គន្លឹះសុភមង្គលគ្រួសារ
តើគួរធ្វើយ៉ាងណាពេលជំពាក់បំណុល?
យ៉ាននីសaបានរៀបរាប់ថា៖«ពេលដែលមានវិបត្តិសេដ្ឋកិច្ចនៅប្រទេសក្រិច មុខជំនួញរបស់ខ្ញុំបានក្ស័យធន។ ដូច្នេះ យើងមិនអាចបន្តបង់រំលស់ផ្ទះរបស់យើង និងបង់សម្រាប់កាតឥណទានទេ។ នេះធ្វើឲ្យខ្ញុំតានតឹងចិត្តរហូតដល់គេងមិនលក់»។
ខាតារីណាបានរៀបរាប់ថា៖«យើងពិបាកទទួលយកណាស់ ពេលគិតថាយើងនឹងបាត់បង់ផ្ទះជាទីស្រឡាញ់នេះ ពីព្រោះយើងខំចាប់ដៃគ្នាសាងវាឡើង។ ដោយសារយើងមិនដឹងថាត្រូវដោះបំណុលតាមរបៀបណា យ៉ាននីសនិងខ្ញុំតែងតែឈ្លោះប្រកែកគ្នា»។
បំណុលអាចធ្វើឲ្យក្រុមគ្រួសារប្រះឆា ឬរហូតដល់បំផ្លាញក្រុមគ្រួសារទៀតផង។ ជាឧទាហរណ៍ អ្នកស្រាវជ្រាវម្នាក់ឈ្មោះចេហ្វ្រី ឌូ បានឃើញថាគូប្ដីប្រពន្ធដែលជាប់បំណុល ច្រើនតែមិនសូវចំណាយពេលមួយគ្នា មិនសូវមានសុភមង្គល និងឧស្សាហ៍ឈ្លោះគ្នា។ បើប្រៀបធៀបជម្លោះដែលមាននៅក្នុងក្រុមគ្រួសារ ការឈ្លោះគ្នារឿងលុយនិងបំណុលគឺមានច្រើននិងអូសបន្លាយយូរជាងគេ។ រឿងនេះក៏នាំឲ្យមានការស្រែកគំហក ការវាយដំ និងរាលដាលដល់រឿងផ្សេងទៀតផង។ ដូច្នេះហើយ គ្មានអ្វីចម្លែកទេដែលគូប្ដីប្រពន្ធជាច្រើននៅសហរដ្ឋអាម៉េរិក បានលែងលះគ្នាដោយសាររឿងលុយកាក់។
ការជំពាក់បំណុលវ័ណ្ឌក ក៏នាំឲ្យមានបញ្ហាសុខភាពដូចជា ជំងឺដេកមិនលក់ ឈឺក្បាលជាប្រចាំ ជំងឺក្រពះ គាំងបេះដូង និងជំងឺបាក់ទឹកចិត្ត។ ប្រពន្ធម្នាក់ឈ្មោះម៉ាថាបានរៀបរាប់ថា៖«លូអីសប្ដីរបស់ខ្ញុំបានតានតឹងចិត្តយ៉ាងខ្លាំងដោយសារតែបំណុល ហើយគាត់មិនចង់ធ្វើអ្វីទាល់តែសោះ គិតតែពីដេកតែប៉ុណ្ណោះ។ បុរសដែលខ្ញុំធ្លាប់តែពឹងពាក់បាន បែរទៅជាបុរសដែលឥតបានការទៅវិញ»។ អ្នកខ្លះតានតឹងចិត្តរហូតដល់ទ្រាំលែងបាន។ ជាឧទាហរណ៍ សារព័ត៌មានBBCបានរាយការណ៍ថា ប្រពន្ធម្នាក់ដែលរស់នៅភាគខាងត្បូងឆៀងខាងកើតនៃប្រទេសឥណ្ឌាបានសម្លាប់ខ្លួន ដោយសារគ្មានលទ្ធភាពសង់បំណុលគេ។ គាត់បានខ្ចីលុយគេបើសរុបជាទឹកប្រាក់ស្មើនឹង៨៤០ដុល្លារអាម៉េរិកដើម្បីបង់ថ្លៃព្យាបាលកូនរបស់គាត់។
ចុះបើក្នុងករណីក្រុមគ្រួសាររបស់អ្នកកំពុងតានតឹងចិត្តដោយសារជំពាក់បំណុល? តើអ្នកគួរធ្វើយ៉ាងណា? សូមគិតពិចារណាអំពីការពិបាកមួយចំនួនដែលគូប្ដីប្រពន្ធជាច្រើនកំពុងជួប ហើយសូមមើលថាគោលការណ៍គម្ពីរអាចជួយអ្នកឲ្យប្រឈមមុខបញ្ហាដូចនោះយ៉ាងដូចម្ដេច។
ការពិបាកទី១: ទម្លាក់កំហុសដាក់គ្នា។
ប្ដីម្នាក់បានរៀបរាប់ថា៖«ខ្ញុំបន្ទោសប្រពន្ធខ្ញុំថា ចេះតែចាយខ្ជះខ្ជាយ ហើយប្រពន្ធខ្ញុំចោទខ្ញុំវិញថាមកពីបងគ្មានការងារល្អទើបគ្មានលុយចាយគ្រប់គ្រាន់»។ តើប្ដីប្រពន្ធអាចធ្វើយ៉ាងណាដើម្បីកុំឲ្យបំណុលធ្វើឲ្យពួកគេបែកបាក់គ្នា?
ដំណោះស្រាយ៖ សហការគ្នាដើម្បីដោះបំណុល។
គឺគ្មានប្រយោជន៍ទេ បើអ្នករវល់តែខឹងនឹងគូរបស់ខ្លួន ទោះបីជាអ្នកមិនបានខ្ចីគេក៏ដោយ។ ប៉ុន្តែ ឥឡូវបើជ្រុលតែជំពាក់បំណុលគេទៅហើយ សូមធ្វើតាមឱវាទក្នុងគម្ពីរនៅអេភេសូរ ៤:៣១ដែលថា៖«ចូរអ្នករាល់គ្នាបោះបង់ចោលគំនុំ កំហឹង ចិត្តក្ដៅក្រហាយ ការស្រែកគំហក និងពាក្យប្រមាថមើលងាយ រួមទាំងសេចក្ដីអាក្រក់គ្រប់យ៉ាង»។
សហការគ្នាដើម្បីដោះបំណុល។ ប្ដីម្នាក់ឈ្មោះស្ទេបផាណូស បានប្រាប់អំពីរបៀបដែលគាត់និងប្រពន្ធរបស់គាត់បានសហការគ្នា គឺដោយ«ចាត់ទុកបំណុលជាសត្រូវ មិនមែនគូរបស់ខ្លួនទេ»។ គាត់ក៏ធ្វើតាមសុភាសិត ១៣:១០ ដែលថា៖«មនុស្សព្រហើនបង្កឲ្យមានតែការទាស់ទែង ប៉ុន្តែ អស់អ្នកដែលមានប្រាជ្ញារមែងស្វែងរកដំបូន្មាន»។ ជាជាងព្យាយាមដោះស្រាយបញ្ហានោះតែម្នាក់ឯង គាត់ពិគ្រោះយោបល់ជាមួយក្រុមគ្រួសារ ហើយព្យាយាមដោះស្រាយបញ្ហានោះជាមួយគ្នា។
កូនរបស់អ្នកក៏អាចរួមចំណែកជួយដែរ។ ឪពុកម្នាក់ឈ្មោះអេហ្គាដូ នៅអាហ្សង់ទីនបានប្រាប់អំពីបទពិសោធន៍របស់ក្រុមគ្រួសារគាត់។ គាត់បានរៀបរាប់ថា៖«កូនប្រុសរបស់យើងចង់បានកង់ថ្មីមួយ តែយើងបានប្រាប់គាត់អំពីមូលហេតុដែលយើងគ្មានលទ្ធភាពទិញ ហើយយើងបានឲ្យកង់ដែលជីតារបស់គាត់ធ្លាប់ប្រើឲ្យទៅគាត់។ គាត់ពិតជាចូលចិត្តជិះកង់នោះណាស់។ ខ្ញុំរៀនថាគឺជាការសំខាន់ដែលសមាជិកក្រុមគ្រួសារទាំងអស់សហការគ្នា»។
សូមសាកធ្វើតាមយោបល់នេះ៖ សូមរកពេលនិយាយជាមួយគ្នាអំពីបំណុលដោយមិនច្រឡោតខឹង និងដោយអស់ពីចិត្ត។ បើនរណាម្នាក់ធ្វើខុស សូមទទួលស្គាល់កំហុសនោះ ហើយកុំរំលឹករឿងដែលកន្លងហួស។ ផ្ទុយទៅវិញ សូមព្យាយាមធ្វើតាមគោលការណ៍គម្ពីរបើត្រូវសម្រេចចិត្តរឿងលុយកាក់នៅលើកក្រោយ។—ចម្រៀងសរសើរព្រះ ៣៧:២១; លូកា ១២:១៥
ការពិបាកទី២: ការសងបំណុលដែលមើលទៅមិនអាចទៅរួច។
អេនរីកេរៀបរាប់ថា៖«ខ្ញុំបានជំពាក់បំណុលជាច្រើន ដោយសារតែមុខជំនួញ ហើយពិបាកជាងនោះទៅទៀត ក៏មានបញ្ហាសេដ្ឋកិច្ចនៅប្រទេសអាហ្សង់ទីនដែរ។ ក្រោយមក ប្រពន្ធរបស់ខ្ញុំត្រូវវះកាត់។ ខ្ញុំមានអារម្មណ៍ថាខ្ញុំមិនអាចសងបំណុលគេអស់ទេ គឺប្រៀបដូចជាខ្ញុំជាប់សំណាញ់ពីងពាងអ៊ីចឹង រើទៅណាមិនរួចឡើយ»។ បុរសម្នាក់ទៀតឈ្មោះរ៉ូបឺតតូនៅប្រទេសប្រេស៊ីល បានបាត់បង់លុយសន្សំរបស់គាត់អស់រលីង ដោយសារតែត្រូវគេបោកក្នុងមុខជំនួញ ហើយក៏ត្រូវជំពាក់លុយធនាគារអស់១២កន្លែងដែរ។ គាត់ប្រាប់ថា៖«ខ្ញុំខ្មាសរហូតដល់មិនហ៊ានជួបមុខមិត្តភក្តិ។ ខ្ញុំមានអារម្មណ៍ថាខ្ញុំអត់បានការទាល់តែសោះ»។
តើអ្នកអាចធ្វើអ្វីបើអ្នកមានអារម្មណ៍ធ្លាក់ទឹកចិត្តយ៉ាងខ្លាំង បន្ទោសខ្លួនឬក៏ខ្មាសគេដោយសារតែអ្នកជំពាក់បំណុល?
ដំណោះស្រាយ៖ ចេះគ្រប់គ្រងថវិកា។b
១. កំណត់គម្រោងថវិកានាពេលបច្ចុប្បន្ន។ អ្នកអាចកត់ទុកចំណូលនិងចំណាយដែលក្រុមគ្រួសាររបស់អ្នកប្រើប្រាស់ក្នុងពីរសប្ដាហ៍ឬដល់មួយខែក៏បាន បើអ្នកគិតថានោះមានប្រយោជន៍។ បន្ថែមពីលើនោះ អ្នកក៏អាចកត់ទុកថ្លៃចំណាយដូចជា ថ្លៃពន្ធដារ ថ្លៃធានារ៉ាប់រង ឬថ្លៃសម្លៀកបំពាក់ជាដើម ដើម្បីដឹងថាក្នុងមួយខែយ៉ាងហោចណាស់ចំណាយអស់ប៉ុន្មាន។
២. បង្កើនប្រាក់ចំណូល។ អ្នកអាចធ្វើការបន្ថែម ទទួលការងារបណ្ដោះអាសន្ន បង្រៀនសិស្សតាមផ្ទះ លក់របស់របរដែលលែងប្រើប្រាស់ ឬក៏ធ្វើការនៅផ្ទះ។ ប្រុងប្រយ័ត្ន៖ សូមកុំឲ្យការងារទៅជាអ្វីដែលសំខាន់ជាងសកម្មភាពផ្សេងៗទាក់ទងនឹងការគោរពប្រណិប័តន៍ព្រះ។
៣. កាត់បន្ថយចំណាយ។ សូមទិញអ្វីដែលត្រូវការប៉ុណ្ណោះ មិនមែនទិញរបស់ទាំងនោះដោយសារតែគេបញ្ចុះតម្លៃទេ។ (សុភាសិត ២១:៥) អេនរីកេដែលបានរៀបរាប់ខាងលើ បានបន្តថា៖«ការមិនប្រញាប់ទិញរបស់ណាមួយ គឺជាការល្អ។ ដោយសារនេះអាចជួយយើងឲ្យមានពេលដើម្បីគិតថានោះជាអ្វីដែលយើងត្រូវការ ឬគ្រាន់តែជាអ្វីដែលចង់បានប៉ុណ្ណោះ»។ នៅខាងក្រោមនេះមានយោបល់ខ្លះៗ។
ការចំណាយនៅក្នុងផ្ទះ៖ បើអាចធ្វើបាន សូមរើទៅផ្ទះតូចជាងដើម្បីកាត់បន្ថយថ្លៃផ្ទះ ហើយកាត់បន្ថយការប្រើប្រាស់ទឹក ភ្លើង និងម៉ាស៊ីនកម្ដៅ។
អាហារ៖ ខ្ចប់អាហារថ្ងៃត្រង់និងអាហារសម្រន់ ជាជាងទៅញ៉ាំអាហារខាងក្រៅជាទៀងទាត់ ហើយអ្នកអាចប្រើកាតទំនិញសន្សំពិន្ទុ និងការបញ្ចុះតម្លៃពិសេស។ ចូអែលម៉ា រស់នៅប្រទេសប្រេស៊ីល បានរៀបរាប់ថា៖«ខ្ញុំច្រើនតែទៅផ្សារតាមផ្លូវមុនពេលផ្សារបិទ ដោយសារពេលនោះគេលក់បង្ហើយបន្លែឬផ្លែឈើក្នុងតម្លៃថោកៗ»។
យានជំនិះ៖ លក់យានជំនិះដែលមិនត្រូវការ ហើយជាជាងទិញថ្មីដើម្បីដូរស៊េរី អ្នកអាចជួសជុលឬថែទាំយានជំនិះដែលអ្នកមានហើយ។ អ្នកក៏អាចជិះរថយន្តក្រុងសាធារណៈឬដើរក៏បាន។
ក្រោយពីអ្នកកាត់បន្ថយការចំណាយហើយ សូមប្រើលុយដែលនៅសល់ឲ្យកើតប្រយោជន៍ច្រើនបំផុត។
៤. ពិនិត្យមើលបំណុល ហើយរកវិធីដោះស្រាយ។ ដំបូង ត្រូវមើលថាតើបំណុលនោះមានការប្រាក់ប៉ុន្មាន? ហើយបើសិនជាបង់មិនទាន់ពេល តើវាអាចឡើងប៉ុន្មានភាគរយ? ក្រោយមក ត្រូវពិនិត្យមើលក្នុងឯកសារនៃបំណុលនោះដែរ ដោយសារមានម្ចាស់បំណុលខ្លះអាចបោកបញ្ឆោតដែរ។ ជាឧទាហរណ៍ នៅសហរដ្ឋអាម៉េរិក បើសិនជាខ្ចីក្នុងរយៈពេលខ្លី តាមពិតការប្រាក់តែ២៤ភាគរយទេ តែគេអាចក្លែងបន្លំឡើងទៅដល់៤០០ភាគរយ។
បន្ទាប់មក ពិនិត្យមើលល័ក្ខខ័ណ្ឌនៃការដោះបំណុល។ បើសិនជាអ្នកត្រូវបង់ការប្រាក់ខ្ពស់បំផុត មានជម្រើសពីរ ទី១ អ្នកអាចបង់បណ្ដើរៗសិន ព្រោះពេលអ្នកឃើញថាវិក្កយបត្រប្រចាំខែមិនសូវច្រើន នោះជំរុញចិត្តអ្នកថាអ្នកអាចសងបំណុលរួចបាន។ ទី២ អ្នកអាចខ្ចីពីកន្លែងដែលមានការប្រាក់ទាបទៅសងនៅកន្លែងដែលមានការប្រាក់ខ្ពស់។
ចុងក្រោយ បើអ្នកកំពុងជាប់បំណុលហើយគ្មានលទ្ធភាពបង់រំលស់តាមកិច្ចព្រមព្រៀងដើមទេ សូមព្យាយាមនិយាយជាមួយម្ចាស់បំណុល សុំប្ដូរគម្រោងបង់រំលស់ថ្មីដែលសមស្របតាមប្រាក់ចំណូលរបស់អ្នក។ អ្នកអាចសុំម្ចាស់បំណុលពន្យារពេល ឬក៏បញ្ចុះការប្រាក់។ ម្ចាស់បំណុលខ្លះប្រហែលជាសុខចិត្តបញ្ចុះការប្រាក់របស់អ្នក បើអ្នកអាចបង់ប្រាក់មួយចំនួនតូចជាមុនសិន។ សូមពន្យល់អំពីស្ថានភាពលុយកាក់របស់អ្នកដោយគួរសម និងស្មោះត្រង់។ (កូឡុស ៤:៦; ហេប្រឺ ១៣:១៨) រួចធ្វើកិច្ចព្រមព្រៀងជាលាយលក្ខណ៍អក្សរ។ បើសំណូមពររបស់អ្នកមិនបានសម្រេចទេ សូមអង្វរសុំពួកគេបើចាំបាច់។—សុភាសិត ៦:១-៥
ពិតណាស់ អ្នកត្រូវមានគំនិតសមហេតុផលពេលចាត់ចែងលុយកាក់។ ទោះជាអ្នកមានគម្រោងចាត់ចែងថវិកាយ៉ាងល្អក៏ដោយ តែនៅតែអាចមានកត្តាដែលអាចកើតឡើងដែលអ្នកមិនអាចដឹងទុកជាមុន ព្រោះលុយ«នឹងដុះស្លាបដូចឥន្ទ្រី រួចហោះឡើងទៅលើមេឃបាត់»។—សុភាសិត ២៣:៤, ៥
សូមសាកធ្វើតាមយោបល់នេះ៖ ពេលអ្នករៀបចំគម្រោងថវិកា សូមពិគ្រោះជាមួយគ្រួសារថាគួរធ្វើយ៉ាងណាដើម្បីអាចកាត់បន្ថយចំណាយហើយបង្កើនចំណូល។ ពេលដែលក្រុមគ្រួសារសហការគ្នា នោះជួយពួកគេឲ្យដោះបំណុលបាន។
ការពិបាកទី៣: បំណុលធ្វើឲ្យយើងសុញគំនិត។
ពេលយើងគិតតែពីរបៀបដោះបំណុល នោះអាចធ្វើឲ្យយើងភ្លេចអ្វីដែលសំខាន់ជាងក្នុងជីវិត។ បុរសម្នាក់ឈ្មោះចូជើសបាននិយាយថា៖«ការពិបាកបំផុតនៅក្នុងជីវិតរបស់ខ្ញុំគឺត្រូវដោះបំណុល ហើយអ្វីដែលគួរតែសំខាន់បំផុតនៅក្នុងជីវិត បែរជាខ្ញុំលែងគិតទៅវិញ»។
ដំណោះស្រាយ៖ ពិតមែនថាលុយគឺសំខាន់ តែមិនមែនសំខាន់បំផុតទេ។
ទោះជាអ្នកខំព្យាយាមយ៉ាងណាក៏ដោយ អ្នកប្រហែលជាត្រូវសងបំណុលអស់ជាច្រើនឆ្នាំ។ ប៉ុន្តែ នៅចន្លោះពេលនោះ តើអ្នកគួរមានទស្សនៈយ៉ាងណាចំពោះស្ថានភាពរបស់អ្នក? ជាជាងគិតអំពីការរកលុយឬគិតអំពីការខ្វះលុយ ជាការល្អឲ្យអ្នកធ្វើតាមយោបល់នៅក្នុងគម្ពីរ ដែលថា៖«យើងនឹងស្កប់ចិត្តហើយ ដោយមានអាហារបរិភោគ និងសម្លៀកបំពាក់»។—ធីម៉ូថេទី១ ៦:៨
ពេលអ្នកស្កប់ចិត្តនឹងកាលៈទេសៈរបស់ខ្លួន នោះជួយអ្នកឲ្យ«ដឹងប្រាកដថាការអ្វីដែលសំខាន់ជាង»។ (ភីលីព ១:១០) «អ្វីដែលសំខាន់ជាង» រួមបញ្ចូលចំណងមិត្តភាពរបស់អ្នកជាមួយនឹងព្រះ និងមិត្តភាពជាមួយក្រុមគ្រួសារ។ ចូជើសដែលបានលើកឡើងខាងដើម បាននិយាយបន្ថែមថា៖«ទោះជាឥឡូវ យើងមិនទាន់សងបំណុលទាំងអស់ក៏ដោយ តែឥឡូវយើងលែងគិតហួសហេតុពេកអំពីបំណុលនោះទៀតហើយ។ ក្រុមគ្រួសារយើងមានសុភមង្គលច្រើនជាង ដោយសារយើងបានចំណាយពេលជាមួយគ្នានិងជាមួយកូនច្រើនជាង ហើយយើងក៏ជាប់រវល់ក្នុងកិច្ចបម្រើព្រះដែរ»។
សូមសាកធ្វើតាមយោបល់នេះ៖ សូមកត់ទុកអ្វីដែលពិតជាមានតម្លៃចំពោះអ្នក ដែលលុយមិនអាចទិញបាន។ បន្ទាប់មក សូមពិនិត្យមើលថាតើអ្នកគួរចំណាយពេលវេលានិងកម្លាំងច្រើនប៉ុនណាទៀត ដើម្បីថែរក្សាអ្វីដែលមានតម្លៃនោះ។
បំណុលធ្វើឲ្យតានតឹងចិត្ត ហើយដើម្បីដោះបំណុលក៏មិនងាយស្រួលដែរ។ តែការខំប្រឹងនោះមិនមែនឥតប្រយោជន៍ទេ។ ប្ដីម្នាក់ឈ្មោះអាន់ជេ នៅប្រទេសប៉ូឡូញ បានសារភាពថា៖«ប្រពន្ធរបស់ខ្ញុំបានធ្វើជាអ្នកធានាឲ្យអ្នករួមការងាររបស់គាត់ខ្ចីលុយមួយចំនួនធំ ហើយអ្នករួមការងារនោះបានបាត់ខ្លួនទាំងមិនទាន់សងលុយគេ។ ដូច្នេះ យើងត្រូវសងជំនួសវិញ នេះធ្វើឲ្យក្រុមគ្រួសារយើងតានតឹងយ៉ាងខ្លាំង»។ ពេលគិតអំពីអ្វីដែលគាត់និងប្រពន្ធរបស់គាត់ប្រឈមមុខ គាត់បាននិយាយថា៖«តាមពិត យើងកាន់តែជិតស្និទ្ធគ្នាជាង មិនមែនដោយសារបំណុលទេ តែដោយសារយើងសហការគ្នាដើម្បីដោះបំណុល»។
a ឈ្មោះខ្លះក្នុងអត្ថបទនេះបានត្រូវប្ដូរ។
b ដើម្បីបានយោបល់ថែមទៀត សូមអានអត្ថបទតភាគជាភាសាអង់គ្លេសដែលមានចំណងជើងថា«របៀបចាយវាយដោយចេះគិត» នៅទស្សនាវដ្ដីភ្ញាក់រឭក! ខែកញ្ញា ឆ្នាំ២០១១ ដែលបានបោះពុម្ពផ្សាយដោយសាក្សីព្រះយេហូវ៉ា។
សូមសួរខ្លួនអ្នកថា . . .
តើខ្ញុំអាចជួយក្រុមគ្រួសារខ្ញុំដោះបំណុលយ៉ាងដូចម្ដេច?
តើតាមរបៀបណាយើងមិនអនុញ្ញាតឲ្យបំណុលមានឥទ្ធិពលឬបំផ្លាញទំនាក់ទំនងក្នុងក្រុមគ្រួសារ?