាមួយទៀត សូមតាំងចិត្តមិនមានទំនាក់ទំនងស្នេហាជាមួយអ្នកណាម្នាក់ក្រៅពីគូរបស់អ្នកឡើយ។
សូមសាកធ្វើតាមយោបល់នេះ:
សូមបង្ហាញឲ្យអ្នកឯទៀតឃើញច្បាស់ថា អ្នកស្មោះប្ដូរផ្ដាច់នឹងគូរបស់អ្នក
សូមគិតអំពីអារម្មណ៍របស់គូអ្នក ហើយប្រញាប់បញ្ឈប់រាល់ទំនាក់ទំនងណាដែលធ្វើឲ្យគូមានអារម្មណ៍មិនស្រួល