ជួយគេឲ្យក្លាយជាអ្នកកាន់តាមគ្រិស្ត
មេរៀនទី ១១
ស្រួលយល់
គោលការណ៍៖ «និយាយសម្ដីដែលគេស្រួលយល់»។—១កូ. ១៤:៩
អ្វីដែលលោកយេស៊ូធ្វើ
១. សូមមើល វីដេអូ ឬអានម៉ាថាយ ៦:២៥-២៧។ បន្ទាប់មក សូមពិចារណាសំណួរដូចតទៅ៖
ក. តើលោកយេស៊ូបានប្រើឧទាហរណ៍អ្វីដែលបង្ហាញថាព្រះយេហូវ៉ាស្រឡាញ់យើង?
ខ. ទោះជាលោកយេស៊ូមានចំណេះច្រើនអំពីសត្វស្លាបក៏ដោយ លោកបានលើកឡើងនូវចំណុចមួយដែលស្រួលយល់ តើនោះជាអ្វី? ហេតុអ្វីវិធីបង្រៀនបែបនោះមានប្រសិទ្ធភាព?
តើគំរូលោកយេស៊ូបង្រៀនយើងយ៉ាងណា?
២. ពេលយើងបង្រៀនតាមរបៀបដែលស្រួលយល់ នោះមនុស្សនឹងចងចាំចំណុចដែលយើងបានបង្រៀន ហើយសេចក្ដីបង្រៀននោះក៏មានឥទ្ធិពលទៅលើចិត្តរបស់ពួកគេដែរ។
ធ្វើតាមលោកយេស៊ូ
៣. កុំនិយាយច្រើនពេក។ សូមផ្ដោតអារម្មណ៍ទៅលើព័ត៌មានដែលអ្នកកំពុងសិក្សាជាមួយនឹងគាត់ ជាជាងនិយាយអ្វីទាំងអស់ដែលអ្នកដឹងអំពីព័ត៌មាននោះ។ បន្ទាប់ពីអ្នកបានសួរសំណួរ សូមអត់ធ្មត់ចាំសិស្សឆ្លើយមកវិញ។ បើគាត់មិនដឹងចម្លើយទេ ឬមួយគាត់ឆ្លើយខុសពីសេចក្ដីបង្រៀនក្នុងគម្ពីរ អ្នកគួរសួរសំណួរផ្សេងមួយទៀតដើម្បីជួយគាត់ឲ្យវែកញែកអំពីរឿងនោះ។ នៅពេលសិស្សយល់អំពីចំណុចសំខាន់ហើយ សូមបន្តទៅវគ្គបន្ទាប់។
៤. ជួយសិស្សឲ្យយល់ចំណុចថ្មី ដោយប្រើចំណុចដែលគាត់បានរៀនរួចហើយ។ ជាឧទាហរណ៍ មុននឹងចាប់ផ្ដើមចូលមេរៀនអំពីការប្រោសឲ្យរស់ឡើងវិញ អ្នកអាចនិយាយត្រួសៗជាមួយសិស្សនូវអ្វីដែលគាត់បានរៀនរួចហើយ ដូចជាអំពីស្ថានភាពមនុស្សស្លាប់ជាដើម។
៥. ប្រើឧទាហរណ៍ឲ្យបានត្រឹមត្រូវ។ មុនប្រើឧទាហរណ៍ណាមួយ សូមសួរខ្លួនអ្នកថា៖
ក. ‹តើឧទាហរណ៍នេះសាមញ្ញទេ?›។
ខ. ‹តើសិស្សនឹងស្រួលយល់ឧទាហរណ៍នេះឬទេ?›។
គ. ‹តើឧទាហរណ៍នេះនឹងជួយសិស្សឲ្យចាំចំណុចសំខាន់ មិនគ្រាន់តែចាំឧទាហរណ៍ឬទេ?›