ជំនឿដែលមានជាទូទៅ
«ខ្ញុំធ្លាប់មានសុបិនអាក្រក់ថាខ្លួនកំពុងតែឆេះក្នុងស្ថាននរក! ខ្ញុំបានយល់សប្ដិឃើញថាគេទម្លាក់ខ្ញុំចូលទៅក្នុងកន្លែងដែលមានភ្លើងឆេះក្រហមឆ្អិនឆ្អៅមួយ ហើយភ្ញាក់ឡើងខ្ញុំក៏ស្រែកយ៉ាងខ្លាំង។ ហេតុនេះហើយ ខ្ញុំខំប្រឹងខ្នះខ្នែងមិនធ្វើអំពើខុសឆ្គងទេ»។—អាលីន
តើអ្នកជឿថា ស្ថាននរកជាកន្លែងសម្រាប់ធ្វើទារុណកម្មមនុស្សដែលធ្វើអំពើខុសឆ្គងទេ? មនុស្សជាច្រើនជឿដូច្នេះមែន។ ជាឧទាហរណ៍ នៅឆ្នាំ២០០៥ បណ្ឌិតម្នាក់ពីសកលវិទ្យាល័យមួយនៅប្រទេសស្កុតឡង់ បានធ្វើការស្ទង់មតិបព្វជិតមួយចំនួនក្នុងប្រទេសរបស់គាត់ស្តីអំពីជំនឿនេះ។ គាត់បានរកឃើញថា មួយភាគបីជឿថាអស់អ្នកដែលផ្ដាច់ខ្លួនចេញពីព្រះនឹងរងទុក្ខ«ការឈឺចាប់យ៉ាងខ្លាំងខាងសតិក្នុងស្ថាននរក»។ មួយភាគប្រាំបានជឿថា អស់អ្នកដែលនៅក្នុងស្ថាននរកនឹងរងទុក្ខការឈឺចាប់ខាងរាងកាយ (University of St. Andrews)។
ជំនឿទៅលើស្ថាននរកមានជាទូទៅក្នុងប្រទេសជាច្រើន។ ជាឧទាហរណ៍ នៅសហរដ្ឋអាម៉េរិក មានការស្ទង់មតិមួយនៅឆ្នាំ២០០៧ដែលបានយល់ឃើញថា ៧០ភាគរយនៃមនុស្សដែលត្រូវបានស្ទង់មតិនោះ ជឿថាមានស្ថាននរក។ សូម្បីតែនៅប្រទេសដែលមនុស្សមិនសូវចាប់អារម្មណ៍នឹងរឿងសាសនាក្ដី ក៏នៅតែមានមនុស្សជឿទៅលើស្ថាននរកដែរ។ ការស្ទង់មតិមួយនៅប្រទេសកាណាដានាឆ្នាំ២០០៤ បានរកឃើញថា ៤២ភាគរយនៃបណ្ដាជនជឿថាមានស្ថាននរក។ ណាមួយទៀត នៅប្រទេសអង់គ្លេស ៣២ភាគរយជឿថាមានស្ថាននរកពិតប្រាកដមែន។
សេចក្ដីបង្រៀនរបស់ពិភពគ្រិស្តសាសនា
បព្វជិតជាច្រើននាក់ក្នុងពិភពគ្រិស្តសាសនាបានឈប់បង្រៀនថា ស្ថាននរកជាកន្លែងទារុណកម្មក្នុងភ្លើងមែនទែនហើយ។ ផ្ទុយទៅវិញ ពួកគាត់គាំទ្រអត្ថន័យដែលស្រដៀងនឹងការពន្យល់ក្នុងសៀវភៅបុច្ឆានិងវិសជ្ជនានៃសាសនាកាតូលិក ដែលត្រូវបានបោះពុម្ពនៅឆ្នាំ១៩៩៤។ សៀវភៅនោះបានពន្យល់ថា៖ «ទណ្ឌកម្មដ៏ចម្បងនៃស្ថាននរក គឺការផ្ដាច់ចេញពីព្រះជារៀងរហូត»។
ទោះបីជាយ៉ាងណាក៏ដោយ មនុស្សជាច្រើននៅតែជឿថា ស្ថាននរកជាកន្លែងរងទុក្ខការឈឺចាប់ខាងសតិ ឬខាងរាងកាយ។ អស់អ្នកដែលបង្រៀនលទ្ធិនេះអះអាងថា គឺជាសេចក្ដីបង្រៀនដែលមានមូលដ្ឋានលើគម្ពីរ។ ប្រធានសាសនាម្នាក់ (លោក R. Albert Mohler) បានពន្យល់អំពីជំនឿរបស់ខ្លួនថា៖ «បទគម្ពីរបានគាំទ្រសេចក្ដីបង្រៀនអំពីស្ថាននរក» (Southern Baptist Theological Seminary)។
អ្វីដែលអ្នកជឿ ម្ដេចក៏សំខាន់ម្ល៉េះ?
ប្រសិនបើស្ថាននរកពិតជាកន្លែងរងទុក្ខការឈឺចាប់មែន នោះគប្បីណាស់ឲ្យអ្នកភ័យខ្លាច។ ក៏ប៉ុន្តែ បើនេះជាសេចក្ដីបង្រៀនមិនពិត នោះអ្នកដឹកនាំសាសនានាំឲ្យមានការភាន់ច្រឡំ និងបង្កឲ្យមានការភ័យខ្លាចដែលមិនគួរមាន ដល់អ្នកដែលជឿលទ្ធិនោះ។ ម្យ៉ាងទៀត ពួកគេក៏បង្ខូចដល់កេរ្ដិ៍ឈ្មោះរបស់ព្រះផងដែរ។
តើគម្ពីរដែលជាបណ្ដាំរបស់ព្រះពន្យល់យ៉ាងណាអំពីរឿងនេះ? ក្នុងអត្ថបទជាបន្តបន្ទាប់ យើងនឹងយកសេចក្ដីបកប្រែពីគម្ពីរផ្សេងៗជាមូលដ្ឋានដើម្បីឆ្លើយសំណួរបីយ៉ាងដែលមានដូចតទៅនេះ: (១) តើពិតជាមានអ្វីកើតឡើងដល់មនុស្សពេលដែលស្លាប់? (២) តើព្រះយេស៊ូបានបង្រៀនអ្វីស្តីអំពីស្ថាននរក? (៣) តើការរៀនសេចក្ដីពិតអំពីស្ថាននរក អាចមានឥទ្ធិពលទៅលើអ្នកយ៉ាងដូចម្ដេច?