សំណួរសម្រាប់ពួកអ្នក ដែលចង់ទទួលការជ្រមុជទឹក
ការពិភាក្សាបញ្ចប់ជាមួយនឹងបុគ្គលដែលមានលក្ខណៈគ្រប់គ្រាន់ដើម្បីទទួលការជ្រមុជទឹក
តាមធម្មតា ពិធីជ្រមុជទឹកធ្វើឡើងនៅឯសន្និបាតនិងមហាសន្និបាតរបស់សាក្សីព្រះយេហូវ៉ា។ នៅចុងបញ្ចប់នៃសុន្ទរកថាអំពីការជ្រមុជទឹក អ្នកថ្លែងនឹងអញ្ជើញបុគ្គលដែលមានលក្ខណៈគ្រប់គ្រាន់ដើម្បីទទួលការជ្រមុជទឹក ឲ្យក្រោកឈរ ហើយឆ្លើយសំណួរពីរដោយបន្លឺសំឡេងឲ្យបានឮហើយច្បាស់។ សំណួរទាំងពីរនោះគឺ៖
១. តើអ្នកបានប្រែចិត្តពីអំពើខុសឆ្គងរបស់អ្នក បានប្រគល់ខ្លួនអ្នកជូនព្រះយេហូវ៉ា ហើយបានទទួលយកសេចក្ដីសង្គ្រោះដែលលោកផ្ដល់ឲ្យតាមរយៈលោកយេស៊ូគ្រិស្តឬទេ?
២. តើអ្នកយល់ថាការជ្រមុជទឹករបស់អ្នកនឹងសម្គាល់ថាអ្នកជាសាក្សីព្រះយេហូវ៉ា ដោយរួបរួមជាមួយអង្គការរបស់ព្រះយេហូវ៉ាឬទេ?
ចម្លើយយល់ព្រមនឹងសំណួរទាំងពីរនេះ ជាការ«ប្រកាសជាសាធារណៈ»របស់ពួកអ្នកដែលមានលក្ខណៈគ្រប់គ្រាន់ដើម្បីទទួលការជ្រមុជទឹក ដែលបង្ហាញថាពួកគេមានជំនឿទៅលើថ្លៃលោះ ហើយបានប្រគល់ខ្លួនទាំងស្រុងជូនព្រះយេហូវ៉ា។ (រ៉ូម ១០:៩, ១០) ដូច្នេះ បុគ្គលដែលមានលក្ខណៈគ្រប់គ្រាន់ដើម្បីទទួលការជ្រមុជទឹក គួរគិតហើយអធិដ្ឋានអំពីសំណួរទាំងនេះទុកជាមុន ដើម្បីអាចឆ្លើយស្របទៅតាមជំនឿរបស់ខ្លួន។
តើអ្នកបានអធិដ្ឋានប្រគល់ខ្លួនជូនព្រះយេហូវ៉ា ដោយសន្យាថានឹងគោរពប្រណិប័តន៍តែលោកមួយប៉ុណ្ណោះ និងចាត់ទុកការធ្វើតាមបំណងប្រាថ្នារបស់លោកថាសំខាន់បំផុតក្នុងជីវិតរបស់អ្នកហើយឬនៅ?
នៅឥឡូវនេះ តើអ្នកជឿជាក់ថា អ្នកគួរទទួលការជ្រមុជទឹកឲ្យបានឆាប់បំផុតឬទេ?
តើសម្លៀកបំពាក់បែបណាដែលសមរម្យពេលទទួលការជ្រមុជទឹក? (១ធី. ២:៩, ១០; យ៉ូន. ១៥:១៩; ភី. ១:១០)
យើងគួរស្លៀកពាក់«បែបរមទម និងដោយមានគំនិតសមហេតុសមផល» ដើម្បីបង្ហាញថា«ខ្លួនគោរពប្រណិប័តន៍ព្រះ»។ ដូច្នេះ ពួកអ្នកដែលទទួលការជ្រមុជទឹកគួរជៀសវាងឈុតហែលទឹកមិនសមរម្យ ឬខោអាវដែលមានពាក្យស្លោកឬរូបភាព។ សម្លៀកបំពាក់របស់ពួកគេគួរមានរបៀបរៀបរយ ស្អាតបាត ថ្លៃថ្នូរ និងសមរម្យសម្រាប់ពិធីជ្រមុជទឹក។
តើគួរមានការប្រព្រឹត្តបែបណានៅពេលទទួលការជ្រមុជទឹក? (លូក. ៣:២១, ២២)
ពេលលោកយេស៊ូទទួលការជ្រមុជទឹក លោកបានទុកគំរូយ៉ាងល្អសម្រាប់គ្រិស្តសាសនិកដែលចង់ទទួលការជ្រមុជទឹកនៅសព្វថ្ងៃនេះ។ លោកបានយល់ថាពិធីជ្រមុជទឹកជាជំហានដ៏សំខាន់ ហើយនេះបានសឲ្យឃើញតាមរយៈចិត្តគំនិតនិងការប្រព្រឹត្តរបស់លោក។ ហេតុនេះ កន្លែងទទួលការជ្រមុជទឹកមិនមែនជាកន្លែងសម្រាប់និយាយកំប្លែងមិនសមរម្យ ប្រលែងគ្នា ហែលទឹក ឬការប្រព្រឹត្តផ្សេងទៀតដែលនាំឲ្យបាត់បង់ភាពថ្លៃថ្នូរឡើយ។ គ្រិស្តសាសនិកថ្មីក៏មិនគួរប្រព្រឹត្តហាក់ដូចជាទើបតែបានទទួលជ័យជម្នះដ៏ធំមួយនោះដែរ។ ពិតមែនតែពិធីជ្រមុជទឹកគឺជាពេលដែលនាំឲ្យអរសប្បាយ ប៉ុន្តែអ្នកគួរបង្ហាញអំណរនោះតាមរបៀបថ្លៃថ្នូរ។
តើការសេពគប់ក្រុមជំនុំនិងការចូលរួមកិច្ចប្រជុំជាទៀងទាត់ នឹងជួយអ្នកឲ្យធ្វើតាមការប្រគល់ខ្លួនជូនព្រះយេហូវ៉ាយ៉ាងដូចម្ដេច?
ក្រោយពីអ្នកបានទទួលការជ្រមុជទឹកហើយ ហេតុអ្វីជាការសំខាន់ចាំបាច់ដែលអ្នករក្សាកាលវិភាគដ៏ល្អក្នុងការសិក្សាផ្ទាល់ខ្លួន ហើយចូលរួមកិច្ចផ្សព្វផ្សាយជាទៀងទាត់?
ការណែនាំសម្រាប់អ្នកចាស់ទុំក្នុងក្រុមជំនុំ
នៅពេលអ្នកផ្សព្វផ្សាយដែលមិនទាន់ទទួលការជ្រមុជទឹក ប្រាប់អ្នកចាស់ទុំថាគាត់ចង់ទទួលការជ្រមុជទឹក នោះអ្នកចាស់ទុំគួរលើកទឹកចិត្តគាត់ឲ្យពិនិត្យមើលយ៉ាងហ្មត់ចត់នូវព័ត៌មានក្នុងផ្នែក«សំណួរសម្រាប់ពួកអ្នកដែលចង់ទទួលការជ្រមុជទឹក»នៅទំព័រ១៨៥-២០៧ ក្នុងសៀវភៅនេះ។ អ្នកចាស់ទុំគួរណែនាំគាត់ឲ្យអាន«ដំណឹងជូនចំពោះអ្នកផ្សព្វផ្សាយដែលមិនទាន់ទទួលការជ្រមុជទឹក» ដែលចាប់ផ្ដើមនៅទំព័រ១៨២ ដើម្បីឲ្យគាត់ដឹងអំពីរបៀបរៀបចំសម្រាប់ការពិភាក្សាជាមួយនឹងអ្នកចាស់ទុំ។ ដូចបានកត់ទុកក្នុងវគ្គទាំងនោះ អ្នកដែលចង់ទទួលការជ្រមុជទឹកអាចប្រើកំណត់ដែលគាត់បានកត់ទុក ហើយក៏អាចបើកសៀវភៅនេះមើលក្នុងអំឡុងពេលពិភាក្សាគ្នាដែរ។ ក៏ប៉ុន្តែ មិនចាំបាច់ឲ្យអ្នកណាម្នាក់ពិចារណាសំណួរនោះជាមួយគាត់ មុនគាត់ជួបអ្នកចាស់ទុំឡើយ។
អ្នកដែលចង់ទទួលការជ្រមុជទឹក គួរជម្រាបអ្នកចាត់ចែងកិច្ចការពួកអ្នកចាស់ទុំ។ ក្រោយពីបុគ្គលដែលចង់ទទួលការជ្រមុជទឹកបានអាន«សំណួរសម្រាប់ពួកអ្នកដែលចង់ទទួលការជ្រមុជទឹក» អ្នកចាត់ចែងកិច្ចការពួកអ្នកចាស់ទុំនឹងសួរបុគ្គលនោះថា តើគាត់បានអធិដ្ឋានប្រគល់ខ្លួនជូនព្រះយេហូវ៉ាដើម្បីធ្វើតាមបំណងប្រាថ្នារបស់លោកហើយឬនៅ។ បើគាត់បានអធិដ្ឋានប្រគល់ខ្លួនជូនព្រះរួចហើយ នោះអ្នកចាត់ចែងកិច្ចការពួកអ្នកចាស់ទុំនឹងសុំឲ្យអ្នកចាស់ទុំពីរនាក់ពិភាក្សា«សំណួរសម្រាប់ពួកអ្នកដែលចង់ទទួលការជ្រមុជទឹក»ជាមួយគាត់។ អ្នកចាស់ទុំម្នាក់នឹងដឹកនាំការពិភាក្សាផ្នែកទី១ ហើយអ្នកចាស់ទុំម្នាក់ទៀតនឹងដឹកនាំផ្នែកទី២។ មិនចាំបាច់រង់ចាំដល់ពេលប្រកាសអំពីសន្និបាតឬមហាសន្និបាតទើបចាប់ផ្ដើមពិភាក្សាសំណួរទាំងនេះទេ។
តាមធម្មតា សំណួរទាំងពីរផ្នែកនេះអាចយកមកពិភាក្សាក្នុងរយៈពេលប្រហែលមួយម៉ោងសម្រាប់ផ្នែកនីមួយៗ ប៉ុន្តែ អាចពិភាក្សាយូរជាងនេះបើចាំបាច់។ ការពិភាក្សាផ្នែកនីមួយៗគួរចាប់ផ្ដើមនិងបញ្ចប់ដោយសេចក្ដីអធិដ្ឋាន។ ទាំងអ្នកចាស់ទុំទាំងអ្នកដែលចង់ទទួលការជ្រមុជទឹក មិនគួរមានអារម្មណ៍ថាត្រូវពិភាក្សាគ្នាដោយប្រញាប់ប្រញាល់ទេ។ អ្នកចាស់ទុំដែលបានចាត់តាំងឲ្យធ្វើការពិភាក្សានេះ នឹងរៀបចំឲ្យមានការពិភាក្សាឲ្យបានឆាប់។
តាមធម្មតា ជាការល្អបំផុតបើពិភាក្សាសំណួរទាំងនោះជាមួយនឹងបុគ្គលម្នាក់ៗដែលចង់ទទួលការជ្រមុជទឹក ជាជាងធ្វើការពិភាក្សាជាក្រុម។ ដោយទុកឱកាសឲ្យបុគ្គលនោះឆ្លើយសំណួរទាំងអស់ អ្នកចាស់ទុំនឹងយល់កាន់តែច្បាស់អំពីការយល់ដឹងរបស់គាត់ស្ដីអំពីសេចក្ដីពិតក្នុងគម្ពីរ។ ដូច្នេះ បើគាត់មានលក្ខណៈគ្រប់គ្រាន់ដើម្បីទទួលការជ្រមុជទឹក អ្នកចាស់ទុំនឹងដឹងច្បាស់ដោយមិនសង្ស័យ។ បន្ថែមទៅទៀត បើពិភាក្សាជាមួយនឹងបុគ្គលម្នាក់ៗដែលចង់ទទួលការជ្រមុជទឹក នោះប្រហែលជាធ្វើឲ្យគាត់ស្រួលជាងក្នុងការឆ្លើយនិងប្រាប់ពីអារម្មណ៍របស់គាត់។ ចំពោះប្ដីនិងប្រពន្ធវិញ អ្នកចាស់ទុំអាចពិភាក្សាសំណួរជាមួយនឹងពួកគាត់ទាំងពីរនាក់បាន។
ប្រសិនបើបុគ្គលដែលចង់ទទួលការជ្រមុជទឹកជាស្ត្រី អ្នកចាស់ទុំត្រូវរៀបចំកន្លែងល្អមួយដើម្បីពិភាក្សាគ្នា ជាកន្លែងដែលអ្នកឯទៀតអាចឃើញពួកគេ ប៉ុន្តែមិនអាចស្ដាប់ឮពួកគេទេ។ បើត្រូវការអ្នកណាម្នាក់ទៀត អ្នកចាស់ទុំគួរនាំអ្នកចាស់ទុំឬជំនួយការខាងកិច្ចបម្រើម្នាក់ទៅជាមួយ អាស្រ័យទៅលើផ្នែកដែលត្រូវពិភាក្សា ដូចបានបញ្ជាក់នៅវគ្គបន្ទាប់។
ក្នុងក្រុមជំនុំដែលមានអ្នកចាស់ទុំតិចណាស់ នោះជំនួយការខាងកិច្ចបម្រើដែលមានលក្ខណៈគ្រប់គ្រាន់ ការវិនិច្ឆ័យយ៉ាងត្រឹមត្រូវ និងមានសមត្ថភាពវែកញែក អាចពិភាក្សាសំណួរក្នុង«ផ្នែកទី១: សេចក្ដីបង្រៀនរបស់គ្រិស្តសាសនិកពិត»ជាមួយនឹងបុគ្គលដែលចង់ទទួលការជ្រមុជទឹក។ ប៉ុន្តែ មានតែអ្នកចាស់ទុំប៉ុណ្ណោះដែលគួរពិភាក្សា«ផ្នែកទី២: របៀបរស់នៅជាគ្រិស្តសាសនិកពិត»។ ប្រសិនបើក្រុមជំនុំខ្វះបងប្រុសដែលមានសមត្ថភាពគ្រប់គ្រាន់ នោះក្រុមជំនុំអាចទាក់ទងអ្នកត្រួតពិនិត្យប្រចាំមណ្ឌលដើម្បីដឹងថា តើអ្នកចាស់ទុំពីក្រុមជំនុំនៅក្បែរៗអាចជួយធ្វើការពិភាក្សាឬយ៉ាងណា។
បើអ្នកដែលចង់ទទួលការជ្រមុជទឹកជាក្មេងមិនទាន់គ្រប់អាយុ ឪពុកម្ដាយ(ម្នាក់ឬទាំងពីរនាក់)របស់គាត់ដែលជាអ្នកជឿ គួរចូលរួមការពិភាក្សា។ បើឪពុកឬម្ដាយម្នាក់មិនអាចចូលរួមបាន នោះអ្នកចាស់ទុំពីរនាក់(ឬអ្នកចាស់ទុំម្នាក់និងជំនួយការខាងកិច្ចបម្រើម្នាក់ អាស្រ័យលើផ្នែកដែលត្រូវពិភាក្សា) គួរចូលរួមសម្រាប់ផ្នែកនីមួយៗ។
អ្នកចាស់ទុំគួរធ្វើឲ្យប្រាកដថា បុគ្គលដែលចង់ទទួលការជ្រមុជទឹកមានការយល់ដឹងល្មមគ្រប់គ្រាន់ចំពោះសេចក្ដីបង្រៀនបឋមក្នុងគម្ពីរ។ បន្ថែមទៅទៀត ពួកគាត់នឹងចង់ដឹងថា តើបុគ្គលនោះពិតជាស្រឡាញ់សេចក្ដីពិត ហើយបង្ហាញការគោរពយ៉ាងត្រឹមត្រូវចំពោះអង្គការរបស់ព្រះយេហូវ៉ាឬ?។ ប្រសិនបើបុគ្គលនោះមិនយល់សេចក្ដីបង្រៀនបឋមក្នុងគម្ពីរទេ នោះអ្នកចាស់ទុំនឹងរៀបចំឲ្យគាត់ទទួលជំនួយ ដើម្បីគាត់មានលក្ខណៈគ្រប់គ្រាន់ទទួលការជ្រមុជទឹកនៅពេលក្រោយ។ បុគ្គលឯទៀតដែលចង់ទទួលការជ្រមុជទឹកប្រហែលជាត្រូវការពេលវេលាច្រើនជាង ដើម្បីបង្ហាញថាគាត់យល់អំពីសារៈសំខាន់នៃកិច្ចបម្រើផ្សាយ ឬអំពីសារៈសំខាន់នៃការចុះចូលនឹងរបៀបរៀបចំរបស់អង្គការព្រះ។ ក្នុងអំឡុងប្រហែលមួយម៉ោងនៃការពិភាក្សា អ្នកចាស់ទុំគួរសម្រេចថាគាត់នឹងប្រើពេលយ៉ាងណា ដើម្បីដឹងប្រាកដថាបុគ្គលនោះមានលក្ខណៈគ្រប់គ្រាន់ដើម្បីទទួលការជ្រមុជទឹកឬមិនមាន។ អ្នកចាស់ទុំគួរពិភាក្សាសំណួរទាំងអស់ជាមួយនឹងបុគ្គលដែលចង់ទទួលការជ្រមុជទឹក ទោះជាសំណួរខ្លះត្រូវចំណាយពេលយូរជាងសំណួរឯទៀតក្ដី។
ក្រោយពីបានពិភាក្សាផ្នែកទី២ចប់ហើយ អ្នកចាស់ទុំដែលបានពិភាក្សាសំណួរទាំងនោះ នឹងជួបគ្នាដើម្បីសម្រេចថាបុគ្គលនោះអាចទទួលការជ្រមុជទឹកបានឬមិនបាន។ អ្នកចាស់ទុំនឹងគិតអំពីប្រវត្តិ សមត្ថភាព និងស្ថានភាពរបស់បុគ្គលម្នាក់ៗដែលចង់ទទួលការជ្រមុជទឹក។ អ្នកចាស់ទុំចង់ដឹងថា តើបុគ្គលនោះមានចំណងមិត្តភាពជាមួយព្រះយេហូវ៉ា និងមានការយល់ដឹងអំពីសេចក្ដីបង្រៀនសំខាន់ៗក្នុងគម្ពីរឬយ៉ាងណា។ ដោយមានជំនួយប្រកបដោយសេចក្ដីស្រឡាញ់ពីអ្នក នោះពួកអ្នកដែលនឹងទទួលការជ្រមុជទឹក នឹងមានសមត្ថភាពគ្រប់គ្រាន់ដើម្បីបំពេញភារកិច្ចដ៏សំខាន់របស់ពួកគេ គឺជាភារកិច្ចផ្សព្វផ្សាយដំណឹងល្អ។
ក្រោយមក អ្នកចាស់ទុំម្នាក់ឬទាំងពីរនាក់ដែលបានពិភាក្សាសំណួរជាមួយបុគ្គលនោះ គួរជួបគាត់ដើម្បីប្រាប់ថាគាត់មានលក្ខណៈគ្រប់គ្រាន់ដើម្បីទទួលការជ្រមុជទឹកឬមិនមាន។ បើគាត់មានលក្ខណៈគ្រប់គ្រាន់ អ្នកចាស់ទុំគួរពិភាក្សាជាមួយនឹងគាត់នូវព័ត៌មានដែលមានចំណងជើងថា«ការពិភាក្សាបញ្ចប់ជាមួយនឹងបុគ្គលដែលមានលក្ខណៈគ្រប់គ្រាន់ដើម្បីទទួលការជ្រមុជទឹក» នៅទំព័រ២០៦-២០៧។ បើគាត់មិនទាន់រៀនចប់សៀវភៅបង្រៀនយើង និង«ព្រះស្រឡាញ់»ទេ អ្នកចាស់ទុំគួរលើកទឹកចិត្តគាត់ឲ្យរៀនចប់សៀវភៅទាំងពីរនេះក្រោយពីទទួលការជ្រមុជទឹកហើយ។ សូមប្រាប់អ្នកដែលនឹងទទួលការជ្រមុជទឹកថា អ្នកចាស់ទុំនឹងកត់ថ្ងៃខែជ្រមុជទឹកចូលក្នុងកាតរបាយការណ៍សកម្មភាពផ្សព្វផ្សាយដែលក្រុមជំនុំមានសម្រាប់គាត់។ សូមរំលឹកគាត់ថា អ្នកចាស់ទុំយកព័ត៌មានផ្ទាល់ខ្លួនរបស់គាត់ ដើម្បីគាត់អាចចូលរួមសកម្មភាពផ្សេងៗដែលក្រុមជំនុំបានរៀបចំ និងដើម្បីគាត់អាចទទួលការលើកទឹកចិត្តនិងការណែនាំពីពួកអ្នកចាស់ទុំ។ បន្ថែមទៅទៀត អ្នកចាស់ទុំអាចរំលឹកអ្នកផ្សាយថ្មីថា អ្នកចាស់ទុំនឹងប្រើព័ត៌មានផ្ទាល់ខ្លួនរបស់គាត់ស្របតាម«គោលការណ៍រក្សាការពារព័ត៌មានផ្ទាល់ខ្លួន» ដែលមានក្នុងគេហទំព័រjw.org។ ការពិភាក្សានេះគួរប្រើពេលតែ១០នាទីឬតិចជាង។
ក្រោយពីអ្នកផ្សាយនោះទទួលការជ្រមុជទឹកបានមួយឆ្នាំ អ្នកចាស់ទុំពីរនាក់គួរជួបគាត់ដើម្បីផ្ដល់ការលើកទឹកចិត្ត និងជូនយោបល់ដែលមានប្រយោជន៍។ អ្នកចាស់ទុំម្នាក់នោះគួរជាអ្នកត្រួតពិនិត្យក្រុមផ្សព្វផ្សាយរបស់គាត់។ បើបុគ្គលនោះជាក្មេងមិនទាន់គ្រប់អាយុ នោះឪពុកម្ដាយ(ម្នាក់ឬទាំងពីរនាក់)របស់គាត់ដែលជាអ្នកជឿ គួរនៅជាមួយ។ ការជួបគ្នានេះគួរប្រកបដោយភាពកក់ក្ដៅនិងការលើកទឹកចិត្ត។ អ្នកចាស់ទុំនឹងពិភាក្សាអំពីការរីកចម្រើនរបស់គាត់ខាងការគោរពប្រណិប័តន៍ព្រះ ហើយផ្ដល់យោបល់អំពីរបៀបដែលគាត់អាចបន្តមានទម្លាប់ល្អក្នុងការសិក្សាផ្ទាល់ខ្លួន ការអានគម្ពីររាល់ថ្ងៃ ការគោរពប្រណិប័តន៍ជាក្រុមគ្រួសារ ការចូលរួមកិច្ចប្រជុំជាទៀងទាត់និងរួមចំណែកក្នុងកិច្ចប្រជុំ ព្រមទាំងចូលរួមកិច្ចបម្រើផ្សាយរាល់សប្ដាហ៍។ (អេភ. ៥:១៥, ១៦) បើគាត់មិនទាន់រៀនចប់សៀវភៅបង្រៀនយើង និង«ព្រះស្រឡាញ់»ទេ អ្នកចាស់ទុំគួររៀបចំឲ្យអ្នកណាម្នាក់បង្រៀនគាត់។ អ្នកចាស់ទុំគួរផ្ដល់ការសរសើរឲ្យបានច្រើនដែលប្រកបដោយសេចក្ដីស្រឡាញ់។ តាមធម្មតា ការជូនយោបល់និងឱវាទមួយឬពីរ គឺគ្រប់គ្រាន់ហើយ។