ព្រះគម្ពីរ—សៀវភៅដ៏អស្ចារ្យ
ព្រះគម្ពីរបានត្រូវហៅថា ជាសៀវភៅដែលលក់ដាច់ជាងគេ ហើយនេះជាការសមត្រឹមត្រូវមែន។ មនុស្សអានហើយស្រឡាញ់ព្រះគម្ពីរជាងសៀវភៅឯណាទៅទៀត។ មកដល់ឥឡូវនេះ ការចែកចាយព្រះគម្ពីរ (ទាំងមូលឬជាផ្នែក) គឺបានត្រូវស្មានថាមានជាងបួនរយកោដិក្បាល ក្នុងជាង២.០០០ភាសា។
ប៉ុន្តែ អ្វីដែលគួរឲ្យចាប់អារម្មណ៍ជាងការចែកចាយព្រះគម្ពីរនោះ គឺការអះអាងថាព្រះជាអ្នកនិពន្ធព្រះគម្ពីរ។ គ្រីស្ទានសាវ័កប៉ុលបានសរសេរថា៖ «គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្ដាលឲ្យតែងទេ»។ (ធីម៉ូថេទី២ ៣:១៦) តើនេះមានន័យយ៉ាងណា? ឃ្លាដែលថា«ព្រះទ្រង់បានបញ្ចេញព្រះវិញ្ញាណឲ្យតែង» (ភាសាក្រិក, the·oʹpneu·stos) ន័យចំៗគឺ «ព្រះបានបញ្ចេញដង្ហើម»។ ពាក្យក្រិកដែលទាក់ទងមួយ pneu’ma គឺមានន័យថា«វិញ្ញាណ»។ ដូច្នេះ ការអះអាងថា វិញ្ញាណបរិសុទ្ធរបស់ព្រះបានបណ្ដាលអ្នកនិពន្ធជាតិមនុស្ស ដោយបញ្ចេញដង្ហើមលើគេ បើនិយាយជាប្រៀបធៀប ដើម្បីឲ្យលទ្ធផលចុងបញ្ចប់អាចមានឈ្មោះត្រឹមត្រូវថា ជាពាក្យបន្ទូលរបស់ព្រះ មិនមែនជាពាក្យរបស់មនុស្ស។ ប្រាកដហើយ មនុស្សជាច្រើនដែលបានសិក្សាព្រះគម្ពីរ គឺមានចិត្តអស្ចារ្យនឹងភាពចុះសម្រុងគ្នាទាំងមូល ភាពត្រឹមត្រូវខាងវិទ្យាសាស្ត្រ ភាពស្មោះត្រង់និងភាពត្រង់នៃពួកអ្នកសរសេរ ហើយអ្វីដែលសំខាន់ជាងគេបង្អស់ គឺការសម្រេចបទទំនាយទាំងឡាយ—ដែលការទាំងនេះបានធ្វើឲ្យពួកអ្នកអានរាប់លាននាក់ដែលចេះគិត ជឿថាសៀវភៅនេះគឺមកពីប្រភពខ្ពស់ជាងមនុស្ស។a
ប៉ុន្តែ តើព្រះទ្រង់បានដឹកនាំការសរសេរព្រះគម្ពីរដ៏ជិតដិតយ៉ាងណា? អ្នកខ្លះនិយាយថា ព្រះទ្រង់បានបង្គាប់ឲ្យសរសេរព្រះគម្ពីរតាមពាក្យរបស់ទ្រង់ត្រង់ៗ។ អ្នកខ្លះទៀតនិយាយថា ទ្រង់គ្រាន់តែបានបញ្ចេញគំនិតក្នុងព្រះគម្ពីរ មិនមែនឲ្យពាក្យត្រង់ៗទេ។ ប៉ុន្តែ ក្នុងការពិត ការបណ្ដាលឲ្យតែងមិនមែនមានតែរបៀបមួយប៉ុណ្ណោះទេ ដ្បិតព្រះអង្គបានមានបន្ទូល«នឹងពួកឰយុកោ ដោយពួកហោរា ជាច្រើនដងច្រើនបែប»។ (ហេព្រើរ ១:១; ប្រៀបធៀប កូរិនថូសទី១ ១២:៦) ក្នុងអត្ថបទជាបន្ទាប់ យើងនឹងពិចារណាមើលរបៀបដែលព្រះបានមានបន្ទូលទៅពួកអ្នកនិពន្ធមនុស្ស៤០នាក់ ដែលបានសរសេរព្រះគម្ពីរ។
[កំណត់សម្គាល់]
a បើចង់បានពត៌មានថែមទៀត សូមមើលទំព័រ ៥៣-៤, និង ៩៨-១៦១ នៃសៀវភៅ The Bible—God’s Word or Man’s? បានបោះពុម្ពដោយសមាគមប៉មយាមខាងព្រះគម្ពីរនិងខិត្តប័ណ្ណនៃរដ្ឋញូវយ៉ក ជាសាជីវកម្ម។