មេរៀនទី៣
អាដាមនិងអេវ៉ាមិនស្ដាប់បង្គាប់ព្រះ
ថ្ងៃមួយ ពេលអេវ៉ានៅតែម្នាក់ឯង សត្វពស់មួយបានមកនិយាយជាមួយនឹងនាង។ វាសួរនាងថា៖ ‹តើព្រះពិតជាមិនឲ្យអ្នកបរិភោគផ្លែពីគ្រប់ដើមឈើទាំងអស់ឬ?›។ អេវ៉ាឆ្លើយថា៖ ‹យើងអាចបរិភោគផ្លែពីគ្រប់ដើមឈើទាំងអស់បាន លើកលែងតែផ្លែពីដើមឈើមួយប៉ុណ្ណោះ។ បើយើងបរិភោគ នោះយើងនឹងស្លាប់›។ សត្វពស់និយាយទៅនាងថា៖ ‹អ្នកប្រាកដជាមិនស្លាប់ទេ។ បើអ្នកបរិភោគផ្លែពីដើមឈើនោះ អ្នកនឹងបានដូចព្រះដែរ›។ តើនោះជាពាក្យពិតទេ? អត់ទេ នោះជាពាក្យកុហក។ ប៉ុន្តែ អេវ៉ាបានជឿពាក្យនោះ។ នាងសម្លឹងមើលផ្លែឈើនោះកាន់តែយូរ ធ្វើឲ្យនាងកាន់តែចង់បរិភោគ។ នៅទីបំផុត នាងក៏បរិភោគផ្លែឈើនោះ ហើយឲ្យអាដាមបរិភោគដែរ។ អាដាមដឹងច្បាស់ថា បើពួកគេមិនស្ដាប់បង្គាប់ព្រះ ពួកគេនឹងស្លាប់។ ទោះជាយ៉ាងនោះក៏ដោយ អាដាមនៅតែបរិភោគផ្លែឈើនោះ។
នៅល្ងាចថ្ងៃនោះ ព្រះយេហូវ៉ាបានមានប្រសាសន៍ទៅអាដាមនិងអេវ៉ា។ លោកបានសួរពួកគេអំពីមូលហេតុដែលពួកគេមិនស្ដាប់បង្គាប់លោក។ អេវ៉ាបន្ទោសថាមកពីសត្វពស់ ហើយអាដាមបន្ទោសថាមកពីអេវ៉ា។ ដោយសារអាដាមនិងអេវ៉ាមិនស្ដាប់បង្គាប់ នោះព្រះយេហូវ៉ាបានបណ្ដេញពួកគេចេញពីសួនអេដែន។ ម្យ៉ាងទៀត ដើម្បីកុំឲ្យពួកគេត្រឡប់មកវិញ លោកបានដាក់ដាវនិងឲ្យទេវតាឈរយាមនៅច្រកចូលសួនអេដែន។
ព្រះយេហូវ៉ាមានប្រសាសន៍ថា អ្នកដែលបានកុហកអេវ៉ាក៏ត្រូវដាក់ទោសដែរ។ តាមពិត មិនមែនសត្វពស់ទេដែលនិយាយជាមួយនឹងអេវ៉ា ពីព្រោះព្រះយេហូវ៉ាមិនបានបង្កើតសត្វពស់ឲ្យចេះនិយាយឡើយ។ អ្នកដែលធ្វើឲ្យសត្វពស់និយាយជាមួយអេវ៉ា គឺជាទេវតាអាក្រក់មួយរូប។ វាធ្វើដូច្នេះដើម្បីបោកបញ្ឆោតអេវ៉ា។ ទេវតាអាក្រក់នោះហៅថា មេកំណាចសាថាន។ នៅអនាគត ព្រះយេហូវ៉ានឹងបំផ្លាញចោលសាថាន ដើម្បីកុំឲ្យវាអាចបោកបញ្ឆោតមនុស្សធ្វើអំពើអាក្រក់ទៀត។
«មេកំណាចជាឃាតករតាំងពីដើមដំបូង ហើយមិនបាននៅជាប់នឹងសេចក្ដីពិតឡើយ ពីព្រោះសេចក្ដីពិតមិននៅក្នុងអ្នកនោះទេ»។—យ៉ូហាន ៨:៤៤, កំណត់សម្គាល់