អត្ថបទអំពីក្របទស្សនាវដ្ដី | តើលោកអ្នកចង់រៀនគម្ពីរឬទេ?
ហេតុអ្វីគួររៀនគម្ពីរ?
តើអ្វីជាគោលបំណងនៃជីវិត?
ហេតុអ្វីមនុស្សរងទុក្ខវេទនានិងស្លាប់?
តើអនាគតរបស់មនុស្សជាតិនឹងទៅជាយ៉ាងណា?
តើព្រះយកចិត្តទុកដាក់នឹងខ្ញុំឬទេ?
តើលោកអ្នកធ្លាប់សួរសំណួរស្រដៀងនេះឬទេ? បើធ្លាប់មែន លោកអ្នកក៏ដូចមនុស្សទូទៅដែរ។ មនុស្សនៅទូទាំងពិភពលោកកំពុងឆ្ងល់អំពីសំណួរសំខាន់ៗដែលទាក់ទងនឹងជីវិត។ តើលោកអ្នកអាចរកចម្លើយចំពោះសំណួរទាំងនោះបានឬទេ?
មនុស្សរាប់លាននាក់នឹងឆ្លើយថា៖ «បាន!»។ ហេតុអ្វី? ពីព្រោះពួកគេបានរកឃើញចម្លើយក្នុងគម្ពីរ ហើយចម្លើយទាំងនោះធ្វើឲ្យពួកគេអស់ចិត្ត។ តើលោកអ្នកចង់ដឹងទេថាគម្ពីរផ្ដល់ចម្លើយអ្វីខ្លះ? បើចង់ដឹង លោកអ្នកអាចទទួលប្រយោជន៍ពីវគ្គសិក្សាគម្ពីរដោយឥតគិតថ្លៃ។ សាក្សីព្រះយេហូវ៉ាស្នើសុំបង្រៀនគម្ពីរដល់លោកអ្នក។a
ពេលមនុស្សឮអំពីការរៀនគម្ពីរ អ្នកខ្លះប្រាប់ថា៖ «ខ្ញុំរវល់ណាស់»។ អ្នកខ្លះទៀតប្រាប់ថា៖ «ការសិក្សាពិបាកពេក» ឬថា«ខ្ញុំមិនហ៊ាននិយាយថានឹងរៀនទេ»។ ប៉ុន្តែ អ្នកខ្លះទៀតមិនបានគិតដូច្នោះទេ។ ពួកគេសប្បាយចិត្តដែលមានឱកាសរៀនអ្វីដែលគម្ពីរបង្រៀន។ សូមពិចារណាពាក្យសម្ដីរបស់បុគ្គលខ្លះដែលបានរៀនគម្ពីរ។
ស្ត្រីម្នាក់ឈ្មោះហ្គៀលរស់នៅប្រទេសអង់គ្លេសបានប្រាប់ថា៖ «ខ្ញុំធ្លាប់ទៅវិហារកាតូលិកនិងប្រូតេស្តង់ ព្រះវិហារសាសនាព្រះពុទ្ធ និងសាសនាឥណ្ឌា។ នៅសកលវិទ្យាល័យ ខ្ញុំបានរៀនមុខវិជ្ជាអំពីជំនឿនិងសាសនា។ ទោះជាយ៉ាងនោះក៏ដោយ ខ្ញុំនៅតែមិនអាចរកចម្លើយចំពោះសំណួរជាច្រើនអំពីព្រះបានឡើយ។ ក្រោយមក សាក្សីព្រះយេហូវ៉ាម្នាក់បានមកលេងផ្ទះខ្ញុំ ហើយគាត់បានបង្ហាញចម្លើយចំពោះសំណួររបស់ខ្ញុំពីគម្ពីរ។ នោះធ្វើឲ្យខ្ញុំកោតស្ងើចណាស់ ដូច្នេះហើយខ្ញុំក៏ព្រមរៀនគម្ពីរទៅ»។
បុរសម្នាក់ឈ្មោះខឺហ្វីរស់នៅប្រទេសបេណាំងប្រាប់ថា៖ «ខ្ញុំមានសំណួរជាច្រើនអំពីជីវិត តែចម្លើយរបស់គ្រូគង្វាលនៅវិហារខ្ញុំ ធ្វើឲ្យខ្ញុំមិនអស់ចិត្តសោះ។ ប៉ុន្តែ សាក្សីព្រះយេហូវ៉ាម្នាក់បានឆ្លើយសំណួររបស់ខ្ញុំដោយប្រើតែគម្ពីរប៉ុណ្ណោះ។ ពេលគាត់បានសួរថាតើខ្ញុំចង់រៀនថែមទៀតឬយ៉ាងណា ខ្ញុំឆ្លើយថាខ្ញុំពេញចិត្តនឹងរៀន»។
បុរសម្នាក់ឈ្មោះហ្សូស៊េរស់នៅប្រទេសប្រេស៊ីលនិយាយថា៖ «ខ្ញុំឆ្ងល់ថាក្រោយមនុស្សស្លាប់ទៅមានអ្វីកើតឡើង។ ខ្ញុំជឿថាមនុស្សស្លាប់អាចធ្វើបាបអ្នកដែលនៅរស់ ប៉ុន្តែ ខ្ញុំចង់ដឹងថាគម្ពីរបង្រៀនយ៉ាងណាអំពីរឿងនោះ។ ដូច្នេះ ខ្ញុំបានចាប់ផ្ដើមរៀនគម្ពីរជាមួយនឹងមិត្តម្នាក់ដែលជាសាក្សីព្រះយេហូវ៉ា»។
ស្ត្រីម្នាក់ឈ្មោះឌេននីហ្សរស់នៅប្រទេសម៉ិកស៊ិករៀបរាប់ថា៖ «ខ្ញុំបានព្យាយាមអានគម្ពីរ តែមិនយល់អត្ថន័យសោះ។ ក្រោយមក សាក្សីព្រះយេហូវ៉ាបានមកជួបខ្ញុំ ហើយពន្យល់យ៉ាងច្បាស់នូវទំនាយខ្លះៗក្នុងគម្ពីរ។ នេះធ្វើឲ្យខ្ញុំចង់រៀនថែមទៀត»។
ស្ត្រីម្នាក់ឈ្មោះអឺនជូរស់នៅប្រទេសនេប៉ាល់ប្រាប់ថា៖ «ខ្ញុំឆ្ងល់ថាតើព្រះពិតជាយកចិត្តទុកដាក់នឹងខ្ញុំឬយ៉ាងណា។ ដូច្នេះ ខ្ញុំបានសម្រេចចិត្តអធិដ្ឋានទៅព្រះ ដែលគម្ពីរចែងថាជាព្រះពិត។ នៅថ្ងៃបន្ទាប់ សាក្សីព្រះយេហូវ៉ាម្នាក់បានគោះទ្វារផ្ទះខ្ញុំ ហើយខ្ញុំក៏យល់ព្រមរៀនគម្ពីរ»។
បទពិសោធន៍របស់ពួកគាត់រំលឹកយើងអំពីប្រសាសន៍របស់លោកយេស៊ូ ដែលថា៖ «អស់អ្នកដែលស្រេកឃ្លានចំពោះការណែនាំពីព្រះ នោះមានសុភមង្គលហើយ!»។ (ម៉ាថាយ ៥:៣) មែនហើយ លក្ខណៈធម្មជាតិរបស់មនុស្ស គឺត្រូវការការណែនាំពីព្រះ។ ហេតុនេះ មានតែព្រះប៉ុណ្ណោះដែលអាចបំពេញការស្រេកឃ្លាននោះ ហើយលោកធ្វើដូច្នេះតាមរយៈគម្ពីរដែលជាបណ្ដាំរបស់លោក។
ដូច្នេះ តើការរៀនគម្ពីររួមបញ្ចូលអ្វីខ្លះ? តើលោកអ្នកអាចទទួលប្រយោជន៍អ្វីខ្លះពីការរៀនគម្ពីរ? អត្ថបទបន្ទាប់នឹងឆ្លើយសំណួរទាំងនេះ។
a យេហូវ៉ាគឺជានាមរបស់ព្រះដែលមានក្នុងគម្ពីរ។