អស់សង្ឃឹម គ្មានចិត្តស្ងប់
មិនជាការចម្លែកអ្វីឡើយ ដែលទស្សនៈរបស់មនុស្សចំពោះពេលអនាគតមានឥទ្ធិពលទៅលើការប្រព្រឹត្តរបស់ពួកគេឥឡូវនេះ។ ជាឧទាហរណ៍ ពេលអស់សង្ឃឹម មនុស្សអាចមានទស្សនៈថា៖ «ចូរយើងស៊ីផឹកទៅចុះ! ដ្បិតស្អែកយើងត្រូវស្លាប់ហើយ»។ (កូរិនថូសទី១ ១៥:៣២) ជាញយដង មនុស្សដែលមានទស្សនៈបែបនេះចេះតែស៊ីផឹកជ្រុល ហើយមានកង្វល់ថែមទៀត ដែលមិននាំឲ្យមានចិត្តស្ងប់ទេ។
តាមពិត បើយើងត្រូវតែរង់ចាំមនុស្សដោះស្រាយបញ្ហាធំដុំទាំងប៉ុន្មានដើម្បីឲ្យមានអនាគតល្អ យើងច្បាស់ជាអស់សង្ឃឹមមែន! ពីព្រោះទឹក ដីនិងខ្យល់ក្នុងបរិស្ថានរបស់យើង ចេះតែកខ្វក់ទៅៗដល់ទំហំដែលពុំធ្លាប់មានឡើយ។ អំពើភេរវកម្មនិងការផលិតអាវុធនុយក្លេអ៊ែរមានកាន់តែច្រើនឡើងៗ។ ទូទាំងពិភពលោក ភាពក្រីក្រនិងរោគរាតត្បាតនៅតែយាយីមនុស្សរាប់រយលាននាក់។ ប៉ុន្តែ ទោះបីជាមានស្ថានភាពបែបនេះក៏ដោយ យើងមិនគួរអស់សង្ឃឹមឡើយ។
ទោះបីជាមនុស្សមិនសូវពូកែទាយអំពីព្រឹត្ដិការណ៍នៅខាងមុខក្ដី ព្រះយេហូវ៉ាជាព្រះដែល«រមែងសំដែងប្រាប់ពីការដែលត្រូវមកខាងចុងបំផុត ហើយតាំងពីចាស់បុរាណ ក៏ប្រាប់ពីការដែលមិនទាន់មានមកដែរ»។ (អេសាយ ៤៦:១០) តើព្រះយេហូវ៉ាមានប្រសាសន៍យ៉ាងណាអំពីពេលអនាគត?
សេចក្ដីបង្រៀនក្នុងគម្ពីរ
ព្រះយេហូវ៉ានឹងមិនអនុញ្ញាតឲ្យផែនដីនិងជីវិតទាំងឡាយខូចបង់ទៅទាំងស្រុងឡើយ។ តាមការពិត មានសេចក្ដីសន្យាក្នុងគម្ពីរដែលថា នៅទីបំផុតព្រះយេហូវ៉ានឹង«បំផ្លាញពួកអ្នកដែលបង្ខូចផែនដី»។ (វិវរណៈ ១១:១៨) តាមរយៈរាជាណាចក្រដែលជារាជរដ្ឋាភិបាលរបស់ព្រះយេហូវ៉ាដែលស្ថិតនៅឯស្ថានសួគ៌ លោកនឹងដកមនុស្សនិងអំពើអាក្រក់ទាំងអស់ចេញពីផែនដី ហើយនឹងរៀបចំឲ្យមានស្ថានភាពនៅទីនេះ សមស្របទៅនឹងគោលបំណងដើមរបស់លោក។ (លោកុប្បត្តិ ១:២៦-៣១; ២:៨, ៩; ម៉ាថាយ ៦:៩, ១០) ខគម្ពីរដូចតទៅនេះជួយលាតត្រដាងពីព្រឹត្ដិការណ៍នាអនាគត ដែលនឹងមានឥទ្ធិពលទៅលើមនុស្សទាំងឡាយ។
ទំនុកដំកើង ៤៦:៨, ៩: ‹ចូរមកពិចារណាមើលអស់ទាំងការនៃព្រះយេហូវ៉ា ជាការហិនវិនាសដែលលោកនឹងធ្វើនៅផែនដី។ ព្រះយេហូវ៉ាបណ្ដាលឲ្យការសង្គ្រាមស្ងប់រំងាប់រហូតដល់ចុងផែនដី ព្រមទាំងបំបាក់ធ្នូ ហើយកាច់លំពែង ក៏ដុតអស់ទាំងរទេះចំបាំងនៅក្នុងភ្លើង›។
អេសាយ ៣៥:៥, ៦: «គ្រានោះ ភ្នែករបស់មនុស្សខ្វាក់នឹងបានភ្លឺឡើង ហើយត្រចៀករបស់មនុស្សថ្លង់នឹងឮបាន។ គ្រានោះ ពួកមនុស្សខ្វិននឹងលោតដូចជាប្រើស ហើយអណ្ដាតរបស់មនុស្សគក៏នឹងច្រៀងឡើង។ ដ្បិតនៅទីរហោស្ថាននឹងមានក្បាលទឹកផុសចេញ ហើយនឹងមានផ្លូវទឹកហូរនៅសមុទ្រខ្សាច់ដែរ»។
អេសាយ ៦៥:២១, ២២: «គ្រានោះ មនុស្សនឹងសង់ផ្ទះ ហើយនឹងអាស្រ័យនៅផង ក៏នឹងដាំចំការទំពាំងបាយជូរ ហើយនឹងបរិភោគផលដែរ។ គេនឹងមិនសង់ រួចមានម្នាក់ទៀតអាស្រ័យនៅ ឬដាំ រួចមានម្នាក់ទៀតបរិភោគផលនោះឡើយ»។
ដានីអែល ២:៤៤, ខ.ស.: «[ព្រះយេហូវ៉ា]នឹងធ្វើអោយរាជាណាចក្រមួយទៀតកើតឡើង ដែលមិនរលាយហើយក៏មិនធ្លាក់ទៅក្រោមអំណាចគ្រប់គ្រងរបស់ប្រជាជាតិណាមួយឡើយ។ រាជាណាចក្រមួយនេះនឹងកំទេចរាជាណាចក្រឯទៀតៗទាំងប៉ុន្មានដែលមានពីមុន អោយវិនាសសូន្យ ហើយរាជាណាចក្រនេះនឹងនៅស្ថិតស្ថេររហូតតទៅ»។
យ៉ូហាន ៥:២៨, ២៩: «មានពេលវេលាមក ដែលអស់ទាំងខ្មោចនៅក្នុងផ្នូរនឹងឮសំឡេង[ព្រះយេស៊ូ] ហើយនឹងចេញមក»។
វិវរណៈ ២១:៣, ៤: ‹ព្រះយេហូវ៉ានឹងធ្វើជាព្រះដល់គេ ហើយជូតអស់ទាំងទឹកភ្នែកពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ។ សេចក្ដីមុនទាំងប៉ុន្មានបានកន្លងបាត់ទៅហើយ›។
សេចក្ដីបង្រៀនក្នុងគម្ពីរបណ្ដាលឲ្យមានចិត្តស្ងប់
សេចក្ដីសន្យាទាំងនេះ យើងអានភ្លាមមិនជឿភ្លាមទេ។ ប៉ុន្តែ កុំឲ្យយើងភ្លេចថា នេះមិនមែនជាសេចក្ដីសន្យារបស់មនុស្សណាម្នាក់ឡើយ តែជាអ្វីដែលព្រះយេហូវ៉ាសន្យា ហើយលោក«មិនចេះភូត»ទាល់តែសោះ។—ទីតុស ១:២
បើយើងរៀនឲ្យចេះទុកចិត្តទៅលើសេចក្ដីសន្យារបស់ព្រះយេហូវ៉ា និងមានរបៀបរស់នៅសមស្របនឹងតម្រូវការរបស់លោក នោះយើងអាចមានចិត្តស្ងប់គ្រប់ជំពូក សូម្បីតែក្រោមកាលៈទេសៈដ៏ពិបាកបំផុតក្ដី។ ទោះបើយើងឆ្លងកាត់សង្គ្រាម ស្ថិតក្នុងភាពរហេមរហាម មានជំងឺតម្កាត់ ជរាភាពឬជិតស្លាប់ក៏ដោយ យើងអាចមានចិត្តស្ងប់នៅឡើយ។ ម្ដេចក៏អាចមានចិត្តស្ងប់បាន? គឺដោយសារយើងជឿជាក់ថា រាជាណាចក្ររបស់ព្រះយេហូវ៉ានឹងកែប្រែស្ថានភាពឲ្យបានល្អឡើងវិញ។
ធ្វើដូចម្ដេចឲ្យមានសេចក្ដីសង្ឃឹមបែបនេះចំពោះពេលអនាគត? យើងត្រូវតែមាន‹គំនិតកែជាថ្មីឡើង› ហើយស្វែងយល់អំពី«បំណងព្រះហឫទ័យនៃព្រះដែលល្អ ស្រួលទទួល ហើយគ្រប់លក្ខណ៍ផង»។ (រ៉ូម ១២:២) ប្រហែលជាយើងត្រូវរកទីសំអាងច្រើនថែមទៀត ទើបយើងអាចទុកចិត្តនិងជឿទៅលើសេចក្ដីសន្យាក្នុងគម្ពីរ។ ការស្រាវជ្រាវបែបនេះពិតជាមានប្រយោជន៍ ហើយអាចនាំឲ្យមានចិត្តស្ងប់មែន!
[រូបភាពនៅទំព័រ៥, ៦]
តើគម្ពីរដែលជាបណ្ដាំរបស់ព្រះរៀបរាប់យ៉ាងណាអំពីពេលអនាគត?