ផែនដីមនោរមជិតណាស់ហើយ!
«ឱព្រះវរបិតានៃយើងខ្ញុំ ដែលគង់នៅស្ថានសួគ៌អើយ សូមឲ្យព្រះនាមទ្រង់បានបរិសុទ្ធ។ សូមឲ្យរាជ្យទ្រង់បានមកដល់ សូមឲ្យព្រះហឫទ័យទ្រង់បានសំរេចនៅផែនដី ដូចនៅស្ថានសួគ៌ដែរ»។—ម៉ាថាយ ៦:៩, ១០
ការអធិដ្ឋានដ៏ល្បីនេះ ដែលភាគច្រើនគេស្គាល់ថាជាការអធិដ្ឋានរបស់ព្រះអម្ចាស់ នោះផ្ដល់សេចក្ដីសង្ឃឹមដល់មនុស្សជាតិ។ ហេតុអ្វីបានជាដូច្នេះ?
ការអធិដ្ឋានរបស់ព្រះអម្ចាស់បង្ហាញឲ្យឃើញថារាជាណាចក្ររបស់ព្រះ នឹងធ្វើឲ្យព្រះហឫទ័យ ឬបំណងប្រាថ្នារបស់ព្រះបានសម្រេចនៅផែនដីដូចនៅស្ថានសួគ៌ដែរ។ ហើយនេះជាបំណងប្រាថ្នារបស់ព្រះគឺធ្វើផែនដីឲ្យទៅជាសួនមនោរមឡើងវិញ។ (វិវរណៈ ២១:១-៥) តើរាជាណាចក្ររបស់ព្រះជាអ្វីទៅ? តើនឹងរៀបចំផែនដីឡើងវិញឲ្យទៅជាសួនមនោរមយ៉ាងដូចម្ដេច?
រដ្ឋាភិបាលពិតប្រាកដមួយ
រាជាណាចក្ររបស់ព្រះជារដ្ឋាភិបាលពិតប្រាកដមួយ។ ដើម្បីឲ្យរដ្ឋាភិបាលមួយមានដំណើរការបាន នោះត្រូវតែមានអ្នកគ្រប់គ្រង មានមាត្រាច្បាប់ និងមានរាស្ត្រផង។ តើរាជាណាចក្ររបស់ព្រះបំពេញតាមតម្រូវការនេះទេ? សូមកត់សម្គាល់ចម្លើយពីគម្ពីរចំពោះសំណួរបីយ៉ាងដូចខាងក្រោមនេះ:
តើអ្នកណាជាអ្នកគ្រប់គ្រងក្នុងរាជាណាចក្ររបស់ព្រះ? (អេសាយ ៣៣:២២) ព្រះយេហូវ៉ាបានតែងតាំងបុត្ររបស់ទ្រង់ ពោលគឺព្រះយេស៊ូគ្រិស្ត ឲ្យគ្រប់គ្រងក្នុងរាជាណាចក្រព្រះ។ (ម៉ាថាយ ២៨:១៨) ក្រោមការដឹកនាំរបស់ព្រះយេហូវ៉ា ព្រះយេស៊ូបានជ្រើសរើសមនុស្សមួយចំនួនពី«គ្រប់ទាំងពូជមនុស្ស គ្រប់ភាសា គ្រប់នគរ ហើយពីគ្រប់ទាំងសាសន៍»ដែលនឹងគ្រប់គ្រងជាមួយទ្រង់ជាស្តេច«សោយរាជ្យ[មក]លើផែនដី»។—វិវរណៈ ៥:៩, ១០
តើរាជាណាចក្ររបស់ព្រះរៀបចំឲ្យមានមាត្រាច្បាប់អ្វីខ្លះសម្រាប់រាស្ត្ររបស់ទ្រង់? មាត្រាច្បាប់ខ្លះឬសេចក្ដីបង្គាប់យ៉ាងចំៗតម្រូវឲ្យរាស្ត្ររបស់ព្រះប្រព្រឹត្តតាម។ ក្នុងចំណោមមាត្រាច្បាប់ទាំងនោះ ព្រះយេស៊ូបានសម្គាល់មាត្រាច្បាប់ដ៏សំខាន់បំផុតដោយមានប្រសាសន៍ថា៖ «‹ត្រូវឲ្យស្រឡាញ់ព្រះអម្ចាស់ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង› នេះជាបញ្ញត្តយ៉ាងសំខាន់ទី១។ ហើយបញ្ញត្តទី២ក៏បែបដូចគ្នា គឺថា ‹ត្រូវឲ្យស្រឡាញ់អ្នកជិតខាងដូចខ្លួនឯង›»។—ម៉ាថាយ ២២:៣៧-៣៩
មាត្រាច្បាប់ខ្លះទៀតតម្រូវឲ្យរាស្ត្រនៃរាជាណាចក្ររបស់ព្រះជៀសវាងពីអំពើខ្លះៗ។ ជាឧទាហរណ៍ គម្ពីរចែងយ៉ាងច្បាស់ថា៖ «សូមបងប្អូនកុំយល់ច្រឡំអោយសោះ អស់អ្នកដែលប្រព្រឹត្តអំពើប្រាសចាកសីលធម៌ ពួកថ្វាយបង្គំព្រះក្លែងក្លាយ ពួកមានសហាយស្មន់ ពួកជនពាល ពួកអ្នករួមសង្វាសនឹងភេទដូចគ្នា ពួកចោរប្លន់ ពួកលោភលន់ចង់បានទ្រព្យគេ ពួកប្រមឹក ពួកជេរប្រមាថ ពួកប្លន់យកទ្រព្យគេ ពុំអាចទទួលព្រះរាជ្យរបស់ព្រះជាម្ចាស់ទុកជាមត៌កបានឡើយ»។—កូរិនថូសទី១ ៦:៩, ១០, ខ.ស.
តើអ្នកណាជារាស្ត្រនៃរាជាណាចក្ររបស់ព្រះ? ព្រះយេស៊ូប្រដូចរាស្ត្រនៃរាជាណាចក្ររបស់ព្រះទៅនឹងសត្វចៀម។ ទ្រង់មានប្រសាសន៍ថា៖ «វានឹងស្ដាប់តាមសំឡេងខ្ញុំ នោះនឹងមានហ្វូងតែ១ នឹងអ្នកគង្វាលតែ១វិញ»។ (យ៉ូហាន ១០:១៦) ដើម្បីជារាស្ត្រនៃរាជាណាចក្ររបស់ព្រះ បុគ្គលម្នាក់មិនគ្រាន់តែនិយាយថាគាត់ដើរតាមព្រះយេស៊ូដែលជាអ្នកគង្វាលដ៏ល្អប៉ុណ្ណោះទេ ក៏ប៉ុន្តែ ធ្វើតាមសេចក្ដីបង្គាប់របស់ទ្រង់ដែរ។ ព្រះយេស៊ូមានប្រសាសន៍ថា៖ «មិនមែនអស់អ្នកណាដែលគ្រាន់តែនិយាយមកខ្ញុំថា ‹ឱព្រះអម្ចាស់ៗអើយ› ដែលនឹងចូលទៅក្នុងនគរស្ថានសួគ៌នោះទេ គឺជាអស់អ្នកដែលធ្វើតាមព្រះហឫទ័យនៃព្រះវរបិតា ដែលគង់នៅស្ថានសួគ៌វិញទេតើ»។—ម៉ាថាយ ៧:២១
ដូច្នេះហើយ អស់អ្នកដែលជារាស្ត្រនៃរាជាណាចក្ររបស់ព្រះប្រើនិងលើកតម្កើងនាមព្រះយេហូវ៉ាដូចព្រះយេស៊ូបានធ្វើដែរ។ (យ៉ូហាន ១៧:២៦) ពួកគាត់ធ្វើតាមសេចក្ដីបង្គាប់របស់ព្រះយេស៊ូដើម្បីបង្រៀនអ្នកឯទៀតអំពី«ដំណឹងល្អនេះដែលសំដែងពីនគរ»ឬរាជាណាចក្ររបស់ព្រះ។ (ម៉ាថាយ ២៤:១៤; ២៨:១៩, ២០) ពួកគាត់ក៏បង្ហាញសេចក្ដីស្រឡាញ់ពិតចំពោះគ្នាទៅវិញទៅមកដែរ។—យ៉ូហាន ១៣:៣៥
ព្រះនឹង«បំផ្លាញពួកអ្នកដែលបង្ខូចផែនដី»
ស្ថានភាពពិភពលោកបច្ចុប្បន្ននេះបញ្ជាក់ឲ្យឃើញថា រាជាណាចក្ររបស់ព្រះនឹងនាំមកនូវការផ្លាស់ប្ដូរដែលគួរឲ្យកត់សម្គាល់ក្នុងពេលឆាប់ៗខាងមុខនេះនៅផែនដី។ តើយើងដឹងដោយរបៀបណា? តាំងពី២.០០០ឆ្នាំមុនមកម្ល៉េះ ព្រះយេស៊ូបានរៀបរាប់ពីទីសម្គាល់ដែលចែកជាច្រើនផ្នែកដើម្បីបញ្ជាក់ថា «នគរព្រះជិតដល់ហើយ»។ (លូកា ២១:៣១) ដូចបានបង្ហាញនៅអត្ថបទមុន យើងមើលឃើញផ្នែកផ្សេងៗនៃទីសម្គាល់នោះកាន់តែច្បាស់នៅទូទាំងពិភពលោក។
តើអ្វីនឹងកើតឡើងជាបន្ទាប់? ព្រះយេស៊ូឆ្លើយថា៖ «នៅគ្រានោះ នឹងមានសេចក្ដីវេទនាជាខ្លាំងណាស់ ដល់ម្ល៉េះបានជាតាំងពីដើមកំណើតលោកីយ ដរាបមកដល់សព្វថ្ងៃនេះ មិនដែលមានយ៉ាងដូច្នោះឡើយ ហើយទៅមុខក៏មិនដែលមានដែរ»។ (ម៉ាថាយ ២៤:២១) នេះមិនមែនជាអ្វីដែលមនុស្សអាចបណ្ដាលឲ្យកើតឡើងបានឡើយ។ គឺជាព្រះទេដែលនឹង«បំផ្លាញពួកអ្នកដែលបង្ខូចផែនដី»។ (វិវរណៈ ១១:១៨) មនុស្សអាក្រក់ដោយសារគិតតែពីប្រយោជន៍ផ្ទាល់ខ្លួន បានធ្វើឲ្យផែនដីខូចស្ទើរតែអស់ ហេតុនេះហើយពួកគេ«នឹងត្រូវកាត់ឲ្យសូន្យចេញពីផែនដីវិញ»។ ក៏ប៉ុន្តែ មនុស្សគ្មានទោសដែលបម្រើព្រះ«នឹងបាននៅជាប់»នៅផែនដីទៅវិញ។—សុភាសិត ២:២១, ២២
ព្រះយេហូវ៉ាមានមូលហេតុត្រឹមត្រូវក្នុងការប្រព្រឹត្តយ៉ាងម៉ឺងម៉ាត់ដូច្នេះ។ ហេតុអ្វី? សូមពិនិត្យការប្រៀបធៀបដូចតទៅនេះ។ សូមស្រមៃគិតថា អ្នកមានអគារដែលមានផ្ទះល្វែងតូចៗមួយចំនួន។ អ្នកជួលខ្លះមានចរិតល្អហើយគួរឲ្យសរសើរ ពួកគេបង់ថ្លៃឈ្នួលផ្ទះនិងថែរក្សាផ្ទះបានយ៉ាងល្អផង។ យ៉ាងណាក៏ដោយ អ្នកជួលផ្ទះខ្លះទៀតចូលចិត្តឆាឆៅគេហើយគិតតែពីខ្លួនឯង។ ពួកគេមិនព្រមបង់ថ្លៃឈ្នួលផ្ទះ ហើយបង្ខូចផ្ទះល្វែងនោះដែរ។ ទោះជាមានការព្រមានច្រើនដងហើយក្ដី ពួកគេនៅតែប្រព្រឹត្តអាក្រក់បែបយ៉ាងនេះដដែល។ តើអ្នកនឹងធ្វើយ៉ាងណា? ក្នុងនាមជាម្ចាស់នៃផ្ទះឈ្នួល អ្នកច្បាស់ជាដេញពួកអាក្រក់ទាំងនោះឲ្យចេញជាក់ជាមិនខាន។
ស្រដៀងគ្នាដែរ ព្រះយេហូវ៉ាជាព្រះដែលបានបង្កើតផែនដីនិងរបស់សព្វសារពើទាំងអស់ មានសិទ្ធដើម្បីសម្រេចថាអ្នកណាទ្រង់នឹងអនុញ្ញាតឲ្យរស់នៅផែនដី។ (វិវរណៈ ៤:១១) ព្រះយេហូវ៉ាបានប្រកាសថាគោលបំណងរបស់ទ្រង់គឺកាត់ចេញមនុស្សអាក្រក់ដែលធ្វើព្រងើយកន្តើយនិងបំពានសិទ្ធអ្នកដទៃពីផែនដី។—ទំនុកដំកើង ៣៧:៩-១១
សួនមនោរមនឹងត្រូវស្ថាបនាឡើងវិញ
រាជាណាចក្ររបស់ព្រះដែលមានព្រះយេស៊ូដឹកនាំ នឹងគ្រប់គ្រងលើផែនដីក្នុងពេលឆាប់ៗនេះ។ ព្រះយេស៊ូហៅការចាប់ផ្ដើមថ្មីនេះជា«គ្រាកែជាថ្មីឡើងវិញ»។ (ម៉ាថាយ ១៩:២៨) តើនឹងមានស្ថានភាពបែបណា? សូមកត់សម្គាល់សេចក្ដីសន្យាដូចខាងក្រោមនេះ:
ទំនុកដំកើង ៤៦:៩។ «ទ្រង់បណ្ដាលឲ្យការសង្គ្រាមស្ងប់រំងាប់ រហូតដល់ចុងផែនដី»។
អេសាយ ៣៥:១។ «ទីរហោស្ថាន ហើយទីហួតហែង នឹងមានសេចក្ដីអំណរ ឯសមុទ្រខ្សាច់នឹងរីករាយ ហើយផ្កាឡើងដូចជាកុឡាប»។
អេសាយ ៦៥:២១-២៣។ «ពួករើសតាំងរបស់អញនឹងប្រើប្រាស់ការដែលដៃគេធ្វើជាយឺនយូរទៅ។ គេនឹងមិនខំធ្វើជាឥតប្រយោជន៍ ឬបង្កើតមកឲ្យតែបានត្រូវវិនាសទៅនោះឡើយ»។
យ៉ូហាន ៥:២៨, ២៩។ «ដ្បិតមានពេលវេលាមក ដែលអស់ទាំងខ្មោចនៅក្នុងផ្នូរ នឹងឮសំឡេង[ព្រះយេស៊ូ] ហើយនឹងចេញមក»។
វិវរណៈ ២១:៤។ «ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ»។
មូលហេតុដែលគួរឲ្យជឿ
តើអ្នកជឿសេចក្ដីសន្យាទំនាយដែលមានក្នុងគម្ពីរទេ? គម្ពីរបានទាយទុកជាមុនថាមនុស្សជាច្រើនមិនជឿទេ។ គម្ពីរចែងថា៖ «នៅជាន់ក្រោយ នឹងមានមនុស្សចំអកមក ដែលគេដើរតាមសេចក្ដីប៉ងប្រាថ្នារបស់គេ . . . ថា៖ ‹តើសេចក្ដីសន្យាពីព្រះអង្គយាងមកនៅឯណា? ដ្បិតតាំងពីពួកឰយុកោដេកលក់ទៅ នោះគ្រប់ទាំងអស់នៅតែដដែល ដូចជាពីកំណើតលោកីយរៀងមកដែរ›»។ (ពេត្រុសទី២ ៣:៣, ៤) ប៉ុន្តែមនុស្សចំអកទាំងនោះយល់ច្រឡំធំហើយ។ សូមពិចារណាពីមូលហេតុតែបួនប៉ុណ្ណោះដែលអ្នកអាចជឿទៅលើអ្វីដែលគម្ពីរបានចែង:
(១) ព្រះធ្លាប់ចាត់វិធានការដើម្បីបំផ្លាញមនុស្សអាក្រក់នៅសម័យបុរាណ។ ទឹកជំនន់សម័យលោកណូអេជាទីសំអាងដ៏ជាក់ស្តែងមួយ។—ពេត្រុសទី២ ៣:៥-៧
(២) បណ្ដាំរបស់ព្រះបានទាយទុកជាមុនយ៉ាងត្រឹមត្រូវពីស្ថានភាពបច្ចុប្បន្ននៃពិភពលោកនេះ។
(៣) អ្វីៗទាំងអស់មិនមែន«នៅតែដដែល ដូចជាពីកំណើតលោកីយរៀងមក»ទេ។ តាមរបៀបដែលមិនធ្លាប់មានតាំងពីមុនមកទេ ផែនដីទទួលរងគ្រោះដោយបញ្ហាសង្គម សីលធម៌ និងការខូចខាតបរិស្ថាន។
(៤) ឥឡូវ‹ដំណឹងល្អដែលសំដែងពីនគរ›ត្រូវបានផ្សព្វផ្សាយនៅទូទាំងផែនដី ហើយនេះជាសញ្ញាបញ្ជាក់ប្រាប់ថាទីបញ្ចប់ឬ«ចុងបំផុត»គឺជិតដល់ហើយ។—ម៉ាថាយ ២៤:១៤
សាក្សីព្រះយេហូវ៉ាអញ្ជើញលោកអ្នកឲ្យសិក្សាបណ្ដាំរបស់ព្រះដែលមានក្នុងគម្ពីរជាមួយពួកគេ។ ធ្វើដូចនេះអ្នកអាចរៀនច្រើនថែមទៀតអំពីសេចក្ដីសង្ឃឹមពីជីវិតដែលគ្មានទីបញ្ចប់ក្រោមការគ្រប់គ្រងនៃរាជាណាចក្ររបស់ព្រះ។ (យ៉ូហាន ១៧:៣) ពិតមែន! មនុស្សជាតិអាចមានអនាគតដ៏អស្ចារ្យមែន។ គ្រាដ៏ល្អបំផុតខិតជិតណាស់ហើយ! តើអ្នកនឹងរួមចំណែកក្នុងអនាគតនេះទេ?
[ឃ្លាអក្សរធំនៅទំព័រ៧]
អស់អ្នកដែលនិយាយថាអ្វីៗនឹងនៅតែដដែលដូចពីមុន នោះពិតជាច្រឡំធំហើយ
[រូបភាពនៅទំព័រ៨]
តើអ្នកនឹងខំប្រឹងឲ្យបានអនាគតដ៏ល្អបែបនេះទេ?