ប្រអប់សំណួរ
◼ មុនអ្នកផ្សាយអាចទទួលការអនុញ្ញាតឲ្យជ្រមុជទឹក តើគាត់គួរចូលរួមកិច្ចប្រជុំនិងកិច្ចផ្សព្វផ្សាយដល់កម្រិតណា?
ការជ្រមុជទឹកជាការសម្រេចចិត្តដ៏សំខាន់បំផុតដែលបុគ្គលម្នាក់ត្រូវធ្វើ។ ដូច្នេះ មុននឹងបុគ្គលម្នាក់ទទួលការអនុញ្ញាតឲ្យជ្រមុជទឹក គាត់ត្រូវមានការយល់ដឹងមួយកម្រិតស្តីអំពីអ្វីដែលព្រះតម្រូវពីគាត់។ បន្ថែមទៅទៀត គាត់គួរបង្ហាញថាខ្លួនបានតាំងចិត្តរួចហើយ ដើម្បីរស់នៅស្របតាមអ្វីដែលព្រះតម្រូវ។
គ្រិស្តសាសនិកបានត្រូវបង្គាប់កុំឲ្យគេចវេះពីការប្រជុំគ្នា ដូច្នេះអ្នកផ្សាយដែលមិនទាន់ទទួលការជ្រមុជទឹកគួរបង្ហាញចិត្តខ្នះខ្នែងដោយចូលរួមកិច្ចប្រជុំក្នុងក្រុមជំនុំ។ (ហេ. ១០:២៤, ២៥) ជាធម្មតា គាត់គួររួមចំណែកក្នុងកិច្ចប្រជុំដោយលើកដៃឆ្លើយផងដែរ។ គាត់ទំនងជាបានចុះឈ្មោះក្នុងសាលាកិច្ចបម្រើផ្សាយហើយ តែនេះមិនមែនជាតម្រូវការទេ។
បន្ថែមទៅទៀត ដោយសារគ្រិស្តសាសនិកបានទទួលភារកិច្ចឲ្យផ្សព្វផ្សាយដំណឹងល្អនិងបង្រៀនអ្នកឯទៀតឲ្យក្លាយជាអ្នកកាន់តាមលោកយេស៊ូ អ្នកផ្សាយដែលមិនទាន់ទទួលការជ្រមុជទឹកគួរចូលរួមក្នុងកិច្ចបម្រើផ្សាយជាទៀងទាត់ មុនគាត់ទទួលការជ្រមុជទឹក។ (ម៉ាថ. ២៤:១៤; ២៨:១៩, ២០) តើគាត់គួរផ្សព្វផ្សាយប៉ុន្មានខែ មុនគាត់អាចទទួលការជ្រមុជទឹក? ជាការល្អដែលគាត់បានត្រូវអនុញ្ញាតឲ្យមានពេលគ្រប់គ្រាន់ដើម្បីបង្ហាញថា គាត់បានតាំងចិត្តចូលរួមកិច្ចបម្រើផ្សាយយ៉ាងខ្នះខ្នែងនិងទៀងទាត់ពីមួយខែទៅមួយខែ។ (ទំនុក. ៧៨:៣៧) ប៉ុន្តែ មិនចាំបាច់ទុកពេលយូរទេ។ ចន្លោះពេលដែលគាត់ចាប់ផ្ដើមផ្សព្វផ្សាយ ដល់ពេលគាត់មានលក្ខណៈគ្រប់គ្រាន់ដើម្បីទទួលការជ្រមុជទឹក ប្រហែលមានរយៈពេលតែប៉ុន្មានខែក៏បាន។ តើគាត់គួរផ្សព្វផ្សាយប៉ុន្មានម៉ោង? គ្មានច្បាប់តឹងរ៉ឹងទេ។ អ្នកចាស់ទុំគួរគិតអំពីកាលៈទេសៈរបស់អ្នកផ្សាយម្នាក់ៗ ហើយគួរមានគំនិតសមហេតុផលនិងមានតុល្យភាព។—លូក. ២១:១-៤
អ្នកចាស់ទុំ (ឬជំនួយការខាងកិច្ចបម្រើបើក្រុមជំនុំនោះមិនមានអ្នកចាស់ទុំគ្រប់គ្រាន់) ដែលជួបជាមួយអ្នកដែលចង់ទទួលការជ្រមុជទឹកគួរចាំថា បុគ្គលម្នាក់ៗគឺខុសៗគ្នា ហើយពួកគាត់គួរយោគយល់ចំពោះអ្នកនោះថាតើគាត់មានលក្ខណៈគ្រប់គ្រាន់ដើម្បីទទួលការជ្រមុជទឹកបានឬមិនបាន។ ពួកអ្នកចាស់ទុំនឹងតម្រូវឲ្យបុគ្គលនោះមានបំណងចិត្តចង់ធ្វើជាសាក្សីព្រះយេហូវ៉ាយ៉ាងខ្លាំង ហើយគាត់ត្រូវបង្ហាញថាការរួមចំណែកក្នុងអង្គការរបស់ព្រះយេហូវ៉ានិងចូលរួមក្នុងកិច្ចបម្រើផ្សាយ គឺជាឯកសិទ្ធិដ៏មានតម្លៃចំពោះគាត់។ អ្នកចាស់ទុំទទួលស្គាល់ថា បុគ្គលនោះមិនទាន់មានភាពចាស់ទុំក្នុងការគោរពប្រណិប័តន៍ព្រះទេ ហើយគាត់ក៏មិនទាន់មានសមត្ថភាពដូចអ្នកដែលបានទទួលការជ្រមុជទឹកដែលមានបទពិសោធន៍ក្នុងកិច្ចបម្រើផ្សាយដែរ។ បើអ្នកចាស់ទុំសម្រេចថាអ្នកដែលចង់ទទួលការជ្រមុជទឹកនោះ មិនមានលក្ខណៈគ្រប់គ្រាន់ដើម្បីទទួលការជ្រមុជទឹកទេ ពួកគាត់គួរបង្ហាញមូលហេតុពីបទគម្ពីរស្តីអំពីការសម្រេចចិត្តរបស់ពួកគាត់ដោយចិត្តសប្បុរស ហើយជួយបុគ្គលនោះពង្រឹងចំណងមិត្តភាពជាមួយនឹងព្រះ។