តើព្រះរាជាណាចក្ររបស់ព្រះជាអ្វី?
មានសេចក្ដីវេទនាមួយដ៏ធំបានកើតឡើង មិនយូរប៉ុន្មានបន្ទាប់ពីព្រះបានបង្កើតមនុស្សជាតិ។ តើជាអ្វីទៅ? ទេវតាមួយរូបបានប្រឆាំងអំណាចគ្រប់គ្រងរបស់ព្រះដែលជាអ្នកបង្កើតខ្លួន។ ទេវតាអាក្រក់នេះ បានទាក់ទាញស្ត្រីទីមួយ គឺនាងអេវ៉ា ឲ្យបរិភោគផ្លែឈើដែលព្រះបានហាមបរិភោគ។ ទេវតានោះនិយាយសំដៅទៅលើនាងនិងអ័ដាមដែលជាស្វាមីរបស់នាងថា៖ «អ្នកមិនស្លាប់ជាពិតមែនទេ ដ្បិតព្រះទ្រង់ជ្រាបថា នៅថ្ងៃណាដែលអ្នកបរិភោគ នោះភ្នែកអ្នកនឹងបានភ្លឺឡើង ហើយអ្នកនឹងបានដូចជាព្រះដែរ ព្រមទាំងដឹងការខុសត្រូវផង»។ (លោកុប្បត្តិ ២:១៦, ១៧; ៣:១-៥) ក្រោយមកទេវតាដែលបះបោរបានត្រូវហៅថា អារក្សហើយសាតាំងផង។—វិវរណៈ ១២:៩
តើនាងអេវ៉ាបានជឿតាមសាតាំងទេ? ព្រះគម្ពីររៀបរាប់ថា៖ «ស្ត្រីបានឃើញថា ផ្លែឈើនោះបរិភោគបាន ក៏ជាទីគាប់ដល់ភ្នែក ហើយជាដើមដែលល្មមគួរនឹងចង់បាន ដើម្បីឲ្យបានប្រាជ្ញា នោះនាងក៏យកផ្លែមកបរិភោគ ព្រមទាំងចែកឲ្យដល់ប្ដីដែរ គាត់ក៏បរិភោគតាម»។ (លោកុប្បត្តិ ៣:៦) ដូច្នេះ ស្វាមីភរិយាមួយគូដំបូងគឺអ័ដាមនិងនាងអេវ៉ាបានចូលរួមជាមួយសាតាំងក្នុងការបះបោរប្រឆាំងនិងព្រះ។ ជាលទ្ធផល ពួកគាត់បានបាត់បង់សួនមនោរម្យដែលជាលំនៅ ហើយកូនចៅរបស់ពួកគាត់ក៏បាត់បង់លទ្ធភាពរស់នៅក្នុងសួនមនោរម្យដែរ។ ដើមដំបូងកូនចៅរបស់ពួកគាត់គួរទទួលមត៌កជាភាពគ្រប់លក្ខណ៍និងលទ្ធភាពរស់នៅជារៀងរហូត តែបែរជាកើតមកទទួលបាបនិងសេចក្ដីស្លាប់ទៅវិញ។—រ៉ូម ៥:១២
តើព្រះយេហូវ៉ាដែលជាព្រះមហាក្សត្រសកលលោកបានដោះស្រាយយ៉ាងដូចម្ដេច? ទ្រង់បានរៀបចំមធ្យោបាយមួយដើម្បីឲ្យកូនចៅរបស់ពួកគាត់បានទទួលការអត់ឱនទោសពីបាប។ (រ៉ូម ៥:៨) ព្រះយេហូវ៉ាក៏បានរៀបចំរដ្ឋាភិបាលមួយដើម្បីដោះស្រាយវិបត្ដិនេះ។ រដ្ឋាភិបាលនោះបានត្រូវហៅថា «នគរព្រះ»ឬព្រះរាជាណាចក្ររបស់ព្រះ។ (លូកា ២១:៣១) ព្រះរាជាណាចក្ររបស់ព្រះបានត្រូវរៀបចំជារដ្ឋាភិបាលមួយដែលចំណុះក្រោមអធិបតេយ្យព្រះយេហូវ៉ា ហើយរដ្ឋាភិបាលនោះក៏មានគោលបំណងយ៉ាងជាក់លាក់ដែរ។
តើព្រះរាជាណាចក្ររបស់ព្រះមានគោលបំណងអ្វី? តើព្រះរាជាណាចក្ររបស់ព្រះមានលក្ខណៈបែបណា? ហើយតើខុសគ្នាពីការគ្រប់គ្រងរបស់មនុស្សយ៉ាងដូចម្ដេច? តើព្រះរាជាណាចក្ររបស់ព្រះត្រូវចាប់ផ្ដើមគ្រប់គ្រងពីពេលណា? អត្ថបទបន្ទាប់នឹងឆ្លើយសំណួរទាំងនេះ។