ចូរគោរពព្រះយេហូវ៉ាជាអ្នកមានសិទ្ធិកាន់អំណាច
«នេះហើយជាសេចក្ដីស្រឡាញ់ដល់ព្រះ គឺឲ្យយើងកាន់តាមអស់ទាំងបញ្ញត្តរបស់ទ្រង់ ឯបញ្ញត្តទ្រង់នោះមិនមែនជាបន្ទុកដ៏ធ្ងន់ទេ»។—១យ៉ូន. ៥:៣
១, ២. (ក) ហេតុអ្វីក៏មនុស្សជាច្រើនសព្វថ្ងៃមិនចូលចិត្តចុះចូលចំពោះអ្នកកាន់អំណាច? (ខ) តើអ្នកដែលមិនចូលចិត្តចុះចូលពិតជាធ្វើអ្វីតាមចិត្តរបស់ខ្លួនមែនឬ? សូមពន្យល់។
នៅសព្វថ្ងៃនេះ មនុស្សជាច្រើនមិនចូលចិត្តចុះចូលចំពោះអ្នកដែល«កាន់អំណាច»ឡើយ។ ពួកគេមានទស្សនៈថា «មិនបាច់មានអ្នកណាប្រាប់ខ្ញុំទេ!»។ ប៉ុន្តែ តើមនុស្សបែបនេះពិតជាធ្វើអ្វីតាមចិត្តរបស់ខ្លួនមែនឬ? មិនទាល់តែសោះ! ភាគច្រើនចេះតែធ្វើតាមអ្នកជិតខាងខ្លួន តែអ្នកជិតខាងរបស់ខ្លួននោះកំពុង«ត្រាប់តាមសម័យនេះ»ទៅវិញ។ (រ៉ូម ១២:២) ស្របទៅតាមសំណេររបស់សាវ័កពេត្រុស ជាជាងធ្វើអ្វីតាមតែចិត្តរបស់ខ្លួន ពួកគេសុទ្ធតែជា«បាវបំរើរបស់[សម័យដ៏]ពុករលួយ»នេះ។ (២ពេ. ២:១៩) ពួកគេប្រព្រឹត្ត«តាមរបៀបលោកីយនេះ គឺតាមមេគ្រប់គ្រងរាជ្យលើអាកាស» គឺសាតាំងដែលជាមេកំណាច។—អេភ. ២:២
២ ក្នុងសៀវភៅមួយដែលមេធាវីម្នាក់បានសរសេរ គាត់អួតខ្លួនថា៖ «ខ្ញុំមិនឲ្យឪពុកម្ដាយ . . . គ្រូគង្វាល . . . ឬធម៌ព្រះ មកបង្ខិតបង្ខំខ្ញុំឲ្យជឿតាមឡើយ»។ ពេលកាន់អំណាច អ្នកខ្លះបំពានសិទ្ធិមែន ដូច្នេះមិនគួរឲ្យស្ដាប់បង្គាប់ទេ។ យ៉ាងណាក៏ដោយ តើនេះជាហេតុឲ្យយើងបដិសេធនឹងអស់អ្នកដែលផ្ដល់ការណែនាំឬ? មុននឹងឆ្លើយ សូមអានកាសែតជាមុនសិន ហើយគិតពីទុក្ខវេទនាដែលមានជាទូទៅ។ ក្នុងអំឡុងគ្រានេះយើងត្រូវការការណែនាំមែន! ប៉ុន្តែ គួរឲ្យស្ដាយណាស់! មនុស្សភាគច្រើនធ្វើថ្លង់មិនចង់ដឹងចង់ឮទៅវិញ។
ទស្សនៈរបស់យើងចំពោះអ្នកកាន់អំណាច
៣. តើពួកគ្រិស្តសាសនិកនៅសតវត្សរ៍ទី១បានប្រព្រឹត្តយ៉ាងណា ដែលបង្ហាញថាពួកគេមិនព្រមចុះចូលភ្លាមៗចំពោះពួកអាជ្ញាធរ?
៣ ក្នុងនាមជាគ្រិស្តសាសនិក យើងមានទស្សនៈខុសប្លែកពីមនុស្សក្នុងពិភពលោកនេះ។ នេះមិនមានន័យថា យើងធ្វើអ្វីៗក៏ដោយតាមតែអ្នកកាន់អំណាចបង្គាប់ឡើយ។ ផ្ទុយទៅវិញ ដូចគ្នានឹងពួកគ្រិស្តសាសនិកនៅសតវត្សរ៍ទី១ ជួនកាលយើងក៏មិនព្រមចុះចូលចំពោះអ្នកដទៃ សូម្បីតែចំពោះអ្នកខ្លះដែលមានសិទ្ធិកាន់អំណាចក្ដី។ ជាឧទាហរណ៍ ក្រុមប្រឹក្សាជាន់ខ្ពស់ ដែលរួមបញ្ចូលសម្ដេចសង្ឃនិងអ្នកឯទៀតដែលមានសិទ្ធិកាន់អំណាច បានហាមផ្ដាច់មិនឲ្យពួកសាវ័កផ្សព្វផ្សាយជាបន្ត។ យ៉ាងណាក៏ដោយ សាវ័កទាំងនោះមិនចុះចូលភ្លាមដោយកំសាកទេ។ ពួកសាវ័កមិនបានឈប់ធ្វើការល្អដោយព្រោះតែចង់ចុះចូលចំពោះពួកអាជ្ញាធរឡើយ។—សូមអាន កិច្ចការ ៥:២៧-២៩
៤. ក្នុងបទគម្ពីរភាសាហេព្រើរ តើអ្នកណាខ្លះបានតាំងគំរូល្អដែលបង្ហាញថា រាស្ត្រច្រើននាក់របស់ព្រះយេហូវ៉ាសុខចិត្តរងទុក្ខជាជាងធ្វើតាមចិត្តអ្នកដទៃ?
៤ មុនសម័យពួកគ្រិស្តសាសនិក អ្នកបម្រើជាច្រើននាក់របស់ព្រះយេហូវ៉ាក៏បានកាន់ជំហររឹងមាំដូចនេះដែរ។ ជាឧទាហរណ៍ លោកម៉ូសេ«មិនព្រមឲ្យគេហៅខ្លួនជាកូនរបស់បុត្រីផារ៉ោនទេ។ លោកស៊ូរងទុក្ខលំបាកជាមួយនឹងរាស្ត្ររបស់ព្រះ»ទៅវិញ ទោះបីជាទង្វើនោះបណ្ដាលឲ្យស្តេចមាន«កំហឹង»យ៉ាងខ្លាំងក្ដី។ (ហេ. ១១:២៤, ២៥, ២៧) មួយទៀត ទោះជាភរិយារបស់លោកប៉ូទីផារមានសិទ្ធិអំណាចធ្វើបាបយ៉ូសែបក៏ដោយ គាត់មិនបានចុះញ៉មទាល់តែសោះ ពេលនាងលួងលោមចិត្តគាត់ឲ្យរួមដំណេកជាមួយ។ (លោ. ៣៩:៧-៩) លោកដានីយ៉ែលក៏បាន«សំរេចក្នុងចិត្តថា មិនព្រមឲ្យខ្លួនសៅហ្មងដោយអាហាររបស់ស្តេច» សូម្បីតែពេលដែលអ្នកជាចៅហ្វាយលើពួកគាត់មិនយល់ព្រមភ្លាមក្ដី។ (ដា. ១:៨-១៤) ឧទាហរណ៍ទាំងនេះបង្ហាញថា តាំងពីបុរាណមក រាស្ត្ររបស់ព្រះយេហូវ៉ាបានកាន់ជំហររឹងមាំដើម្បីគាំទ្រអ្វីដែលត្រឹមត្រូវ មិនថានេះនាំឲ្យពួកគេរងទុក្ខលំបាកបែបណាក៏ដោយ។ ពួកគេមិនព្រមចុះចូលចំពោះអ្នកដទៃដោយគ្រាន់តែចង់យកចិត្តគេទេ ហើយគប្បីណាស់ឲ្យយើងកាន់ជំហរដូចគ្នាដែរ។
៥. ស្តីអំពីការគោរពអ្នកកាន់អំណាច តើយើងមានទស្សនៈខុសគ្នាយ៉ាងណាពីមនុស្សក្នុងពិភពលោកនេះ?
៥ ពេលយើងកាន់ជំហររឹងមាំដោយចិត្តក្លាហាន នេះមិនមែនជាលក្ខណៈមានះទេ។ ណាមួយទៀត យើងមិនកាន់ជំហររឹងមាំដោយមានបំណងចង់ប្រឆាំងនឹងពួកអ្នកកាន់អំណាច ដូចអ្នកបះបោរប្រឆាំងនឹងរដ្ឋាភិបាលឡើយ។ ផ្ទុយទៅវិញ យើងបានតាំងចិត្តគោរពព្រះយេហូវ៉ាជាអ្នកមានសិទ្ធិកាន់អំណាចលើសជាងមនុស្សណាក៏ដោយ។ ពេលច្បាប់របស់មនុស្សប្រឆាំងនឹងច្បាប់របស់ព្រះយេហូវ៉ា នោះមិនពិបាកឲ្យយើងសម្រេចចិត្តធ្វើអ្វីមួយទេ។ ដូចពួកសាវ័កនៅសតវត្សរ៍ទី១ យើងស្ដាប់បង្គាប់ព្រះជាជាងមនុស្ស។
៦. ហេតុអ្វីក៏ការស្ដាប់បង្គាប់ព្រះយេហូវ៉ាតែងតែមានប្រយោជន៍?
៦ តើចិត្តគំនិតបែបណាជួយយើងឲ្យគោរពព្រះយេហូវ៉ាជាអ្នកមានសិទ្ធិកាន់អំណាច? យើងធ្វើតាមយោបល់ដែលចែងនៅសុភាសិត ៣:៥, ៦ ថា៖ «ចូរទីពឹងដល់[ឬ«ទុកចិត្តលើ», ខ.ស.]ព្រះយេហូវ៉ាឲ្យអស់អំពីចិត្ត កុំឲ្យពឹងផ្អែកលើយោបល់របស់ខ្លួនឡើយ ត្រូវឲ្យទទួលស្គាល់ទ្រង់នៅគ្រប់ទាំងផ្លូវឯងចុះ! នោះទ្រង់នឹងដំរង់អស់ទាំងផ្លូវច្រករបស់ឯង»។ យើងជឿថាមិនយូរមិនឆាប់ អ្វីៗក៏ដោយដែលព្រះយេហូវ៉ាតម្រូវពីយើង តែងតែនាំឲ្យមានប្រយោជន៍។ (សូមអាន ចោទិយកថា ១០:១២, ១៣)ប្រាកដមែន នៅចំពោះបណ្ដាជនអ៊ីស្រាអែល ព្រះយេហូវ៉ាពិពណ៌នាអំពីអង្គទ្រង់ថា៖ «ជាអ្នកដែលបង្រៀនឲ្យឯងបានទទួលប្រយោជន៍ ហើយក៏នាំឯងទៅក្នុងផ្លូវដែលឯងគួរដើរ»។ រួចមក ព្រះយេហូវ៉ាមានប្រសាសន៍ទៀតថា៖ «បើឯងបានស្ដាប់តាមបញ្ញត្តទាំងប៉ុន្មានរបស់អញ . . . នោះសេចក្ដីសុខរបស់ឯងនឹងបានដូចជាទន្លេ [ហើយ]សេចក្ដីសុចរិតរបស់ឯងនឹងបានដូចជារលកនៃសមុទ្រហើយ»។ (អេសា. ៤៨:១៧, ១៨) យើងទុកចិត្តនឹងពាក្យទាំងនោះហើយក៏ជឿស៊ប់ថា ការស្ដាប់បង្គាប់ព្រះយេហូវ៉ារមែងតែងតែនាំឲ្យមានប្រយោជន៍។
៧. បើយើងមិនយល់ច្បាស់ពីមូលហេតុដែលព្រះយេហូវ៉ាផ្ដល់ច្បាប់ណាមួយក្នុងបណ្ដាំរបស់ទ្រង់ តើគប្បីឲ្យយើងធ្វើអ្វី?
៧ សូម្បីតែពេលដែលយើងមិនយល់ច្បាស់ពីមូលហេតុដែលមានច្បាប់ណាមួយក្នុងបណ្ដាំរបស់ព្រះយេហូវ៉ាក្ដី យើងនៅតែគោរពទ្រង់ជាអ្នកមានសិទ្ធិកាន់អំណាចដដែល។ នេះមិនបានសេចក្ដីថា យើងជឿផ្កាប់មុខដោយត្រចៀកស្រាលឡើយ តែបង្ហាញថាយើងទុកចិត្តទៅលើព្រះយេហូវ៉ាវិញ។ ទស្សនៈនេះសឲ្យឃើញពីជំនឿស៊ប់ថា ព្រះយេហូវ៉ាជ្រាបពីអ្វីដែលនាំឲ្យបានប្រយោជន៍។ ការស្ដាប់បង្គាប់ព្រះយេហូវ៉ាក៏បង្ហាញថាយើងស្រឡាញ់ទ្រង់ដែរ ដូចសាវ័កយ៉ូហានបានសរសេរថា៖ «នេះហើយជាសេចក្ដីស្រឡាញ់ដល់ព្រះ គឺឲ្យយើងកាន់តាមអស់ទាំងបញ្ញត្តរបស់ទ្រង់»។ (១យ៉ូន. ៥:៣) ប៉ុន្តែ ការស្ដាប់បង្គាប់មានលក្ខណៈសំខាន់មួយទៀតដែលយើងមិនគួរភ្លេចឡើយ។
ចូររៀនឲ្យចេះវែកញែកចុះ!
៨. ពេលយើងរៀនឲ្យចេះ«វែកញែក» តើនេះជួយយើងឲ្យគោរពព្រះយេហូវ៉ាជាអ្នកមានសិទ្ធិកាន់អំណាចយ៉ាងដូចម្ដេច?
៨ គម្ពីរចែងថា យើងគួរតែ«បង្ហាត់ឥន្ទ្រីយ»ឬបណ្ដុះឲ្យមាន«សមត្ថភាពវែកញែក»កាន់តែល្អឡើងៗ «ដើម្បីឲ្យបានដឹងខុសត្រូវ»។ (ហេ. ៥:១៤; ព.ថ.) ដូច្នេះ យើងមិនមានគោលដៅធ្វើតាមច្បាប់របស់ព្រះយេហូវ៉ាដោយស្វ័យប្រវត្តឡើយ។ ផ្ទុយទៅវិញ យើងចង់មានសមត្ថភាព«ដឹងខុសត្រូវ»ដោយចេះគិតពីគោលការណ៍នីមួយៗរបស់ព្រះយេហូវ៉ា។ គប្បីឲ្យយើងចេះកត់សម្គាល់ប្រយោជន៍ដែលមកពីការធ្វើតាមបង្គាប់របស់ព្រះយេហូវ៉ា ដើម្បីបណ្ដុះឲ្យមានទស្សនៈដូចអ្នកតែងបទទំនុកដំកើងដែលថា៖«ក្រឹត្យវិន័យរបស់ទ្រង់ក៏នៅក្នុងចិត្តទូលបង្គំ»។—ទំនុក. ៤០:៨
៩. តើយើងអាចរៀនឲ្យចេះវិនិច្ឆ័យខ្លួនសមស្របទៅតាមគោលការណ៍របស់ព្រះយេហូវ៉ាយ៉ាងដូចម្ដេច? ហេតុអ្វីក៏សំខាន់ម្ល៉េះឲ្យយើងចេះធ្វើដូច្នេះ?
៩ យើងត្រូវតែរំពឹងគិតពីអ្វីដែលយើងអានក្នុងគម្ពីរ ទើបអាចទទួលស្គាល់តម្លៃនៃច្បាប់របស់ព្រះយេហូវ៉ា ដូចអ្នកតែងបទទំនុកដំកើង។ ជាឧទាហរណ៍ ពេលយើងរៀនអំពីតម្រូវការណាមួយរបស់ព្រះយេហូវ៉ា យើងអាចសួរខ្លួនឯងថា ‹ហេតុអ្វីបានជាច្បាប់ឬគោលការណ៍នេះមានប្រយោជន៍? បើខ្ញុំធ្វើតាមច្បាប់ឬគោលការណ៍នេះ តើនឹងមានលទ្ធផលល្អអ្វីខ្លះ? ចំពោះអស់អ្នកដែលមិនអើពើនឹងឱវាទនេះពីព្រះយេហូវ៉ា តើមានផលវិបាកណាខ្លះ?›។ ពេលយើងចេះវិនិច្ឆ័យខ្លួនឲ្យបានស្របទៅតាមតម្រូវការរបស់ព្រះយេហូវ៉ា នេះនឹងជួយយើងឲ្យចេះធ្វើការសម្រេចចិត្តសមស្របទៅនឹងឆន្ទៈរបស់ទ្រង់ដែរ។ យ៉ាងនេះ យើងអាច«យល់បំណងព្រះហឫទ័យ»របស់ព្រះយេហូវ៉ា ព្រមទាំងធ្វើតាមបំណងនោះដោយចេះស្ដាប់បង្គាប់ទ្រង់។ (អេភ. ៥:១៧) ប៉ុន្តែ នេះមិនតែងតែស្រួលទេ។
សាតាំងព្យាយាមបង្អាប់កិត្ដិយសព្រះយេហូវ៉ា ជាអ្នកមានសិទ្ធិកាន់អំណាច
១០. តើសាតាំងបានព្យាយាមបង្អាប់កិត្ដិយសព្រះយេហូវ៉ាជាអ្នកមានសិទ្ធិកាន់អំណាចក្នុងលក្ខណៈមួយណានៃជីវិត?
១០ យូរយារមកហើយ សាតាំងបានព្យាយាមបង្អាប់កិត្ដិយសព្រះយេហូវ៉ាជាអ្នកមានសិទ្ធិកាន់អំណាច។ ចិត្តគំនិតនិងការប្រព្រឹត្តច្រើនបែបច្រើនយ៉ាងសឲ្យឃើញពីស្មារតីប្រកាន់យកតែគំនិតខ្លួនឯងដូចសាតាំង។ ជាឧទាហរណ៍ សូមគិតអំពីទស្សនៈរបស់មនុស្សជាច្រើនដែលមិនឲ្យតម្លៃចំពោះចំណងអាពាហ៍ពិពាហ៍ស្របទៅតាមទស្សនៈរបស់ព្រះយេហូវ៉ា។ គូប្រុសស្រីខ្លះរួមរស់ជាមួយគ្នាដោយឥតរៀបការ ហើយស្វាមីភរិយាខ្លះទៀតចេះតែរកហេតុដើម្បីលែងលះគូរបស់ខ្លួនទៅវិញ។ មនុស្សបែបនេះប្រហែលជាឯកភាពនឹងតួឯកកុនដ៏ល្បីម្នាក់ដែលបាននិយាយថា៖ «ប្រុសក៏ដូចស្រីដែរ គ្មាននរណាអាចស្រឡាញ់មនុស្សតែម្នាក់រហូតបានឡើយ»។ តួឯកកុននេះក៏បញ្ជាក់បន្ថែមទៀតថា៖ «ខ្ញុំមិនដែលស្គាល់អ្នកណាម្នាក់សោះ ដែលប្រាថ្នាចង់រស់នៅជាមួយនឹងគូរបស់ខ្លួនឬក៏ស្មោះត្រង់រហូតនោះ»។ ពេលគិតអំពីសង្សារច្រើននាក់ដែលតួឯកកុនដ៏ល្បីម្នាក់ទៀតធ្លាប់មានហើយមិនអាចស្រឡាញ់គ្នារហូតបាន គាត់ក៏បាននិយាយដូចគ្នាដែរថា៖ «ខ្ញុំសង្ស័យថា មនុស្សយើងគ្មានទំនោរចិត្តចង់រស់នៅជាមួយម្នាក់គត់អស់មួយជីវិតទេ»។ បើដូច្នេះ គប្បីឲ្យយើងសួរខ្លួនឯងថា ‹ស្តីអំពីអាពាហ៍ពិពាហ៍ តើខ្ញុំគោរពតាមទស្សនៈរបស់ព្រះយេហូវ៉ាជាអ្នកមានសិទ្ធិដាក់កម្រិតឬ? ឬមួយក៏ តើទស្សនៈធូររលុងរបស់មនុស្សក្នុងពិភពលោកនេះមានឥទ្ធិពលមិនល្អមកលើចិត្តគំនិតរបស់ខ្ញុំទៅវិញ?›។
១១, ១២. (ក) ហេតុអ្វីក៏ពិបាកម្ល៉េះឲ្យយុវវ័យខ្លះគោរពព្រះយេហូវ៉ាជាអ្នកមានសិទ្ធិដាក់កម្រិតលើខ្លួន? (ខ) សូមរៀបរាប់បទពិសោធន៍មួយដែលបង្ហាញថា ការមិនធ្វើតាមច្បាប់និងគោលការណ៍របស់ព្រះយេហូវ៉ានាំឲ្យមានផលវិបាក។
១១ ប្អូនៗក្នុងអង្គការរបស់ព្រះយេហូវ៉ា ចូរប្រយ័ត្នចុះ! ពីព្រោះសាតាំងព្យាយាមបង្អាប់កិត្ដិយសព្រះយេហូវ៉ាដោយមានបំណងនាំប្អូនៗឲ្យលែងចាត់ទុកទ្រង់ជាអ្នកមានសិទ្ធិដាក់កម្រិតលើខ្លួន។ «សេចក្ដីស្រើបស្រាល»និង«តណ្ហា[ឯទៀត]នៃយុវវ័យ» រួមជាមួយការបង្ខិតបង្ខំពីអ្នកដែលប្អូនៗសេពគប់ជាមួយ អាចនាំឲ្យមានគំនិតថា ច្បាប់របស់ព្រះយេហូវ៉ាសុទ្ធតែតឹងរ៉ឹងពេក។ (២ធី. ២:២២; ២ធម. ២:២២, ខ.ស.) ប្អូនៗទាំងឡាយអើយ! កុំឲ្យមានគំនិតបែបនេះឡើយ! ចូរព្យាយាមដើម្បីយល់អំពីអត្ថប្រយោជន៍ដែលមកពីការធ្វើតាមគោលការណ៍របស់ព្រះយេហូវ៉ា។ ជាឧទាហរណ៍ មានបង្គាប់ក្នុងគម្ពីរថា៖ «ចូររត់ពីការសហាយស្មន់ចេញ»។ (១កូ. ៦:១៨) ម្ដងនេះទៀត ចូរឲ្យប្អូនៗសួរខ្លួនឯងថា ‹ហេតុអ្វីបានជាច្បាប់នេះមានប្រយោជន៍? បើខ្ញុំធ្វើតាមច្បាប់នេះ តើនឹងមានលទ្ធផលល្អអ្វីខ្លះ?›។ ប្អូនៗប្រហែលជាស្គាល់នរណាម្នាក់ក្នុងក្រុមជំនុំដែលមិនបានធ្វើតាមឱវាទនេះពីព្រះយេហូវ៉ា ហើយមានផលវិបាកទៅវិញ។ ក្រោយបានធ្វើដូច្នេះ តើពួកគេពិតជាសប្បាយទេ? តើជីវិតរបស់ពួកគេប្រសើរជាងពេលបានចូលរួមជាមួយអង្គការរបស់ព្រះយេហូវ៉ាទេ? តើពួកគេពិតជាបានរកគន្លឹះនៃសុភមង្គលដែលអ្នកបម្រើឯទៀតរបស់ព្រះយេហូវ៉ាមិនមានឬទេ?—សូមអាន អេសាយ ៦៥:១៤
១២ សូមគិតអំពីយោបល់របស់នារីម្នាក់ឈ្មោះសារ៉ុន ដែលជាគ្រិស្តសាសនិកម្នាក់ដែរ។ ប៉ុន្មានឆ្នាំមុន សារ៉ុនបានសរសេរថា៖ «ដោយសារខ្ញុំមិនបានគោរពតាមច្បាប់របស់ព្រះយេហូវ៉ា ខ្ញុំក៏កើតអេដស៍ជាជំងឺដែលបណ្ដាលឲ្យស្លាប់។ ជាញយដងខ្ញុំនឹកចាំពីប៉ុន្មានឆ្នាំមុនដែលខ្ញុំបានបម្រើព្រះយេហូវ៉ាដោយសប្បាយរីករាយ»។ សារ៉ុនសារភាពថា នាងបានប្រព្រឹត្តយ៉ាងល្ងីល្ងើដោយធ្វើខុសច្បាប់ព្រះយេហូវ៉ា។ ផ្ទុយទៅវិញ គប្បីឲ្យនាងទទួលស្គាល់តម្លៃនៃច្បាប់ទាំងនោះជាជាង ពីព្រោះច្បាប់របស់ព្រះយេហូវ៉ាតែងតែការពារយើង។ សារ៉ុនស្លាប់គ្រាន់តែ៧សប្ដាហ៍ក្រោយនាងបានសរសេរពាក្យទាំងនេះ។ រឿងដ៏ខ្លោចផ្សានេះបង្ហាញថា សាតាំងគ្មានអ្វីល្អផ្ដល់ឲ្យអស់អ្នកដែលចូលដៃជាមួយរបៀបរបបដ៏អាក្រក់របស់វាឡើយ។ សាតាំងជា«ឪពុក»ឬអ្នកដែលពោលពាក្យ«កំភូត»មុនគេ ហើយទោះជាវាសន្យាច្រើនយ៉ាងណាក៏ដោយ វាមិនដែលធ្វើតាមពាក្យសន្យាណាមួយសោះ ដូចជាវាបានកុហកនាងអេវ៉ាដែរ។ (យ៉ូន. ៨:៤៤) គឺច្បាស់ហើយថា យើងតែងតែទទួលប្រយោជន៍ជានិច្ច ពីការគោរពព្រះយេហូវ៉ាជាអ្នកដែលមានសិទ្ធិដាក់កម្រិតឲ្យយើង។
ចូរប្រយ័ត្ននឹងស្មារតីប្រកាន់យកតែគំនិតខ្លួនឯង!
១៣. តើក្នុងករណីណាមួយដែលយើងត្រូវតែប្រយ័ត្ននឹងស្មារតីប្រកាន់យកតែគំនិតខ្លួនឯង?
១៣ ដំណាលគ្នានឹងការគោរពព្រះយេហូវ៉ាជាអ្នកមានសិទ្ធិកាន់អំណាច យើងក៏ត្រូវតែប្រយ័ត្ននឹងស្មារតីប្រកាន់យកតែគំនិតខ្លួនឯង។ ចិត្តក្រអឺតក្រទមអាចបណ្ដាលឲ្យយើងមានទស្សនៈថា មិនចាំបាច់មានអ្នកណាជួយណែនាំយើងឡើយ។ ជាឧទាហរណ៍ ពេលអ្នកនាំមុខក្នុងចំណោមរាស្ត្ររបស់ព្រះយេហូវ៉ាជូនឱវាទ យើងប្រហែលជាមិនចង់ស្ដាប់ទេ។ ប៉ុន្តែ ព្រះយេហូវ៉ាមានអ្នកបម្រើស្មោះត្រង់ ជាខ្សែរយៈដើម្បីផ្ដល់ការណែនាំដែលប្រៀបដូចជាអាហារតាមត្រូវពេល។ (ម៉ាថ. ២៤:៤៥-៤៧) គប្បីឲ្យយើងមានចិត្តរាបទាប ហើយទទួលស្គាល់ថា នេះជាខ្សែរយៈដែលព្រះយេហូវ៉ាកំពុងប្រើដើម្បីថែទាំរាស្ត្ររបស់ទ្រង់នាសម័យនេះ។ ចូរឲ្យយើងមានលក្ខណៈដូចពួកសាវ័កដ៏ស្មោះត្រង់ចុះ! ពេលសិស្សខ្លះរបស់ព្រះយេស៊ូមិនពេញចិត្តនឹងអ្វីដែលទ្រង់បង្រៀនម្ដងនោះ ទ្រង់សួរពួកសាវ័កថា៖ «អ្នករាល់គ្នាចង់ថយទៅដែរឬ?»។ ពេត្រុសឆ្លើយតបថា៖ «ព្រះអម្ចាស់អើយ! តើយើងខ្ញុំនឹងទៅឯអ្នកណាវិញ? គឺទ្រង់ហើយដែលមានព្រះបន្ទូលនៃជីវិតដ៏នៅអស់កល្បជានិច្ច»។—យ៉ូន. ៦:៦៦-៦៨
១៤, ១៥. ហេតុអ្វីគប្បីឲ្យយើងមានចិត្តរាបទាបក្នុងការធ្វើតាមឱវាទដែលមានមូលដ្ឋានទៅលើគម្ពីរ?
១៤ យើងក៏គោរពព្រះយេហូវ៉ាជាអ្នកមានសិទ្ធិកាន់អំណាច ដោយធ្វើតាមឱវាទដែលមានមូលដ្ឋានទៅលើបណ្ដាំរបស់ទ្រង់។ ជាឧទាហរណ៍ ក្រុមអ្នកបម្រើស្មោះត្រង់បានទូន្មានយើងថា យើងត្រូវតែ«ចាំយាម ហើយដឹងខ្លួន»ចុះ! (១ថែ. ៥:៦) ដំបូន្មាននេះ ពីអ្នកបម្រើស្មោះត្រង់ពិតជាមានប្រយោជន៍មែន ពីព្រោះយើងកំពុងរស់នៅគ្រាជាន់ក្រោយបង្អស់ដែលពេញទៅដោយ«មនុស្ស[ដែល]ស្រឡាញ់តែខ្លួនឯង ទាំងស្រឡាញ់ប្រាក់»។ (២ធី. ៣:១, ២) តើទស្សនៈបែបនេះដែលមានជាទូទៅអាចមានឥទ្ធិពលមកលើយើងទេ? អាចមានមែន! បើយើងមានគោលដៅផ្សេងៗដែលមិនទាក់ទងនឹងការថ្វាយបង្គំព្រះយេហូវ៉ា នេះអាចនាំឲ្យយើងលែងយកចិត្តទុកដាក់នឹងកិច្ចបម្រើទ្រង់ ឬមួយក៏យើងអាចចាប់ផ្ដើមមានចិត្តចង់ដេញតាមទ្រព្យសម្បត្ដិទៅវិញ។ (លូ. ១២:១៦-២១) អាស្រ័យហេតុនេះ គប្បីណាស់ឲ្យយើងធ្វើតាមឱវាទក្នុងគម្ពីរ ហើយជៀសវាងពីរបៀបរស់នៅដែលបង្ហាញពីការរកតែប្រយោជន៍ខ្លួនឯងដែលមានពាសពេញក្នុងពិភពលោករបស់សាតាំង។—១យ៉ូន. ២:១៦
១៥ អ្នកបម្រើស្មោះត្រង់ផ្ដល់ការណែនាំដែលប្រៀបដូចជាអាហារដល់ក្រុមជំនុំទាំងឡាយ តាមរយៈពួកអ្នកចាស់ទុំដែលបានតែងតាំងឲ្យបំពេញភារកិច្ចនោះ។ មានការដាស់តឿនក្នុងគម្ពីរថា៖ «ចូរស្ដាប់តាម ហើយចុះចូលនឹងពួកអ្នកដែលនាំមុខអ្នករាល់គ្នាចុះ! ដើម្បីឲ្យអ្នកទាំងនោះបានថែរក្សាព្រលឹងអ្នករាល់គ្នាដោយអំណរ មិនមែនដោយស្រែកថ្ងូរទេ ដ្បិតបើត្រូវស្រែកថ្ងូរនោះ បង់ប្រយោជន៍ដល់អ្នករាល់គ្នាហើយ»។ (ហេ. ១៣:១៧) តើនេះមានន័យថា ពួកអ្នកចាស់ទុំក្នុងក្រុមជំនុំមិនចេះភ្លាត់ធ្វើខុសទេ? មិនមែនទេ! ព្រះយេហូវ៉ាឃើញចំណុចខ្សោយរបស់ពួកគាត់ច្បាស់ជាងយើងទៅទៀត។ យ៉ាងណាក៏ដោយ ព្រះយេហូវ៉ានៅតែតម្រូវឲ្យយើងចុះចូលចំពោះពួកគាត់នៅឡើយ។ ពេលដែលយើងសហការណ៍ជាមួយពួកអ្នកចាស់ទុំ ទោះជាពួកគាត់ភ្លាត់ធ្វើខុសម្ដងម្កាលក៏ដោយ នេះបង្ហាញថាយើងកំពុងគោរពព្រះយេហូវ៉ាជាអ្នកមានសិទ្ធិកាន់អំណាច។
សារៈសំខាន់នៃចិត្តរាបទាប
១៦. តើយើងអាចគោរពព្រះយេស៊ូជាអ្នកនាំមុខក្រុមជំនុំនៃពួកគ្រិស្តសាសនិកយ៉ាងដូចម្ដេច?
១៦ យើងត្រូវតែចងចាំជានិច្ចថា ព្រះយេស៊ូជាសិរសាឬអ្នកនាំមុខក្រុមជំនុំ។ (កូល. ១:១៨) ហេតុនេះហើយបានជាយើងចុះចូលចំពោះពួកអ្នកចាស់ទុំដែលផ្ដល់ការណែនាំឲ្យយើង ព្រមទាំង«រាប់អាន[ពួកគាត់]ជាខ្លាំង»ថែមទៀត។ (១ថែ. ៥:១២, ១៣) ពួកអ្នកចាស់ទុំក្នុងក្រុមជំនុំក៏មានស្មារតីចុះចូលផងដែរ។ ពួកគាត់ធ្វើដូច្នេះដោយបង្រៀនក្រុមជំនុំពីសាររបស់ព្រះយេហូវ៉ា មិនមែនទស្សនៈរបស់ខ្លួនគាត់ទេ។ ពួកអ្នកចាស់ទុំមិនបង្រៀនអ្វីដែល«លើសជាង[ឬ«ហួសពី»]សេចក្ដីដែលបានចែងទុក»ក្នុងគម្ពីរ ដោយមានបំណងចង់លើកតម្កើងតែគំនិតរបស់ខ្លួនឡើយ។—១កូ. ៤:៦; ១ករ. ៤:៦, ខ.ស.
១៧. តើមហិច្ឆតានាំឲ្យមានគ្រោះថ្នាក់បែបណាខ្លះ?
១៧ បងប្អូនទាំងឡាយក្នុងក្រុមជំនុំត្រូវតែប្រុងប្រយ័ត្នជានិច្ចដែរ កុំឲ្យស្វែងរកកិត្ដិសព្ទដល់ខ្លួន។ (សុ. ២៥:២៧) តាមមើលទៅ សាវ័កយ៉ូហានធ្លាប់ស្គាល់គ្រិស្តសាសនិកម្នាក់ដែលមានទំនោរចិត្តមិនល្អបែបនេះ។ យ៉ូហានសរសេរថា៖ «អ្នកឌីអូត្រេព ដែលចូលចិត្តចង់ធ្វើធំក្នុងពួកនោះ គាត់មិនទទួលយើងទេ។ ដូច្នេះ បើខ្ញុំមក ខ្ញុំនឹងនឹកចាំពីការដែលអ្នកនោះធ្វើ ដោយគាត់ពោលពាក្យអាក្រក់ និយាយដើមយើង»។ (៣យ៉ូន. ៩, ១០) ស្ថានការណ៍នោះផ្ដល់មេរៀនល្អសម្រាប់យើងនៅសព្វថ្ងៃនេះផងដែរ។ បើយើងឃើញថា ខ្លួនមានទំនោរចិត្តទោរទន់ទៅរកមហិច្ឆតា គប្បីណាស់ឲ្យយើងយកឈ្នះលើទំនោរចិត្តបែបនោះភ្លាម។ គម្ពីរចែងថា៖ «សេចក្ដីឆ្មើងឆ្មៃនាំមុខសេចក្ដីហិនវិនាស ហើយចិត្តព្រហើន[ឬ«ចិត្តក្រអឺតក្រទម»]ក៏នាំឲ្យដួលចុះដែរ»។ អស់អ្នកដែលគោរពព្រះយេហូវ៉ាជាអ្នកមានសិទ្ធិកាន់អំណាច ត្រូវតែទប់ទល់នឹងចិត្តអំណួត ក្រែងលោខ្លួនធ្វើអ្វីដែលនាំឲ្យអាម៉ាស់ខ្មាសវិញ។—សុ. ១១:២; ១៦:១៨; ព.ថ.
១៨. តើអ្វីនឹងជួយឲ្យយើងគោរពព្រះយេហូវ៉ាជាអ្នកមានសិទ្ធិកាន់អំណាច?
១៨ ត្រូវមែន! ចូរឲ្យយើងតាំងចិត្តដើម្បីទប់ទល់នឹងទស្សនៈរបស់ពិភពលោកនេះដែលមានស្មារតីប្រកាន់យកតែគំនិតខ្លួនឯង ហើយចូរឲ្យយើងគោរពព្រះយេហូវ៉ាជាអ្នកមានសិទ្ធិកាន់អំណាចចុះ! ចូរឲ្យយើងបង្ហាញអំណរគុណចំពោះព្រះយេហូវ៉ាដោយរំពឹងគិតម្ដងម្កាលពីឯកសិទ្ធិដ៏អស្ចារ្យរបស់ខ្លួនជាអ្នកបម្រើទ្រង់។ ដោយសារយើងបានរួមចំណែកជាមួយនឹងរាស្ត្ររបស់ព្រះយេហូវ៉ា នេះបង្ហាញថាទ្រង់បានទាញនាំយើងតាមរយៈសកម្មពលបរិសុទ្ធរបស់ទ្រង់ ដើម្បីមានចំណងមិត្តភាពជាមួយនឹងទ្រង់។ (យ៉ូន. ៦:៤៤) កុំឲ្យយើងចាត់ទុកចំណងមិត្តភាពដ៏ពិសេសនេះជាការធម្មតាឡើយ! ចូរឲ្យរបៀបរស់នៅរបស់ខ្លួនសឲ្យឃើញថា យើងបដិសេធទាំងស្រុងស្មារតីប្រកាន់យកតែគំនិតខ្លួនឯង ហើយបង្ហាញថាយើងជាអ្នកដែលគោរពព្រះយេហូវ៉ាជាអ្នកមានសិទ្ធិកាន់អំណាច។
តើអ្នកនៅចាំទេ?
• តើការគោរពព្រះយេហូវ៉ាជាអ្នកមានសិទ្ធិកាន់អំណាចរួមបញ្ចូលអ្វីខ្លះ?
• ពេលរៀនឲ្យចេះវែកញែក តើនេះជួយឲ្យយើងគោរពព្រះយេហូវ៉ាជាអ្នកមានសិទ្ធិកាន់អំណាចយ៉ាងដូចម្ដេច?
• តើសាតាំងព្យាយាមបង្អាប់កិត្ដិយសព្រះយេហូវ៉ាជាអ្នកមានសិទ្ធិកាន់អំណាចដោយរបៀបណាខ្លះ?
• ក្នុងការគោរពព្រះយេហូវ៉ាជាអ្នកមានសិទ្ធិកាន់អំណាច តើចិត្តរាបទាបមានសារៈសំខាន់ប៉ុណ្ណា?
[រូបភាពនៅទំព័រ២០]
‹យើងត្រូវតែស្ដាប់បង្គាប់ព្រះជាជាងមនុស្ស›
[រូបភាពនៅទំព័រ២១]
យើងតែងតែទទួលប្រយោជន៍ ពេលធ្វើតាមគោលការណ៍របស់ព្រះយេហូវ៉ា