អត្ថបទអំពីក្របទស្សនាវដ្ដី
តើទីបញ្ចប់ជិតមកដល់ឬ?
តើព្រះនឹងអនុញ្ញាតឲ្យមនុស្សបន្តគ្រប់គ្រងលើមនុស្សឯទៀតហើយនាំឲ្យមានការហិនវិនាសមកលើមនុស្សជាតិឬ? មិនមែនទេ។ ដូចដែលយើងបានរៀនហើយថា ព្រះនឹងចាត់វិធានការដើម្បីបំបាត់ចោលទុក្ខវេទនានិងការសង្កត់សង្កិនដែលមានអស់រាប់សតវត្សរ៍មកហើយ។ ព្រះដែលជាអ្នកបង្កើតមនុស្សជាតិនិងផែនដីចង់ឲ្យលោកអ្នកដឹងថាគ្រានោះគឺជិតមកដល់ហើយ។ តើតាមរបៀបណាលោកបានបើកបង្ហាញអំពីព័ត៌មានដ៏សំខាន់នេះ?
សូមពិចារណាអំពីឧទាហរណ៍នេះ: ពេលអ្នកធ្វើដំណើរទៅកន្លែងណាមួយ មុនដំបូងអ្នកប្រហែលជារកមើលព័ត៌មានតាមអ៊ីនធឺណិត មើលផែនទី និងមើលការណែនាំផ្សេងៗដែលអ្នកបានទទួល។ បន្ទាប់មក កាលដែលអ្នកកំពុងធ្វើដំណើរហើយឃើញទីតាំងផ្សេងៗស្របតាមការណែនាំដែលអ្នកបានទទួល អ្នកច្បាស់ជាមានទំនុកចិត្តថាអ្នកកំពុងជិតទៅដល់គោលដៅរបស់អ្នកហើយ។ ស្រដៀងគ្នាដែរ ព្រះបានឲ្យគម្ពីរដែលជាបណ្ដាំរបស់លោកមកយើង ហើយក្នុងគម្ពីរបានរៀបរាប់យ៉ាងច្បាស់អំពីព្រឹត្ដិការណ៍ផ្សេងៗដែលកើតឡើងទូទាំងពិភពលោក។ ពេលដែលយើងឃើញព្រឹត្ដិការណ៍ទាំងនោះ យើងជឿជាក់កាន់តែខ្លាំងថាយើងកំពុងរស់នៅគ្រាដែលទីបញ្ចប់ជិតមកដល់។
គម្ពីរពន្យល់ថាប្រវត្ដិសាស្ត្រមនុស្សជាតិនឹងមកដល់គ្រាដ៏សំខាន់ដែលនាំឲ្យមានទីបញ្ចប់។ គ្រានោះនឹងកើតមានព្រឹត្ដិការណ៍ផ្សេងៗទូទាំងពិភពលោកដែលមិនធ្លាប់មានក្នុងប្រវត្ដិសាស្ត្ររបស់មនុស្សជាតិ។ សូមពិចារណាព្រឹត្ដិការណ៍ខ្លះដែលបានត្រូវរៀបរាប់ក្នុងបណ្ដាំរបស់ព្រះ។
១. ភាពចលាចលទូទាំងពិភពលោក ទំនាយដែលបានត្រូវកត់ទុកក្នុងសៀវភៅម៉ាថាយ ជំពូកទី២៤ បានប្រាប់អំពីព្រឹត្ដិការណ៍ផ្សេងៗនៅផែនដីដែលជាផ្នែកនៃសញ្ញាសម្គាល់យ៉ាងច្បាស់។ នោះគឺជាសញ្ញាសម្គាល់ដែលបញ្ជាក់«គ្រាចុងបញ្ចប់នៃរបៀបរបបពិភពលោក» ហើយនាំឲ្យ«ទីបញ្ចប់នឹងមកដល់»។ (ខ៣, ១៤) ព្រឹត្ដិការណ៍ទាំងនេះរួមមានសង្គ្រាមធំៗ ការអត់ឃ្លាន ការរញ្ជួយដីពីកន្លែងមួយទៅកន្លែងមួយ ការប្រឆាំងច្បាប់មានកាន់តែច្រើនឡើង មនុស្សគ្មានសេចក្ដីស្រឡាញ់តាមធម្មជាតិ ហើយមនុស្សនឹងត្រូវបំភាន់ដោយពួកអ្នកដឹកនាំសាសនា។ (ខ៦-២៦) ពិតមែនថាព្រឹត្ដិការណ៍ទាំងនេះបានកើតឡើងក្នុងមួយកម្រិតអស់ជាច្រើនសតវត្សរ៍មកហើយ តែកាលដែលទីបញ្ចប់ជិតមកដល់ ព្រឹត្ដិការណ៍ទាំងអស់នោះនឹងកើតឡើងនៅពេលដំណាលគ្នាទូទាំងផែនដី។ ម្យ៉ាងទៀត ព្រឹត្ដិការណ៍ទាំងនេះក៏កើតឡើងដំណាលគ្នានឹងការព្រមានបីខាងក្រោមនេះដែរ។
២. ការប្រព្រឹត្តនិងចិត្តគំនិតរបស់មនុស្ស គម្ពីរចែងថា«គ្រាចុងក្រោយបង្អស់»ឬគ្រាដែលទីបញ្ចប់ជិតមកដល់ នោះការប្រព្រឹត្តនិងចិត្តគំនិតរបស់មនុស្សនឹងអាក្រក់កាន់តែខ្លាំងឡើង។ យើងអានបទគម្ពីរទាំងនោះថា៖ «មនុស្សនឹងស្រឡាញ់តែខ្លួនឯង ស្រឡាញ់ប្រាក់ អួតបំប៉ោង ក្រអឺតក្រទម ជាអ្នកជេរប្រមាថ មិនស្ដាប់បង្គាប់ឪពុកម្ដាយ រមិលគុណ មិនស្មោះត្រង់ គ្មានសេចក្ដីស្រឡាញ់តាមធម្មជាតិជាមនុស្ស មិនព្រមស្រុះស្រួលគ្នា ជាអ្នកបង្កាច់បង្ខូច មិនចេះទប់ចិត្ត កាចសាហាវ មិនស្រឡាញ់គុណធម៌ ជាអ្នកក្បត់ ធ្វើតាមទំនើងចិត្ត មានមោទនភាពហួសហេតុពេក ស្រឡាញ់ការសប្បាយជាជាងស្រឡាញ់ព្រះ»។ (ធីម៉ូថេទី២ ៣:១-៤) ទោះបីជាការដែលមនុស្សមិនចេះគោរពមនុស្សឯទៀត ធ្លាប់កើតមានជាយូរមកហើយក្ដី ប៉ុន្តែនៅ«គ្រាចុងក្រោយបង្អស់»ចិត្តគំនិតបែបនោះនឹងមានកាន់តែច្រើនឡើងនៅគ្រប់ទីកន្លែង រហូតដល់យើងអាចនិយាយថា«គ្រាចុងក្រោយបង្អស់នឹងលំបាកណាស់»។ នៅសព្វថ្ងៃនេះ តើលោកអ្នកបានកត់សម្គាល់ថាមនុស្សទូទៅកំពុងមានការប្រព្រឹត្តនិងចិត្តគំនិតបែបនេះឬទេ?
៣. ផែនដីកំពុងត្រូវបង្ខូច គម្ពីរបញ្ជាក់ថាព្រះនឹង«បំផ្លាញពួកអ្នកដែលកំពុងបង្ខូចផែនដី»។ (ការបើកបង្ហាញ ១១:១៨) តើមនុស្សកំពុងបំផ្លាញផែនដីយ៉ាងណា? នៅសម័យបុរាណ គ្រាដែលណូអេរស់នៅ គម្ពីរបានរៀបរាប់ថា៖ «ផែនដី នោះបានខូចអាក្រក់នៅចំពោះព្រះ ក៏មានពេញជាសេចក្ដីកាចសហ័សផង ហើយព្រះទ្រង់ទតមើលផែនដី ឃើញថាខូចអាក្រក់»។ ស្តីអំពីសង្គមមនុស្សអាក្រក់នេះ ព្រះបានមានប្រសាសន៍ថា«អញនឹងបំផ្លាញគេទៅ»។ (លោកុប្បត្តិ ៦:១១-១៣) តើលោកអ្នកបានកត់សម្គាល់ឃើញភ័ស្តុតាងកាន់តែច្រើនដែលបញ្ជាក់ថាផែនដីកំពុងពោរពេញទៅដោយអំពើសាហាវឃោរឃៅឬទេ? បន្ថែមទៅទៀត មនុស្សជាតិបានមកដល់គ្រាមួយដែលមិនធ្លាប់មានក្នុងប្រវត្ដិសាស្ត្រ។ តើនេះមានន័យអ្វី? នៅសព្វថ្ងៃនេះ មនុស្សជាតិមានសមត្ថភាពបំផ្លាញផែនដីនិងជីវិតមនុស្សទាំងឡាយតាមរយៈគ្រឿងសស្ដ្រាវុធផ្សេងៗដែលពួកគេបានបង្កើត។ ម្យ៉ាងទៀត ផែនដីកំពុងត្រូវបំផ្លាញតាមវិធីមួយទៀត ពោលគឺប្រព័ន្ធទ្រទ្រង់ជីវិតនៅផែនដីដូចជា ខ្យល់អុកស៊ីហ៊្សែន ប្រព័ន្ធអេកូឡូស៊ីសម្រាប់សត្វ ព្រៃឈើ និងសមុទ្រជាដើម កំពុងត្រូវបង្ខូចយ៉ាងធ្ងន់ធ្ងរដោយសារការគ្រប់គ្រងមិនល្អរបស់មនុស្ស។
សូមសួរខ្លួនអ្នកថា ‹ជាងមួយសតវត្សរ៍មុននេះ តើមនុស្សជាតិមានសមត្ថភាពបំផ្លាញផែនដីឬទេ?›។ នៅសព្វថ្ងៃនេះ មនុស្សជាតិកំពុងព្យាយាមបង្កើតគ្រឿងសព្វាវុធទំនើបៗដែលអាចបំផ្លាញផែនដីបាន ថែមទាំងពួកគេកំពុងបំផ្លាញបរិស្ថានទៀតផង។ ម្យ៉ាងទៀត មនុស្សកំពុងបង្កើតបច្ចេកទេសថ្មីៗលឿនជាងពួកគេអាចយល់អំពីផលវិបាក ឬដោះស្រាយបញ្ហាដែលមកពីបច្ចេកទេសទាំងនោះ។ ទោះជាយ៉ាងណាក៏ដោយ អនាគតរបស់ផែនដីមិនអាស្រ័យទៅលើមនុស្សទេ។ មុនពេលដែលជីវិតទាំងឡាយនៅផែនដីបានត្រូវបំផ្លាញចោលដោយស្នាដៃរបស់មនុស្ស ព្រះនឹងចាត់វិធានការបំផ្លាញចោលពួកអ្នកដែលបង្ខូចផែនដី។ នេះគឺជាសេចក្ដីសន្យារបស់លោក!
៤. កិច្ចការផ្សព្វផ្សាយទូទាំងពិភពលោក ផ្នែកមួយទៀតដែលជាសញ្ញាសម្គាល់នៃទីបញ្ចប់ បានត្រូវប្រាប់ទុកជាមុនក្នុងគម្ពីរថាកិច្ចការផ្សព្វផ្សាយនឹងរីកចម្រើនដល់កម្រិតដែលមិនធ្លាប់មានពីមុន ពោលគឺ«ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។ (ម៉ាថាយ ២៤:១៤) កិច្ចការផ្សព្វផ្សាយនេះច្បាស់ជាខុសគ្នាពីកិច្ចការផ្សព្វផ្សាយរបស់សាសនាភាគច្រើនដែលបានធ្វើអស់ជាច្រើនសតវត្សរ៍មកហើយ។ ក្នុងអំឡុងគ្រាចុងក្រោយបង្អស់ «ដំណឹងល្អនេះអំពីរាជាណាចក្រ»នឹងត្រូវប្រកាសផ្សាយ។ តើលោកអ្នកស្គាល់សាសនាមួយណាដែលប្រកាសប្រាប់អំពីដំណឹងល្អនេះឬទេ? ទោះជាសាសនាខ្លះហាក់ដូចជាកំពុងផ្សាយដំណឹងដូចនោះក្ដី តើពួកគេកំពុងផ្សាយអំពីដំណឹងល្អនេះដល់«គ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ»ឬទេ?
រាជាណាចក្រព្រះកំពុងត្រូវប្រកាសផ្សាយជារាប់រយភាសានៅទូទាំងពិភពលោក
គេហទំព័រwww.jw.org ផ្ដោតទៅលើ«ដំណឹងល្អនេះអំពីរាជាណាចក្រ»។ ក្នុងគេហទំព័រនេះមានសៀវភៅផ្សេងៗដែលពន្យល់អំពីដំណឹងល្អនោះជាង៧០០ភាសា។ តើលោកអ្នកស្គាល់អង្គការណាផ្សេងទៀតដែលផ្សាយដំណឹងល្អអំពីរាជាណាចក្រព្រះទូទាំងផែនដីដូចនេះឬទេ? មុនមានប្រព័ន្ធអ៊ីនធឺណិត សាក្សីព្រះយេហូវ៉ាបានត្រូវគេស្គាល់ថាជាពួកអ្នកដែលខំព្យាយាមផ្សព្វផ្សាយដំណឹងល្អអំពីរាជាណាចក្រព្រះ។ ចាប់តាំងពីឆ្នាំ១៩៣៩ ក្របទស្សនាវដ្ដីប៉មយាមលេខនីមួយៗតែងតែសរសេរថា«ប្រកាសអំពីរាជាណាចក្ររបស់ព្រះយេហូវ៉ា»។ សៀវភៅមួយដែលរៀបរាប់អំពីសាសនាផ្សេងៗបានប្រាប់ថា កិច្ចការផ្សព្វផ្សាយរបស់សាក្សីព្រះយេហូវ៉ា«គឺបានត្រូវធ្វើឡើងយ៉ាងសកម្មនិងទូទាំងផែនដីដែលស្ទើរតែប្រៀបផ្ទឹមពុំបានឡើយ»។ កិច្ចការផ្សព្វផ្សាយនេះលើកបញ្ជាក់អំពីដំណឹងល្អដែលថាបន្ដិចទៀត«ទីបញ្ចប់នឹងមកដល់»តាមរយៈរាជាណាចក្ររបស់ព្រះ។
គ្រាដ៏សំខាន់ក្នុងប្រវត្ដិសាស្ត្រពិភពលោក
ក្នុងអត្ថបទនេះបានរៀបរាប់អំពីព្រឹត្ដិការណ៍ទាំងបួនដែលជាផ្នែកសញ្ញាសម្គាល់នៃការព្រមានក្នុងគម្ពីរ តើលោកអ្នកបានសម្គាល់ឃើញព្រឹត្ដិការណ៍ទាំងនេះក្នុងជីវិតរបស់លោកអ្នកឬទេ? អស់ជាង១០០ឆ្នាំមកហើយ ទស្សនាវដ្ដីនេះរៀបរាប់អំពីព្រឹត្ដិការណ៍ទូទាំងពិភពលោក ដើម្បីជួយលោកអ្នកឲ្យយល់ច្បាស់ថាយើងកំពុងរស់នៅគ្រាដែលទីបញ្ចប់ជិតមកដល់។ ប៉ុន្តែ អ្នកខ្លះដែលមិនជឿបានរិះគន់ហើយអះអាងថារបាយការណ៍នោះគឺគ្រាន់តែជាគំនិតរបស់មនុស្សប៉ុណ្ណោះ ហើយថាព័ត៌មាននោះប្រហែលជារឿងមិនពិតទេ។ ម្យ៉ាងទៀត ពួកអ្នកមិនជឿទាំងនោះអះអាងថាស្ថានភាពពិភពលោកមិនមែនកាន់តែអាក្រក់ទៅៗទេ តែយើងគ្រាន់តែឮព័ត៌មានច្រើនជាងមុនប៉ុណ្ណោះតាមរយៈបណ្ដាញព័ត៌មានផ្សេងៗ ដែលធ្វើឲ្យមនុស្សគិតថាពិភពលោកកាន់តែអាក្រក់ទៅៗ។ យ៉ាងណាក៏ដោយ នៅសព្វថ្ងៃនេះមានភ័ស្តុតាងកាន់តែច្រើនដែលបញ្ជាក់យ៉ាងច្បាស់ថា យើងកំពុងរស់នៅគ្រាចុងបញ្ចប់ដែលជាសម័យដ៏សំខាន់បំផុតក្នុងប្រវត្ដិសាស្ត្រមនុស្សជាតិ។
អ្នកជំនាញការខ្លះគិតថាយើងកំពុងរស់នៅក្នុងគ្រាដែលមានការផ្លាស់ប្ដូរដ៏ធំ។ ជាឧទាហរណ៍ នៅឆ្នាំ២០១៤ ពួកអ្នកវិទ្យាសាស្ត្រខ្លះបានព្រមានក្រុមប្រឹក្សាសន្ដិសុខសហប្រជាជាតិអំពីព្រឹត្ដិការណ៍ធំៗដែលកំពុងគំរាមកំហែងដល់ជីវិតមនុស្សជាតិ។ ពួកអ្នកវិទ្យាសាស្ត្រទាំងនោះបញ្ជាក់ថា៖ «ការពិនិត្យមើលយ៉ាងដិតដល់អំពីព្រឹត្ដិការណ៍ទាំងនេះ ធ្វើឲ្យយើងសន្និដ្ឋានថាសង្គមមនុស្សនៅតែប្រឈមមុខនឹងគ្រោះថ្នាក់ដែលបណ្ដាលមកពីការរីកចម្រើនខ្លាំងខាងបច្ចេកវិទ្យា»។ មនុស្សជាច្រើនជឿជាក់កាន់តែខ្លាំងថាយើងកំពុងមកដល់គ្រាដ៏សំខាន់មួយក្នុងប្រវត្ដិសាស្ត្រពិភពលោក។ អ្នកបោះពុម្ពទស្សនាវដ្ដីនេះនិងអ្នកអានជាច្រើនជឿទាំងស្រុងថា គ្រាដ៏សំខាន់នេះគឺពិតជាគ្រាចុងក្រោយបង្អស់ ហើយថាទីបញ្ចប់គឺជិតមកដល់ហើយ។ ប៉ុន្តែ ជាជាងភ័យខ្លាចអំពីអនាគត លោកអ្នកអាចមានអំណរវិញ។ ហេតុអ្វីដូច្នេះ? ពីព្រោះលោកអ្នកអាចរួចរស់ជីវិតពីទីបញ្ចប់បាន!