ហេតុអ្វីក៏គួរជឿលើព្រះយេស៊ូគ្រីស្ទ?
«សូម្បីតែមនុស្សជាច្រើន ដែលមិនមែនជាគ្រីស្ទាន ក៏ជឿថា ទ្រង់ជាគ្រូដ៏ឧត្តមនិងប្រកបដោយប្រាជ្ញាដែរ។ ទ្រង់ប្រាកដជាបុគ្គលម្នាក់ ដែលធ្លាប់រស់នៅ ហើយមានអានុភាពយ៉ាងខ្លាំងលើគេ»។ (សព្វវចនាធិប្បាយសៀវភៅពិភពលោក) តើ«ទ្រង់»ជាអ្នកណា? គឺជាព្រះយេស៊ូគ្រីស្ទ ជាអ្នកដែលបង្កើតសាសនាគ្រីស្ទាន។
ក៏ប៉ុន្តែ ទោះជាសព្វវចនាធិប្បាយចែងយ៉ាងណាក៏ដោយ ចំពោះមនុស្សជាច្រើនលាននាក់នៅបូព៌ាប្រទេស និងកន្លែងផ្សេងៗទៀត នោះព្រះយេស៊ូគ្រីស្ទជាបុគ្គលដែលគេមិនស្គាល់ទេ គឺគ្រាន់តែជាឈ្មោះដែលគេប្រហែលជានឹកចាំពីសៀវភៅសិក្សានៅវិទ្យាល័យប៉ុណ្ណោះ។ សូម្បីតែនៅក្នុងនិកាយនៃពិភពគ្រីស្ទសាសនា នោះក៏មានសាសនវិទូនិងបព្វជិត ដែលមានប្រសាសន៍ថា យើងពិតជាមិនស្គាល់ព្រះយេស៊ូទេ ហើយសម្ដែងការសង្ស័យលើភាពត្រឹមត្រូវនៃឯកសារបួនច្បាប់(សៀវភៅដំណឹងល្អ) ដែលនៅមាននៅឡើយ ជាប្រវត្ដិរូបទ្រង់ដែលត្រូវបានកត់ទុកក្នុងព្រះគម្ពីរ។
តើពួកអ្នកសរសេរសៀវភៅដំណឹងល្អ អាចប្រឌិតរឿងនៃព្រះជន្មរបស់ព្រះយេស៊ូបានទេ? មិនអាចទាល់តែសោះ! ក្រោយពីបានពិនិត្យមើលសៀវភៅទាំងនេះ នោះអ្នកប្រវត្ដិសាស្ត្រដ៏ល្បីម្នាក់ឈ្មោះ វិល ដូរេន បានសរសេរថា៖ «ដែលមនុស្សដ៏តូចតាចបីបួននាក់ នោះក្នុងតំណតែមួយអាចបង្កើតបាន បុគ្គលិកលក្ខណៈមួយដ៏ខ្លាំងក្លានិងដ៏ចូលចិត្តទៀតផង ហើយការប្រព្រឹត្តដែលថ្លៃថ្នូរដ៏ខ្ពង់ខ្ពស់ ព្រមទាំងមានមតិដែលនាំឲ្យផុសគំនិតខាងឯភាតរភាពមនុស្ស នោះនឹងជាអព្ភូតហេតុ ដ៏អស្ចារ្យជាងអព្ភូតហេតុណា ដែលបានកត់ទុកក្នុងសៀវភៅដំណឹងល្អទៅទៀត។ ក្រោយពីពីរសតវត្សនៃវិវេចនាជាន់ខ្ពស់ នោះទម្រង់នៃជីវិត ចរិតលក្ខណៈ និងការបង្រៀនរបស់ព្រះគ្រីស្ទ គឺនៅមានច្បាស់គួរសម ហើយទុកសំរាប់ជាអំពើប្រពៃដ៏អស្ចារ្យបំផុត នៅក្នុងប្រវត្ដិសាស្ត្រនៃបស្ចិមប្រទេស»។
ក៏ប៉ុន្តែពួកអ្នកឯទៀតចាត់ទុកព្រះយេស៊ូ ថាមិនគួរនឹងគេយកចិត្តទុកដាក់នោះទេ ដោយព្រោះនូវអ្វីដែលពួកអ្នកដែលអះអាងថាកាន់តាមទ្រង់បានធ្វើនោះ។ មនុស្សខ្លះនៅប្រទេសជប៉ុននឹងនិយាយថា៖ ‹ពួកគ្រីស្ទានបានទម្លាក់គ្រាប់បែកបរមាណូទៅលើក្រុងណាហ្កាសាគី ដែលជាទីក្រុងមួយ ដែលមានពួកអ្នកកាន់សាសនាគ្រីស្ទានច្រើនជាង ទីក្រុងភាគច្រើននៅក្នុងប្រទេសជប៉ុន›។ ប៉ុន្តែតើអ្នកនឹងបន្ទោសគ្រូពេទ្យចំពោះការឈឺថ្កាត់របស់អ្នកជម្ងឺឬ បើសិនជាអ្នកជម្ងឺឥតបានធ្វើតាមសំបុត្រទិញថ្នាំនោះ? មនុស្សភាគច្រើនដែលបានអះអាងជាគ្រីស្ទាន បានឥតអើពើយ៉ាងយូរនូវសំបុត្រទិញថ្នាំរបស់ព្រះយេស៊ូ ដើម្បីឲ្យដោះស្រាយនឹងជម្ងឺរបស់មនុស្សលោកនោះ។ ក៏ប៉ុន្តែ ព្រះយេស៊ូបានប្រទានឲ្យវិធីដោះស្រាយនឹងបញ្ហាដែលយើងមានជារៀងរាល់ថ្ងៃ ព្រមទាំងសេចក្ដីទុក្ខវេទនារបស់មនុស្សទូទាំងពិភពលោកដែរ។ ហេតុនេះហើយបានជាយើងអញ្ជើញលោកអ្នកឲ្យអានអត្ថបទជាបន្ទាប់ ហើយមើលដោយខ្លួនអ្នកផ្ទាល់ថាតើព្រះយេស៊ូពិតជាអ្នកណា។