៥
ការចាប់ផ្ដើមជីវិតដ៏ពិបាក
នៅខាងក្រៅសួនច្បារអេដែន អ័ដាមនិងនាងអេវ៉ាមានបញ្ហាច្រើនណាស់។ ពួកគេត្រូវតែខំប្រឹងធ្វើការដើម្បីឲ្យបានម្ហូបអាហារបរិភោគ។ ជាជាងដើមឈើមានផ្លែដ៏ល្អនោះ គេបានឃើញតែរុក្ខជាតិមានបន្លាជាច្រើនដុះជុំវិញគេទៅវិញ។ នេះជាអ្វីដែលបានកើតឡើង នៅពេលដែលអ័ដាមនិងនាងអេវ៉ាមិនបានគោរពតាមព្រះ ហើយបានឈប់ធ្វើជាមិត្តសំឡាញ់របស់ទ្រង់នោះ។
ប៉ុន្តែ ជាលទ្ធផលដ៏អាក្រក់ជាងនោះទៅទៀត អ័ដាមនិងនាងអេវ៉ាបានចាប់ផ្ដើមស្លាប់។ នៅចាំទេ ព្រះបានព្រមានពួកគេថា គេនឹងត្រូវស្លាប់បើគេបរិភោគផ្លែពីដើមឈើមួយនោះ។ មែនហើយ ពីថ្ងៃដែលគេបានបរិភោគនោះ គេក៏ចាប់ផ្ដើមស្លាប់។ តើជាការឥតប្រាជ្ញាម្ល៉េះហ្ន៎ ដែលពួកគេមិនបានគោរពតាមព្រះនោះ!
កូនចៅរបស់អ័ដាមនិងនាងអេវ៉ាបានកើតមក ក្រោយពីព្រះបានបណ្ដេញឪពុកម្ដាយរបស់គេចេញពីសួនច្បារអេដែន។ ហើយនេះបានសេចក្ដីថា កូនចៅរបស់គេក៏នឹងទៅជាចាស់ជរាហើយត្រូវស្លាប់ដែរ។
បើអ័ដាមនិងនាងអេវ៉ាបានគោរពតាមព្រះយេហូវ៉ានោះ ជីវិតច្បាស់ជាបានសប្បាយរីករាយណាស់ ចំពោះគេនិងកូនចៅរបស់គេ។ ពួកគេនឹងអាចរស់នៅជានិរន្តរ៍ដោយសុភមង្គលនៅលើផែនដីបាន។ គ្មានអ្នកណាម្នាក់នឹងត្រូវចាស់ជរា ឈឺនិងស្លាប់ឡើយ។
ព្រះទ្រង់មានព្រះហឫទ័យចង់ឲ្យមនុស្សរស់នៅជានិរន្តរ៍ដោយសុភមង្គល ហើយទ្រង់បានសន្យាថា នៅថ្ងៃមួយពួកគេនឹងមានជីវិតរស់នៅដូចនេះមែន។ ផែនដីទាំងមូលនឹងទៅជាល្អបំព្រង ប៉ុន្តែមិនត្រឹមតែប៉ុណ្ណោះទេ គឺមនុស្សទាំងអស់ក៏នឹងមានសុខភាពដ៏ប្រសើរដែរ។ ហើយមនុស្សគ្រប់គ្នានៅលើផែនដីនឹងទៅជាមិត្តដ៏ល្អចំពោះគ្នាទៅវិញទៅមកហើយនិងព្រះដែរ។
ប៉ុន្តែ នាងអេវ៉ាមិនមែនជាមិត្តរបស់ព្រះទៀតទេ។ ដូច្នេះ កាលដែលនាងសម្រាលកូន នោះមិនជាការស្រួលសំរាប់នាងឡើយ។ នាងមានការឈឺចាប់។ ការមិនបានគោរពតាមព្រះយេហូវ៉ា ពិតជាបានធ្វើឲ្យនាងមានទុក្ខព្រួយជាច្រើន តើអ្នកមិនយល់ស្របទេឬ?
អ័ដាមនិងនាងអេវ៉ាមានកូនប្រុសស្រីជាច្រើន។ នៅពេលដែលកូនប្រុសទីមួយរបស់គេបានកើតមក គេបានដាក់ឈ្មោះវា កាអ៊ីន។ គេបានដាក់ឈ្មោះកូនទីពីរជា អេបិល។ តើមានអ្វីកើតឡើងដល់ពួកគេ? តើអ្នកដឹងទេ?
លោកុប្បត្តិ ៣:១៦-២៣; ៤:១, ២; វិវរណៈ ២១:៣, ៤