មើលហ្ន៎! ពួកអ្នកស្មោះត្រង់
«ឱព្រះ[យេហូវ៉ា]អើយ តើមានអ្នកឯណាដែលមិនត្រូវ កោតខ្លាចដល់ទ្រង់ ហើយសរសើរដំកើងដល់ព្រះនាមទ្រង់ ដ្បិតមានតែទ្រង់១ដែល[ស្មោះត្រង់, ព.ថ.]»?—វិវរណៈ ១៥:៤
១. តើបងប្រុសរ៉ូធើហ្វឺតបានថ្លែងអ្វីខ្លះ អំពីសេចក្ដីស្មោះត្រង់នៃបងប្រុសរ៉ាសិល?
យ៉ូសែប រ៉ូធើហ្វឺត ដែលបានទទួលតំណែងជាប្រធាននៃសមាគមប៉មយាមពីឆាល្ស រ៉ាសិល ក្នុងឆ្នាំ១៩១៧ មានប្រសាសន៍នៅឯពិធីបុណ្យខ្មោចថា៖ «ឆាល្ស ថេស្ស រ៉ាសិល មានចិត្តស្មោះត្រង់ចំពោះព្រះ ស្មោះត្រង់ចំពោះព្រះគ្រីស្ទយេស៊ូ ស្មោះត្រង់ចំពោះព្រះរាជាណាចក្ររបស់ព្រះមេស្ស៊ី។ គាត់មានចិត្តស្មោះត្រង់ណាស់—ត្រូវហើយ ស្មោះត្រង់រហូតដល់ស្លាប់»។ ត្រូវហើយ នេះជាការថ្លែងអំណរគុណដ៏ល្អ ចំពោះអ្នកបំរើដ៏ស្មោះត្រង់របស់ព្រះយេហូវ៉ា។ គ្មានសេចក្ដីដឹងគុណណាទៀត ដែលយើងអាចថ្លែងដល់បុគ្គលណាមួយ ក្រៅពីនិយាយថាគាត់ជាប់ការសាកល្បងនៃសេចក្ដីស្មោះត្រង់ ដែលថាគាត់មានចិត្តស្មោះត្រង់—ស្មោះត្រង់យ៉ាងខ្លាំង។
២, ៣. (ក) ហេតុអ្វីក៏មានការពិបាកដើម្បីឲ្យបានស្មោះត្រង់? (ខ) តើអ្នកណាទៀតដែលប្រឆាំងនឹងពួកគ្រីស្ទានពិតដែលខំឲ្យបានស្មោះត្រង់?
២ សេចក្ដីស្មោះត្រង់បង្កើតឲ្យមានការដ៏ពិបាកណាស់។ ហេតុអ្វី? ពីព្រោះសេចក្ដីស្មោះត្រង់ប្រឆាំងនឹងប្រយោជន៍ខ្លួនឯង។ ក្នុងចំណោមពួកអ្នកដែលមិនមានចិត្តស្មោះត្រង់ចំពោះព្រះ គឺពួកបព្វជិតនៃពិភពគ្រីស្ទសាសនា។ ហើយសព្វថ្ងៃនេះ ភាពមិនស្មោះត្រង់ចំពោះទំនាក់ទំនងក្នុងអាពាហ៍ពិពាហ៍ក៏មានសុសសាយជាងពីមុនទៅទៀត។ អំពើកំផិតគឺមានទូទៅ។ ភាពមិនស្មោះត្រង់ក៏មានជាច្រើនក្នុងវិស័យពាណិជ្ជកម្មដែរ។ ចំពោះរឿងនេះ គេប្រាប់យើងថា៖ «ពួកថៅកែនិងពួកប្រកបមុខការជាច្រើន . . . ជឿថាមានតែមនុស្សភ្លីភ្លើទេ ដែលមានចិត្តស្មោះចំពោះក្រុមហ៊ុនរបស់គេសព្វថ្ងៃនេះ»។ មនុស្សដែល«ស្មោះត្រង់ហួសហេតុ»ត្រូវគេមើលងាយ។ «សេចក្ដីស្មោះត្រង់ដ៏សំខាន់គឺចំពោះតែខ្លួនឯង» នេះជាពាក្យសំដីរបស់ប្រធានក្រុមហ៊ុនផ្ដល់ឲ្យឱវាទចំពោះការចាត់ការនិងបុគ្គលិកនីតិប្រតិបត្ដិ។ ប៉ុន្តែ ការនិយាយអំពីសេចក្ដីស្មោះត្រង់ចំពោះខ្លួនឯង គឺបន្ថោកអត្ថន័យនៃពាក្យនេះ។ នេះរំឭកយើងអំពីអ្វីដែលបានចែងមកនៅមីកា ៧:២ ព.ថ. «ពួកមនុស្សស្មោះត្រង់ចំពោះព្រះ បានសូន្យបាត់ពីផែនដីទៅ»។
៣ សាតាំងនិងពួកបិសាចរបស់វាប្រឆាំងនឹងយើងរឹតតែខ្លាំងឡើង ដោយប្ដេជ្ញាមិនឲ្យយើងមានចិត្តស្មោះត្រង់ចំពោះព្រះ។ ហេតុនេះហើយបានជាពួកគ្រីស្ទានត្រូវបានប្រាប់ឲ្យដឹងក្នុងអេភេសូរ ៦:១២ «ដ្បិតយើងរាល់គ្នាមិនមែនតយុទ្ធនឹងសាច់ឈាមទេ គឺនឹងពួកគ្រប់គ្រង ពួកមានអំណាច នឹងពួកម្ចាស់នៃសេចក្ដីងងឹតនៅលោកីយនេះវិញ ហើយទាស់នឹងអំណាចអាក្រក់ខាងវិញ្ញាណ នៅស្ថានដ៏ខ្ពស់ដែរ»។ ត្រូវហើយ យើងត្រូវតែធ្វើតាមការព្រមាននេះ៖ «ចូរឲ្យដឹងខ្លួនហើយចាំយាមចុះព្រោះអារក្សដែលជាខ្មាំងសត្រូវរបស់អ្នករាល់គ្នាវាតែងដើរក្រវែលទាំងគ្រហឹមដូចជាសិង្ហដើម្បីនឹងរកអ្នកណាដែលវាត្របាក់លេបបាន»។—ពេត្រុសទី១ ៥:៨
៤. តើការទោរទន់អ្វីដែលធ្វើឲ្យពិបាកយ៉ាងខ្លាំងនឹងស្មោះត្រង់?
៤ អ្វីមួយទៀតដែលធ្វើឲ្យពិបាកសម្ដែងសេចក្ដីស្មោះត្រង់ នោះគឺទំនោរចិត្តដ៏កំណាញ់ដែលយើងមានជាមរតកពីឪពុកម្ដាយរបស់យើង ដូចបានចែងមកនៅលោកុប្បត្តិ ៨:២១៖ «គំនិតក្នុងចិត្តមនុស្ស នោះអាក្រក់»—និងចិត្តកំណាញ់«តាំងតែពីក្មេងមក»។ យើងគ្រប់ៗគ្នាមានបញ្ហាដូចសាវ័កប៉ុល ដែលគាត់បានសារភាពថា៖ «ខ្ញុំមិនប្រព្រឹត្តការល្អ ដែលខ្ញុំចង់ធ្វើនោះទេ តែការអាក្រក់ដែលខ្ញុំមិនចង់ធ្វើ នោះបែរជាខ្ញុំធ្វើវិញ»។—រ៉ូម ៧:១៩
សេចក្ដីស្មោះត្រង់ជាអ្វីមួយដ៏ពិសេស
៥, ៦. តើយើងអាចនិយាយយ៉ាងណាចំពោះសេចក្ដីស្មោះត្រង់ ហើយតើគេបានឲ្យអត្ថន័យយ៉ាងណា?
៥ «សេចក្ដីស្មោះត្រង់» ជាពាក្យដ៏ពិសេសមួយ។ ដូច្នេះសៀវភៅឈ្មោះ ការពិនិត្យមើលក្នុងព្រះគ្ពមីរ ចែងថា៖ «គឺគ្មានពាក្យអង់គ្លេសណាដែលសម្ដែងយ៉ាងចំនូវអត្ថន័យនៃពាក្យហេព្រើរនិងក្រិកនោះឡើយ ប៉ុន្តែ‹សេចក្ដីស្មោះត្រង់› រួមបញ្ចូលគំនិតនៃភក្ដីភាពនិងភាពស្មោះពីចិត្ត នៅពេលដែលប្រើចំពោះព្រះនិងកិច្ចបំរើរបស់ទ្រង់ ពាក្យ‹សេចក្ដីស្មោះត្រង់›គឺមានអត្ថន័យគ្រប់គ្រាន់»។a ចំពោះ«សេចក្ដីស្មោះត្រង់» ទស្សនាវដ្ដីប៉មយាម ពេលមួយបានថ្លែងថា៖ «ការសង្ឃឹមទៅលើបាន ភារកិច្ច សេចក្ដីស្រឡាញ់ កាតព្វកិច្ច សេចក្ដីស្មោះចំពោះ។ តើពាក្យទាំងនេះមានអ្វីដូចគ្នា? ពាក្យទាំងនេះជាលក្ខណៈផ្សេងៗនៃសេចក្ដីស្មោះត្រង់»។ ត្រូវហើយ គឺមានគុណធម៌ជាច្រើន ដែលជាលក្ខណៈផ្សេងៗនៃសេចក្ដីស្មោះត្រង់។ ជាការគួរឲ្យកត់សម្គាល់ដែរ ដែលសេចក្ដីស្មោះត្រង់និងសេចក្ដីសុចរិតគឺទាក់ទងគ្នាជាញឹកញាប់ក្នុងព្រះគម្ពីរ។
៦ អត្ថន័យជាបន្ទាប់ក៏មានប្រយោជន៍ដែរ៖ ‹សេចក្ដីស្មោះត្រង់អាចបង្ហាញនូវការសង្ឃឹមទៅលើបាន និងសេចក្ដីស្មោះចំពោះ ហើយមាំមួននឹងការមិនដាច់ស្រេចឬការល្បួង›។ ‹សេចក្ដីស្មោះត្រង់បង្ហាញនូវការសង្ឃឹមទៅលើបានចំពោះពាក្យសន្យារបស់ខ្លួន ឬសេចក្ដីស្មោះចំពោះស្ថាប័ន ឬគោលការណ៍ដែលខ្លួនគិតថាជាតម្រូវខាងសីលធម៌របស់ខ្លួន។ ពាក្យនេះមិនគ្រាន់តែប្រាប់អំពីការកាន់យ៉ាងខ្ជាប់ប៉ុណ្ណោះ តែប្រាប់ពីការទប់ទល់នឹងការល្បួងដែលធ្វើឲ្យលែងកាន់ខ្ជាប់ខ្ជួន›។ ដូច្នេះ មនុស្សដែលនៅមានចិត្តស្មោះត្រង់ ថ្វីបើមានការសាកល្បង ការប្រឆាំង និងការបៀតបៀន គឺសមនឹងត្រូវហៅថា«ស្មោះត្រង់»។
៧. តើសេចក្ដីស្មោះត្រង់និងការសង្ឃឹមទៅលើបាន ខុសគ្នាយ៉ាងណា?
៧ ប៉ុន្តែ ចំពោះសេចក្ដីស្មោះត្រង់នេះ ប្រហែលជាការល្អក្នុងការពន្យល់ឲ្យឃើញច្បាស់រវាងសេចក្ដីស្មោះត្រង់ និងការសង្ឃឹមទៅលើបាន។ ក្នុងសហរដ្ឋអាមេរិកខាងលិច គឺមានទឹកក្ដៅផុសពីដីប្រហែលរៀងរាល់ម៉ោង។ នេះគឺមានទៀងទាត់ដល់ម្ល៉េះ ដែលត្រូវបានគេហៅថា របស់ដែលសង្ឃឹមទៅលើបាន។ ព្រះគម្ពីរចែងអំពីរបស់ដែលគ្មានជីវិតរស់រវើកបែបនេះ ដូចជាលោកខែជាអ្វីដែលទុកចិត្តទៅលើបាន។ ទំនុកដំកើង ៨៩:៣៧ ចែងអំពីលោកខែជា«ទីសំគាល់[សង្ឃឹមទៅលើបាន, ព.ថ.]ដែលនៅលើមេឃ»។ បន្ទូលរបស់ព្រះត្រូវបានហៅជាអ្វីដែលសង្ឃឹមទៅលើបាន។ វិវរណៈ ២១:៥ ចែងថា៖ «ឯព្រះអង្គ ដែលគង់លើបល្ល័ង្ក ទ្រង់មានបន្ទូលថា៖ ‹មើល! អញធ្វើទាំងអស់ឡើងជាថ្មី›។ រួចទ្រង់មានបន្ទូលមកខ្ញុំថា៖ ‹ចូរសរសេរទុកចុះ ដ្បិតពាក្យទាំងនេះពិតប្រាកដហើយគួរជឿ› »។ ឧទាហរណ៍ទាំងនេះគឺសង្ឃឹមទៅលើបាន ទុកចិត្តទៅលើបាន តែមិនអាចសម្ដែងសេចក្ដីស្រឡាញ់ឬអាចមានគុណសម្បត្ដិនៃសីលធម៌ ដូចជាសេចក្ដីស្មោះត្រង់បានឡើយ។
ព្រះយេហូវ៉ា ជាបុគ្គលស្មោះត្រង់ដ៏ខ្ពង់ខ្ពស់
៨. តើភស្តុតាងអ្វីក្នុងព្រះគម្ពីរដែលសម្គាល់នូវគំរូដ៏ល្អជាងគេចំពោះសេចក្ដីស្មោះត្រង់?
៨ គឺគ្មានចម្ងល់ឡើយ ព្រះយេហូវ៉ាជាគំរូដ៏ល្អនៃការសម្ដែងសេចក្ដីស្មោះត្រង់។ ព្រះយេហូវ៉ាមានព្រះទ័យស្មោះត្រង់ចំពោះមនុស្សលោក ថែមទាំងប្រទានរាជបុត្រារបស់ទ្រង់ ដើម្បីឲ្យមនុស្សអាចទទួលជីវិតអស់កល្បជានិច្ច។ (យ៉ូហាន ៣:១៦) យេរេមា ៣:១២ យើងអានថា៖ « ‹ឱអ៊ីស្រាអែល ជាពួករាថយអើយ ចូរវិលមកវិញចុះ អញនឹងមិនបំភ័យឯងដោយទឹកមុខអញទេ ដ្បិតអញមានសេចក្ដីមេត្ដា› ព្រះយេហូវ៉ាទ្រង់មានបន្ទូលថា ‹អញនឹងមិនក្រោធជាដរាបឡើយ› »។ ការបញ្ជាក់ថែមទៀតនៃសេចក្ដីស្មោះត្រង់របស់ព្រះយេហូវ៉ា គឺជាពាក្យដែលបានកត់ទុកមកក្នុងវិវរណៈ ១៦:៥៖ «ឱព្រះដ៏គង់នៅ ហើយបានគង់នៅតាំងពីដើមរៀងមកអើយ ដែលទ្រង់បានជំនុំជំរះកាត់ទោសដូច្នេះ នោះសុចរិតហើយ»។ រួចមកម្ដងទៀត ក្នុងទំនុកដំកើង ១៤៥:១៧ យើងអានថា៖ «ព្រះយេហូវ៉ាទ្រង់សុចរិតក្នុងគ្រប់ទាំងផ្លូវទ្រង់ ក៏សប្បុរសក្នុងគ្រប់ទាំងកិច្ចការរបស់ទ្រង់ដែរ»។ តាមការពិត ព្រះយេហូវ៉ាមានព្រះទ័យស្មោះត្រង់ដ៏អស្ចារ្យដល់ម្ល៉េះ ដែលវិវរណៈ ១៥:៤ ចែងថា៖ «ឱ[ព្រះយេហូវ៉ា]អើយ តើមានអ្នកឯណាដែលមិនត្រូវ កោតខ្លាចដល់ទ្រង់ ហើយសរសើរដំកើងដល់ព្រះនាមទ្រង់ ដ្បិតមានតែទ្រង់១ដែល[ស្មោះត្រង់]»។ ព្រះយេហូវ៉ាគឺមានព្រះទ័យស្មោះត្រង់ល្អដាច់គេ។
៩, ១០. តើប្រវត្ដិនៃសេចក្ដីស្មោះត្រង់អ្វីដែលព្រះយេហូវ៉ាបានធ្វើ ក្នុងការទាក់ទងជាមួយសាសន៍អ៊ីស្រាអែលរបស់ទ្រង់?
៩ ប្រវត្ដិនៃសាសន៍អ៊ីស្រាអែល មានភស្តុតាងជាច្រើននៃសេចក្ដីស្មោះត្រង់របស់ព្រះយេហូវ៉ាចំពោះប្រជារាស្ត្ររបស់ទ្រង់។ ក្នុងសម័យពួកចៅក្រម សាសន៍អ៊ីស្រាអែលបានលះបង់ការថ្វាយបង្គំពិតម្ដងហើយម្ដងទៀត តែព្រះយេហូវ៉ាមានព្រះទ័យអាណិតដល់គេជាញឹកញាប់ហើយសង្គ្រោះពួកគេ។ (ពួកចៅហ្វាយ ២:១៥-២២) ក្នុងប្រាំសតវត្សដែលសាសន៍អ៊ីស្រាអែលមានស្តេចសោយរាជ្យ ព្រះយេហូវ៉ាសម្ដែងសេចក្ដីស្មោះត្រង់ដល់សាសន៍នោះ។
១០ សេចក្ដីស្មោះត្រង់របស់ព្រះយេហូវ៉ាបណ្ដាលឲ្យទ្រង់អត់ធ្មត់នឹងប្រជារាស្ត្ររបស់ទ្រង់ ដូចបានកត់ទុកមកក្នុងរបាក្សត្រទី២ ៣៦:១៥, ១៦៖ «ព្រះយេហូវ៉ា ជាព្រះនៃពួកឰយុកោគេ ទ្រង់បានចាត់ទូតទ្រង់ឲ្យទៅឯគេ ទាំងក្រោកពីព្រលឹមនឹងចាត់គេផង ដ្បិតទ្រង់មានព្រះហឫទ័យអាណិតមេត្ដាដល់រាស្ត្រទ្រង់ ហើយដល់ទីលំនៅទ្រង់។ តែគេចំអកឲ្យពួកទូតនៃព្រះ ក៏មើលងាយដល់ព្រះបន្ទូលទ្រង់ ព្រមទាំងឡកឡឺយឲ្យពួកហោរាទ្រង់វិញ ដរាបដល់សេចក្ដីក្រោធរបស់ព្រះយេហូវ៉ា បានឆួលឡើងទាស់នឹងគេទាល់តែរកកែខៃមិនបានឡើយ»។
១១. តើសេចក្ដីស្មោះត្រង់របស់ព្រះយេហូវ៉ាប្រទានឲ្យយើងនូវការធានាអះអាងឬសម្រាលទុក្ខអ្វី?
១១ ពីព្រោះព្រះយេហូវ៉ាមានព្រះទ័យស្មោះត្រង់ដ៏ឧត្តម សាវ័កប៉ុលអាចសរសេរ ដូចកត់ទុកមកក្នុង រ៉ូម ៨:៣៨, ៣៩៖ «ដ្បិតខ្ញុំជឿជាក់ថាទោះស្លាប់ ឬរស់ ពួកទេវតា ឬអំណាចអ្វី ការអ្វីនៅជាន់នេះ ឬទៅមុខ ឬឥទ្ធិឫទ្ធិអ្វី ទីមានកំពស់ ទីជំរៅ ឬរបស់អ្វីដែលកើតមកឯទៀតក្ដី នោះពុំអាចនឹងពង្រាត់យើងចេញពីសេចក្ដីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅបានឡើយ»។ ត្រូវហើយ ព្រះយេហូវ៉ាធានាអះអាងយើងថា៖ «អញនឹងមិនចាកចេញពីឯង ក៏មិនបោះបង់ចោលឯងឡើយ»។ (ហេព្រើរ ១៣:៥) យ៉ាងប្រាកដណាស់ ជាការដ៏សម្រាលទុក្ខមួយដោយដឹងថាព្រះយេហូវ៉ាគឺតែងតែមានព្រះទ័យស្មោះត្រង់!
ព្រះយេស៊ូគ្រីស្ទ បុត្រាដ៏ស្មោះត្រង់
១២, ១៣. តើភស្តុតាងអ្វីដែលយើងមានចំពោះសេចក្ដីស្មោះត្រង់នៃរាជបុត្រារបស់ព្រះ?
១២ ព្រះយេស៊ូគ្រីស្ទជាបុគ្គលដែលកាន់តាមគំរូល្អគ្រប់ល័ក្ខណ៍របស់ព្រះយេហូវ៉ា ក្នុងការស៊ូទ្រាំនឹងការសាកល្បងនៃសេចក្ដីស្មោះត្រង់។ ដោយត្រឹមត្រូវ សាវ័កពេត្រុសអាចដកស្រង់ចេញពីទំនុកដំកើង ១៦:១០ ហើយសំដៅពាក្យនេះទៅនឹងព្រះយេស៊ូគ្រីស្ទក្នុង កិច្ចការ ២:២៧ «ដ្បិតទ្រង់នឹងមិនទុកព្រលឹងទូលបង្គំ ឲ្យជាប់នៅក្នុងស្ថានឃុំព្រលឹងមនុស្សស្លាប់ទេ ក៏មិនឲ្យអ្នកបរិសុទ្ធរបស់ទ្រង់ឃើញសេចក្ដីពុករលួយដែរ»។ ព្រះយេស៊ូគ្រីស្ទសមហៅជា‹បុគ្គលស្មោះត្រង់›។ គ្រប់វិធីទាំងអស់ ទ្រង់មានព្រះទ័យស្មោះត្រង់ចំពោះព្រះវរបិតារបស់ទ្រង់ ហើយចំពោះសេចក្ដីសន្យានៃព្រះរាជាណាចក្រ។ សាតាំងនៅដើមដំបូងបានខំបំបាក់ចិត្តស្មោះគ្រប់ល័ក្ខណ៍របស់ព្រះយេស៊ូ ដោយប្រើល្បួងដែលទាញឲ្យគិតតែប្រយោជន៍ខ្លួន។ ដោយបានបរាជ័យក្នុងការធ្វើនេះ អារក្សក៏ធ្វើការបៀតបៀន រហូតទាំងធ្វើគត់ដល់ព្រះយេស៊ូលើបង្គោលឈើ។ ព្រះយេស៊ូមិនដែលងាកចេញពីការសម្ដែងសេចក្ដីស្មោះត្រង់ដល់ព្រះវរបិតានៃស្ថានសួគ៌ គឺព្រះយេហូវ៉ាឡើយ។—ម៉ាថាយ ៤:១-១១
១៣ ព្រះយេស៊ូគ្រីស្ទមានព្រះទ័យស្មោះត្រង់ដល់ពួកអ្នកកាន់តាមទ្រង់ ដោយចាំពាក្យសន្យាដែលកត់ទុកមកក្នុងម៉ាថាយ ២៨:២០៖ «មើល! ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប»។ ក្នុងការសម្រេចតាមពាក្យសន្យានោះ ទ្រង់បានធ្វើជាមេដឹកនាំដោយស្មោះត្រង់ទៅលើក្រុមជំនុំរបស់ទ្រង់ តាំងពីបុណ្យភិន្ដាកុសក្នុងឆ្នាំ៣៣ស.យ.មកទល់ឥឡូវនេះ។
មនុស្សឥតគ្រប់ល័ក្ខណ៍ដែលស្មោះត្រង់
១៤. តើយ៉ូបបានទុកគំរូនៃសេចក្ដីស្មោះត្រង់យ៉ាងណា?
១៤ ឥឡូវនេះ ចុះយ៉ាងណាវិញចំពោះមនុស្សឥតគ្រប់ល័ក្ខណ៍? តើពួកគេអាចមានចិត្តស្មោះត្រង់ចំពោះព្រះទេ? យើងមានឧទាហរណ៍ដ៏អស្ចារ្យនៃយ៉ូប។ សាតាំងបានធ្វើឲ្យរឿងនេះឃើញច្បាស់ក្នុងករណីរបស់គាត់។ តើយ៉ូបមានចិត្តស្មោះត្រង់ចំពោះព្រះយេហូវ៉ាឬក៏គាត់បំរើទ្រង់ពីព្រោះចង់បានប្រយោជន៍ផ្ទាល់ខ្លួន? សាតាំងបានអួតថា វាអាចបំបែរយ៉ូបពីព្រះយេហូវ៉ា ដោយធ្វើឲ្យមានបញ្ហាដល់យ៉ូប។ ពេលដែលយ៉ូបបានបាត់បង់ទ្រព្យសម្បត្ដិរបស់គាត់ទាំងអស់ កូនចៅរបស់គាត់ ព្រមទាំងសុខភាពរបស់គាត់ផងនោះ ប្រពន្ធរបស់គាត់ដាស់តឿនគាត់ថា៖ «ចូរប្រមាថដល់ព្រះហើយស្លាប់ទៅចុះ»។ ប៉ុន្តែយ៉ូបនៅមានចិត្តស្មោះត្រង់ ដ្បិតគាត់មានប្រសាសន៍ទៅនាងថា៖ « ‹ឯងនិយាយដូចជាស្រីឆោតល្ងង់ទេ ម៉េច យើងទទួលសេចក្ដីល្អមកពីព្រះ តើមិនត្រូវទទួលសេចក្ដីអាក្រក់ដែរទេឬ›? ក្នុងគ្រប់ទាំងសេចក្ដីទាំងនោះ យ៉ូបមិនបានធ្វើឲ្យខ្លួនសៅហ្មង ដោយបបូរមាត់ទេ»។ (យ៉ូប ២:៩, ១០) តាមការពិត ចំពោះអស់អ្នកដែលបម្រុងនឹងសម្រាលទុក្ខគាត់នោះ យ៉ូបមានប្រសាសន៍ថា៖ «ទោះបើទ្រង់សំឡាប់ខ្ញុំក៏ដោយ គង់តែខ្ញុំនឹងទុកចិត្តដល់ទ្រង់ដែរ»។ (យ៉ូប ១៣:១៥) ដូច្នេះហើយ បានជាព្រះយេហូវ៉ាព្រមទទួលយកយ៉ូប! ព្រះយេហូវ៉ាមានបន្ទូលប្រាប់អេលីផាសជាសាសន៍ថេម៉ានថា៖ «អញមានសេចក្ដីកំហឹងខឹងនឹងឯងហើយ ព្រមទាំងគូកនឯងទាំង២នេះផង ដ្បិតឯងរាល់គ្នាមិនបាននិយាយសេចក្ដីដែលត្រឹមត្រូវពីអញ ដូចជាយ៉ូប ជាអ្នកបំរើអញទេ»។—យ៉ូប ៤២:៧, ១០-១៦; យ៉ាកុប ៥:១១
១៥. តើយើងមានភស្តុតាងអ្វីក្នុងព្រះគម្ពីរ ចំពោះសេចក្ដីស្មោះត្រង់នៃពួកអ្នកបំរើជាច្រើនរបស់ព្រះយេហូវ៉ា?
១៥ ពួកបុរសនិងពួកស្ត្រីដែលមានជំនឿ ដែលបានរៀបរាប់មកក្នុងសៀវភៅហេព្រើរ ជំពូក១១ អាចចាត់ទុកជាពួកបុគ្គលដែលមានចិត្តស្មោះត្រង់។ ពួកគេមិនគ្រាន់តែអាចសង្ឃឹមទៅលើបាន តែមានចិត្តស្មោះត្រង់ក្នុងសេចក្ដីលំបាកយ៉ាងខ្លាំង។ ដូច្នេះហើយ យើងអានចំពោះអស់អ្នក«ដោយសារសេចក្ដីជំនឿ . . . បានបិទមាត់សិង្ហ បានពន្លត់អំណាចភ្លើង បានរួចពីមុខដាវ . . . ខ្លះត្រូវគេធ្វើទុក្ខវេទនា ឥតទទួលការប្រោសលោះ ឲ្យរួចឡើយ គឺដើម្បីឲ្យបានរស់ឡើងវិញបែបប្រសើរជាង ខ្លះទៀតត្រូវសេចក្ដីល្បង ដោយមានគេចំអកឲ្យ ទាំងវាយនឹងរំពាត់ ក៏ទ្រាំទាំងជាប់ចំណង នឹងជាប់គុកផង ត្រូវគេចោលនឹងថ្ម ល្បួង ហើយអារបណ្ដាច់ ក៏ត្រូវស្លាប់នឹងដាវ ត្រូវដើរវីមវាម ទាំងស្លៀកស្បែកចៀម នឹងស្បែកពពែ ត្រូវកំសត់ទុគ៌ត ត្រូវគេសង្កត់សង្កិន ហើយធ្វើបាប»។—ហេព្រើរ ១១:៣៣-៣៧
១៦. តើសាវ័កប៉ុលផ្ដល់ឲ្យគំរូនៃសេចក្ដីស្មោះត្រង់យ៉ាងណា?
១៦ បទគម្ពីរគ្រីស្ទានភាសាក្រិកក៏ផ្ដល់ឲ្យគំរូដ៏គួរឲ្យអស្ចារ្យរបស់សាវ័កប៉ុល។ គាត់អាចនិយាយយ៉ាងត្រឹមត្រូវដល់ពួកគ្រីស្ទានថែស្សាឡូនីច ចំពោះការផ្សាយរបស់គាត់ថា៖ «អ្នករាល់គ្នាហើយព្រះផង ជាស្មរបន្ទាល់អំពីយើងខ្ញុំ ដែលយើងខ្ញុំបាន នៅជាមួយនឹងអ្នករាល់គ្នា ជាពួកអ្នកជឿ បែបយ៉ាងណា ដោយបរិសុទ្ធ សុចរិត ហើយឥតកន្លែងបន្ទោសបាន»។ (ថែស្សាឡូនីចទី១ ២:១០) យើងមានភស្តុតាងថែមទៀតនៃសេចក្ដីស្មោះត្រង់របស់ប៉ុលក្នុងពាក្យរបស់គាត់ ដែលបានកត់ទុកមកក្នុងកូរិនថូសទី២ ៦:៤, ៥ យើងអានថា៖ «ក្នុងគ្រប់ការទាំងអស់ នោះយើងខ្ញុំខំផ្ទុកផ្ដាក់ខ្លួន ទុកដូចជាអ្នកបំរើព្រះ គឺក្នុងការទ្រាំទ្រជាច្រើន ក្នុងការទុក្ខលំបាក ការខ្វះខាត ការចង្អៀតចង្អល់ កាលគេវាយ ដាក់គុក កើតវឹកវរ ក្នុងការនឿយហត់ ចាំយាម តមអត់»។ របស់ទាំងនេះគឺជាភស្តុតាងថាសាវ័កប៉ុលមានការគោរពខ្លួន ពីព្រោះគាត់មានចិត្តស្មោះត្រង់។
ពួកអ្នកស្មោះត្រង់ក្នុងសម័យទំនើប
១៧. តើពាក្យអ្វីរបស់បងប្រុសរ៉ូធើហ្វឺត ដែលបានបង្ហាញការប្ដេជ្ញារបស់គាត់ឲ្យបានស្មោះត្រង់?
១៧ ក្នុងសម័យទំនើបនេះ យើងមានគំរូដ៏ល្អដែលបានពិចារណាក្នុងវគ្គដំបូងនៃអត្ថបទនេះ។ ចូរកត់សម្គាល់នូវអ្វីដែលបានចែងមកក្នុងសៀវភៅដែលមានឈ្មោះ សន្ដិភាពក្នុងពិភពលោកក្រោម«ម្ចាស់នៃមេត្រីភាព» ក្នុងទំព័រ ១៤៦ ក្រោមចំណងជើង «សេចក្ដីស្មោះត្រង់ក្នុងកំឡុងពេលជាប់គុក»។ នៅទីនោះ គឺបានចែងថា៖ «ការសម្ដែងសេចក្ដីស្មោះត្រង់ចំពោះអង្គការរបស់ព្រះយេហូវ៉ាក្នុងកំឡុងពេលជាប់គុក ប្រធានទីមួយនៃសមាគមប៉មយាម យ៉ូសែប រ៉ូធើហ្វឺត នៅខែធ្នូ ថ្ងៃទី២៥១៩១៨ បានសរសេរសេចក្ដីជាបន្ទាប់ថា៖ ‹ពីព្រោះខ្ញុំមិនចុះចូលនឹងបាប៊ីឡូនដ៏ធំ ប៉ុន្តែខំបំរើព្រះអម្ចាស់របស់ខ្ញុំដ៏ស្មោះត្រង់ ខ្ញុំនៅក្នុងគុក ហើយខ្ញុំមានអំណរគុណណាស់។ . . . ខ្ញុំសុខចិត្តឲ្យព្រះសព្វព្រះហឫទ័យនឹងខ្ញុំ ជាជាងចុះចូលនឹងសត្វសាហាវហើយរួចចេញពីគុក ឲ្យមនុស្សលោកសរសើរនោះឡើយ› »។b
១៨, ១៩. តើមានគំរូដ៏ល្អអ្វីខ្លះនៃសេចក្ដីស្មោះត្រង់ក្នុងសម័យយើងនេះ?
១៨ យើងមានគំរូដ៏ប្រសើរនៃសេចក្ដីស្មោះត្រង់ចំពោះមនុស្សគ្រីស្ទានជាច្រើនទៀត ដែលបានស៊ូទ្រាំនឹងការបៀតបៀន។ ក្នុងចំណោមពួកស្មោះត្រង់ទាំងនេះ គឺមានស្មរបន្ទាល់ព្រះយេហូវ៉ាជនជាតិអាឡឺម៉ង់ កាលនៅក្រោមអំណាចណាត្សី ដែលបានពណ៌នាក្នុងខ្សែអាត់វីឌីអូ ត្រីកោណពណ៌ស្វាយ ដែលបានចែកចាយពាសពេញក្នុងភាសាអង់គ្លេស។ ពួកស្មរបន្ទាល់ព្រះយេហូវ៉ាដ៏ស្មោះត្រង់ជាច្រើននៃជនជាតិអាហ្វ្រិក ដូចពួកមកពីប្រទេសម៉ាឡាវី ក៏គួរឲ្យកត់សម្គាល់ដែរ។ នៅទីនោះ មានអ្នកយាមគុកម្នាក់បានផ្ដល់ភស្តុតាងចំពោះសេចក្ដីស្មោះត្រង់នៃពួកស្មរបន្ទាល់ ដោយនិយាយថា៖ «ពួកគេនឹងមិនចុះចាញ់ឡើយ។ ពួកគេនឹងមានច្រើនឡើងថែមទៀត»។
១៩ យើងមានចិត្តរំភើបណាស់ ក្រោយពីអានចំពោះសេចក្ដីស្មោះត្រង់របស់ពួកគ្រីស្ទានពិត ដូចជាពួកដែលរស់នៅក្នុងប្រទេសក្រិក ម៉ូសាប៊ិក និងប៉ូឡូញ សៀវភៅប្រចាំឆ្នាំនៃស្មរបន្ទាល់ព្រះយេហូវ៉ា។ ពួកគេជាច្រើនបានរងទុក្ខទារុណកម្មដ៏ឈឺចាប់យ៉ាងខ្លាំង។ ក្នុងទំព័រ១៧៧ នៃសៀវភៅប្រចាំឆ្នាំ១៩៩២ បង្ហាញរូបភាពនៃគ្រីស្ទានប្រាំបួននាក់ក្នុងប្រទេសអេស្យូពី ដែលបានស៊ូទ្រាំនឹងការសាកល្បងនៃសេចក្ដីស្មោះត្រង់រហូតដល់គេសម្លាប់ចោល។ ជាស្មរបន្ទាល់ព្រះយេហូវ៉ា តើយើងមិនសប្បាយចិត្តទេឬ ដោយមានគំរូដ៏ល្អជាច្រើន ដើម្បីជំរុញទឹកចិត្តយើងឲ្យស៊ូទ្រាំនឹងការសាកល្បងនៃសេចក្ដីស្មោះត្រង់?
២០. តើនឹងមានអ្វីជាបន្ទាប់ បើសិនជាយើងនៅស្មោះត្រង់?
២០ ដោយទប់ទល់នឹងសេចក្ដីល្បួងនិងការកៀបសង្កត់ដោយស្មោះត្រង់ យើងបណ្ដុះឲ្យមានសេចក្ដីគោរពខ្លួនយើង។ ដូច្នេះ តើយើងចង់នៅខាងណាចំពោះសេចក្ដីស្មោះត្រង់? ដោយស៊ូទ្រាំការសាកល្បងនៃសេចក្ដីស្មោះត្រង់ យើងគាំទ្រព្រះយេហូវ៉ាចំពោះរឿងនេះ ហើយបញ្ជាក់ថាអារក្សជាអ្នកភូតភរដ៏ថោកទាប! ដោយហេតុនោះ យើងទទួលការយល់ព្រមពីព្រះយេហូវ៉ាជាអ្នកបង្កើតយើង ហើយទទួលរង្វាន់នៃជីវិតអស់កល្បជានិច្ចដោយសុភមង្គល។ (ទំនុកដំកើង ៣៧:២៩; ១៤៤:១៥ខ) ជាបន្ទាប់ យើងនឹងពិចារណាមើល ចំពោះអ្វីដែលត្រូវការដើម្បីស៊ូទ្រាំនឹងការសាកល្បងនៃសេចក្ដីស្មោះត្រង់។
[កំណត់សម្គាល់]
a សព្វវចនាធិប្បាយពីរក្បាលដែលបានបោះពុម្ពដោយសមាគមប៉មយាមខាងព្រះគម្ពីរនិងខិតប័ណ្ណនៃរដ្ឋញូវយ៉ក
b បោះពុម្ពដោយសមាគមប៉មយាមខាងព្រះគម្ពីរនិងខិតប័ណ្ណនៃរដ្ឋញូវយ៉ក
តើអ្នកនឹងឆ្លើយយ៉ាងណា?
◻ ហេតុអ្វីក៏ការមានស្មោះត្រង់ជាការដ៏ពិបាកម្ល៉េះ?
◻ ហេតុអ្វីក៏អាចនិយាយថា«សេចក្ដីស្មោះត្រង់»ជាពាក្យដ៏ពិសេសមួយ?
◻ តើយើងមានគំរូអ្វីក្នុងព្រះគម្ពីរនៃពួកមនុស្សឥតគ្រប់ល័ក្ខណ៍ដែលស្មោះត្រង់?
◻ តើគំរូដ៏ល្អអ្វីនៃសេចក្ដីស្មោះត្រង់ដែលយើងមាន?
[រូបភាពនៅទំព័រ២០]
ឆាល្ស ថេស្ស រ៉ាសិល
[រូបភាពនៅទំព័រ២១]
ព្រះយេស៊ូគឺពិតជា‹បុគ្គលស្មោះត្រង់›របស់ព្រះយេហូវ៉ា
[រូបភាពនៅទំព័រ២២]
ថ្វីបើឥតល្អគ្រប់ល័ក្ខណ៍ យ៉ូបបានសម្ដែងសេចក្ដីស្មោះត្រង់ចំពោះព្រះ
[រូបភាពនៅទំព័រ២៣]
ប៉ុលបានទុកគំរូដ៏ល្អនៃសេចក្ដីស្មោះត្រង់ចំពោះព្រះយេហូវ៉ា